Mail an Pieter J.

Weeromme naor Correspondentie
Weeromme naor Stellingwarfs
Home


Mail an Pieter J.

Daotum: 9 juli 2003.

Beste Pieter, (naeme-geneut (of is't toch naeme-genoot?)),

Zie now wel da'k om een ienvoldig (of is 't ienvooldig) woordelissien (woordenliessien) te springen zitte?
Mien 8.000 woordelissien geft: "simpel" bi'j ienvoldig en "eenvoudig" bi'j ienvooldig.

Eerstens vanzels daank veur je antwoorden op al mien vraogen.
De ambtelike termien (6 weken?) tussen mien vraogen en jow antwoorden zal krek wel of krek niet overschreden wezen.

In de zelde volgodder as jow brief:

1. Stellingwarver woordelisten (via internet).
Jow schrieven dat er verlet is van haandige woordelisten en dan... praot ie allienig nog over drie lopende prejekten:

1a. Stellingwarfs-Nederlaans woordeboek.
Dit is - he'k begrepen - een al haost ofdaon prejekt.
Et laeste (of leste) diel is op een haortien nao vild he'k heurd.
Nog vule slimmer is et vanzels, dat et niet meer te koop is.
Een volgende drok lat bi'jkaans nog wel vuuf(?) of misschien wel tien(?) jaor op zich waachten.

1b. Busewoordeboekien
Veur mi'j makkelik praot vanzels, mar ik hadde liever zien daj'm hier doe-der-tied mit begonnen weren.
Mien expirementen (en ok naovraog hier-en-daor) duden op een grote behoefte.

1c. Nederlaans-Stellingwarfs woordeboek
As Ad. 1a. klaor is dan liekt mi'j disse uutgifte mar een tik an 't oor.;)

Vanzels he'k d'r alle begrip veur dat disse uutgiften "verantwoord" maekt en uutgeven wodden moeten. Mar dat nemt niet weg dat daornaost, mar veural ok vule vlogger een ienvoldige (simpele) oplossing vunnen wodden moet veur een ienvoldig (simpel) perbleem. Ik, en vast wel meer mit mi'j, zitten niet drekt verlegen om zoen zwaor verantwoorde uutgifte mar zuken vlogge even een oplossing veur de perblemen zoas die (ok) in dit briefien bi'j-de-vleet veurkommen. Ik daenke dan ok dat d'r naost die degelike uutgiften plak is veur een "klad-briefien" naost et scharm van de kompjoeter (krek liek as een schoffien leden, mit al die vremde alt-toets-tekens in WP5.1). A'k et dan toch over de kompjoeter hebbe dan kan'k je (nog niet veerder vertellen heur!) ok nog weten laoten dat mien woordeschat van zoen 8.000 stellingwarver woorden inkotten beschikber kommen kan as spellingskontrole veur MS-Word. Uut mi'jzels he'k kontakt zocht mit een peer meensken die mi'j (hiel enthousiast) elektrische tekst anleveren, die deur mi'j dan ommezet wodden naor die spellingskontrole. En et overnemen van de kollums van Johan en Karst in de LC leveren mi'j weeks gemiddeld ongeveer vuuftig (van de gem. 350) ni'je woorden op. Ik hadde vanzels vule liever de kant-en-klaore lemma's uut et echte woordeboek (dat was trouwes eins ok mien vraoge!) as basis neumen zonder die uutgifte in de weg te staon of op ere wieze geweld an te doen. Jammer... mar ik respektere jim prioriteiten en uutzette lijnen venzels.

Nog wel een punt(ien) m.b.t. jim veurneumen kontakt mit Van Dale Lexicografie over et anbieden op (beveiligde) cd-rom. Dit liekt mi'j tied- en geld vergriemeri'je. Veureerst is et doel van schrieveri'je meerstentieds et pebliekelik maeken (uutgeven) van die schrieveri'je. A'j de eigen uutgiften now al te ingewikkeld maeken zal d'r niet al te vule belangstelling veur wezen, liekt mi'j. WordPerfect is ooit ok groot wodden deur et grote tal van illegaole kopieën mien ik. Et kraeken van een beveiligd bestaand, daor kuj' meerstal gewoon op waachten. Een veurbield: een schoft leden he'k zels (enkel en alliend veur de oarighied) nog es wat bezocht mit een slim beveiligde gegevensbaank (route-planner) bi'j een software-pakket van meer as dattig-duzend gulden. Roem een halve dag ha'k neudig; en d'r bin nog vule slimmere jonges dan mi'j op dit gebied! Dus om daor now al te vule tied (en geld) in te stikken, liekt mi'j een doodgeboren kientien. Bovendien is deur de subsiediegevers et grootste pat toch al betaeld mag ik hopen?

Jim webstee
Et is mi'j niet bekend wat jim uutgeven an jim webstee, mar wa'k d'r van zien hebbe, dan is elke cent te vule. Niet da'k mi'jzels verkopen wil, mar wi'j bouwen en onderholen zels ok (vanuut oonze professie) websteegies veur hiel weinig geld, en wi'j doen ok nog wel es wat an sponsering. Jow schrieven in je brief dat d'r op jim webstee (www.stellingwarfs.nl) o.e. een list mit honderd "mooiste woorden" te vienen is. Wanneer hej' daor zels veur et laest keken? Ik hebbe een schoft leden en vandaege ok nog even keken, mar kon ze niet vienen. Slimmer nog, d'r staot eins hielendal niks (nul-komma-nul) op die webstee (een plaetien van et gebouw (instituut) en de tekst "In anbouw". Neem dan liever een veurbeeld an bevobbeld AnnaBee en ok nog een hieleboel aand'ren!

2. Puzels en spelledeuze
Jammer daj' hier je eigen - mar ok mien - enthousiasme wat liggen laoten. Krek as bi'j et veurige onderwarp laoj' me d'r een betien mit zitten. Liever was ik in 't overleg betrokken west om dan misschien wel wat hulpe an te bieden m.n. ok veur wat de centeraosie anbelangt. Intussen he'k zels mar offerte anvraogd bi'j een drokkeri'je en ik moet je zeggen, et veul mi'j niet tegen. Ik wol d'r dan ok mar in eigen beheer mit uutaende.
Ik hebbe intussen priesopgaove vraogd en kregen, om kaorties (3,5 x 5 cm. 120 gr.) op ofroep in een oplaoge van 100 setties te maeken mit an de iene kaante een stellingwarfs woord en an de ere kaante de vertaeling in et hollaans. Dit gaot om een stok of 500 uutzochte woorden die zich 'mooi' lienen veur een vertaeling, bev. "aemelen" vs. "zaniken", "aansen" vs. "straks", enz. enz. Disse kaorties zollen dan as basis bruukt wodden kunnen om -tegere mit wat speulmenieren- weg te geven. Et in boek(ien)vorm of op internet publiceren van disse en ok de aandere woorden die ik al bi'jmekeer hebbe -en die zich nog daegeliks vermeerderen-, is in mien beleving een fluitien van een cent waorbi'j de kosten niet vule hoger hoeven te wodden dan diezelde cent.

De uutvoering van disse plannegies zullen in mien eigen opzet gien wetenschoppelike verantwoording kennen en zullen de naeme van de Schrieversronte niet uutdregen kunnen of ... hej'm mit een hiel zunige mitwarking (d'r is vaaste wel iene te vienen die 't d'r in de eigen aovendtied even bi'jdoen wil) toch zin om mit te doen?

3. Anzet tot manuscript
Mien anzet tot dit manuscript, daor is deur jow wat te zwaor an tild. Veur mi'jzels ha'k al es een peer expirementies daon om in verschillende leeftiedsgroepen te (kunnen) schrieven. Zo he'k veur de allerkleinsten (ong. 5 à 6 jaor) in de weer west mit twie voegelties, een rooie katte en een kruulorenstruke. Veur de wat oolderen (ong. 8 à 9 jaor) he'k es wat maekt mit twie jonges, een geit veur een bolderkarre en een vri'je woensdagmiddag. En zo docht ik de sexpirementen te slieten an jongen van een jaor of dattien, veertien, vuuftien. Ik had et jow eins allienig mar mitgeven om et zels es deur te kieken en dan jow persoonlike miening te heuren of ik op de goeie weg bin of niet. Jow schrieven mi'j daor o.e. over dat et veur wat de zeden in odder wezen moet. Now, bi'j mien weten komt d'r gien woord in veur (en bin'k ok niet van doel) waj' niet alle daegen op de radio en tillevisie heuren of zien kunnen. En wat is d'r eins op tegen, dat et de lachlust opwekt? As lezer et pad van de stellingwarfse tael wat lacherig opkommen, liekt mi'j al gauw beter as dat pad niet op te kommen. Veur hoogdraevende literaire warken, bin'k niet in de wiege legd en ok al zo'k et kunnen, ik zol et niet iens willen. Lezeri'je mag/moet -veur mi'j pesoonlik- makkelik toegaankelik wezen. Aand're schrievers schrieven mar veur een aander pebliek.

Mit de alderbeste groeten van disse kaante,
Piet Bult, 25-10-2004

P.S.
Et maeken laoten van die kaorties zet inkotten uutaende bin'k bange. Aj'm toch nog op ien of ere wieze mitdoen willen - al is et allienig mar in et mitdrokken van de naeme -, dan wo'k dat wel vlogge even weten.

Nog een P.S.
Ik hebbe intussen ok es wat anprutst mit et vertaelen van hollaans naor stellingwarfs en eersomme. Behalven de woordvolgodder "Ik had iets willen doen" vs. "Ik had wat doen willen" enz. komt d'r toch ok best redelik leesbere tekst uut roegelen.