Ni’jberkoop, 10 november 2003.

Betreft: Meugelike tip veur een toekem keer.


L.S.,
D’r is zovaeke de vraoge an de odder (ok in de laeste jaorvergeerdering nog weer): hoe berieken we de jeugd?
Wat now toch een “miste kaans”! Ik doele hier op de uutgifte van een groot tal kienderboeken “Pimmegien is groot”, an kiender van legere schoelen.

Wat was ’t niet mooi west om daor ok drekt een vorm van een wedstried an te verbienen. Een soorte van opstel- of veurdreegwedstried (naor anleidinge van dat boek vanzels) mit een bescheiden priesien (ha’k graeg spoonseren wild). Dat hadde in ’t klein kund mar et har ok slim uutvergroot wodden kund mit veurrondes bi’j elke schoele en dan een grote finale bi’j Dragt in Wolvege en/of De Zon in Oosterwoolde.

Daormit hawwe dan in elk geval berikt dat et boekien zonder-mis lezen wodden zol, en vri’j-wis ok nog deur meer kiender. Nog een positieve bi’jkomstighied zol west hebben dat de kiender dan ok langer mit de Stellingwarfse tael in de weer wezen zollen. Now is’t boek in et beste geval lezen en in de kaaste zet. In mien gedaachten haj’ d’r wel haost een halfjaor wat meer aktie(s) omhenne maekt hebben kund.

Zunde! Hatstikke jammer! D’r is now -naor mien gedaachten- lang niet uuthaeld wat d’r wellicht inzeten har (kosten/baoten). Of ..... zit ik d’r hielendal naost?

Mit vrundelike groet,
Piet Bult