In memoriam: Jan Veldhuizen

Et is haost een jaor leden da’k Jan veur et eerst tegenkwam, op de elektronische snelweg mit zien (aemel)berichien:

Goeie,
Ik leze sund een klein half jaor eins daegeliks jow dagboekien. Ik leze daorin dus ok daj' de Biebel in et Stellingwarfs an et vertaelen binnen. Op zich een nobel en loffelik (dit woord kon 'k niet vienen in de dikke Bloemhoff, dus et zal wel niet goed wezen) streven, mar wat is et nut er van? De Stellingwarven bin veur zover ik weet veur et grootste diel onkarkelik, dus een grote verkoop zit er daenk ik niet in. De meerste meensken zullen die Biebel daenk ik kopen as curiositeit. (Dit woord staot ok niet in et woordeboek, mar ik weet d'r gien Stellingwarfs woord veur). Of is dit een poging om de Stellingwarvers te bekeren? In dat geval weens ik je een protte starkte. Ie kun nooit weten wat er gebeurt. Daenk mar an Bonifacius.
Ik hoop et nog es van je te heuren.
Groeten,
Jan Veldhuizen, Apeldoorn

Binnen et ure he’k him doe bescheid daon:

Sund die tied hawwe haost alle daegen wel aemelkontakt. Op ien of aandere meniere klikte gewoon tussen oons, we laggen mekeer wel. Een peer maond leden troffen we mekeer nog bi’j Henk en Freerkje in Noordwoolde en bi’j et uutkommen van Jan zien ni’jste bundel mit beestachtige riempies, stuurde hi’j ok zoe’n boekien ‘Beestebende’ naor heur toe. Daor zat ok een briefien bi’j:

Gaot alles goed mit jim? Allebeide nog een betien gezond? Hier gaot et wel aorig. Kon een stok beter, mar ok een stok slechter. We hobbelen mar wat deur. Ik las in de kraante dat et Bertus Lacherfestival weer een groot succes was. Hatstikke mooi veur jim. Gewoon volholen. Et is wel niet mien meziek, mar daoromme vien ‘k et wel geweldig dat jim zoe’n succes hebben. Iederiene moet doen wat hi’jzels mooi en prettig vint.

Piet Bult is opholen mit zien dagboek. Vien ‘k wel jammer. Hi’j kwam altied knap scharp uut de hoeke. Ik moch dat wel. Ik mis et eins een betien.

Ik hadde dit briefien eerst mit de haand schreven, mar doe kon ‘k zels niet meer lezen wat d’r ston. Ik had wel dokter wodden kund.

Ik hope dawwe mekeer binnenkot weer es zien…

Groeten, Jan.

Van ’t zoemer bin Jan en Coby ok es, bi’j oons op ‘e koffie kommen (zo zol Jan dat zegd hebben) en nog mar krek een peer weken leden (4/11) bin ‘k op deurreize van Frieslaand naor Braobaant, in Apeldoorn nog even anwipt om een paantien koffie. Ze zatten drok in een timmerderi’je…

Al een hiel schoft dee Jan ok slim fanatiek mit, om oonze biebelvertaeling te verbeteren. Hi’j zat roem in de vri’je tied en hadde d’r alderdeegst nog een spiksplinterni’je Biebel (NBV) veur antuugd, kon ‘k wel vernemen. Mit et vingertien en een rood potlood het hi’j d’r nog hiel wat fouten uuthaeld en verbeteringsveurstellen andreugen. Zien laeste aemel van zien laeste dag was in hiele grote rooie koeieletters en gong zo:

Piet HELP. Crisis.
Mien vrouw het mien kaemer tot renovaosiegebied verklaord. Zeg mar tot raampgebied. Wat moe'k doen??? Vrouwluden!!!!
Kiek, die van jow stuur ie op ‘t peerd de bos in, mar bi'j mi'j gaot dat niet. Ze het gien peerd. Ik zol haost zeggen, om bi’j Paulus te blieven, bidde veur mi'j.
Groeten,
Jan (wanhopig).

Beste meensken, vrouwluden en manluden, is et ‘stom toeval’ dawwe op de rouwkaorte diezelde Paulus opiens weer tegenkommen in zien brief vanuut de gevangenis an de gemiente in Filippi: Filippenzen 4:6 uut de Stellingwarver Biebel (in opbouw): “Wees over niks bezorgd, mar vraoge God waj’m neudig hebben en daank him, in al jim gebeden.”

Wi’j, van de stichting Stellingwerfs Eigen daanken Jan veur zien wark wat hi’j veur ’t Stellingwarfs en veur oons daon het. Zien daegelikse aemels mit zien kotswielige humor mis ik now al. Zien hulpe bi’j et vertaelen van de Biebel zuwwe vanzels ok slim missen.

November 2005