Bericht aan Pieter Jonker
Weeromme naor Correspondentie
Weeromme naor Stellingwarfs
Home
Bericht aan Pieter Jonker (dir. SSR)
Et wondertien van Pieter Jonker
Pieter Jonker vint in de LC van 26/1 dat hi'j et goed daon het. Zovule
zelsoverschatting gaot mi'j eins toch krek even te veer. Hoewel
destieds een daelegaonde lijn inzet was weren d'r rond 1970 neffens
mi'j aorig meer kroempraoters as vandaege-de-dag; niet aanders as mit
bi'jglieks et Fries. Doe heurd'ie op et schoeleplein haost niks
aanders, op 't heden is 't een grote uutzundering. Wat Jonker veural
daon het is et Stellingwarfs goed votstoppen en in een kluis leggen
waor mar een peer meensken een sleutel van hebben. Et anvieteren van et
gebruuk wodt - vanwegens subsidiegevers? - dan wel mit de mond beleden
mar blift beheind binnen een hiel klein kreengien.
Jonker stelt dat hi'j destieds bi'j de RONO an 'e kaante zet is omreden
heur dat te isoleerd wezen zol. Daor kan 'k mi'j wel wat bi'j
veurstellen want Jonker stelde himzels tot et laeste an toe de hieltied
slim isoleerd op. Wel de hieltied tegen de media en aanderen anschoppen
omreden ze niet op zien meniere en op zien kondiesies mitdoen
wollen mar niet zo slim wezen om wegen te zuken waordeur d'r wel meer
meugelik west hadde. Nee, Jonker wol veural gien indringers en meensken
mit aandere idenen in zien keukentien.
Et eigen gebouw en et eigen traktement weren van groter belang as o.e.
de zorg om d'r meer jongvolk te betrekken en es wat aanders te
bedaenken as alliend mar meer boeken uutgeven van zien grote en
persoonlike vrund Johan Veenstra die dan ok krek zoe'n beparkt
gezichtsvermogen het. "Aanders maek ie haost onderscheid in meensken. En dat kan echt niet meer vandaege-de-dag." zegt Jonker. Lao'me niet lachen. As d'r iene is die hiel dudelik onderscheid maekt tussen meensken dan is dat Jonker zels!
Omreden Jonker et wel zoveer kregen het dat de gemienten eerst bi'j him
om raod kwammen weren daormit alle aandere initiatieven dan ok drekt
ofsleuten veur de subsidiepotten. Honderddattig boeken en een
dweildeurnat archief in dattig jaor veur al die miljoenen euro's is
neffens mi'j niks om over op te scheppen. Ik bin in ieder geval bliede
dat hi'j niet meer op die stoel zit en hope mar dat et now onder de
ni'je direkteur aorig beter wodt.
Ni'jeberkoop, 30-01-2007
Piet Bult