Uitnodiging van SSR
Weeromme naor Correspondentie
Weeromme naor Stellingwarfs
Home
Uitnodiging van SSR
Beste Sietske,
Daank veur je aemelbericht van 19 feberwaori.
Daj'm d'r over praoten willen, vien ik al hiel wat (eerst nao 5 jaor!).
De veurweerden waoj' in je bericht naor verwiezen, bin mi'j beslist
niet bekend... Van Pieter J. he'k doedestieds alliend - mar wel dudelik
- begrepen dat de sSr niet an dit projekt mitdoen wol en dat hi'j
liever zag da'k mar een gedichtebundeltien maeken zol. Veurweerden
weren doe dan ok niet an de odder en bin ok niet an de odder west. Iene
van mien laeste woorden (wee'k nog wel) dat et gevolg zien iewige
negatieve holing naor mi'j toe, alliend mar verliezers opleveren zol.
Dat mos dan mar "kommen zo 't komt", zee bi'j slot van zaeke.
Naotied he'k him vaeker as een peer keer vraogd om d'r nog es over te
praoten mar dat anbod van mi'j het hi'j altied stark ofsleugen...
Praoten kan gienertied kwaod (hadde neffens mi'j al vule eerder es
moeten), mar die 'negatieve berichten over de Stellingwarver
Schrieversronte en sommige van heur mitwarkers' begriep ik niet
hielemaole of ie moe'n al doelen op mien 'kritische op- en anmarkings',
mar dat is toch hiel wat aanders, neffens mi'j. Daj' mien kritische
woorden (ok mit) an Frank toeschrieven liekt mi'j meer as een
goedmaekertien (exkuus) weerd of ik moet al hiel wat belangrieks mist
hebben...
Bliekber wi'j' nog altied niet geleuven dat et mit et Stellingwarfs al
laeter is as twie menuten veur twaelven mar ie willen et idee van zoe'n
gesprek eerst veurleggen an je bestuur op 19 meert. Dan hej' nog een
weke neudig om de uutkomst daorvan op pepier te zetten, neem ik zomar
an. Dat is vanzels je goed recht mar al mit al biwwe dan een week of
vuuf zesse veerder (nao oons eerste berichien van 13/2) om mekeer
alliend nog mar een idee over een gesprek bekend te maeken (lees: awwe
eins wel praoten willen). Ik vien zoks typisch praot veur
baentiesmannen. Daj' as direkteur eerst een/ieder gesprek an je bestuur
veurleggen moeten/willen, komt mi'j trouwens ok meer as vremd veur,
veur de uutwarking van zoe'n ienvooldig idee wao'we et now nog mar over
hebben. Persoonlik kan 'k vaeks wel wat vlogger en zie d'r op disse
meniere dan ok hielemaole gien brood in en et warkt bi'j mi'j eerder as
de bekende rooie lappe op de bekende bolle. Om et van disse kaante toch
niet hielemaole en al op veurhaand mislokken te laoten gaot mi'j (nao
jow ongetwiefeld goedbedoelde veurstel) liekwels krek even te veer en
stelle dan ok veur (kuj' drekt mitnemen naor je bestuur) da'k mi'j
vertegenwoordigen laot. Ik kan mien tied wel beter bruken...
Mit een vrundelike groet,
Piet Bult
21-02-2008