Reactie op brief van SSR

Weeromme naor Correspondentie
Weeromme naor Stellingwarfs
Home


Reactie op brief van SSR

Beste heer Dijkstra,
Et is weenst dat d'r eindelik es fesoenlik weerwoord op een briefien van mi'j/oons komt. Daorveur daank. Veerder gao 'k now even in de ik-vorm omreden jow mi'j in jow brief ok et meerste rechtoe rechtan anspreken.

In jow brief van 31 oktober lees ik onwil van jim kaante, of op zien minst een niet zo neudig hoeven, om saemen te warken. An veerdergaonde besprekings stellen jow op veurhaand en ienziedig de veurweerde dat ik mien doen-en-laoten eerst (drasties) anpassen moet an jow weensken, normen en weerden (oprechte wil hebben en respekt en erkenning tonen).

Krek as in de jaorenlange poletiek overheersende kleur van oonze beide Stellingwarfse gemienten as in et jaorenlange beleid van de Schrieversronte, komt me dit regente verschiensel slim bekend veur. Ik geleuf toch dat ik wat liberaoler van aord binne, hebbe alderdeegst wat een hekel an dat 'regenteske'. Et is lichtkaans ok daoromme dat jow et niet warderen kunnen dat ik mien onvrede over alderhaande zaeken niet altied alliend mar binnenskaemers mar ok wel in et eupebaor an de orde stelle. Ik kan beslist niet begriepen wat daor - binnen mien greenzen - verkeerd an is, mar lao'we nog es bi'j et begin beginnen.

Doe ik nog donateur van de sSr was, he'k mi'j daor altied honderd percent veur inzet. Doe 'k wel meer wol as die honderd percent is et op ien of aandere meniere verkeerd gaon. Neffens de direkteur van de sSr van doe (PJ) wo'k te vule en te hadde. Op mien duzend-en-iene idenen he'k gienertied een betien een positief bescheid kregen. Meerstal kreeg ik hielemaole gien bescheid en a'k bescheid kreeg dan was et altied negatief en herkende ik ok die regenteske holing van de man. Op et laest kreeg ik alderdeegst te heuren: "Ik wil niet meer mit jow praoten." Tsja, en aj' niet meer mit mekeer praoten (willen) dan gaot d'r vaeks meer verkeerd. Meer as driekeer he'k van mien kaante toch perbeerd om weer in gesprek te kommen. Et is mi'j niet lokt...

Doe de sSr in jannewaori 2007 een ni'je direkteur (SB) anstelde docht ik d'r goed an te doen om heur te fielseteren mit heur promosie en sprak de weens uut dat onze kontakten mit heur mar beter verlopen mochten as mit de veurige direkteur. Bliekber wol de direkteur et beleid - naor oons toe - mar laoten zo et was want ik hebbe d'r niks weer op heurd. Ok de jaoren daornao is d'r niks veraanderd en kreeg ik gienertied bescheid op aemelties of briefies mit opmarkings of veurstellegies. Jow schrieven dat jow wat in mi'j teleursteld binnen mar wat daenken jow dat ik deur de jaoren henne al teleursteld was!

Niet as dreiging (zo vulen jow dat bliekber), mar poer as feitelike mitdieling hebbe ik krek as meerstal mien bedoelings altied roem in 't veurend eupebaor maekt. Een veurbeeld geft Johan V. in zien i-dagboekien op 23 december 2003. In dit geval dan ok alle ruumte en tied veur beleidsmaekers om de zaeke bi'jenneer te holen. Bliekber was de sSr doe al onwillig want d'r is gien reaktie kommen. Mit de opmarking van de direkteur (PJ) over mien veurstel om de Biebel veur de sSr in et Stellingwarfs te vertaelen kree'k te heuren "Wat hej' daor now an. Maek ie mar een gedichtebundeltien, dat kuj' ok wel." Ik was doe diepe in mien ziel raekt...

Zo is et in mien ogen en in kot bestek kommen. Mit een ni'je veurzitter he'k hiel even de hope had dat d'r veur een dadde keer een meugelikhied was om de draod weer positief op te pakken. En nog de hieltied mienen jów de veurweerden bepaolen te kunnen veur saemenwaring. Driekeer jammer. Jammer, ik bin slimmer as een ezel; ik hebbe mi'j now driekeer de neuze stoten an dezelde stien. Jammer, jow hebben de verkeerde veur, iene die in van de meester eerst mar es een halfure in de hoeke staon moet. Jammer veur et Stellingwarfs. Dat d'r de laeste peer jaor meer aktieve meensken op vergeliekbere meniere as ik bi'j de sSr (soms letterlik) buten de deure zet binnen, moet je toch an te daenken zetten, liekt mi'j.

Mit een vrundelike groet en nog altied in veur een goed, eerlik en eupen gesprek - et liefste in et eupenbaor -,
Veur de Stichting Stellingwerfs Eigen
Piet Bult
2008-11-02


PS
Waor was de sSr tiedens de uutrieking van de Biebel in et Grunnings?
Waor was de sSr bi'j et streektaelsymposium in et Huis van de Groninger Cultuur?
Waor was de sSr doe d'r op meer as tien plakken in et Stellingwarfs veurlezen wodde?