Mail van SSE aan SSR
Weeromme naor Correspondentie
Weeromme naor Stellingwarfs
Home
Mail van SSE aan SSR over de relatie
Acht bestuur,
Mit daank, respekt en wardering kregen we jim brief van 6 jannewaori.
Veurof
Uut et biebelboek Wieshied 6:16 Wieshied is op zuuk naor meensken die heur weerd binnen.
Wi'j bin opni'j slim teleursteld. Bliekber stellen jim bepaolde
persoonlike gevulens boven oons gezaemelike doel, de Stellingwarfse
tael- en kultuurbevoddering.
Jim konklusie en veural ok de gevolgen daorvan dat 'de basis veur een
vorm van saemenwarking ontbrekt' begriepen we dan ok niet goed. Et
ienigste wawwe hieromtrent daenken te weten is daj'm as veurweerde
steld hebben dat wi'j eerst mar es meer respekt en wardering veur jim
doen en laoten tonen moeten zollen. Mar hoe kommen jim d'r bi'j dawwe
dat niet (daon) hebben? Veurbeelden hiervan wiwwe graeg even
rechtzetten, en veerder...
Ja, et is waor dawwe geregeld wat kritiek hebben en dat niet onder
stoelen of baanken stikken. Waoromme zowwe ok? Oonze kritiek gaot
altied nog in nette bewoordings op gewone toonhoogte en onder et motto:
kritiek hebben is betrokkenhied tonen. Ja-knikkers bin d'r neffens oons
al genoeg in de Stellingwarven. Mar goed, jim hebben daor bliekber een
aandere miening over...
In oons aldereerste gesprek - in Ni'jberkoop onder et genot van een
paantien koffie mit wat lekkers d'r bi'j - zee veurzitter Dijkstra dat
hi'j gien oolde koenen uut de sloot haelen wol mar veuruutkieken wol
naor de toekomst. Hier zitten we dudelik op iene lijn, alliend... uut
jim reaktie bliekt opni'j dat jim alliend mar naor oolde koenen kieken
en oons daor bliekber op beoordielen. Wi'j vienen dat een vremde gang
van zaeken...
Jim stellen in jim brief veerder dat oonze suggestie onterechte wezen
zol dat jim direkteur (vrouw Bloemhoff) 'netuurlik altied' op oonze
aemelties reageren zol. Dit is grote onzin vanzels. Zeker al een keer
of vieve het ze dat niet daon en dat hewwe ok kenber maekt. Zoks liekt
daoromme in oonze ogen ok inderdaod op doelbewust beleid. Niet ienkeer
hebben jim of zi'jzels dat ok mar even rechtzet. Wi'j vienen dat een
vremde gang van zaeken...
Wi'j zollen ni'je gezichtspunten andregen moeten om bi'j jim een aander
standpunt te rechtveerdigen? Now brekt oons de klompe! Wi'j hebben toch
ok gien gezichtspunten andreugen waor jim jim staandpunten dislange op
baseerd hebben?
Bi'j jim opmarking dat oonze aemel van 3 november - neffens jim
direkteur - niet binnenkommen west hebben zol, zuj'm de eventuele fout
toch warkelik bi'j jimzels zuken moeten. De oold-direkteur het oons
meer as ienkeer zegd dat jim et 'spul' wel gauw es in de hobbel hebben
en zels digibeten binnen. Bi'j oons ligt dat krek aandersomme, we
kennen praktisch gien storing en meugen oonszels al herwerts jaoren
specialist op dit gebied numen. Alliend dat al zol een aorige anvulling
in oons saemenwarkingsverbaand wezen kunnen, die jim dan toch bliekber
liever ofwiezen. Wi'j vienen dat een vremde gang van zaeken...
Jim leggen in jim brief de 'fout' toch mar weer bi'j oons daele mit de
opmarking dat wi'j wel even infermeren kund hadden as oons e-bericht
wel binnenkommen was. (Dat vienen wi'j trouwens een typisch regenteske
holing.) Faktureren, baank- en belastingzaeken regelen gaot
vandaege-de-dag allemaole middels e-berichten of aanderszins on-line
over internet. Om dan ok overal nog es aachteran te bellen liekt oons
in et daegelikse e-postverkeer liekwels niet gebrukelik, destemeer as
dat al vaeker zo gaon is. Jim bellen d'r now toch ok niet aachteran as
jim brief wel ankommen is?
Nog even een opmarking - los van jim brief mar - die we belangriek
vienen om hier even te mellen. Veur de grote buterwereld komt et zo
langzemer haand bliekber allemaole wel gauw es wat verwarrend over. Zo
komt et hoe langer hoe vaeker veur dat wi'j post en e-post kriegen die
niet veur oons - alderdeegst niet veur oonze ogen! - mar veur de
Schrieversronte bedoeld is (bi'jglieks over subsidie-anvraogen of Kluun
in de boekekaaste van ...). An now toe biwwe daor vanzels altied hiel
diskreet mit omme gaon. Omreden jim dit mit jim holing mit in de haand
warken beraoden we oons nog, hoe hier in de toekomst mit omme te gaon.
Om nog even kot te memoreren:
- jim zien gien basis veur een saemenwarking
- jim stellen daormit persoonlike gevulens boven et bovenliggende doel
- jim stellen dat wi'j de basis veur saemenwarking andregen moeten. Mar
ja, wi'j lopen d'r niet graeg altied mit te koop dat d'r - zegge, de
laeste vuuf jaor - gien aander as wi'j te vienen is die meer veur de
Stellingwarfse zaeke in 't spier west en uut de wege zet het as wi'j,
zonder d'r zels ok mar een dubbeltien wiezer van te wodden deur o.e.:
- de biebelvertaeling,
- verschillende lezings en workshops,
- et maondeliks maeken van 'An de liende',
- et vertaelen van stokkies veur brulloften en grafredes of artikels veur tiedschriften,
- stokken Stellingwarfse tekst plaetst kregen op bi'jglieks grote
bodden bi'j de Ofsluutdiek, in een Fries boek over et Noodrecht in de
middeliewen, in een boek over de verdronken dörpen in Zeelaand,
- bi'jdregen an de uutbouw van de Stellingwarfse Wikipedie en de Lowlands-list,
- mitdoen in et Friese 'Literaire Sirkwy',
- een protte kontakten legd hebben en saemwarkingsverbanen angaon
binnen mit alderhaande Nedersaksische streektaelorgenisaosies van
Grunningen en via aandere nationaole en internationaole streektaelklubs
tot an de Benelux Interparliamentary Consultative Counsel an toe,
- en gao zo mar deur...
Jim - mar meer nog et Stellingwarfs - lopen daormit een protte
expertise in et gebruuk van mederne media mis en missen ok oonze
enthousiasme en bewezen daodkracht die deur oons inbrocht wodden kund
hadde...
Wi'j willen van now of dan ok gien tied en energie meer in disse onwil
stikken en zullen jim now dan mar niet weer lastigvalen mit vraogen.
Nee, wi'j smieten gien deuren dichte mar we gaon ok niet ieder vorrels
jaor op 'e kni'jen.
Mit een vrundelike groet,
Stichting Stellingwerfs Eigen
Piet Bult (sikt.)
cc:
Oost
West
Perveensie
Alle frakties in Oost en West