Mail an dr. Henk Bloemhoff

Weeromme naor Correspondeensie
Weeromme naor Stellingwarfs
Home


Mail an dr. Henk Bloemhoff  (17-09-2020)

Beste Henk Bloemhoff.
Et is en blift eins hatstikke jammer dat jow en de Stellingwarver Schrieversronte de saemenwarking mit oons en oonze stichting Stellingwerfs Eigen, doedestieds (2002 – 2012) altied en stille zwiegend uut de weg gaon en bleven binnen.

Kotleden kree'k een artikel uut de kraante toestuurd mit jow uutvienings over de 'Stellinga' (FD 27/8). Ik weet niet krek waj' now in je boekwark beschreven hebben mar omdebi'j 2007/2008 heb ik, tegere mit een Nedersaksische kroniekschriever uut et Duutse Leeg-Saksen, een protte van dit ni'js al es op pepier zet. Et meerste hawwe doe uutvunnen in de biebeltheek van Hamburg. Op 't heden staot d'r ok al een protte over op et internet.

Ik bin d'r zo goed as wisse van dat de deur jow nuumde Saksische Stellinga gien direkt verbaand hebben mit oonze Stellingwarven van vandaege de dag. In disse kontekst bin de 'Stellinga' een -tiedelijk- 'verbond' (stellingabunde), van Duutse komof. Waor oonze Stellingwarven naor nummd binnen, bin, neffens jow eigen zeggen, bin rechters (stellingen) die rechtspreuken bi'j konflikten. D'r bin dan ok meer honties die as Fikkie hieten en de Stellinga die jow now benumen bin een stel 'frilingi' (van oorsprong vri'jen) en 'lazzi' (vri'jlaoten slaven) die rond 841-843 in dat Stellingaverbond optrokken naor et Karolingische riek om daor alderhaande vaeks godsdienstige stried (domini vs. domini) te leveren.

Iene van de bekendste slaegen was de slag bi'j et (now) Fraanse Fontenoy-en-Puisaye in 841. Lees de 'Serments de Strasbourg' (Eed van Straatsburg) d'r nog mar es op nao. Aj' goed lezen dan koj', deur et 'Traité de Verdun' (Verdrag van Verdun), de kenneksie mit Nederlaand daor ok al in tegen (Lotharius I, AD 843). As de Letiense tekst je te vule is, kuj' die 'Illustribus Ecclesiae Scriptoribus' en aandere warken van de bekende Liwadder Suffridus Petri (Sjoerd Pietersz) ok wel in et Engels kriegen, he'k begrepen.

Jow Lodewiek de Vrome numen wi'j hiere 'Louis le Pieux', die op 11 april 778 vlakbi'j Poitiers geboren is. Et kan, donkt mi'j, niet mis, dat d'r in Poitiers bi'j de historici daore wel et ien en 't aander over die Louis bekend is. Dat zelde gelt vanzels ok veur Karel de Kaele (Fraans: Charles le Chauve) mar daorveur kuj', neffens mi'j, et beste in die zien geboorteplak Frankfurt terechte.

Tegenwoordig woon ik percies in dat Fraanse rebeid (et noorden van Nouvelle-Aquitanië) tussen Auxerre en Poitiers, en hool mi'j nog wel es wat doende mit toponymie in Frankriek (meerst Gallische herkomst van plaknaemen van zo rond et begin van oonze jaortelling) en, hoewel et mien interesse niet meer zo het, zol et veur mi'j eins gien muuite wezen moeten om es naovraoge te doen en es wat historische feiten over jow Nedersaksische Stellinga op te zuken, in de lekaole biebeltheken. Dat ja, a'k es wat veur je doen kan dan laot me dat mar es weten.

Piet Bult
La Trimouille (F).

PS 1: Jammer. Waoromme mos dit onderzuuk now weer zo neudig in een boek? Publiceer et toch liever op internet. Kost een stok minder en dan kan jan en alleman over de hiele wereld mitdoen om je wiezer maeken...

PS 2: Ik hebbe hierover ok een inzunnen stokkien naor et FD toe stuurd. 'k Zol niet weten as dat plaetst wodt of is...


Opm. pb: Zoals gebruikelijk, niets van Bloemhoff gehoord over mijn aanbod...

© Piet/er Bult