Naor Dagboekien

Veurige weke Ankem weke

Weke 38 (13/9-19/9.2004):
Zundag (19/9):
Doe’k vandemorgen even an ’t blaederen was in mien boekekassien veul d’r een briefien van de Stellingwarver spreukekelinder uut een boek. Aachter op dat briefien (6 en 7 meie 2004) ston ‘Wat over sterrebeelden’ van Joop van Lier. "De Lieuw is een nogal groot sterrebeeld. De mythe van de Lieuw komt uut een saege over de heldendaoden van Hercules, de nationaole held van de oolde Grieken.", schrift Van Lier. Now, daor het de beste man een tikfout maekt docht ik want mien mythologieboekien zegd: "De eerste taak van Heracles was het doden van de Nemeaanse Leeuw, een gigantisch beest dat de heuvels en de straten van de dorpen in de Peloponesus onveilig maakte. De huid van het dier was bestand tegen ijzer, brons en steen. De pijlen van Heracles ketsten af op de huid, zijn zwaard boog in tweeën en zijn houten stok brak in stukken. Daarom worstelde Heracles met het beest totdat het beest stikte. Heracles sloeg de huid van de dode leeuw om zich heen als bescherming in zijn gevecht met de giftige Hydra. Zoals het verhaal vertelt is de Leeuw aan de hemel gezet ter nagedachtenis aan de heldhaftige strijd van Heracles tegen het beest." Dat ja, ik docht Joop het Heracles en Hercules even deurmekeer haeld. Doe’k dit stokkien hier daele schreef scheut et me in ’t benul: Heracles is vanzels gewoon de Griekse naeme veur Hercules. Joop is dus niet de sufferd. Dat bin’k zels (es weer).

Kraantekoppen zetten mi’j vaeke op et verkeerde bien. De LC kan d’r ok wat van! ‘k Weet niet meer waor a’k ‘m weg hebbe mar disse kwam ik laestdaegs ok argens tegen: "Vijftien jaar borstvoeding" en disse: "Politie schoot met pijl en boog gewapende zwerver neer".

Gisteraovend wawwe even op een verjaorsvesite en vong ik een vladde van een gesprekkien van mien buurvrouw op over begreven of kremeren. "Now," zee dat joonk ding van roem in de twintig, "ik wil best kremeerd wodden, mar ik bin zo bange da’k d’r laeter spiet van kriege."

Vanaovend ok nog even naor een ‘house-warming-party’ west mar daor is gien woord Stellingwarfs bi’j.

Zaoterdag (18/9):
7:15 Vandemorgen zuwwe we eerst even een grote pries winnen mit peertien rieden. Dan zien we laeter nog wel even weer…
15:00 ’t Is dus (alweer) krek niks wodden. Ien wit lintien zat d’r an veur 179 en 177 punten. Aandere keer beter.

Kraante (LC) van vandaege:
De Paralympics bin begonnen mar zullen nog niet de helte an andacht kriegen as de speulen veur de niet "disable-den", bin ‘k bange.
Een hiele vette kop over een toeslag (zeg mar mitvaler) veur zes miljoen burgers in dit laand. Ja… naodat ze eerst een vette toeslag (zeg mar tegenvaler) van je ofneumen hebben.
Et invoeren van een punte-riebewies scheelt mar acht dojen jaors. Da’s de muuite niet (sic).
Soldaot ommekommen in Irak mar vrouw en kiender holen d’r wel een lintien an over (sic).
De wedeman van een oppasser in de Liwwadder gevangenis is zien vrouw kwiet mar hoolt d’r wel tienduzend euro an over (sic).
En now bin ‘k nog mar op de veurste ziede…
In Turkije meugen ze (mannegies / vrouwgies) niet naor mekeer lonken mar in Ierlaand moet dat now krek wel (Kattelieken / Protestaanten).
De taelstried in België kan vanzels ok zo mar overslaon Frieslaand liekt mi’j.
Mien favoriete kollumniste (Jantien de Boer) naost de inzunnen stokkies had ok weer slim heur best daon. Nemt mi'j een protte wark uut hanen.
Opiens zag ik een bekende Stellingwarver schriever boeken signeren in Grunningen. Bleek him toch niet te wezen.
De beer in ’t Lauwersgebied bliekt gien beer te wezen mar wel een groot beest. Och… liekewel et iene as et aander: zo nuumt ze mi’j ok wel es.
In et Klunderen stonnen vandaege gelokkig niet zovule verkeerde en/of malle woorden as veurige weke behalven dat een hiele klofte hadde-fietsers haost wat as ‘gekken’ en ‘idioten’ anduded wodden. Ik bin bange dat zi’j etzelde vienen van et schrieversvolkien. Obekjektief zien hebben zi’j dan et meerste geliek, vien ik. En dat sliemen mit de direkteur van de Schrieversronte kan om mi’j ok wel wat minder. D’r bin ok meensken die daor aanders over daenken. Of zol dat now bedoeld wezen mit dat "… nog al es bi’j mekeer in de kont kroepen willen…" van die i-dagboekienschriever waor a’k et maendag (13/9 hieronder) over hadde?

17:00 Krek op ‘e tillevisie oonze ‘adderman’ Andries even zien in et pergramme ‘Mooiste plakkien van Nederlaand’. Now kuj’ eins mar iene stem per perveensie uutbrengen mar een komputerman het ok een trukedeusien en dan kuj’ weet-hoevaeke stemmen. En die peer woorden Stellingwarfs misstaon ok niet op heur webstee: www.demooisteplek.nl in heur gaasteboek.

Vri’jdag (17/9):
Gisteraovend weer gezellig een uurtien mit mekeer an ’t Wiespraoten west veur Radio Weststellingwerf Centraal. ’t Is haost zoveer dawwe tied tekot hebben an dat iene ure.

Vandemorgen mar hadde an ’t wark en dan wi’k vandemiddag even de hot op…

Doe’k vandemiddag even de hot op was bin’k bi’j Frank terechte kommen en daor hewwe votdaolik een zwaore vergeerdering belegd. ’t Gong over centen en dat bin altied zwaore vergeerderings. Wi’j hebben de begroting die we een weekmennig leden opsteld hadden, goedkeurd en hebben een subsidieanvraoge opsteld. Morgen zuwwe d’r nog even een mooi stokkien pepier en een bloemmegieskevot veur kopen en dan kannie op ‘e busse.

Vandemiddag ok nog even bi’j oons zels mit een vergrootglas deur ’t laand lopen. Dan ziej’ toch dingen diej’ gewoonlik niet zien zoas: Hoornbloeme, Thijm erepries, Grote weegbree, Schiefkamille, Krop A gras, Timonthee, Veldzuring, Kleine vossestat, Ridderzoering, Kroepende botterbloeme, Scharpe botterbloeme, Pinksterbloeme, Witte klaover, Peerdebloeme, Maodeliefje, Varkensgrös, Gruppeltiesrus, Akkerdistel, Echte valeriaan, Fluitekruud, Kruusgrös, Struusgrös, Straotegrös, Kweek, Engels raaigrös, Lieuwetaand, te vule om op te numen. Et meerste was trouwes al uutbluuid.

Donderdag (16/9):
Tegen zes ure wa’k beneden. Veurige weke ok al es een dag, mar ik vun et now echt koold (en slim vochtig) vandemorgen. Dat doe he’k et daon… Ik heb stiekem an de Honeywell zeten. Et kost een peer centen mar dan hej’ ok wat en ik laote mi’j niet verrekken. Now glieren de vingers mi’j temeenste weer soepel over et toetsebod.

‘k Wol wel even een ofspraoke mit de belastingdienst maeken mar dat is nog niet zo ienvooldig veur mekeer te kriegen. Vuuf keer deurschaekeld van de ien naor de aander en doe kwammen ze d’r aachter: de persoon die we hebben moeten die is d’r vandaege niet. Now, dat hewwe now al meer as een maond anheuren moeten. ’t Duurt niet laank meer, dan wi’k niks meer mit die lu van doen hebben! Dan bekieken ze et mar. Dan zuken we wel een aandere instelling waor we zo now en dan es wat an vermaeken.

Vandaege ok nog kennismaekt mit de ‘Baarnse Bijbel’. Dit is niet ‘zomar’ een vertaeling mar een vertaeling uut de oolde taelen rechtstreeks in et Nederlaans mar dan zo vule meugelik in de letterlike zin. Et leest dan ok lang niet zo makkelik as de ‘gewone’ Biebel. Et het een protte kotte zinnegies en daordeur dot et wat ‘staccato’ an. ’t Het wel wat. Veur wie ok interesseerd is, kiek mar es op www.skandalon.nl

Een / Die aandere Stellingwarver i-dagboekienschriever vraogd him in gemoede of waorom as d’r niet meer Stellingwarver schrievers mitgaon te sutelen. Mien bescheid: Ik heb et sutelen altied mit plezier daon krek as et mitdoen an ledewinakties en zo wat henne mar ik vuul mi’j d’r now gewoon een betien uutpest of wegpest of… hoe zeg ie zoks netties. En ik weet van meer, die etzelde overkommen is. Dat as die aander Stellingwarver i-dagboekienschriever et him nog es ofvragt dan zol hi’j misschien es naor et Bestuur, Direktie, Staf en zo wat henne kieken moeten. Ik wil d’r ok best een keer mit him (en ok wel mit aanderen) over praoten en kieken as d’r nog wat recht te zetten is want zo et now liekt is et sutelen bi’j mi’j hielendal over.

Woensdag (15/9):
Gister in Duutslaand stonnen we argens in de riegel veur een leket. We keken mekeer es an omreden et d’r daor zo an toe gong veur wat et kebaol angaot. Vandemorgen wawwe in Franeker en stonnen in de riegel bi’j krek zoe’n leket. We hebben mekeer weer ankeken omreden et d’r hier zo mooi rustig an toe gong. En now wil die malle Burgemeester Dales van Liwwadden hebben dawwe oons stoffig imago ofschudden en in de vaort van ’t westen mitgaon. Dan kriegen we dus ongeveer etzelde verschil as gister en vandaege veur zoe’n leket. Laot oons hier lekker stoffig blieven en stuur die Dales mar vlogge weer naor Groot-Mokum. Of stuur ‘m aachter die vrouw Loekie an, wie kent heur nog?

A’k die foto op de veurste ziede van de LC van maendag wel zien hadde, wodde mi’j krek in een aemeltien vraogd. Een foto die neumen is in Steggerde bi’j de ontbloting (staot niet in de dikke Bloemhoff) van een monement veur Riny Siemonsma († 1985). Now, die ha’k niet mist vanzels. Ik hebbe doe nog tegen de vrouw zegd: dat vien ik now et mooie an (stik)moggen: die kieken niet naor komof, range of staand. Aj’ now Burgemeester of Puttienschepper binnen, die moggen die stikken d’r mar wat op los.

De bekendste Stellingwarver schriever had neffens zien dagboekien veurige weke een ni’j woord (uut)vunnen: Ooldewiezezoemer. Hi’j hadde mit een rotgaank de maeker van et woordeboek d’r bi’jhaeld. Vandaege zag ik (al)weer een ni’j woord in zien i-dagboek: votsnieden. ‘k Zol d’r mar niet weer zo vlogge mit naor de woordeboekemaeker lopen want et is neffens mi’j een Karstiaans woord (krek zoks as: waor aj’ votkommen) en gelokkig staon beide malle woorden (terechte) ok niet in ‘oons’ woordeboek (blz 755 S-Z). Et moet gewoon ‘wegsnieden’ wezen vanzels (dat staot wel op blz. 832 S-Z) (krek as dat et votkommen, wegkommen wezen moet). Mar och, we verzinnen oons allemaole wel es vanzels...

Et is al herwerts jaoren leden (1978) da’k Lykele Jansma (* Donkerbroek,† Twiezelerheide mar doe uutgever in Butenpost) es hulpen hebbe mit een heruutgifte van et boekien ‘Der wie ris in ald wyfke; in ald teltsje foar de fryske bern opskreaun troch Nynke fan Hichtum’. In ’t Fries dus. In de tied doe ‘Frysk & Frij nog by Tsjebbo Broersma yn Kollum makke waerd’ sleug ik ok nog wel es wat in dat Friese wereltien omme. Vandemiddag rommelde ik wat in de boekekaaste en kreeg ik dat boekien bi’j toeval in hanen. Dat zo’k mittertied nog wel es ommezetten willen en et hier dan in Stellingwarf es uutgeven willen. Mar es even (bi’j Foppe?) zuken waor de rechten liggen.

Deensdag (14/9):
Vandemorgen al (hiel) vroeg op stap naor Duutslaand veur een seminar over financiele software en de Duutse belastingdienst. Slim belangriek mar (dus) een gezeur van niks. Hatstikke laete weer thuus en (dus) gien nocht an nog meer gezeur. ‘k Gao vroeg aachter et breiden broekien. Moarn wêr een dei. T’rusten…

Maendag (13/9):
Vandemorgen doe ‘k wakker wodde was et gelokkig weer gewoon maendag. Hoezo… gewoon maendag? ’t Zal je mar gebeuren dat et gewoon deensdag is op maendag… Mooi an ’t wark west dus.

Vandemiddag mit een bloemegien in de haand naor een eupeningsreceptie in Winschoten west.

Vanaovend twie Stellingwarver sutelders over de heerd had. Ok even een kop koffie geven vanzels. Wat starkers wollen ze niet hebben.

De onderwarpen veur Wiespraoten van ankem donderdag even bepraot en deurgeven en de rest van de aovend is veur de Haandelings van de apostels.

Zundags wilt et nog wel es gebeuren da’k wat ommestrune in i-dagboekies van konkulega’s. Dat he’k gister ok even daon. Vandaege wo’k et spullegien speulen van wat a’k d’r now nog van wete, van wa’k gister hier en daor lezen hebbe. Bitter weinig dus… Wat mi’j nog heugt is dat d’r iene schreef dat de i-dagboekienschrievers mekeer nog al es in de kont kreupen of kroepen wollen. ’t Zol daordeur een soorte van inteelt wezen. Hi’j had daor letterlik en figuurlik gien plak veur. Disse man komt (ok al) andacht te kot liekt mi’j. Hi’j zal een minne jeugd had hebben. Een uutzondering bevestigt meerstal de regel mar zol schoelemeester ok synoniem wezen kunnen veur schriever? De iene schoelemeester-schriever liekt mi’j trouwes een hatstikke aorige vent. Van een aander vien ik, da’k bliede bin da’k niet bi’j him in de klasse zeten hebbe.