Naor Dagboekien

Veurige weke Ankem weke

Weke 45 (1-7/11.2004):
Zundag (7/11):
Vandaege een betien an ’t wark west, een betien ommekuierd en wat op et web ommesnuuid. Opiens kwam ik een oold verhaeltien tegen van een oold-Wolvegester die wat hulpe zocht bi’j et weer op odder kriegen van dat oolde verhael. Ik heb mi’j mit een aemel an him (m/v) bekend maekt en waacht zien bericht mar even of. O ja, et verhaeltien gaot over een boertien dat in de dattiger jaoren naor de duzendmark gaot in Stienwiek…

Ik hool jim op ‘e hoogte over hoe et oflopt...


Zaoterdag (6/11):
Vandaege al hiel vroeg (om zes ure) uut et waarme nust en aachter et breiden broekien weg. Krek veur achten bin ‘k onderwegens naor Lievelde. Gaondeweg de dag wa’k d’r al rad aachter da’k in dit gezelschop toch (alweer) wat een vremde voegel was. De meersten biebelvertaelers die as ik hier tegen kwam bin daor mit doende van uut heur geleuf. Ongeveer de helte het dan ok een theologische (studie) aachtergrond. Allemaole aorige meensken mar et leek mi’j bi’jtieden meer een gezellige reünie as dat daor de perblemen bepraot wodden waor ik nog wel es mit zitten wil. Mar ik hebbe d’r vanzels wel aorig wat persoonlike kennissen an overholen die ‘k now via et aemelen wel es wat vraogen kan. D’r weren allerhaande kroempraoters (meerst een peer man (m/v) van et Grunningers, Drents, Gællemunigers, Twents en Aachterhoeks.

We hadden allemaole etzelde stok Lucas 2:1-20 vertaeld en dat wodde bespreuken deur perfester Anne van der Meiden. Op oonze vertaeling hewwe vraogen had over et "onder de schölk dregen" en et "in de kraom kommen". Hoewel de Drenten disse beide uutdrokkings wel kenden hadden die et vertaeld mit resp. "een poppien kriegen mus" en "et was zo wied". Bi’j de Grunnigers was Maria "in verwachten" en "was t zo wied". In Dalfsen "leup ze op ’t läste" en "was ’t zo wied". Et Gællemunigers het et over et "zwanger wezen" en dat Maria "uut-erekend was". Een ere Gællemunigerse vertaeling had et over "een kiend kriegen mos" en "de tied van de geboorte an’ekomen was". In Drempt zeggen ze "in verwachting" en "uut-eteld". In et Liemers hebben ze et over "zee mos ne kleinen kriegen" en "dat et mit eur zo wied was". In de Twentse biebel staot "zee leup op ’t leste" en "dat ’t zo wied mit heur was". De NBV het et over Maria "die zwanger was" en "brak de dag van haar bevalling aan".

Vri’jdag (5/11):
Vandaege een protte gedonder had mit klandisie die last hadden van een virus. D’r schient op ’t heden een ni’j ‘sasser’ worm op et web omme te dwaelen. Veerder in de weer west mit WebServices en zo…

En veurbereidings troffen om morgen naor De jaorlikse studiedag van biebelvertaelers uut et Nedersaksisch taelgebied an weerskaante van ‘den paol’ mit as warkliest:

09:00 – 10:00 ure: Ankomst en koffie
10:00 – 10:15 ure: Eupening, welko en huushooldelike dinkies
10:15 – 10:30 ure: Staand van zaeken in eigen regio.
10:30 – 11.00 ure: Perfester A. van der Meiden over de inzunnen stokkies uut Lucas
11:00 – 11:15 ure: Pauze mit koffie
11:15 – 12:30 ure: Algemene bespreking van de stokkies uut Lucas
12:30 – 14:00 ure: Pankoeken eten bi’j Erve Kots (een belevenis, zo is mi’j verzekerd)
14:00 – 16:15 ure: Veurdregen en bespreken van de vassies die maekt binnen
16:15 – 16:30 ure: Evaluaosie van de dag en veurstellen veur de volgende keer.

Iederiene het veur de bespreking een stok uut Lucas instuurd (Lucas 2:1- 21; et geboorte verhael).

De geboorte van Jezus.

01 In die tied leut keizer Augustus een bevel uutgaon mit de bosschop dat alle inwoners van zien riek heur inschrieven laoten mossen.
02 Disse eerste volkstelling was, doe Quirinius et bestuur over Syrië har.
03 Iederiene gong onderweg om him inschrieven te laoten, elk naor zien eigen geboortestee.
04 Jozef gong van de stad Nazaret in Galilea naor Judea, naor de stad van David die Betlehem hiet, omreden hi'j van David ofstamde,
05 om him inschrieven te laoten tegere mit Maria, zien anstaonde vrouw, die al een mooi schoft wat onder de schölk dreug.
06 En wiels zi'j daor weren, raekte ze in de kraom,
07 en ze kreeg een zeune, heur eerste poppien. Ze wikkelde him in een doek en legde him in een voerbak, omreden d'r veur heur nargens aanders plak was.
08 Daor in de buurt weren die naachs hedders in et veld, zi'j hullen waacht bi'j heur kudde.
09 Opiens ston d'r een engel van de Heer bi'j heur en wodden ze omgeven deur et straolende locht van de Heer, zodat ze slim schrokken.
10 De engel zee doe tegen heur: "Wees mar niet bange, want ik kom om jim goed ni'js an te zeggen, dat et hiele volk bliede maeken zal:
11 vandaege is in de stad van David veur jim een redder geboren. Hi'j is de messias, de Heer.
12 Dit zal veur jim et teken wezen: jim zullen een pasgeboren kiend vienen dat in een doek wikkeld in een voerbak ligt."
13 En opiens kwam d’r bi'j de engel een groot hemels leger dat God prees mit de woorden:
14 "Ere veur God in de hoogste hemel en vrede op eerde veur alle meensken waor hi’j van hoolt."
15 Doe de engels naor de hemel weeromme gaon weren, zeden de hedders tegen mekeer: "Lao’we naor Betlehem toe gaon om mit oons eigen ogen te zien wat d'r gebeurd is en wat de Heer oons anzegd het."
16 Ze gongen d’r vot-en-daolik henne, en troffen Maria en Jozef daor, en et poppien dat in de voerbak lag.
17 Doe ze et joongien zaggen, vertelden ze wat heur over him zegd was.
18 Iederiene die et heurde ston versteld over wat de hedders tegen heur zeden,
19 mar Maria beweerde al disse woorden in heur hatte en bleef d'r over deur prakkeseren.
20 De hedders gongen weeromme naor heur schaopen, wiels ze God loofden en prezen om alles wat ze heurd en zien hadden, krek zoas et heur zegd was.
21 Doe d'r acht daegen omme weren en et joongien besneden wodden zol, kreeg hi'j de naeme Jezus, die de engel nuumd hadde, nog veurdat hi'j in de schoot van zien moeke belaand was.