Naor Dagboekien

Veurige weke Ankem weke

Weke 47 (15-21/11.2004):
Zundag (21/11):
Vandemorgen mit een protte plezier luusterd naor Huus en Hiem op RWC. Henk en Frank hadden Otto de Vent in heur uutzending en dat is een man naor mien hatte. Die nuumt de dingen gewoon bi’j de naeme, en daor hool ik wel van. Disse man het (ok) niet al te vule (meer) op mit de Schrieversronte as ‘Instituut’ zoas et daor de laeste jaoren omme toegaot begreep ik en daor bin ik et (vanzels) hielendal mit iens. Ieder naor zienes hatstikke aorige meensken vanzels mar et systeem dat deugt veur gien meter. Naor anleiding van mien lobbywark (veur oonze vertaeling van de Biebel) bi’j de Gemiente kreeg ik vandeweke te heuren dat ze ‘in principe’ allienig haandel doen mit de Schrieversronte. Grote flauwe kul vanzels. Dat kan gewoon niet. Wi’j hebben veur De Stellingwarver Biebel een eigen stichting in ’t leven roepen moeten omreden de sSr d’r niks mit van doen hebben wol neffens de woorden van heur direkteur. Vri’jdag wa’k nog op zien kantoor langes gaon mar doe was de baos d’r niet (kan gebeuren). Zaoterdag he’k ok nog even hiel veurzichtig perbeerd om opni’j de dialoog an te gaon mar diezelde PJ had gien verlet om d’r nog es over te praoten, zo leut hi’j mi’j wat kribbig weten. Ik daenke da’k de kommende tied nog wel gauw es even bi’j de Gemiente (en de Perveensie, en zo) wezen moet en dan moe’we et daor drekt ok mar es hebben over een alternatief, want et bruken en uutdregen van oonze tael wodt deur diezelde sSr tegenworig meer tegenwarkt as dat ze mitwarken, begriep ik zo staorigan. Mar ja, dan moej’ wel een alternatief bieden kunnen vanzels. Een alternatieve meugelikhied liekt mi’j bevobbeld et opsplissen van et bestaonde Instituut in een pat dat veerder gaon kan as Historisch Archief Stellingwarf (HAS) en een warkelik onofhankelik Taelinstituut waor niet de hieltied alles waj’ zeggen of schrieven (willen) deur die iene zi’je (zeef) van een man (m/v) of viere uutschift wodt. Et HAS moet dan mar een eigen kraantien uutgeven en de Ovend moet mar de Magnetron wodden mit wat meer, hieter en veural wat een diversere (?) inhoold. Misschien moe ‘k mar es een oproep doen an meensken die hier ok een miening over hebben want ja, stel je veur dat ik de ienige bin die et zo ziet. Dan kan ik mi’j vanzels beter stilleholen (en hier-en-daor mien exkuus anbieden).

Veur de rest de hiele dag mit et Biebelboek "Handelinger der Apostelen" an ’t schrippen west en tussendeur de kelder in ok nog even schonemaekt in et kader van oonze grote naojaorshuushemmelaktie.

Mien oproep die ‘k al es eerder daon hebbe om op Andries en zien Drents-Friese Woold te stemmen as mooiste plakkien (ncrv) het bliekber vertuten daon. Vannaacht is de stemmeri’je van heur webstee ofhaeld en ston Andries mooi bovenan. Deur een berichien aachter te laoten he’k him daor dan ok mar even mit fielseteerd vanzels.

Mien oproep om een adres waor a’k nog turf kopen kan is ondertussen ok ofhandeld. Niet naost de deure en ok niet goedkoop mar beter duur as niet te koop.

Zaoterdag (20/11):
De meerste meensken doen de grote schoonmaek an et begin van de zoemer zo rond april. Wi’j doen dat (vanzels) aanders. Wi’j doen dat now, in november. De hiele zoemer hebben de deuren en raemen vaeks de hiele dag eupen staon en is de smerigte d’r bakken vol inkommen. Dat rumen we now even op en dan kuwwe de hiele winter lekker smoek en schone zitten. Dat ik mos vandemorgen eerst mit een karre vol rommel naor de Gemiente.

Krek veur at et uutaende gong wa’k in de biebeltheek van Wolverge waor Joukje heur bundel Herfst / Haast wereldkundig maekte. Krap honderd man (m/v) weren bliede mit disse bundel of mit Joukje. Die vuufhonderd boekies bin in een floep en een scheet uutverkocht mag ik annemen. Ik zag al iene lopen mit een staepel van wel een stok of tien, misschien wel vuuftien of twintig boekies. En dan gaot et hadde vanzels. Mit da’k nog even bi’j iene stao te praoten over et Biebel-projekt zeg ik zo kwaanskwies: had dit bundeltien van Joukje ok niet bi’j de Schrieversronte thuusheurd? Zonder nao te daenken zee de man: et geft niet hoe et gebeurt, as et mar gebeurt. Da’s mien man! Doe ‘k laeter thuus kwam vul et boekien eupen op bladziede 28:

Et liekt wel of de rosies
die verdreugd op de kaaste staon
heur ofvraogen
wat veur nut ze nog hebben
Mar ik wete
da’k et ogenblik nooit vergete
daj’d’r mit deur de deure kwamen.

(Uut: Herfst / Haast van Joukje Postma Van Roeden)

Dit gedicht geft aorig an hoe as et boekien veerder inmekeer stikt, liekt mi’j. De verhaelen en gedichten lieken bi’jtieden slim ienvooldig van opzet mar aj’ Joukje een betien kennen dan weej’ dat d’r een ontiegelike diepe wereld an gedaachten en gevuul aachter zit. Zok volk vergeef ik graeg een peer tikfouten. Joukje nuumt dit boekien: ‘de opbrengst van de haast; de haast van mien leven.’ Mi’j donkt dit is nog mar de eerste oogst, ie kun nog wel een keer of wat zi’jen en oogsten. En meerstal komt d’r nog een hiel laank winterschoft nao de haast. Joukje, nog es: fielseteerd!!!

Ik hebbe de diskussie mist mar et leek even niet goed te kommen mit de gehakballe las ik in de LC van vandaege. Gelokkig het Brussel de teugels wat vieren laoten en kan ik mien favoriet gewoon eten blieven. ‘k Schrok mi’j even rot. ‘k Hebbe krek mar drie an ‘e kaante legd veur vanaovend.

De president van de Nederlaanse baank is nog de hieltied somber over de ekonomie in dit laand. A’k de man zien kop (heufd) zie dan daenk ik wel es: dat kan ok haost niet aanders mit altied zoe’n somber gezichte.

Loesje vien ‘k jaoren: een lekker ding. Loesje wodt ankem woensdag ok al weer 21 jaor! Een sikkemeneur zegt d’r dan drekt aachteran: waor blift de tied. Now, de tied gaot wel deur, de vraoge is eerder: waor blief ie?

En vanaovend biwwe mit een man (m/v) of zesse lekker te diketen west naor de pizzaria in Norg. 

Vri’jdag (19/11):
"Regen is vloeibare zonneschijn", is vandaege de mooiste zin die ‘k lezen hebbe in de kraante (LC). Et zol een uutspraoke wezen van de moeke van Bill Clinton. Dat moet toch haost wel een aorige en veural ok een positief instelde mevrouw wezen (of west hebben?).

Een dag of wat leden ha’k een briefien van et Gemientehuus kregen mit et bericht dat mien paspoort oflopen was. Dat vandemorgen docht ik: daor moe’k mar even wat an doen. Eerst mar es op naor de fotowinkel in Oosterwoolde en die had daor een hiele protte mooie plaeties liggen. Ik zegge: ik moest een pasfoto mitnemen naor et Gemientehuus veur een ni’j paspoort, kan ‘k daor iene uutzuken? Now dat kon (vanzels) niet. D’r wodde een hiele ni’je van mien eigen kop (heufd) maekt en die mos ik d’r bi’j inleveren zee de man. Jammer, ik vun zoe’n mooie roege meidekop (heufd) eins vule mooier. En ik daenke: de meerste douanemannen ok. Et oolde paspoort wodde votdaolik verscheurd mar ik zee da’k et ankem weekaende nog bruken mos a’k naor Duutslaand wol. Now, dan ha’k gien paspoort zee et (veerder aorige) meenske. Mar wat, a’k mi’j dan ligitiem maeken moet, was mien vraoge. Dat kon ok wel mit et riebewies, zee ze. Mar ik rie niet in een auto zee ik nog… Een diskussie van niks vanzels mar et ni’je paspoort mos ik wel hoogstpersoonlik ofhaelen bi’j heur, zee ze nog. Mar hoe moe’k mi’j dan ligitimeren? Now aj’ op disse foto lieken dan is ’t goed, zee ze hiel helder. O, dan kan mien twielingbreur ‘m wel even ophalen, he’k kwaanskwies zegd, want die liekt as twie druppels op mi’j. Ik weet niet wat ze d’r veerder nog van docht het want ik bin mar votlopen mar ze keek wel wat mal om heur henne mit een grimas van: wa’k now veur vremde kerel in de winkel hebbe…?

Doe ‘k toch in Oosterwoolde was en ok al in et ni’je Gemientehuus bin ‘k ok drekt mar even deurlopen naor de man die over de subsidies gaot. Et liekt nog een hiele ‘strijd’ te wodden uut wat pottien een betien subsidie veur de Stellingwarver Biebel kommen moet. Ik hebbe zegd dat ze eins niet an et pottien van de Schrieversronte kommen mossen mar ja, as ’t echt niet aanders kan dan is ’t vaeke toch ieder veur zich...

Morgenvroeg (10:30 – 11:30 ure) gao ‘k even naor de biebeltheek van Wolvege. Oonze oold-Wiespraoter Joukje hoolt heur ni’je gedaachte-bundel daor tegen et locht. Joukje het krek as mi’j ok niet al te vule op mit uutgevers en dat soorte volk. Bi’j de kommersjele uutgevers dri’jt et allienig mar om een hoge oplaoge (een protte omzet, bedoelen ze dan) en bi’j subsidieerde uutgevers bi’j vaeks overleverd an iene of een peer mannegies (m/v) die et wel even uutmaeken zullen as jow wark wel goed genoeg is veur heur hoogdraeveri’je. Of ie moe’n vaeke mit je uutgever te eten gaon zoas een inkele schriever dot.

Ik hebbe now al veur drie zaoterdaegen aachtermekeer hoogdraevende literaire uutneudigings liggen en ik bin van doel om bi’j alledrie ok even zien te laoten. Da’s veur ’t netwarken en da’s weer krek zoks as mit je uutgever uut eten gaon, en daor he’k toch zoe’n hekel an…

Donderdag (18/11):
Et begon vandemorgen drekt al een betien verkeerd. Krek een kertier te laete wakker, een slok koffie en een sigerette te min, is een foute start van mien dag. Mar goed, ik was al mooi vroeg onderwegens naor de Veluwe. Mar et autorieden is tegenworig ok gien aorighied meer an. Tussen Meppel en Zwolle is et rond die tied altied ‘raak’ en deur de polder bast et van de (te) grote trekkers waor altied wel een peer auto’s aachter ‘hangen’ blieven. En zoe’n hiele riegel kuj’ vaeks niet ‘even’ in ien keer inhaelen. D’r bin trouwes zo kalmpiesan ok vusen tevule van die grieze zestigers bi’j pad die et wel an tied hebben. Ze zwabberen van links naor rechts en blieven et liefst zo laank as mar meugelik is an de linker kaante plakken, want ja daor hiel in de veerte zien ze nog een auto en die zullen ze ok nog wel even veurbi’j. Krek as dat volk wat mar nooit een rotonde oprit as d’r in de veerte (overkaante) ok nog een auto ankomt. Ze hebben alle recht vanzels mar ik mag graeg een betien opschieten. Heb ik daor dan ok een betien recht op, of niet…?

Lange ingewikkelde praoteri’je en een liekese vervelende weg weeromme. Mu van et niks doen dus.

Henk vreug nog of et "de poelepetaote", "een poelepetaote" of "et poelepetaote" wezen mos. Etzelde riegeltien veur de truthaene. Ik daenke dat hi’j mien iq an et uutperberen is;-) In de Nieuwe Ooststellingwerver ston vandeweke krek een hiel verhael van Wiebe Scheenstra over fezaanten en een protte meugelike krusings mit fezaanten tot an een "kizaante" (krusing tussen kiepe en fezaante) an toe.

‘k Wol eins nao zoe’n malle reize vandaege et liefste een posien op ‘e baank liggen te tillevisie-kieken mar dat he’k gien vuuf menuten volholen. Of et is oorlog of aander geweld om van alles of et gaot over alle meugelike ziekten of zo. Vanaovend doe ‘k d’r krek veur zitten gaon was, gong et over kienderstarfte deur mishaandelings. Dat is toch niet te geleuven…!!! Niet da’k de ogen d’r veur sluten wil vanzels mar mien benul is te krap om van zoks ok mar iene streep te begriepen. Ja, en meer zenders as Ned. 1, 2 en 3 en hewwe niet. Misschien is dat ok al twieje te vulle…

O ja, en we moe’n ok nog een (Nederlaans) woord bedaenken as tegenhanger van "geweld" las ik in de kraante. Ik wor d’r zuver wat opstanig van, vandaege…

Woensdag (17/11):
Vandemorgen eerst even naor Franeker west en veerder de hiele dag weer gewoon, baandig in de weer.

Ok nog even weer een vassien maekt zo as Harmen die graeg hebben wol (hoop ik) (veur tekst en uutleg zie: veurige weke bi’j 9/11).

Mien ooldershuus (pb: ‘ooldershuus’ is trouwes gien geef Stellingwarfs)

Et huus van mien oolden
dat staot d'r al laank niet meer
mar a'k de weg daor langes lope
dan daenk ik d' hieltied weer:

<refrein>
veurhuus
woonhuus
aachterhuus
burgerhuus
ri'jgieshuus
.....
daor was ik thuus.

Et huus van mien oolden
een foto die 'k in mien hatte beweer
et mooiste plakkien veur mi'j
en ik daenke de hieltied weer:

<refrein>
tuunhuus
tolhuus
zoemerhuus
broggehuus
uutvanhuus
.....
daor was ik thuus.

Et huus van mien oolden
now raost daor et snelle verkeer
mar aarme ik, al aorig op leeftied
now daenk ik de hieltied weer:

<refrein>
anleunhuus
bejaordehuus
verzorgingshuus
verpleegtehuus
ziekenhuus
rouwhuus
.....
dat is now mien thuus.
(of: ik kom nooit weer thuus.)

Deensdag (16/11):
De hiele dag naor Arnhem west, mit bastende heufdzeerte thuuskommen, vanaovend dan ok niet naor een verjaorsfesien west en dat had wel moeten. Sorry…

Maendag (15/11):
Vandaege de hiele dag weer drok an ’t wark veur de baos. Een dagure ha’k wel verdiend mar niet kregen. Ja, een goed bod eten mit een gehakballe en twie sukelaogies.

Ik trof vandaege ok iene die zocht een ni’je hobby; hi’j wol mar es een posien "paashaasschaamhaarsparen", zee hi’j want dat nam niet al te vule ruumte, et klonk zo lekker en d’r zatten een protte a’s in ien woord. Dat laeste kon ‘k him gien ongeliek in geven. Ik zal Harmen ankem weke es vraogen awwe daor gien vassien over maeken kunnen. Dat moet dan mar een lange-woorden lietien wodden.

Taovend tegere mit Frank tot haost diepe in de naacht mit de Haandelings van de Apostels doende west. Halverwege hewwe ok nog een vergeerdering hullen mit et voltallig bestuur over et anvraogen van wat subsidie. De drokker het nog niet beld mar Lukas zal haost klaor liggen en dan moe’n we weer tot de pottemenee vanzels.