Zorge d'r altied veur dat et eten klaor staot

Zette de zaeken al op veurhaand klaor, de aovend teveuren as et moet, zodat et lekker rokt en d'r een lekker proesien op him waacht as hi'j thuuskomt van zien zwaore wark. Et is een vorm van dudelik maeken daj' de hiele dag an him docht hebben en daj' je bezorgd maeken over zien noden. De meerste manluden hebben honger as ze thuus kommen en de gedaachte, et veuruutzicht op een stevig maol (veural as et zien lievelingskossien is) maekt diel uut van et waarme welkom thuus.

Wees op tied klaor

Neem veur jezels een vorrels ure rust veur hi'j thuus komt om je te ontspannen. Wark je gezichte een betien bi'j, doe een bloeme of een baand in je haor en kiek fris en vrolik. Hi'j het een zwaore dag aachter de rogge, deur mitwarkers die him de hiele dag aachter de vodden zatten mit wark en zorgen. Wees dan ok opgewekt en vrolik en een betien interessaanter as die laestnuumde mitwarkers van him. Zien zwaore dagtaeke moet opvrolikt wodden en daor ligt jow opdracht veur de kommende uren.

Breng odder op zaeken

Doe - krek veur je man thuus komt - nog een laeste ronde deur de veurnaemste kaemers van et huus. Ruum de schoeleboeken, et speulgoed, de pepiereboel op en neme nog vlogge even et stof of, veural van de taofel, de veensterbaanken en de laampekappe.

In de kooldste maonden van et jaor

Ie moe'n een smoek vuurtien anmaeken waor hi'j wat bi'j kroelen en him ontspannen kan. Je man zal et gevuulte kriegen dat hi'j in een waarme en rustige haven ankommen is, en dat maekt jow ok gelokkig. Zien welbevienen bezorgt jow een geweldige persoonlike voldoening.

Hool et geluud wat zaachte

Veur zien thuuskommen zet ie et geluud uut van de wasmesiene, de dreuger of de stofzoeger. Perbere de kiender kalm en rustig te holen. Laot him marken daj' bliede binnen dat hi’j weer thuus is. Verwelkom him mit een waarme glimk om je mond en toon de oprechthied van je wil om him te gerieven.

Luuster goed naor him

Et zol kunnen daj' een protte belangrieke zaeken van die dag an him vertellen willen, mar daorveur is zien thuuskomst niet et geschikte mement. Laot him eerst praoten. Heug je dat zien onderwarpen altied belangrieker binnen as die van jow. Zorge d'r veur dat et zien aovend wodt.

As hi'j es wat laeter thuus komt

Klaeg gienertied as hi'j wat laeter thuus komt of alderdeegst as hi'j de hiele naacht votblift. Bekiek et as een kleinighied in vergeliek mit wat hi'j de hiele dag al deurstaon moeten het. Instelleer him in een makkelike stoel of op zaachte baank. Vraog him om him te ontspannen of even liggen te gaon. Zet wat waarms of een frisdraank veur him klaor. Schudde de kussens op zien stoel of baank wat op en stelle him veur om zien schoenen uut te trekken. Legge zien lievelingskraantien mit wat lekkers d'r bi'j op et taofeltien naost zien stoel. Aj' al wat zeggen, praot dan zachies tegen him, mit een plezierige stemme. Stelle him gien vraogen van wat hi'j daon het en twiefel gienertied an zien oordiel of zien rechtschaopenhied. Daenke d'r an dat hi'j de meester in huus is, en in die funktie zal hi'j op jow en de kiender altied zien wil uutoefenen mit eerlikhied, waorhied en naor beste kunnen.

As hi'j mit et eten klaor is

Ruum vlogge de taofel of en doe gauw de ofwas. As je man vragt om te helpen wies ie zien veurstel risseluut of, want hi'j zol him wel es verplicht vulen kunnen om et altied weer te doen, mar nao een zwaore dag het hi'j vanzels gien verlet van extra wark. Vieter him an om him an zien favoriete bezigheden te wijden. Toon je belangstelling daor ok veur zonder him et gevuul te geven daj' zien geliekese haost wodden op zien gebied. Aj' zels bezighied hebben, doe die dan zonder daor bi'j te praoten of him te storen, want zien interessaante punten bin meerstal belangrieker as die van jow.

Veur as et duuster wodt

Breng et huus op odder zodat et klaor is veur de aanderemorgen. Daenke d'r an om meugelik et morgenbroggien al op veurhaand klaor te zetten. Et morgenbroggien van je man is slim belangriek as hi'j op een positieve meniere mit zien zwaore dagtaeke uut aende zetten zal. Aj'm ienkeer in de slaopkaemer kommen binnen zorge dan om zo vlogge meugelik op bedde te liggen.

De vrouwelike hygiëne

Et mag niet zo wezen dat je man in de riege staon moet om in de badkaemer te wezen, zoas hi'j vaeks ok al mos om zien trein te haelen. Zorge d'r wel veur dat ie je beste veurkommen hebben aj'm slaopen gaon. Perbeer een veurkommen te hebben dat innemend is mar zonder uutdaegend te wezen. Aj' een naachtcrème anbrengen of krulspelden zetten willen, waacht daor dan mit tot hi'j slapt want et zol him argeren kunnen, bi'j et zien moeten van zoe'n schouwspul krek veur zien slaop.

Wat de intieme relaosies anbelangt

Et is hiel belangriek je te heugen waj'm mekeer beloofden bi'j et angaon van et huwelik en veurnaemelik de belofte van geheurzemhied. As hi'j van oordiel is om vot-en-daolik slaopen te willen dan zal et zo wezen. Laot je altied leiden deur de wil van je man en oefen op gien inkeld stuit drok op him uut om him tot een intieme saemenkomst an te vieteren.

As je man veurstelt om je te besleiferen

Anvere dan in nederighied, mar hool de hieltied in et aachterheufd dat de wille an de man besteded is, en vule belangrieker is as dat van de vrouw. As hi'j zien orgasme beriekt, is een betien gekreun van jow kaante niet verkeerd, nee, et ligt krek aandersomme, et zal him overtugen dat ie d'r ok plezier an beleefd hebben.

As je man wat minder gewone haandelings veurstelt

Gedreeg je dan geheurzem en liedzem. Geef je meugelik misbaor an deur een stilzwiegen. D'r is lichtkaans dat je man nao et gedoe vot-en-daolik in slaop valen zal. Breng je naachtklerao-sie weer op odder, breng je schoonhiedsprodukten op je gezichte an krek as je haorverzorging.

Now maj' de wekker zetten

Om de aanderemorgen, krek even veur je man in de bienen te kommen. Zo kuj' him een kop thee of koffie maeken tegen dat hi'j wakker wodt.

Zo leef ie lange en gelokkig, neffens de 'Biebel in et Stellingwarfs'…