In de Skans...

Weeromme naor Essays
Weeromme naor Stellingwarfs
Home


In de Skans... (review)

Zit ie goed? Hol je dan mar even goed vaaste,
Zonder mi'jzels - op wat veur meniere ok - bekend te maeken, he'k ongeveer 12 meensken (d.i. roegweg 10%; an mien taofeltien, an de bar en in de pauze buten onder 't roken van een sigerettien) kwaanskwies vraogd:
A. "... en, vermaek ie wat?" en
B. "... hoe bi'j d'r eins toe kommen om hierhenne?" en as 't wat een langer gesprek wodde he'k ok nog een peer keer vraogd:
C. "Koj' eins veur Johan, veur Karst of maekt et niks uut?"
Een peer A-antwoorden die vaeker as iens veurkwammen: "Ik vien d'r neat oan!" (o.e. iene uut Joure wee'k nog) en "Prachtig, prachtig" en "Ik kin 't allegeare sa hurd net neikomme".
De B-antwoorden kwammen d'r meerstal op daele dat hi'j/zi'j een abonnement har en (dus) naor haost elke veurstelling gong in de Skans. Ok een stokmennig mossen (?) as begeleiding mit heit/mem mit.
Van de C-antwoorden kreeg Johan de meerste stemmen, dan Karst en dan veur beidend, in een verhoolding van 3-2-2.
De meerste meensken waor'k zo even mit praotte weren van Friese komof (praotten Fries weeromme op mien - stug volholen - Stellingwarver vraoge/n). Een peer plaknaemen van de Fries-praoters: Joure, Franeker, Drachten en de NOP. 'k Heb iene Stellingwarver troffen en iene boven uut Drente tegere mit heur zuster uut Drachten. D'r was veur mi'j gien inkelde bekende bi'j. De gemiddelde leeftied schatte ik zeker op 50+ en misschien nog wel wat hoger. Beneden de vuvendattig leek mi'j een uutzondering.

Mien eigen miening: D'r was bliekber niet al te vule rochtberhied an geven. Ik kwam et hiel toevallig tegen in de Woudklank. Niks in de Nieuwe Ooststellingwerver of zo. (Waorom staot d'r eins nooit iets van een agende in de Ovend veur de kommende twie maonden?) Knullige fout in de ankondiging trouwes, - dat plaetien van Johan mit een stok tekst van Karst - krekliek as in de agende bi'j de Skans. Tegere mit een vergeliek van de intreepriezen veur de verschillende veurstellings in de Skans, misschien ok wel een betien tekenend veur jim hiele veurstelling. Hiel positief was et vanzels dat de Skans d'r (ok) niet op rekend hadde, dat d'r zoveul belangstelling veur was (he'k even naovraogd). Aj' mit riegelmaot een veurstelling zien van o.e. Herman van Veen, Tineke Schouten en 'dat soorte' op 'e tillevisie, dan is disse veurstelling van Johan en Karst veural wat knullig en kneuterig. Gien fesoenlike ankondiging en wat een ondudelik beginnegien. De klaank van Karst zien (luuster)lieties ma'k graeg heuren. In een veurstelling mag et om mi'j wel wat 'krachtiger'. Karst dot neffens mi'j goed zien best om dudelik over te kommen. Jammer dat et lang niet altied lokt. D'r ontgaot mi'j ok een hiele protte! De keuze van nostalgie en sombere lieties zollen et donkt mi'j beter doen op een (haast)aovend- in plak van disse (bijna lente) matineeveurstelling. Karst zingt Berkoop, mag van mi'j de hiele aovend wel dri'jd wodden. De tekst krie'k mar bi'j vlaegen mit, mar dat kan me niet iens zovule schelen. Op belangrieke mementen dri'j ie je heufd nog wel es wat weg van de microfoon.

De verhaelen van Johan wodden rondomme mooi vunnen. Ik vien d'r niet zo vule an. Veur de pauze hadden zien verhaelen - krek as in een protte aandere uterings van him - een hoog "ik"-gehalte. Daj' zo goed en bekend en beroemd binnen moet et publiek mar vienen, dat wi'k niet zovaeke van de man zels heuren. Et eerste spontaone klappen kreeg hi'j doe hi'j vertelde dat hi'j leek op Jaques Herb. Zien haost statische vaasteholen van de microfoon het et grote veurdiel dat hi'j de hieltied goed te verstaon is mar het et naodiel dat et allemaole wat stief overkomt. Verhaelties over Linda de Mol, Lekaole radio (of hebben jim dat ok al?) en 't Stellingwarver Songfestival bin an mi'j niet besteded. Bi'j et tesselen van dat rotjoongien - en ok aandere stokkies - zatten een protte meensken wel vaeke mit et heufd te nikken as teken van herkennen van bepaolde situaosies. Zien gedichten uut Winterlaand en over zien Mem (pb: Moeke) doen 't altied goed he'k wel es begrepen mar et bödt mi'j gien vermaek op mien vri'je zundagmiddag (en veur die acht euro's de man).

Nao de pauze hadde Karst nog wat lieties over eten koken, tango d'amore, een schaop onder de tram, een bolle an aandere kaant van de Lende en een smatlappe. Hier gelt opni'j da'k van de klaank gien genoeg kriegen kan mar da'k de inhoold niet stark mar toegelieke ok niet al te belangriek vien. Et verhael van Geert en Jantje en heur ruzie over een kondoom doet et altied goed vanwegens de sekslink vanzels. Et drie of vuuf keer boe-mitzingen is veur liefhebbers van de polonaise misschien wel prachtig. Ik vien 't hiel vreselik en hiel verschrikkelik. Om een maegien te vraogen om mit een lietien mit te fladderen is mi'j ok te simpel. Gelokkig was d'r niet iene beschikber zodat Johan daor een betien veur joker ston.

Johan zien verhael uut Wonder boven wonder over Berend en Akke, een keboolter van de Blesdiekiger heide en Gustaaf de gaanze mit toverkracht zal misschien niet verkeerd wezen mar a'k weten har da'k op zundagmiddag naor een sprookje mit keboolters en toverbeesten toe gaon zol, dan wa'k niet kommen. Mien weerstaand tegen dit stokkien wodde nog es stevig andikt deur zien brieduutstokte moraal an 't aende. Die moraal har elkeniene al laank begrepen.

En wat d'r dan van mien reseensie terechte kommen was?
Et bovenstaone zo'k hier now nog wel een keer 'deftig' verwoorden kunnen vanzels, mar hool et mar op mien al eerder geven konklusie:
Dit past eins niet meer in disse tied, mar 't is mooi dat et hier nog wel kan. Et was neffens mi'j beter uut de varve kommen in een wat kleinere (knussere) omgeving zoas in et eigen kleinkeunst theater van Karst in Berkoop mit niet meer as zoe'n vuuftig man op visite. As 't dan toch beslist wat groter moet, dan moet d'r misschien wel een dadde man/vrouw an toevoegd wodden die veur wat speciaole effekten zorgt zoas de ankondiging, een roffel op een drumstel of et tussendeur speulen van wat akkoorden op een keybaord of zoks.

Aj'm over een jaor (of wat) weer in de Skans (of nog groter staon dan kom ik niet weer (of et moet al uut fesoen wezen). Aj'm nog es wat doen in de KiekKarst jim best doen, dan kom ik graeg nog es langes.

Tot zoveer dan mar, mit de antekening da'k et eerlik beleefd hebbe zoa'k et hierboven beschreef. Niks mooier of lilleker maekt as da'k et vun.


© Piet Bult, 29-01-2004