Paosken en Pinkster

Weeromme naor Essays
Weeromme naor Stellingwarfs
Home


Paosken en Pinkster

Paosken is et gedaenken van et weeromme opstaon nao et overlieden van J.C.
De daotum van de eerste paoskedag vaalt neffens de kristelijke kalender op de eerste zundag nao volle maone naodat de lente begonnen is (21 meert). Eerste paoskedag vaalt dus op zien vroegst op 22 meert en op zien uterst op 25 april.
Et joodse paoskefeest (Pesach) begint op de aovend van de 14de van de maond Nisan (meert–april). Dat is  de daotum waorop et volle maone is in de maond waorvan de 14de dag van de ni'je maone of rekend, op of nao de lente-equinox (equinox = et sniedepunt van de eclipticus mit de hemel-evenaar).
Deur de verschillende berekenings kun de daotums van et kristelike en et joodse paoskefeest soms een hiel aende uut mekeer liggen.

Pinkster is een feest dat liekewel in et jodendom as in et kristendom vierd wodt. Bi'j de joden hiet et ok wel et 'Wekefeest' (in et Hebreeuws: Sjawoe’ot). Dit feest wodt zeuven weken nao Paosken (in et Hebreeuws: Pesach) vierd. Jahwe wodt dan daankt veur de oogst. (Liekt mi'j trouwes een betien an de vroege kaante.) Veur kristenen is Pinkster et feest van de uutstotting van de Heilige Geest over de geleuvigen en et gedaenken van de stichting van de karke in Jeruzalem op de vuuftigste dag (in et Grieks: pentèkostè) nao Paosken. In et biebelboek Haandelings 2 is van een geheimzinnig gebeuren spraoke. In een mennigte meensken was opiens wat, dat op vuur leek en zich in tongen verdielde en op elk van heur daelekwam. Allemaole wodden ze vervuld van de Heilige Geest en begonnen in vremde taelen te praoten. Zol et Stellingwarfs daor ok al bi'j west hebben...?


© Piet Bult