Reseensies

Weeromme naor Essays
Weeromme naor Stellingwarfs
Home


Reseensies

OPROEP

Awwe et hebben over et uutgeven van boeken (mar ok aandere geschriften) in et Stellingwarfs dan vaalt et op dat die schrieveri'je altied slim anpriesd wodt deur de schriever en/of deur de uutgeveri'je van zoe'n boek. Hiel inkeld dan misschien mar in al de jaoren dat d'r boeken in et Stellingwarfs verschenen binnen lezen we haost gienertied argens een reseensie van een aander as de schriever en/of de uutgever zels. Ok daorin biwwe vri'jwat een uniek gebied mar neffens mi'j niet in al te positieve zin. Et is in de regel hiel gebrukelik dat een boek beoordield wodt en dat die beoordieling dan ok publiseerd wodt. As 't niet aanders kan dan doe'we et zels mar we hebben vule liever iene die daor - zeg mar, as vri'jwilliger - wark van maekt.

Wi'j zuken dan ok iene die veur 'An de liende' de schrieveri'je in et Stellingwarfs es wat kritisch beschouwen wil. Dat zoks ok nog es 'zonder aanziens des persoon' moet, mag dudelik wezen. Deur altied en alliend mar te roepen dat een boek d'r prachtig uutzicht en dat et verhael mooi verteld is, daor schieten we bi'j slot van zaeke gien van allen echt wat mit op. Et ok es een betien bekieken deur een technisch en een kritisch brillegien kan hielemaole gien kwaod. Et is eerder aandersomme: daor wowwe mit mekeer alliend mar wiezer van!

Wie geregeld een serieuze reseensie bi'j oons inlevert om mit naeme en toenaeme te publiseren krigt van oons zo now en dan een boekebon. Een inkelde keer een reseensie schrieven kan ok gien kwaod en is dan ok altied welkom. Et hoeft ok niet alliend over de alderni'jste boeken of gedichten te gaon. Et mag ok een beschouwing over een boek, een gedicht of een gedichtebundel van herwerts jaoren leden gaon.


De redaktie, sept. 2009