Stelling-Warf

Weeromme naor Etymologie
Weeromme naor Stellingwarfs
Home


D'r wodt wel gauw es zegd dat wi'j gien wetenschoppelik wark ofleveren zollen en de Schrieversronte wel omreden dr. Henk Bloemhoff en bi'jglieks dr. Rienk Klooster dure titels veur heur naeme staon hebben, mar...

Waor moet wetenschoppelik onderzuuk eins an voldoen?

Wetenschoppelik onderzuuk is onderzuuk dat neffens bepaolde kriteria, riegels en methoden uitgevoerd wodt. Disse kriteria, riegels en methoden bin ontstaon deur erverings mit et doen van onderzuuk en et kriegen willen van goeie en betrouwbere risseltaoten as gevolg van een meting of een interveensie.

Nao et opni'j mislokte kontakt zuken (sept. 2020) mit Henk Bloemhoff over zien uutviening van de Saksische 'Stellinga', kwa'k now, bi'j et oprumen van een oolde PC de etymologische naem Stelling-Warf nog es tegen.
Ik hool et met 'Werf' op de toevoegde W veur an et 'erf' van een (kleine) woning of buurtschop.
Mit et woord 'Stelling' kuj' vule meer kanten uut mar dat et rechtsprekers wezen zollen is veur mi'j et laeste wao'k an daenk.
Et eerste waor ik an daek is een anlegplak, alderdeegst een soorte van 'scheepswerf', veur schippen, in et Duutse Ostrieslaand van doe destieds.
Oons onderzuuk in Duutse bibliotheken is doe, tegere mit mien kammeraod in et Duutse Nedersaksen een hiel boekwark wodden van zoen 130 bladzieden van onderzuuk.

Kiek hier veur et boekwark van oons onderzuuk uut meert 2010.

Zo'ksoorte onderzuuk zo'k een peer jaor leden ok wel weer doen willen over de naeme 'Stellinga' (zie hieronder bi'j PS).
Wi'j roepen wel gauw es de hulp in van disse en gene (mit de Bibel o.e. dr. Anne van der Meiden, dr. Jaap van Dorp, dr. Anne Bult, en meer) en vraogen dan meerstal eerst niet naor die zien titels.
Van mien grote vrund in Noord-Duutslaand kree'k doe een hiel boekwark over de herkomst van de naeme van Stelling-Warf.
En krek as mit de Saksische 'Stellinga' slaot de herkomst neffens dr. Bloemhoff, as plak waor rechtspreuken wodt deur drie stellings, eins nargen op. Niet alleman mit de titel dr. is ok warkelik een wetenschopper...


© Piet/er Bult, jannewaor 2026
   Bron: mien oolde PC van omdebi'j 2010
   mit laetere toevoegings...

PS (uut mien bericht van 17-09-2020 an dr. Bloemhoff)
Over de 'Stellinga' van Bloemhoff (naor anleidinge van een artikel in et FD van 27/8/2020)
Ik bin d'r dan ok zo goed as wisse van dat de deur jow nuumde Saksische Stellinga gien direct verbaand hebben mit de Stellingwarven van vandaege de dag. In disse kontekst bin de 'Stellinga' een -tiedelijk- 'verbond' (stellingabunde), van Duutse komof. Waor oonze Stellingwarven van vandaege-de-dag naor nummd binnen, bin, neffens jow eigen zeggen, rechters (stellingen) die rechtspreuken bi'j konflikten (ok onzin, neffens mi'j). D'r bin dan ok meer honties die as Fikkie hieten en de Stellinga die jow now benumen bin een stel 'frilingi' (van oorsprong vri'jen) en 'lazzi' (vri'jlaoten, meerst boere slaven) die rond 841-843 in dat Stellingaverbond vanuut Duutslaand optrokken naor et Karolingische riek om daor alderhaande - vaeks godsdienstige - stried (domini vs. domini) te leveren.

Iene van de bekendste slaegen daore, was de slag bi'j et (now) Fraanse Fontenoy-en-Puisaye in 841. Lees de 'Serments de Strasbourg' (Eed van Straatsburg) d'r nog mar es op nao. Aj' goed lezen dan koj', deur et 'Traité de Verdun' (Verdrag van Verdun), de kenneksie mit Nederlaand daor ok al in tegen (Lotharius I, AD 843). As de Letiense tekst je te vule is, kuj' die 'Illustribus Ecclesiae Scriptoribus' en aandere warken van de bekende Liwadder Suffridus Petri (Sjoerd Pietersz) ok wel in et Engels kriegen, he'k begrepen.

Jow Lodewiek de Vrome numen wi'j hiere 'Louis le Pieux', die op 11 april 778 vlakbi'j Poitiers geboren is. Et kan, donkt mi'j, niet mis, dat d'r in Poitiers bi'j de historici daore wel et ien en 't aander over die Louis bekend is. Dat zelde gelt vanzels ok veur Karel de Kaele (Fraans: Charles le Chauve). Daorveur kuj', neffens mi'j, et beste in die zien geboorteplak Frankfurt terechte.

Tegenwoordig woon ik percies in dat Fraanse rebeid (et noorden van Aquitanië) tussen Auxerre en Poitiers, hool mi'j nog wel es wat doende mit toponymie (meerst Gallische herkomst van plaknaemen van zo rond et begin van oonze jaortelling) en et zol veur mi'j eins gien muuite wezen moeten om daor es naovraoge te doen en es wat historische feiten over jow Stellinga op te zuken, in die lekaole biebeltheken. Dat ja, a'k es wat veur je doen kan dan laot me dat mar es weten.

PB: Nooit wat op heurd, vanzels...