Van tiene

Weeromme naor Gedichten
Weeromme naor Stellingwarfs
Home


Van tiene

D'r was een laand, jow kennen et riekaans nog
Een laand van Stellings en een protte Warvers
Meer as vuuftigduzend hebben d'r west
Laestdaegs weren et nog mar krek tiene

Tien ... Stellingwarvers hadden krek de kursus daon
iene het him daor bemegen, doe weren d'r nog negen

Negen ... Stellingwarvers gongen ok nog veur et vervolg
iene kreeg de kriebels en die lachte, doe weren d'r nog achte

Acht ... Stellingwarvers begonnen doe veur heurzels
iene kon et niet geleuven, doe weren d'r nog zeuven

Zeuven ... Stellingwarvers
iene hadde eins toch gien interesse, doe weren d'r nog zesse

Zes ... Stellingwarvers,
iene  kreeg 'm niet meer stieve , doe weren d'r nog vieve

Vuuf ... Stellingwarvers,
iene wodde dri'jer van de liere,  doe weren d'r nog viere

Vier ... Stellingwarvers,
iene dieje, dieje, doe weren d'r nog drieje

Drie ... Stellingwarvers,
iene zee ik zieje, doe weren d'r nog twieje

Twie ... Stellingwarvers,
iene kreeg bi'jspiene, doe was d'r nog krek iene

Iene ... Stellingwarver,
is de aanderen aachternaogaon
hadde hoogmoedswaon
wol alles wel kepotslaon
waor haor op zat kaelslaon
gienertied meer klaorstaon
was zo andaon
mos zo angaon
kon niet anslaon
hoe kon dit toch bestaon
leut him bi'jstaon
wol niet naor binnengaon
wat mos hi'j daeleslaon
of zol hi'j deurgaon
mar zol hi'j dan niet deurslaon
wat mos hi'j ok wat deurstaon
hi'j het et locht uutdaon
het de deure dichtedaon
is doodgaon
en hennegaon


© Piet Bult