Een half verhael

Weeromme naor Verhaelen
Weeromme naor Stellingwarfs
Home


Een half verhael

Van interviewers is et bekend dat d'r wel es wat mit cieferties ommegoegeld wodt. Et begint vaeks al mit et formuleren van de vraoge. Ik heurde een schoft leden et verhael van iene die dee onderzuuk naor et gebruuk van et Stellingwarfs hier in de omkrieten. De vraoge an de deuren was: Wodt d'r hier in of om huus wel es Stellingwarfs praot? Et risseltaot dee mi'j slim ni'j want et was op een bepaolde streek tegen de 100%! Eerst weken laeter heure 'k dat de uutvoerder van et onderzuuk een peer tellen veur de interviewer uut, volk inhuurd hadde die bi'j dezelde deuren langes opvalend luud en dudelik Stellingwarfs praotten. Dat ja, zo wodde d'r nog wel es Stellingwarfs praot in of om huus...

Op een weblog kwam ik et verhael tegen van iene "... dat d'r laestdaegs in Enschede een symposium west was over et Nedersaksisch en dat daor een hooglerer et grote belang van twietaelighied en de diverse streektaelen onderstreept hadde in een slim aorige bi'jdrege...". Now weet ik toevallig dat de weblogger van dit verhael d'r zels niet bi'j was. Dat weet ik toevallig omreden ik en mien maot d'r wel weren. En op datzelde symposium was ok een hoge ome (direkteur van et Meertens Instituut en dan toch ok de minste niet) die een verhael hul dat et Nedersaksisch mar niet onder Diel III van et Europese Handvest mos kommen te valen...

Kiek, zomar twie veurbeelden hoe aj' zonder te liegen de zaeken toch wel wat naor je haand zetten kunnen deur bi'jglieks et iene wel en et aandere niet te numen. Om over et forum mit die beste man van et Meertens instituut en dat Diel III nog even deur te gaon; d'r kwam alderdeegst bi'jval uut de zael, die ok liever niet wol dat et Nedersaksisch onder Diel III kommen zol. Zo wodde d'r zegt dat et best es zo uutpakken kan dat de bestaonde streektael-instituten wel es meer centen - en veural dan ok meer macht - kriegen kunnen awwe doukies al onder dat Diel III valen zollen. Dat bleek een interessaante vraoge want dat zol zomar es kunnen, wodde d'r zegd. Doe daor even op deurgaon wodde en d'r taelgreenzen op de bodden kwammen hawwe de streektaeldeskundige uut de Stellingwarven zomar in de gedienen. 'k Weet d'r alles van want die vraogesteller was ondergetekende... dus...

Veur de gek...
Deur alliend dat te zeggen waj' zeggen willen en niet te zeggen waj' weglaoten willen kuj' haost alleman wel een betien veur de gek holen. De tebaksindustrie kan d'r wat dat angaot ok wat van. Eerst zat d'r altied 50 gram shag in een poedegien. Sund een peer jaor is dat stiekeman wat minder wodden tot dat d'r 47,5 gram in zat. Even naotied wodde dat 45 gram en vandaege-de-dag zit d'r nog mar 42,5 gram in datzelde shagpoedegien. Een betien een helder locht kikt daor vanzels dwas deur henne. Zo kwam ik laestdaegs iene tegen die zee: "Wat kan mi'j dat now schelen. Weej' hoe 'k dat oplost hebbe? Et laeste betien uut et oolde poedegien - vaeks nog wel een gram of tiene - doe 'k altied as eerste in et ni'je, dan he'k toch gewoon weer 50 gram, alderdeegst wat meer." Kiek, zo is d'r vanzels veur alle perblemen wel een oplossing te bedaenken. Mar dat moej' wel zien en dat moej' wel zien willen vanzels...


© Piet/er Bult