Vrouw... reist mit de trein    

Wark van Grietje
Stellingwarfs
Home


Vrouw... reist mit de trein

Et is slim koold vandaege. Ze het heur dikke jasse andaon. Daor zit ok een kapuchon an, die kan ze opdoen as et neudig is. Ie weten mar nooit, de trein kan zomar niet kommen. Et zol niet de eerste keer wezen en op de stations is et altied klumen. Ze reist vandaege naor Rotterdam. Henne in ien keer, ze hoeft niet iens over te stappen. Lekker de kraante lezen en de meensken die bi’j heur in de coupé zitten storen heur niet. Tjong, jonge, denkt ze as ze uutstapt. Dit gong meraokels.
In de middag, nao heur bezuuk an heur nichien, loopt ze weer naor et station. Ze het de loopschoenen andaon, een waarme broek en de haansken. Et vriest niet zovule, mar de gevuulstemperatuur is wel vuuftien graoden onder nul. Ze wil op ‘e tied weer naor huus, want ie weten mar nooit. D’r is ok nog sni’j veurspeld.
Te vroeg is ze d’r vanzels. Mar, beter te vroeg, dan te laete, denkt ze.
Dan komt d’r op et bord een bericht: de trein naor et noorden het vuuf menuten vertraoging.
Dat vaalt mit. De waarme kapuchon mar wat beter over de oren dan.


© Grietje Bosma - Dijkstra