Vrouw... op schoele

Wark van Grietje
Stellingwarfs
Home


Vrouw... op schoele

Ze zit in de kring, een kring mit kleine meensies, zo om en de bi’j zes jaor, bezig mit "beginnende geletterdhied" en et gaot zo:
Vrouw juffrouw zegt: vandaege de T.
Wie weet et eerste woord dat begint mit een T? En kun jim dan ok wel even vertellen, waorom jim now juust an dat woord denken?
Alle kleine koppies kieken eernstig, naodenkend.
Dan zegt Thomas: "Tekenen. Dat vien ik altied mooi as we dat doen en daorom denk ik d’ran."
"Tellen," zegt Peter, "dat doen we ok wel. Ik kan al tot honderd!"
"Taofel," roept Connie, "die staon ok bi’j oons in de klasse."
"Wat bin jim knap," zegt juffie.
"Oh, mar we weten nog wel vule meer!" Johan mag et now zeggen.
"Ik weet d’r wel twee juf. Taart en Tante. Taart heb ik gister had, een hiel groot stok, omdat Tante jaorig was!" "Tjonge, jonge," juf beert wat of.
"Ik weet d’r wel viere juf. Mag ik ze allemaole zeggen?"
"Now veur disse keer dan Eise, omdat ie et binnen."
Eise gaot d’r es even goed veur zitten, trekt een gewichtig gezichten dan komt et:
"Taoi, tiezer, todde, tanebossel."
Alle kiender kieken mit eupen mond naor Eise. Hoe bedenkt hi’j et? Mar daor hoeven ze niet lange over te prakkezeren, want Eise gaot wieder: "Ik had gister een hiele grote taoipoppe in ien keer opeten en toen we an taofel zatten kon ik vanzels haost niks meer op en toen zee mien moeder, dat ik een tiezer was. Even laeter had ik een todde an de neuze, zee ze en die mos ik ofvegen en mar mitien de tanebossel pakken, want ik mos toch zo op bedde."
"Ik vaal haost van de stoel Eise jonge, wat goed."
Naodat d’r nog Traone, Tuut, Tikkertien, Ti’je en Toke bedocht was, zee juf: "Zal ik et ofsluten? Zundag is d’r in Berkoop wat mit een T, TAEL en THEE. Niet veur jim, mar veur grote meensen."
"Dat is niet arg heur, want ik vien thee alliend mar lekker mit een hiele protte suker en melk d’rin en dan hiel lange reuren en dat mag daor vast niet," is de reaktie van ien van de maegies.


© Grietje Bosma - Dijkstra