Vrouw... gaot sociaol    

Wark van Grietje
Stellingwarfs
Home


Vrouw... gaot sociaol

"Toch sneu, dat die jonge buurvrouw van de overkaante niks kan.Krek uut et ziekenhuus en now moet zi’j et kalm an doen," daenkt Vrouw… "Zal ik heur vraogen, of ik heur ruten wassen kan?"
Zi’j stiefelt over de weg en drokt op de belle.
"Za’k de ruten even veur jow doen buurvrouw?"
De jonge vrouw is hielemaole verbouwereerd! "Och, dat hoeft niet heur, ik kan d’r nog wel deurhenne kieken. Is dat niet te vule muuite?"
"Nee, ik doe dat graeg. Zal ik et mar mit de raegebolle doen? Vien ie dat goed?"
"Best buurvrouw, mar woj’ d’r niet even inkommen?"
"Nee, ik doe et drekt. Dan is et mar weer klaor. Now goeie heur en gauw weer opknappen!"
        Een mement laeter  kletst et waeter al tegen de glaezen en krast de raegebolle d’r over.
Uuteindelik was de jonge vrouw d’r niet zo hiel bliede mit. De krassen bin d’r nooit weer ofgaon!
Mar ien ding was waor, as zi’j die krassen zag, docht zi’j an de vrouw. Zo had zi’j toch een onuutwisbere indrok maekt.


© Grietje Bosma - Dijkstra