Ok al woon ik al jaoren buten de Stellingwarven, ik perbeer toch wel een klein betien op ‘e hoogte te blieven mit wat daor zoal leeft en wat de meensken daor van belang vienen.
  Ik heb daor ok nog een goeie vrund wonen waor a’k nog hiel regelmaotig kontakt mit hebbe en die mi’j van al et reilen en zeilen nog wel wat op de hoogte hoolt, van wat d’r allemaole speult in die kontreinen.
  En dan bin ‘k ok nog abonneerd op de ‘Aanpakken’. Daor wor ik ok nog wel es et ien en aander uut geweer.
  Mit een protte wille lees ik ok elke dag de internetdagboeken van Johan Veenstra en Piet Bult. De laestnuumde is d’r jammergenoeg mit ophullen. Dat vien ’k eins hielendal niet aorig van him, mar hi’j zal daor ongetwiefeld zien reden toe hebben. Now blift dan allienig et dagboek van Johan Veenstra nog over.
Zoa’k al zee, ik lees et daegeliks.
  Johan vertelt in zien dagboek wat hi’j daegeliks zoal om hanen het. Over zien schrieveri’je bi’jglieks en zien vertelleri’je. Mar ok over et wark in de tuun en zien bezuken an aandere meensken. Hielemaole niks mis mit, zoj’ zeggen en dat is vaeks ok zo. Nog es, hielendal niks verkeerds an. Aj’t d’r now mit iens binnen of niet, et bin zien belevenissen en et is zien verhael.
  Mar is zien dagboek van 7 oktober 2005 zette Johan een stelling daele, die mi’j toch an et daenken zet het.
  Hi’j stelde doe dat hi’j tot de veronderstelling kommen is dat kerels die kleine pieterties (piemelties) hebben, dit gebrek kompenseren deur in een grote auto omme te rieden. Hi’j schrift d’r bi’j dat d’r gien wetenschoppelik onderzuuk naor daon is, mar et liekt him gien gekke rissenaosie.
  Now, et liekt mi’j eins wel wat een vremde rissenaosie. Ie kun veur etzelde geld zeggen dat vrouwluden mit een peer grote bosten in kleine autogies rieden. En dat kan dus niet, want dan passen ze niet tussen et stuur en de rogge van de stoel.
  Mar, even weeromme naor die kerels mit heur kleine piemels en grote auto’s. Ik vraoge mi’j of waor Johan die wieshied weghaelt. Erverings lichtkaans? Doe ik vroeger nog bi’j de pelisie warkte gongen we nao et sporten altied mitmekeer onder de douche. Mitmekaander in iene grote ruumte. D’r was doe ok een man bi’j die in een grote Citroën ree, zoe’n snoekebek. Neffens Johan zol die maanspersoon dus eins mar een klein piemeltien hebben moeten. Now, ik kan je wel zeggen dat die slange van him bi’j de braandweer niet misstaon zol.
  D’r was ok iene bi’j die in een Fiat 600 ree, mar die vul niet uut de toon bi’j de rest van oons. Deurmekeer was et krek as mit de auto’s, allemaol middenklassers.
  Kiek, now he’k et eerste pat van zien stelling al om ziepe hulpen. Now kuj’ vanzels stellen dat uutzonderingen de regel bevestigen, mar a’k op 15 man al twie uutzonderingen opnumen kan, hoevule uutzonderingen bin d’r dan wel niet op duzend man?
  Dan schrift hi’j ok dat ze “et gebrek kompenseren”. Mar wat is een gebrek? Te groot? Te klein? Middenklasse? Et is vanzels mar hiel betrekkelik. As je auto goed in jow gerage past, liekt et mi’j toe dat d’r hielemaole gien gebrek is. Et is toch de bedoeling dawwe die piemelties bruken veur datgene, waorveur ze bedoeld binnen? Veur de ofwaetering en et instaandholen van de eigen soort, liekt mi’j. We holen toch gien lange-lulle-kompetitie? Lichtkaans dat dit ooit nog es bi’j de Olympische Speulen op ’t pergramme komt, mar zo veer is et nog lange niet.
  Tussen haokies, in wat auto zol Veenstra zels eins rieden? Een Suzuki Alto of toch een Mercedes 350-abc?

Of zol hi’j seins van poere frustaosie van beidend wel wat groter hebben willen? Mar och, daor is tegenwoordig ok wel een mouwe an te passen, he’k wel es heurd.


© Jan Veldhuizen, 08-10-2005