Verlangst

Wark van Roely
Stellingwarfs
Home


Verlangst

d’ oolde stee, ‘k mos d’r mar niet meer kommen
as bi’j de meitied de seringe bluuit
de musken nusselen onder de holle pannen
de koekoek ropt en de merel fluit

an de slootkaante staot de braom te pronk
zet vlammend geel de hiele wal in braand
ontelbere moggies daansen in de zunne
vroege swelvers scheren over ‘t laand

veerweg heur ik mien mem weer zingen
wiels et wasgoed wappert in de wiend
heit spit de tuun en poot de bonen
om huus ’t hoge lachien van een kiend

in de proemeboom koert, ienzem een doeve
een lichte dieze legt een deken over 't laand
d’ aovendlocht trilt van onbestemde geuren
glidt langzem over in de naacht

wat wet een kiend van et vergaon van dingen
hoe zol et weet hebben van verleuren tied
mar kleurt de braom en roeken de seringen
dan verlangt mien hatte naor mien kiendertied

as bi’j de meitied de seringe bluuit
de musken nusselen onder de holle pannen
de koekoek ropt en de merel fluit.
d’ oolde stee, ‘t is beter da’k d’r niet meer komme

© Roely Bakker