Veertig jaor MOP
Weeromme naor Wark van Tuller
Weeromme naor Stellingwarfs
Home
Veertig jaor M.O.P. 1965 – 2005
(Makkingester Ooldejaorsploeg)
Een teroggeblik op een roerig verleden.
Saemensteld deur: Tulle (Ate Mulder)
Nao te bestellen:
Copyrechten:
Drok:
ISBN:
NUR:
sSe:
Inhoold:
Wat d’r an veurof gong
4
Bejaordenpakketten
5
De eerste stunt
6
Mislokt en verongelokt
6
De Sik
7
Weijert Zeephat 95 jaor
7
Autokros
7
De rekre-aosie
8
De twiede ereburger
8
10 november Wienfeest –69 8
Kidnapping
8
De veurzitter trouwt
9
Priesschieten, sjoelen en balgooien 10
Wat d'r an veurof gong.
In de jaoren zestig was d'r van ooldsher et gebruuk van togen. Alles
wat niet onder dak ston moch deur de dörpsjeugd versleept wodden.
Hierbi'j weren meerstentieds dezelde lu et haesien. Et was doe
spannend, as ze jow mit de hujvörke naozatten, veural aj' dan zo
manmachtig weren, dat ze jow toch niet kriegen konnen. Zo wodde d'r
vaeke een boerewaegen uutmekeer haeld, en op et dak van de schoele of
zuvelfebriek weer inmekeer zet.
Bi'j de jaorwisseling van '64 en '65 leup dit togen allemachtig uut de
haand; d'r weren doe nogal wat van die opscheuten jongen, die pelisie
Steensma et bloed onder de naegels weg treiterden. Hi'j zat ze nao,
dwas deur de lanen over de Prikkedam, zonder dat hi'j d'r iene in de
vingers kreeg. Op een gegeven mement mos hi'j bakzeil haelen, en wodden
de rollen ommedri'jd en Steensma ommeraek oftuugd. 't Spul kwam tot een
uutbasting, doe een peer onschuldige jongen, d'r ommeraek mit de
gummieknuppel van langes kregen. Aachterof speet dit Steensma en een
kerel as hi'j was, het hi'j netties zien verontschuldigings an disse
jongen anbeuden.
Ien en aander kwam ter spraoke, doe h'ij Evert et ni'j-jaor ofwinnen
kwam.
- “Wat was et hier ooldjaorsaovend
een bende zol dit niet aanders kunnen? Kiek now es naor Berkoop en
Buil. Daor hebben ze een ooldejaorsploeg. Daor verlopt de
jaorwisseling, mit deur die Ooldejaors-ploegen, toch vule mooier?
Zollen wi'j die ok niet in Makkinge oprichten kunnen? D'r zitten hier
ja zo now en dan een stokmennig potige jongkerels in de kroeg. As die
heur schoolders d'r now es onder zetten zollen.”
Mit kwam Jan Ni'jhoolt binnen, hi'j zol mit de jongen te stappen
mar hadde de boot mist. Om kot te gaon, nog diezelde aovend wodde de
anzet geven tot et oprichten van de Makkingester Ooldejaorsploeg
(M.O.P.) deur die jongen, die van Appelsche weerommekwammen. Iederiene
wodde even iene veur iene appat neumen, waorbi'j ze goed op et hatte
drokt wodde dat et geheim blieven mos.
Dat is ze aorig lokt. Naoderhaand is de ploeg nog uutbreided mit wat
leden van de biljat-klub en wodde d'r een rieksdaelder in de maond an
kontribusie heven. D’r wodde ok regelmaotig potbiljatten holen,
waorbi'j de pot veur de MOP was. Daornaost weren d'r een peer giften
van o.e. et V.V.V. en de zuvelfebriek.
De Doelstelling: Et ooldejaorsgebeuren een rustig en vredelievend
kerakter geven en d'r veur te zorgen dat et sociaole leven in Makkinge
op peil blift of alderdeegst om dit op hoger peil te brengen.
De eerste vuuftien leden:
Jan Ni'jhoolt (veurzitter)
Berend Dijkstra
Jan
Veenstra
Evert H. Jongediek (sekretaoris) Ate
Haanstra
Gooitzen Duursma
Ate D. Bi'jstra (ponghoolder)
Hendrik Kuipers
Jan Tjassing
Hendrik S. Mulder
Tjibbe van der Meulen Albert Buursma
Kees Blomsma
Hendrik ter Schuur Eise Dijkstra
Bejaordenpakketten.
Genoeglik zatten Jan en Ynze nog even nao te genieten van de bakkebolle
- die him goed smaeken leut - doe inienen et hontien ansleug. Volk an
de deure. Wie moch dat wel wezen? Ynze schosselde naor de aachterdeure.
- “Koest mar Tommie, goed volk.”
Et leek veurnaem volk. Twie manluden mit hoge zwatte zieden hoeden op
en mit gele klompen an, stonnen bi'j de deure.
- “Wi'j wollen jim naemens de M.O.P.
graeg disse fruitmaande anbieden.”
- “Zo, waor hewwe dat an te daanken?
Mar waacht, ik zol zeggen kom d'r mar even in want dan kuj'm Jan
ok geliek et verhael doen.”
De mannen scheuten uut de klompen en leupen achter Ynze an. Et was al
wat rommelig in huus mar ja, wat kuj' in een mannehuusholing aanders
verwaachten?
- “Pak een stoel en val daele. Zo,
dat zicht d'r goed uut. Wi'j hebben gien bier in huus mar jim lussen
toch wel een borrel?”
- “Graeg” zee de iene, wiels
de aandere van ja nikte.
- “Ynze jong, schink oons es even
iene in.”
Now hadde Ynze een perbleem. De ofwas was nog niet an kaante dus weren
d'r gien schone koppies en paanties. Daor mos in '65 de ofwasmesiene an
te passe kommen, dus trok Ynze de aachterdeure los en daor kwam hi’j al
anlopen. Tommie slikte netties de koppies schone en gong weer naor de
dele.
- “Moej'm d'r ok suker in?”
De iene stootte de aander es an mar et was al te laete.
- “Asjeblief.”
Een schoon lepeltien was d'r niet te vienen. Wel iene mit een protte
eigeel d'r an. Gien perbleem. Tommie slikte et netties schone en Jan
dreugde et mit zien niet al te schone rooie buusdoek nog evenpies nao.
- “Proost jonges. Op een goed en gelokkig ni'jjaor.”
Now zoj' misschien daenken dat een honnetonge hatstikke zuver schone is
en draank mit meer as dattig percent alle bakteries wel doodmaeken zol
mar wat wol et geval: Op twie jannewaori wodde de beerputte van kefé
Jongediek eupenmaekt om naor een tane te zuken. Gelokkig zat d'r een
plaetien an. De 65-plussers hebben dit gebaor altied slim wardeerd en
vanof dit
mement bestelden Jan en Ynze tussen Kast en Ni'jjaor altied wat
flessies bier bi'j de bakker.
De eerste stunt: Jaorovergang 1966/1967
Zoe'n twiehonderdvuuftig man hadde geheur geven an de oproep, om op 'e
hoeke te kommen. Dit was daon middels een geluudswaegen die aovens om
een ure of zeuven, achte deur et dorp en ommelanen de ronde daon hadde.
In ofwaachting van wat d'r kommen zol, vullen ze hielendal stille, doe
d'r vanof et Oost een waegen ankwam mit de vlagge in stok mit as
verlochting een stok of tien mannen mit hoge zieden hoeden op et heufd
en gele klompen an die een stal- of stormlanteern omhogens hullen.
De vlaggemast die et geheime genoodschop bi’j heur hadde, bleek veur de
Iesclub te wezen, wiels de fietserekken heur plak bi'j et dörpshuus
vunnen. As sluutstok wodde pelisie Steensma deur veurzitter NI'jhoolt
naor veuren reupen. Hi'j wodde tot ereburger van Makkinge sleugen. De
versiersels, een medaille mit een meulentien en de tekst
“Ereburger van MOP, december 1966” wodden him om de nekke hongen. In
zien toespraoke gong Jan in, op wat pelisie Steensma gedurende zien
twelfjaorige loopbaene veur et dörp Makkinge zoal daon had. Mar veural
de anzet tot et oprichten van de M.O.P. hadde disse doen besluten om
him et ereburgerschop te geven.
Zo de kop was d'r of. De twiede ooldejaorsploeg in Ooststellingwarf was
geboren.
Mislokt en verongelokt. Jaorovergang
1967/1968
Veur de twiede stunt hadden de Moppers et idee te berde brocht om
middels oolde bruukte fietsen in een iene-, twie-, drie- of
viere-opstelling et dörp binnen te kommen. Et hiele dörp wodde
ofstruund op zuuk naor gaedelik materiaol. Now dat is d'r kommen! In 't
buurdorp Else, in de smitse van Jan Santing, wodden ze in de juuste
stelling anmekeer last. Et leek machtig mooi. Maar doe mossen ze op
huus an en dat mos onopvalend gebeuren. Op een zundagnaacht om half
iene zol et wezen. De Peperstraote uut, op 'e Veneboeren an. Now weten
de meerste meensken die laeter wel es an de autopedwedstried mitdaon
hebben, hoe belangriek as et is om geliek op te gaon, aanders is hi'j
onbestuurber. Zo ok de fiets. De gang wol d'r eerst mar niet inkommen
en doe hi'j uutaendelik uutaende scheut en van links naor rechts
hobbelde totdat hi’j in de sloot belaande, was et ding in ien keer
stokkend. Hielendal kaduuk. De wille hadden ze d'r van had mar oplappen
hadde gien zin dat d’r wodde een ni'je stunt bedocht.
Now was d'r an et aende van de zestigerjaoren nog gien riolering en dee
de tonnegiesman nog maondeliks zien ronde deur ‘t dörp. Dat was niet
meer van disse tied, vunnen de MOP-jongen.
Riolering mos d'r kommen. Et oolde husien wodde naost et mederne
waeterkloset op een waegen zet.
Deur de intrede van de MOP-kevotten, die roem een gulden de man
(inwoner) opbrochten en et overschot van de MOP-uutvoering zatten ze
roem bi'j kas. Dit risselteerde in drie bloembakken en twie zitbaanken
veur Dörpsbelang en veur de schoele een baandrekorder, wiels d'r veur
de bejaorden een zuvelpakket was. De MOP onthulde heur eigen vlagge die
ontwurpen was deur oold-burgemeester mr. G.A. Bontekoe. An et aende van
de stunt, -d'r was gien waachten op-, kwam wat laeter as de bedoeling
was, burgemeester Oosterwiek ok nog langes.
De Sik Jaorovergang 1968/1969.
Deur et kontakt mit Katerinus Haanstra kwam de MOP an een hiele flutte
hadboard. Dit wodde doedertied ommenocht bi'j een meubelfebriek uut
Wolvege ophaeld mit de anhanger van vrachtrieder Jacob Wemer, aachter
een trekker. Disse was zo zwaor overlaeden dat hi'j et onderwegens
begaf. Dit hadboard hadden ze neudig om een oold striekiezer op waore
grootte (8 bi'j 2,5 en 3,5 meter) nao te bouwen. Hier gongen
verscheidene uren inzitten. In de schure van Punter was et die winter
verrekte koold. Mar et risseltaot moch d’r wezen. Et kontakt mit Punter
was kommen, deurdat de MOP- jonges hier hasems eerpelrooid hadden. Dat
had ok weer de neudige pietermannen opleverd. Daornaost hadden ze bi'j
Duursma in et huj zeten en timmerman Lemstra hulpen mit et daelehaelen
van de dakpannen van een slooppaand op et Buterheideveld. Veur et dörp
weren d'r borden mit “Welkom in Makkinga” en veur et dörpshuus een
splinterni’je geluudsinstelaosie. De bejaorden kregen ieder een
fruitschaole.
Weijert Zeephat 95 jaor.
Op 15 april 1968 (twiede paoskedag) wodde Weijert Zeephat 95 jaor.
Vanwege et feit dat hi'j de ooldste mulder van et laand was en ok de
ooldste inwoner van et dörp, wol de MOP hier ommedaenken an geven. In
een oold rietuug mit et sunderklaospeerd d'r veur, wodde mit de meziek
veurop, een rondtocht deur et dörp maekt. Dit hadde nog al wat voeten
in de eerde want Zeephat vun et zien tied nog niet om in een koetse
vervoerd te wodden. Gelokkig wussen ze him omme te praoten en geneut de
man van de ere die him te beurd vul. As geschink was d'r veur Zeephat
een miniatuurmeulentien waor een meziekdeuze in zat.
Autokros.
In augustus wodde de eerste autokros uutschreven, mit daornaost een
demonstraosie parresjutespringen an de Balkweg. D'r weren zoe'n duzend
bezukers. Et jaor daor op is de keuze maekt om him op twiede paosdag te
holen. Dit voldee zo goed, dat tot op heden, as et weer en de toestaand
van et laand et toelat, nog de hieltied op die dag plak vint. Dit
gebeuren het wel es roem drieduzend bezukers trokken. Ze hebben daor al
es de starkste man van Nederlaand een veurstelling geven laoten. Wieder
weren d'r een demonstraosie mit parrasjutespringers en een
demonstraosie mit pelisiehonnen. Et gong altied goed tot an paosken
1989. Doe nammen ze oonze vlaggenist Evert Jongediek mit stropak en al
mit. Mit ondermeer een stokkend bien het Evert d'r een hiel skoft uut
west.
De rekre-aosie. Jaorovergang 1969/1970.
In winterse tempereturen en een starke oostenwiend, die now niet drekt
uutneudigden om te kamperen, was zoks al uutbeeld op 'e waegen. De
lange onderbokse mos d'r wel bi'j an. (Ik geleuve niet dat ze doe al
mikten op naektlopers).
Hanebokend ston de meute op 'e hoeke te waachten, en ze weren
zuver bliede dat ze heur vertreden konnen naor de iesbaene. Hier
reden scheuvellopers mit fakkels ronties over de baene en kreeg oold-
veurzitter Bles de sleutel van et verlochtingkassien, waordeur de baene
d'r in vol locht henne lag.
Et daankwoord van Bles duurde botte lange. Was et deur de berenburg? Et
zal de toenmaelige bezukers nog wel heugen. Daornao poogde de meziek
nog een deuntien te speulen, mar de instrementen bevreuren an de lippen.
De hoge zije hadde plak maekt veur de MOP-pette, blauw mit witte bies
en de letters MOP.
Veur de 65-plussers was d'r een oranjekoeke.
De twiede ereburger.
Op 4 juli 1969, doe et heufd van de eupenbaore schoele Jacob Oosterkamp
mit pensioen gong, wodde hi'j benuumd tot ereburger van de MOP.
Alle MOP-leden die in Makkinge naor schoele west binnen, zatten bi'j
meester Oosterkamp in de klasse. Daornaost was disse grieze eminentie
aktief in et vereningsleven.
Dat stunten Makkingesters al jong in et bloed zit, dee wel blieken, doe
de jongen van Frans Gorter him in een bokkekarre over et schoeleplein
reden.
10 november Wienfeest -69.
Now ok de laeste staandholers, Keimpe te Hage (Kaontien) en Roelof
Legendal (A.B.C.) de brui d'r an geven hadden, was d'r van de
Makkemer-maark niet vule meer over, dan dat op disse dag de bezukers
steevaaste de kroeg opzochten.
De MOP vun dat disse tredisie einliks wel beweerd beheurde te blieven.
En naodat d'r morgens et ienigste dier, een geite, verkocht wodde an
Bles, was d'r aovens een Wienfeest. Op de hispel zet deur de MOP.
Hierveur weren d'r hiele grote lege wienvatten kocht, om de sfeer te
verhogen. Nao afloop bin disse bi'j opbod verkocht, zodat alle onkosten
van disse aovend d'r weer uut weren.
Een toekomstig veurzitter dronk bier as wien, dit is him niet zo goed
bekommen.
Kidnapping. Jaorovergang 1970/1971
Doe de wethoolder van onderwies Hendrik Zwart zo as te doen gebrukelik
tegen een ure of ellem zien hontien uutleut, wodde hi'j overmeesterd
deur vier potige MOP-leden, die him in dekens wikkelden en stevig
vaaste bunnen mit touw,waornao ze him in de moterbakfiets liend van Ale
Peper kieperden en op Makkinge antoogden.
De MOP was ondertussen op de Brink anbelaand mit twie waegens, op de
eerste was de oolde schoele naobouwd. Op de twiede een grote
symbolische pette. Jan NI'jhoolt was al mit zien rede uut aende zet en
haeperde op een gegeven mement ....waor bleef hi'j now? ...Wat dee
blieken?...Moterpech... Et duurde wat langer, mar et is goed beteerd.
Zwart kon op 'e hoeke de makette van een ni'je schoele in
ontvangst nemen. Niet letterlik, dan zol hi'j toch mar op de
zoolder van et gemientehuus belanen. Nao toezegging dat hi'j him d'r
volledig veur in zetten zol, is hi'j netties in een Fiat 600 naor
huus toe brocht.
Nao ofloop wodde d'r vuurwark ofsteuken vanuut de schostiens van de
oolde schoele.
Daorveur hadden de oolderen een kaemerplaante kregen, en elke verening.
et ien en aander.en dörpsbelang 17 naembotties veur de butenwegen.
25 jaor vri'j - De
zigeunerwaegen.
5 meie - 25 jaor vri’j. Bevri'jd van de bezetting deur de
Duutsers. Dit mos vierd wodden en vanzels was de MOP van de perti'j.
In et veurleste jaor in de Middelboeren, doe hi'j mit trots vertelde,
dat hi'j in zien negenentachtstigte was, zat Jouk Mulder genoeglik in
de veensterbaank an zien piepe te trekken. Et leek een mooie dag te
wodden en hi'j hadde al bot vertier an de MOP-jongen, die an et
schreppen weren om an heur zigeunerwaegen de lseste haand te leggen.
Hi'j hadde wel nocht an al die onnocht. Manluden as vrouwen verkleded,
iene in een hiel groot berepak, wat zol die et waarm hebben. Een
monikespeuler, die lietieswieze d'r meziek uuttrok. Mar doe Jan
Bethlehem mit een sleie zomar een grote deuk in zien mooie oolde auto
sleug, gong zien mond van verbaozing eupen en ontvul ‘m de piepe.
Hi'j wodde zuver kwaod.
- “Moet dit now zo?”
Doe Japie Bos d'r ankwam, as vrouw verklieded, mit een pruke op van
zien zuster, weren d'r vrouwlu die de broek niet dreuge holen konnen
van et lachen. Zoe'n geliekenis, hoe was et meugelik. Wieder weren d'r
pelisies bi'j mit een moter mit zi'jspan en wodde d'r pickuptouw
opstookt in de oolde potkachel om him flink roken te laoten. Ok bi'j de
opbouw hadden ze heur al de busen uutklauwd, doe de iene de ere de
jasse vaastespiekerde an de deure. Et wodde een spetterend feest.
De veurzitter trouwt.
In oktober wodde Jan Ni'jhoolt mit zien anstaonde in een koets naor et
gemientehuus in Oosterwoolde reden. Daor mos et peer deur een
erehaege bestaonde uut MOP-leden en pupilen van de sport.
Disse bezundere behaandeling vul allienig Jan ten deel. Weren et doe de
verholings, laeter mos elk et gewoonweg doen, krek as alle leden, mit
een askebakkien mit inskriptie.
Priesschieten, sjoelen en balgooien.
Dit vun in et verleden altied plak in kefé Dokter. Doe disse de deure
sleut, wol de MOP ok disse tredisie in ere holen; butendat smeet et ok
nog geld op, zodat dit veur mekeer maekt wodde in de schure van buurman
Haanstra.
Daornao wodden de overbleven priezen bi'j opbod verkocht in kefé
Jongediek.
Daor dit veur et goeie doel bestemd was, wodde d'r al es een kiepe
verkocht veur meer dan vuuftig gulden.
Nao taonende toeloop is dit gebruuk in de ningtiger jaoren verleuren
gaon.
Kastaovend.
In de donkere daegen veur kastmis, doe de daegen nog echt donker weren
en niet zo as vandaege an de dag verdonkermaond mit allerhaande
futaliteiten mit lochies, hul de MOP weer priesschieten sjoelen en
balgooien.
Janneke, die veur een jaor terogge in Makkinge te wonen kommen was,
kende dit spektaokel nog niet, mar doe de buren d'r op an stonnen, dat
ze mit mos, hadde ze de stoute schoenen mar antrokken en heur toch mar
overhaelen laoten.
Misschien was et wel goed om d'r toch es even tussenuut te gaon, want
heur leven ston behoorlik op 'e kop. Nog maor krek trouwd, hadde ze
heur man verleuren.
Ze beleefde een protte wille an de spullegies. In een wereld die ze
einliks niet kende, hier gien vraogen, leut ze heur as van oolds gaon.
Nao ofloop op 'e kroeg an, waor de overbleven priezen bi'j opbod
verkocht wodden zollen. Bi'j disse peblieke verkoping wodde de regel
van niet tappen schunnen, wat de kroegbaos een goeie aovend opleverde
en de gezellighied ten goede kwam.
Gezellige tied kent gien tied, en doe de kroeg om twie ure sleut,
nuugde ze een stokmennig meensken om nog iene of te drinken.
Dit was niet tegen dovemaansoren zegd, dat ze gongen mit Janneke
op huus an. Daor wodde et beregezellig, dit trok ok de beide buren an.
De Limburger, die bi'j Janneke onder dezelde kappe woonde, begon al
naor gelang hi'j meer op had, al hadder te zingen:’ Van scheit an de
buren ..........we nemen d'r nog een.’ Et is him niet zo bekommen,
(spiekers) want hi'j is een dag laeter ofreisd naor et Limburgse.
Onderwiels hadden ze mit mekeer et hiele kastdinee burgemeester maekt
en was et al goed lochtig, doe ze op huus angongen.
Janneke heur kastdaegen hadden ze een stokkien inkot.
Eerste kastdag belden heur oolden vergeefs an.
Ze hebben mit menaander mar een knappe salade lapt en Janneke is nog
een aovend mit heur west te stappen.
Onbewust is d'r een knap stokkien sociaol wark verricht.
D'r op uut mit de hiele ploeg: D'r is
wat te beleven!
Et begon mit een reisien, bi’j aovende naor een boerekroegien in
Wezepe, zoas d'r in Drenthe wel meer te vienen weren. Ze weren op et
idee brocht deur een Cuby en the Blizzards-fan, want hier ston een foto
van op 'e hoes van heur l.p..
De plaetemaotschoppi'je hadde wat van die Amsterdamse flodderjuffers
daor hennehaeld, en et was d'r doedertied mar mal omvot gaon, dat et
hiele dörp sprak d'r schaande van.
Veur et ofrekenen wodde d'r een vremd systeem op nao hullen, gewoon de
flessies op 'e taofel staon laoten, disse bleek niet groot genoeg,
tellen en ofrekenen.
Aj' even aachteruut mossen, deej' dat op de koegaank..
Laeter bin ze nog een aovend naor de eupenlochtbioskoop in Drouwen
west, hier hadden ze een half ure vertraoging, want ze weren op et
terrein an et ‘schaiten.’ De film vul niet mit.
Laeter wodde veur et reisien vaeke een dag uuttrokken, en et doel
van bestemming, deur een reizekemmissie van eer peer man bepaold.
Zo weren ze es op weg naor de kezemaark in Alkmaar (de man die et
regelde vergat de buuscenten, dus mar effen naor de baank Hier kon hi'j
him niet legitimeren, mar mit hulpe van baankbediende Lammie Tjassing,
die de mannen beschreef, is et lokt.
Die kezemaark was nogal gauw bekeken, dus mar even naor een kroegien
Doe ze op weg weren naor Volendam om de inwendige meense te verstarken,
hadde d'r iene bot last van hoog waeter, et zwiet brak him an alle
kaanten uut, de ere jongen mar pesten, moe'j kieken allegeer waeter, en
hi'j mar strieken mit zien grote rooie buusdoek..
Tot overmaot van ramp mossen wi'j ok nog niet in Volendam wezen, mar
wodden wi'j deurstuurd naor Edam.
Doe de sjefeur even buten et dörp stille hul, stonnen d'r zo’n
vuuftien man op 'e riegel boven op 'e diek:, dat d'r weren meer mit
hoge nood.
Amsterdam, die grote stad wodde vaeker bezocht, zo zaggen we in Carree
André van Duin, we zatten zo hoge, dat iene et d'r benauwd van kreeg en
d'r tussenuut kneep. De artiesten weren zo klein, dat ie hadden
op 'e tillevisie meer zien.. Toevalligerwieze weren d'r meer meensken
uut Makkinge, want de gemeente maekte ok een uutstappien, dat Pieter en
Klaos, oonze wegwarkers wodden toereupen.
Dat ze in Amsterdam, die boeregezichten d'r goed uut kennen, dee
blieken, doe een ploegien van een man of zeuven, ingong op et anbod om
es een lifeshow te bekieken. Nogal een aentien buten et centrum:
Zi'j zatten nog maor net, doe d'r nog een ploegien inkwam, dissen
mochten veur half geld naor binnen.
Dat was nog in de tied van Floris, want doe d'r zoe'n kerel him niet
uut aende kriegen kon en em anslingerde; reup d'r iene: 'Ha
Thierry....de slingeraor....'. Lachen vanzels.
Ok weren ze in et De La Mar theater, waor Fons Jansen optrad.
Madam Touseau mit al zien wassen beelden, en een aorige portier die him
stillegies as beeld gedreug; en dan stiekem naor vrouwlu knipoogde, die
verbouwereerd vanzels. Dat kon toch niet, nog mar es kieken.
En kalmpies an, de ogen strak richt, toffelden ze op him of..
Weren ze d'r zo wat, dan reup hi'j van boe!
Et Evuolon in Eindhoven was botte interessaant, de technologische
ontwikkelings leuten ze daor zien, veural de beeldtillefoon maekte een
protte indrok. Die zol d'r over tien jaor wezen.
Kuj' zien, dat de toekomst niet altied vaalt te veurspellen. Mar in elk
geval
een anraoder; ok de oolde auto's in Drunen hadden heur liefhebbers.
Schiphol, ok machtig, mar d’r was een ploegien , dat al es vleugen
hadde, en zi’j kwammen toevalligerwieze in een vertrekhal terechte,
waor meensken van allerhaande nationaliteiten waachten op heur
vlocht.
Dat et zat d'r best, een schoffien laeter kwam d'r nog een groepien in;
de ober hadde dit in de gaten. 'Moet je opletten, zullen we even een
geintje uithalen.'Dat die jongen kwammen mooi op oons an en scheuven
bi'j oons an taofel. Ze reupen de ober:
Disse vreug geliek om een instapbewies, aers moch hi'j ze niet
bedienen.
'En die mannen dan?'. Ja, mar die hadden wel een instapbewies.
‘Nou’ zee de ober ‘ik weet het goed gemaakt, als jullie die andere
jongens ook wat te drinken aanbieden, zal ik ze halen.’
Dat gong an.
De praolwaegens van et bloemekorso van Aalsmeer weren ok de muuite
weerd; hier kon ok de veiling bezocht wo’n. Krek as in Broek op
Langedijk, een gruunteveiling, waor aj' veur spek en bonen mit
bieden mochten.
In Arnhem weren d'r wienkelders, waor pruufd wodden mocht. D’r
ankoppeld een uutstappien naor de Mosterdfebriek, glasfebriek en
et Eupenlocht Museum.
Doe ze wussen, waor Abraham de mosterd haelde, even stappen in et
Spiekerkertier.
Mit een toeristenkaorte naor Duutslaand om te waeterskienen en te
kleidoeveschieten in ....................... <,aovends stapt in
...................
D’r weren een peer snuggere jonges, die een taxi nammen om op et juuste
plak te geraeken. Nao een rit van een stief kertier belaanden ze in een
kroegien, waor de rest van de ploeg al een peer bierties naor binnen
geuten hadde.
Barbaarse mannen. Jaorovergang
1971/1972
Uut et noorden, dus vanof et Bûterheideveld, kwam een groot viking-
schip mit een botte tam tam et dörp binnen. De meerst geliekende
noorman hadde al veur wat argewaosie zorgd, deur even te wied naor de
boeg van et schip te lopen; en van twie meter hoogte naor beneden te
valen .Him mankeerde gelokkig niks, mar de boot was schendeseerd.
Dit jaor gongen ze niet naor de Brink, mar hul de stoet halt bi'j de
meule, die in volle glorie letterlik in de schienwarpers zet wodde.
Een machtig gezicht. Wat vandaege-an-de-dag nog alle aovens te zien
is; een tiedklokke dot et zwaore wark.
De waachtmeester Gehasse gong oons dörp verlaoten en wodde in et
zunnegien zet. Veur de Kermobri weren d'r trekpennen en een
onderplaete; op et karkhof wodden prachtig witte hekken plaetst.
Veur de bejaorden weren d'r 98 fruitmaanden.
Hettehokke Jaorovergang 1972/1973.
V.V.V.-dörpsbelang kreeg van de MOP een eigenmaekt hokke, van zels
schelde sparrebomen, anbeuden. Hier wodden 260 paolen in verwarkt.
De MOP was botte aktief en hadde ok speulwarktugen veur achter 'Het
Haventje' maekt, een klimtoestel., een schommel, een wip en een
evenwichtsbalke.
Veur de haandwiezer op 'e Brink was de beroepsmaotige hulp van
timmerman Haanstra en schilder Minkes inreupen.
Ok was d'r nog een net om de ni'je gedienen van et Dörpshuus te
beschaarmen.
Tot slot was d'r een zuvelpakket veur de oolderen.
Eupening van de schoele
Op de bewuste middag kwammen de MOP-jongens tegere in de gelagkaemer
van Hotel Schurer, waor doe nog vrouw Bouma, tegere mit moeke Veenstra,
de skepter zwaaide.
Genoeglik zatten ze in de rieten kuupstoelen rond de stamtaofel te
waachten op de dingen, die gebeuren gongen.
Volgens plan zollen ze de inspekteur van onderwies in de bakfietse van
Ale Peper naor schoele brengen, waor hi'j de eupening verrichten zol.
Now bleek d'r vot- en- daodlik een perbleem te wezen; Ale hadde zien
moterbakfiets krek verkocht. Goeie raod was duur..... Hi'j hadde nog
wel zien gewone bakfiets staon, dan mossen ze wel trappen, mar et was
ja mar een schietaentien. Dat mos kunnen.
Krek doe ze et d'r over had hadden, kwam inspekteur Bijlsma d'r in, een
allemachtig grote, staotige kerel van krapan twie meter en vast wel
honderdtachtig pond schone an de haoke.
Dat ze konnen et lachen al niet holen, hi'j scheut d'r mooi op in, en
wees Rones Veenstra an:’Jij moet maar trappen.’
Och here, et bakkien was niks te groot; dit wodde niks. Mar sportief as
disse man was, perbeerde hi'j et uut. Now ik kan jow zeggen:
Et gong krek an, tied om him te bedaenken kreeg hi'j niet, geliek wodde
et deksel dichte gooid, en rap gongen ze in optocht op et schoeleplein
an.
De flesse berenburg was in dit geval van hatte gund en wel besteded.
De braandstofkrisis Jaorovergang
1973/1974.
De al wat ooldere meensken zullen et heur nog wel herinneren; de
benzine op de bon, en de autolose zundaegen. Mit mekere in de bus naor
de bekerwedstried Heerenveen-Feyenoord
Dit dee de MOP in de turf belanen, want mit de winter veur de deure
mossen wi'j et wel waarm weten te holen. Turf was nargens meer te
kriegen. Goeie raod was duur, gelokkig hadde iene et lumineuze idee,
dat d'r op De Fochtel nog vene zat was om turf te stikken. Dat op naor
et Fochteler vene, waor ze zels doe de turf ofsteuken hebben, ze hadde
dan ok een oolderwets fermaot.
Vandaor et turfschip belaeden mit turf en aere nusteri'jen.
D'r zatten ondermeer 5 liedboeken veur de Vrouwenverening in.
De Gimmesiek een chronometer en 5 ballen.
Veur de kleuterschoele een poppekaaste en een schommel.
Crescendo een weerdebon;
Volleybalklub een wedstried- en een oefenballe.
Een medalliekaaste veur de Biljatklub en twie radiatoren mit
beneudigdheden veur de Sport.
De Soos een kegelspul, de kaortklub 10 pakkies kaorten.
SDM twie spotlochten en een regelkaaste veur de tenielverlochting.
De Zang een meziekbon.
De oolderkemmissie twie diavieuwers veur heur diatheek.
De plattelaansvrouwen taofelklieties. Twie baanken veur dörpsbelang en
de jeugdsoos een stereo-plaetedri'jer mit twie boksen.
Alle 65- plussers een diepvriespakket
In de vaort der volkeren, besefte de MOP zo staorigan ok daj' an de
reklame niet veurbi'j kunnen, dat d'r wodde een bod onthuld mit
de tekst:
“MAKKINGA OOK UW WOONCENTRUM, KOOP
HIER UW BOUWTERREIN”
Veur et eerst was d'r van butenof een kedoogien van de Jeugdsoos
Maksozo, die mit een grote vrouwelike poppe op de proppen kwam. Een
vrundelike protestaktie omdat d'r gien vrouwlu as lid van de MOP
toelaoten wodden. Ze mossen beloven, dat disse vrouw alle
vergeerderings van de MOP bi'jwonen zol.
Et Mopwief en de priesvraoge.
Op de eerstvolgende vergeerdering in jannewaori, wodde bedocht dat et
wief einliks ok een naeme hebben mos. Verschillende variaanten vleugen
over de taofel, mar de mannen kwammen d'r niet uut.
Weej' wat? Lao'we een priesvraoge uutschrieven. Aldus wodde daon
Oonze ereburgers keuzen de naeme Maja, inzunnen deur Frans Gorter, as
winner..
De pries beston uut een mooie witte geite en wodde tiedens een
gezellige aovend uutriekt.
Oonze veurzitter leut oons veur de tied even weten, dat hi'j ok een
aorigheitien mitneumen hadde veur Steensma en Oosterkamp, een
pottersdeusien mit echte droppies van de geite.
Et was dat wi'j et wussen, want wat gebeurde: Steensma bedaankte en nam
geliek een ‘droppien’ uut et deusien en vertrok gien spier.
Zi'j wel, ze scheuten dubbel van et lachen onder de taofel, wiels
Steensma mit een slok bier de naosmaek votspuulde.
Volleybalwedstried.
In feberwaori wodde de MOP deur de vrouwlu van de volleybalklub
uutneudigd om de ni'je ballen in te wijden. Hier wodde geheur an geven.
In lange onderbroek mit veur alle zekerhied een grote sluutspelde
op 'e gulpe.
80 jaor “DE EENDRACHT”
Jaorovergang 1974/1975.
In et jaor 1974, doe et 80 jaor leden was dat de zuvelfebriek opricht
wodde, ston de ooldejaorsviering in dit teken. En wel deur een
allemachtig grote keze, die et dörp binnen rulen kwam. Wieder een groot
staandbeeld, dat doomnee van Brederode veurstellen mos. Veur disse
beeltenis was d'r een kemmissie van drie man benuumd. Onderling was d'r
een dag ofspreuken, om hier mit an et wark te gaon. Wat d'r mis gong,
we weten et niet, mar et kwam hier op daele, dat ’Van Brederode’ deur
ien man maekt wodde. Toevalligerwieze woont die now in et eerste huus,
ja krek, an de Van Brederodestraote.
In een feestelik saemenwezen, was d'r veur alle toeschouwers een
stokkien keze, beschikber steld deur de jubilerende zuvelfebriek.
In de ni'j-jaorsrede gong veurzitter Jan Veenstra in op de geschiedenis
van de zuvelfebriek.
Wieder weren d'r een zelsmaekte toegangspoort veur de Iesklub, twie
schriefmezienen veur de Kermobri, ringen veur de kleuterschoele,
keuerek veur de Biljatklub.
Doomnee De Ridder kreeg een cheque van f. 500,00 as bi'jdrege
veur een ni'j orgel in de karke en was d’r veur Sportclub een doelnet.
De ooldere bevolking was veurzien van een pakket mit levensmiddels..
Rivaliteit et gezonde waopen.
Netuurlik het d'r altied stried west tussen de ooldejaorsploegen
onderling. Wie kreeg de meerste andacht van de kraanten
Veural een stokkien in de Liwwadder, die nogal selektief te wark gong,
wodde op twie jannewaori naor uutkeken.
En ni'jjaorsmorgen luusteren naor Radio Frieslaand, wat d'r op
aere plakken beurd was.
Now wus de Vesuvius, een echte stuntploeg, oons an de rechterkaante in
te haelen Wat wol et geval?: Ze pretendeerden in jan. '75 al heur
tienjaorig bestaon vieren te kunnen.
Hiertoe wodden wi'j nuugd op een receptie in kefé Et Anker (fem De
Haan).. In oonze keze (ze gunden him een twiede leven)
hewwe disse happening bezocht., elk mit een kesien onder de aarm
veur de Vesuviusleden.
Oflopen jaor hawwe al een fiet uuthaeld, deur een ooieveer op
heur nust in Tronde te zetten. Hiertoe wodde weer de HBO-kraene inzet.
Doch iene van de jongen van Punter wus naor et nust te klauteren en
hadde de ooieveer weer daelehaeld.
Laeter het oonze schilder, hi'j hadde gien hoogtevrees, him mit
de klauter-schoenen van Ab Wever an, weer op et nust zet.
Bi'j de Vesuvius is hi'j laeter mit een hoogwarker weer daelehaeld.
Hadden ze him maor staon laoten, want d'r het him nooit een ooieveer
melded.
Et twiede lustrum.
Et zat ze lange niet lekker, dat de Vesuvius heur zo te pakken neumen
hadde, en d'r zat mar ien middel op om dit wat te verzaachten:
Groter en grootser uutpakken. Gien fesien veur heurzels, mar veur
de hiele dörpsgemienschop, bi'jgelieks een feest in de tente.
Tussendeur hebben ze veur de zekerhied toch mar een fesien holen, waor
de ereburgers en oold-leden bi'j nuugt wodden.
Now hadden ze deur de autokros wat kontakten mit Barreld van Wijk uut
De Ulesprong, waor ze elk jaor een feest hullen. As dit in zoe'n
gat kan, moet dat hier ok wel kunnen.
Goeie raod was duur, dus besleuten ze om mit een ploegien een aovend
mit Van Wijk te praoten.
Daor dee blieken, dat ze begonnen weren mit andielen te warken.,
kotomme ze kwamen optogen weeromme en zaggen et al hielendal
zitten
Op 'e weerommereize zollen ze nog even opstikken bi'j de sekstente van
Berkoop, mar om reden dat ze heur daor as lid in schrieven mossen, niet
om et tientien, mar stel je veur dat de pelisie de boeken konterleerde,
dan stonnen ze d'r mooi op, dus bin ze mar deurreden.
Al mit al mos d'r nog een protte waeter deur de Lende, mar et feest
gong an. Hiertoe wodden d'r 140 andielen van elk vuuftig gulden
uutgeven, waorvan 40 verplicht deur de mop-leden ofneumen wodden mossen.
Doedertied nogal een hiet hangiezer, want honderd gulden, was doe al
gauw een hiel weekloon. De jongste jongen mossen et nog doen mit
buusgeld.
Aachterof een investering mit hoog rendement, want naoderhaand
bleken de
aandelen zeuventig gulden weerd, wiels d’r ok nog gratis toegan veur
twie evenementen bi’j was.
Stad en laand wodde ofbeld om de goedkoopste tente te kriegen, dit
gelokte in Drachten.
Now moej'm weten, dat jaors teveuren Pultrum uut Houtigehage in Berkoop
een tente opzet hadde, disse kwam mar muuilik overaende, want de
bouwers vierden heur eigen fesien in kafetaria 'Et Koepelbos'; en
verteerden op kosten van de feestkemmissie.
Dat ze weren waorschouwd disse meensken niet te nemen.
Doe oonze tentebouwers bi'j Evert heur broggien opatten; brocht Evert
dit dan ok ter spraoke. Aachterof dee blieken, dat Pultrum hierbi'j an
taofel zat.
Mar mit dubbel vel veur de hassens, kwam hi'j aovens tegere mit
de vrouw, om de tente in de gaten te holen.
Om de kosten wat te drokken wodden d'r ok een zweef en een dri'jmeulen
op et terrein toelaoten
Op de dag van et feest was d'r zomar inienend een man mit een aep, die
geern zien keunsten vertonen wol. Weer een peer tienties verdiend.
Zoe'n groots feest beleggen, hadde nogal wat voeten in eerde, en d'r
wodde dan ok hiel wat ofvergeerderd.
Gelokkig ston et hiele dörp aachter oons, en stelden Willem Mulder en
Fedde van der Bosch heur lanen ommenocht beschikber.
Ok de gemiente warkte mit deur de Wemeweg of te sluten veur deurgaond
verkeer, alliening de bus mos vri'je deurtocht hebben.
In geerwarking mit de meziekverening speulde woensdagsaovend de Johan
Willem Friso Kapel veur een 6 á 700 man.
Op vri'jdagaovend was d'r touwtrekken veur de dörpen en de
ooldejaorsploegen, hierveur hawwe oons locht opsteuken bi'j Minne
Brouwer uut Boyl.
Zaoterdags et Concours hyppique mit tuugpeerden, hiertoe hawwe een
beroep daon op Tjalling Bles, die ok nog meerdere jaoren in een
CH-kemmissie zeten het, Springruters en demonstraosies van de Tjonger
Schotsploeg en een Ponnieklub uut Vries.
Et hiele spul wodde dusdaonig sponserd, dat ze mit de eerste bezuker al
in de winst zatten. Hierdeur kon de intree dan ok hiel lege holen
wodden.
Over belangstelling hadden ze et eerste jaor toch al niet te klaegen,
want mit de artiesteparade was de tente an de kop toe vol, d'r wodden
zels meensken weerommestuurd.
De stemming zat d'r dan ok goed in, en et leup as een trein. De tap
hullen ze in eigen haand, mar veur et oberwark wodden vakkundige luden
in huurd.
Jammer genoeg weren d'r een peer tussen, die de zaeke besodemieterden
en stiekem meer glaezen op heur blaeden zetten.
Die hadden dan ok geliek ofdaon en laeter is altied mit eigen volk
warkt.
Een domper op et feest kregen ze zundagsmorgens, doe dee
blieken dat Willem Bos mit zien lillike ente tegen een boom
vleugen was.
Wat 'm in eerste anblik, niet zo goed anzien leut, waordeur d'r al
vreesd wodde, dat et feest oflast moeten wodden zol.
Gelokkig vul dit aachterof nog wel een betien mit.
Aj' et feest had hebben, moej' ok zorgen dat de boel weer an de
kaante komt, en dit vul et eerste jaor niet mit.
Deur mit glaswark te warken, was et veld bezi'jd mit glasscharven. Een
gezuuk van jewelste, daor bin zels de schoelrekiender bi'j inschaekeld;
die veur een ijsko et terrein naozochten.
Dit, nao dat we eerst al perbeerd hadden mit een grote veegmesiene dit
wark te klaoren.
“CRESCENDO” Jaorovergang 1975/1976.
Mit de meziek veurop gong et crescendo en daor aachteran een hiele
grote trommel mit trommelsleger. Wat dee blieken ... Uut disse trommel
kwammen twie MOP-leden steuken in een prachtig uniform. Rooie jasse mit
zwatte kraege en zwatte broek mit rooie bies.
Et hiele korps, veertig man stark wodde in uniform steuken.
De MOP was eerst al ankommen in een autobus, as stil protest, omdat de
busverbiening mit Berkoop opheven was. Ok weren d'r zelsmaekte
lanteerns veur op de Brink. en 81 oranjekoeken veur de bejaorden.
Al mit al kosten die uniforms de MOP een hiel rib uut heur lief.
Ze hebben d'r daonig op ommestend, as dit wel kon.
In eerste instaansie was et doel, dit plan tot uutvoer te brengen
middels een renteloos veurschot, dat de meziek bi'j de gemiente
an gaon kunnen zol.
Deur een stomme zet, jow moe'n an de poletiek nooit et aachterste aende
van jow tonge laoten zien, leup dit mis.
Gelokkig hadden ze goed boerd, en weren d'r nogal wat andielholers die
heur winst in de Mop-kas vloeien leuten, zodat et aachterof toch wel
een goeie beslissing west het.
Revue.
Et nocht en de wille die de meensken beleefden an et naospeulen van et
MOP-feest deden heur besluten een MOP-revue deur eigen leden op 'e
plaanken te brengen. Hiertoe wodde kontakt zocht mit Henk Bloemhoff die
et volgende MOP-lied kompeneerde:
"'t Is de Mop - Mop - Mop, die staot
veur jim klaor,
't is de Mop - Mop - Mop,
van ni'j tot oold jaor,
't is de Mop - Mop - Mop,
niet zwaor en niet slim,
't is de Mop - Mop - Mop,
die dot et veur jim.
Dit is now toch prachtig,
dit volk hier allemaol,
Dit is es wat aanders, dit
is nog es bertaol,
Wi'j hier mitmekere,
bedaenken pot en streek,
maeken elk an et lachen, die
saggerijnig keek.
Nee, we gaon niet togen,
gien ketting bi'j jim brek,
Niet weer dat gesleep uut de
hokken deur de drek.
Honnen bin niet neudig en
pelisie blief mar thuus,
"t Blift veur altied veilig,
gien volk meer om et huus.
Dit is es wat aanders, de
Mop die is aktief,
helpt jim uut de ruzie, en
manlu an een wief.
Makkinge springlevend, van
ni'j tot oolde jaor,
't Mop-se ploegien meensken
staot hieltied veur jim klaor.
Einliks best jammer, dat dit lied wat in de vergetelhied raekt is, wie
wet is d'r iene bi'j de Mop, die zorgen kan veur een knap stokkien
meziek hieronder, opdat et weer dienst doen gaot op brulloften en zo.
Mit vule overgaove wodde d'r altied oefend veur de revue's en mannen in
vrouwlude-kleren dot et altied. Et verhoogde in ieder geval de
saemheurighied binnen de MOP.
De Meulen - een hiet
hangiezer. Jaorovergang 1976/1977.
In de ooldejaorsnaacht van 1976 kwam de MOP mit een miniatuurmeule et
dörp binnenrieden, dit om de andacht te vestigen op de slechte staot
van oonze meule, deur de stormschae van nov. 1973.
Om in disse erbarmelike toestaand veraandering te brengen, het de MOP
een poging daon, om drie perti'jen n.l. de eigenaresse C.L.M. te
Meppel, de Friese Molenstichting en de Gemeente mitmekere omme taofel
te kriegen, hiertoe wodde d'r in jannewaori een vergeerdering belegd,
om onder veurzitterschop van de MOP, de onderlinge staandpunten
uutien te zetten.
Et zol angaon, mar op et allerleste mement trok de gemeente heur
terogge.
As giften weren d'r een grote viskoeme, 100 x 40 x 40 cm., een
naembottien mit "Et Trefpuntien" veur et dörpshuus, en
wodde de torenklokke van de karke verlocht., daornaost wodde de
fruitmaande weer es van stal haeld.
Twiede tentfeest.
Nao et welslaegen van et eerste feest, was d'r de vraoge hoe vaeke
kuwwe dit doen, om de vuuf jaor? In sommige ogen zol dit te lange
duren, dan zol de reklame van et feest votglieden.
Dus wodde besleuten om d'r nog mar es mitmekere tegenan te gaon in een
nog grootster feest. De tente die et eerste jaor te klein bleek,wodde
vergroot.
The Cats, et eerste jaor te duur, weerden vaaste legd. Een aorig
pregramme veur de bejaorden, et kon allemaol.
Veur et C.H. weren oons kampioenschoppen toewezen, en wodde de
anklieding anpast. Een stokmennig leden leupen de hiele dag mit een
bolhoetien op, en de vrouwlu, die de linten uutrieken zollen, wodden in
kostuum hezen.
Piet de Boer zol mit zien tienspan een demonstraosie geven.
Deur et votvalen van oonze reserves wodden d'r weer andielen uutgeven,
dit keer alliening mit vri'jkaorties en zonder winstdeling.
En weer wodde et een sukses.
Bi'j et ofbreken van de tente gong et mar krek goed. Et weren doe nog
tenten mit masten, en doe elk groepien de tente los har staon, reup d'r
iene :'Los mar'. Wat gebeurde, lat zich raoden, de tente vul in ien
slag tegen de vlakte
'Dit giet mooi', weren de woorden van de bewuste persoon.
De tentebouwers hatstikke kwaod!
Gelokkig vullen de masten bi'j mekeer daele, mar veur etzelde geld
weren ze breuken..
Molukkers.
In de anloop van et feest wodde d'r hiel wat of vergeerderd, somstieden
tot midden in de naacht. Et was in de tied, dat de Molukkers een trein
bi'j Yde-de Punt kaapt hadden en de schoele in Bovensmilde bezet
hullen. Dat de aangst d'r goed in zat, dee wel blieken uut et feit, dat
doe twie leden op 'e hoeke nog even stonnen nao te praoten, de iene in
een spiekerpak,de aere in een rood-wit-zwatstipte boezeroen. Et schaad
vul schienber wat over heur gezichten, want aanderdaegs dee et verhael
de ronde, dat d'r molukkers op 'e hoeke waorneumen weren.
De
dörpspompe Jaorovergang 1977/1978.
Veurdawwe allegeer waeterleiding hadden, wodde d'r in Makkinge een
protte gebruuk maekt van de dörpspompe om in et daegeliks waeter te
veurzien.
Hi'j gaf lekker helder waeter, en een protte kontakt, daor midden op de
Brink.
Middels een braandweerauto mit loeiende sirene kwammen de MOP- jongen
et dorp binnenrieden. Disse auto dateerde uut 1946 en hadde dienst daon
in Ferwerderadiel; de as braandweerluden verklede moppers, zorgden d'r
veur, dat mit een tal emmers waeter, de pompe weer waeter geven zol.
Dit lokte, en nao zoe'n vuuftien jaor dreugligging kuj' weer helder
waeter uut de pompe drinken. (Veur de tied was d'r al vakkundig naor
keken en was d'r een ni'je zoeger inzet)
Veur de dörpekampploeg was d'r een medalliekaaste, de iesklub twie
sni'jschoevers, veur v.c.m.-vrouwluden een wedstriedballe,
-manluden een oefenballe..
De Kermobri f. 500,00 en O.L.S. f.250,00 as anzet veur een
stencilmesiene.
Veur et peuterspeulplak in et Haventje 14 peuter- stoelties en een
grote warktaofel (wodde naoleverd). Sportklub kreeg twie baanken veur
de ooldere supporters (Golden girls).
Wieder wodde d'r 93 x een MOP-kelender uutrikt.
Fietstocht.
De eerste fietstocht verregende. Now moej' weten, dat ze twiehonderd
erepennings besteld hadden, dus dochten ze lao'we et nog mar es
perberen.
Gevolg twiehonderdvuuftig dielnemers, mossen ze nog naobestellen ok.
Nao dit sukses staot hi'j alle jaoren op et pergramme.
Doe d'r een drietal leden as kontrolepost, midden in de Appelschester
bossen posteerd wodden, zee Henk:' Dit is ok niks. Domweg een stempel
geven en vot bin ze weer.
We moe'n zien dawwe ze hier even vaaste holen, ik hebbe nog een stok
touw en een balle in de auto liggen.'
Dat ze hebben ze allemaol touwgien springen laoten en ze mossen de
balle tegen een paoltien schieten. Veur de schien, gavven ze hier dan
mar wat punten veur.
Laeter, bi'j et naokieken van de rit, kwammen twie leden een koppel
jongen op reesfietsen uut Donkerbroek aachterop.
Doe bin ze domweg even verkeerd reden, hebben midden in een hoeke mais
waacht, wat d'r gebeuren gong. En ja, ze reden bliend aachter heur an,
doe ze heur veurbi'j weren, hebben ze de route wieders naolopen.
Ze bin d'r uutkommen, al hadden ze wel wat riekelik kilemeters maekt.
Beverly Hillbillies en ,,MOP-pet"-show. Jaorovergang
1978/1979.
Deur barre weersomstanigheden wodde d'r uutweken naor Et Trefpuntien.
In een tjokvol huus wodde volop andacht schonken an de vlomark, die ok
al zoe'n vermaardhied hadde, dat ze hier zels in Beverly Hills van op
de hoogte weren.
En ,,granny,, hoogstpersoonlik mit een ni'je pette veur
maarktmeester Anne Meestringa anzetten kwam.
Ok weren d'r veur et dörpshuus dattig roestvri'j staolen
melkkannegies; een zelsmaekte poppekaaste veur de schoele.
Veur de karkvoogdij een elektrische hedeschere, Sportclub twie dug-outs
en elf voegelhokkies veur de voegelwaacht.
Tot slot nog drie speultoestellen van ronde paolen veur et speulveltien
aachter et Haventje.
Ningtig krentewegges vunnen bi'j disse ooldejaorsviering heur weg.
Uut de
locht. Jaorovergang 1979/1980
De eerste jannewaori van 1980 leut zich kenmarken, deurdat d'r een
boeiing 757 midden op de Brink van Makkinge wus te lanen.
Et geveerte hong an een KBO-kraene, gong hielendal over Hotel Schurer
henne, mit an boord ondermeer veurzitter Jan Stelma en kopiloot Roelof
Kromkamp.
Nao een lochtreize van twintig meter hoogte weren ze al wat wit om 'e
snute.
Wieder was d'r veur de schoele een klimhuus, een plattegrond veur
dörpsbelang, et karkepattien zal verlocht wodden en d'r komt een
beukenhede rondom de karke.
Een bloembak in de vorm van een strontbak op een boerewaegen in de
Brink.
Een schriefbod veur et dörpshuus. Een drokpasse veur de Kermobri. Ok
weren d'r honneteletten, die de overlast an honnestront beparken mossen.
Et jaorliks kedo een set glaezen mit ofdrok van de kaarke, de meule, de
Brink en de zuvelfebriek.
Disse wodden op bestelling maekt, en op 'e leste dag van et jaor veur
alle zekerhied nog uut et Brabantse haeld.
Inwijding middels inbraok.
Doe de jonges d'r mit gangs weren de stunt en de kastboom op te rumen;
was d'r iene van oonze leden, die d'r prat op gong, dat hi'j een eigen
huus in Makkinge kocht hadde.
De aeren zetten 'm veur et blok, deur op te marken, dat zoe'n huus
einliks inwijded wodden mos.
Now leut hi'j him niet kennen, mar hi'j had ien perbleem, gien sleutel.
Ach et moet gek kommen, dawwe daor niet wat op versieren kunnen en mit
een man of zeuven achte gongen ze op zien ni’je huus an.
En ja, waorachtig deur een rute op de ziedkaante konnen ze ien veur
iene et huus inklauteren.
Et was niet zo botte waarm, dus mar even bi'j Evert aachteromme veur
een flesse Berenburg, bier en fris.
Et huus ston nog mar net op zien naeme, en d'r weren allienig wat grote
koffiemokken, veur de timmerlu en schilders in huus. Et begon mit een
bojempien mar de bekers wodden al voller, et gong d'r ommeraek om toe.
Aachterof was d'r iene die zeej, dat ie mit draank op beter rieden kon,
want wat wol et geval, wat nooit daon wodde, hi'j zette de grote auto
in de kleine gerage.
Zien maot van de aandere kaante van et dörp, kon dit niet beaomen, hi'j
ree zien eigen huus veurbi'j en parkeerde an de aandere kaante van de
weg in een gruppe.
De dadde zol aanderdaegs bi'j een ni'je warkgever beginnen, dat het
hi'j mar een dag uutsteld.
Draank maekt meer kepot as jow lief is, et zal de mannen nog lange
heugen.
Zwaor geschut en belegering van de meule. Jaorovergang
1980/1981.
De MOP was et waachten zat en kwam mit zwaor geschut op 'e lappen.
D'r zat hielendal gien schot in om tot herstel van de meule te kommen,
vandaor dat besleuten was om him demonstratief te bezetten.
Et kenon beston uut een oolde waetertank, mit daor een apperaot in, dat
bruukt wodde om de voegels te verjaegen.
Om de dattig tellen scheut dit geval of en deur de holle ruumte gaf dit
een geweldige knal, soortgeliek an kerbiedschieten.
Dit kebaol dee heurzels, ok al wussen ze dat de knal kwam, nog
schrikken.
De meule wodde dag en naacht bezet holen tot 3 jannewaori, de aovend,
waorop serieus vergeerderd wodden zol deur Plaetselik belang, et
gemiente-bestuur, eigeneresse CLM en een tal instaansies op meulegebied.
As geschenken dit jaor: twiehonderd stoelen veur et Dörpshuus,
tien
stoelties veur et peuterspeulplak en twie wiendhokkies veur de
iesbaene.
Disse weren wel neudig, want de sni'j en haegelbui'jen vleugen
oons om de oren. Bi'j disse winterse taferelen sleuten de haost honderd
vleispakketten goed an.
De bezetting:
Disse haelde zels lanelike bekendhied, ondermeer deurdat De Telegraaf
hier een artikel an wijdde.
Et was best toeven in de meule, bi’j de meulenstien wodde een barregien
inricht, en pattie meensken zorgden veur de inwendige meenske.
Deur de slechte staot, waor de meule in verkeerde, was betreden van de
meule hier en daor echt geveerlik, en ok al wodde de anval van de
geitefokkers ofsleugen, et was veur de dörpsjeugd mar een tik an et
oor, om in de meule te kommen; ze klauterden tegen de regenpiepe op en
van et platte dak wieder omhogens.
Oonze veurzitter die ongelokken veurkommen wilde, stuurde ze vot, zo
vlogge as waeter sprongen ze zonder geveer te zien naor beneden.
Jan gong et minder of, hi'j vul ongelokkigerwieze deur de lochtkoepel
en brak een bien.
De
Onderzee-er. Jaorovergang 1981/1982.
Een allemachtig groot geveerte kwam slim opvalend de Brink opveren, de
MOPPYDICK; ien en aander as symboliek veur al die meensken, die altied
zonder op te valen, zoe'n protte wark veur de Makkingester
dörpsgemienschop doen. (De stille warkers.)
An boord bleken twie baanken veur 'Sportclub', et hattekaamp een
springtoestel veur de dwarggeiten en twie voerbakken; twie
sni'jschoevers veur de iesklub; VCM 4 ballen en de E.H.B.O. een
echte oefenpoppe mit de naeme Annie.
In disse symboliek paste een MOP-klompien mit dreugboeket.
Eupening zwembad en kantine Lotus.
De leden van Lotus gavven heur d'r al aorig bi'j, oflopen feest hadden
zi'j al mit oonze touwtrekwedstried mit daon, nee niet in heur tenue,
mar netties in de kleren..
Now hadden ze de MOP nuugd veur de eupening van heur ni'je zwembad en
kantine.
Mit een ploegien van een man of zeuven wodde hier geheur angeven. Et
duurde niet lange of bi'j de eerste toespraoke, gong d'r al iene uut de
kleren.
'Verrek', zee d'r iene 'die ken ik, die staot in Oosterwoolde in
een winkel, en ik kom him ok nog wel es in et uutgaonsleven tegen.
Me dunkt dan wi'j' ok opvalen'
Naoderhaand doe et beloop zien aende kreeg en ze al op huus an zollen,
de Makkingesters weren al vot, wodden ze tegenholen.
'Jim moe'n now nog niet vot gaon, wi'j hebben krek een fust bier
ansleuten, dat moet leeg.'
Bier....dat was niet tegen dovemansoren zegd, en nao hiel wat henne-
en- weer gepraot, wodden de kleren an de struken hongen, en et zwembad
in MOP-tenue (pette op en klompen an) in gebruuk neumen.
Naoderhaand hebben ze nog even opsteuken bi'j Evert en Tietje, de
verhaelen, die doe loskwammen passen niet in dit stok.
Naachtelike
Kermistoestanen. Jaorovergang 1982/1983.
Wie wel es in een zweefmeule zeten het, wet daj' daor beter niet in
zitten kunnen gaon, nao et nuttigen van vette eulibollen en de neudige
draank.
Now kwam de MOP mit een eigenmaekte dri'jmeulen op de proppen; disse
woddde andreven deur de oftakasse van een trekker, dus hoe meer gas
....juust ..des te hadder as hi'j in de ronte vleug.
In disse sfeer was d'r een traktaosie op euliebollen veur et pebliek.
In de karke zal een ni'je klosetpot mit waeterspuling plaetst wodden;
een schommel veur de kleuterschoele; twie netten veur aachter de doelen
veur 'Sportclub' en et Dörpshuus een ofwasmesie..
Bi'j dit treffen, was d'r ok een persentien veur de MOP.
Veurzitter Durk Oosterhof kreeg uut hanen van oold-veurzitter Jan
Nijholt een bod, schilderd deur Andries Minkes.
Dit het plak kregen in kefé Jongediek.
Muzikaal
intermetzo Jaorovergang 1983/1984.
In de ooldejaorsnaacht van "83 op "84 zorgde de MOP veur meziek in de
tente, deur een grote piano en hoge bas.
Dit ston veur de bi'jdraege, die de MOP schonk an oons vrouwludekoor
'De Vriendschap' , in et kopen van een ni'je piano.
Hopelik was die d'r veur de tiende meert, want dan orgeniseert de MOP
een telentejacht, en komt hi'j mooi van passe.
Ok wodde de trappe in de karke maekt, de peuterzael kreeg twie grote
hoolten puzzels, de soos een bingospel, wieder nemt de MOP de
stroom-kosten veur heur rekening en maekt et tegere mit aere verenings
meugelik te kiezen veur et duurste wiekensysteem.
Ok zullen de welkomsbodden verni'jd wodden.
Een maantien mit keze is d'r veur alle 65- plussers.
Iene grote fiets zol niet
kunnen? Jaorovergang 1984/1985
Om et tegendiel te bewiezen, komt de MOP op een tienpersoonsfiets de
hoeke op rieden. Et geveerte was tien meter lang.
D'r wodde even stillestaon bi'j et sluten van de zuvelfebriek. ,,De
Eendracht,, en alleman hoopte, dat hier een goeie bestemming veur
meugen kommen zol, zodat et gien grote ruïne wodden zal.
Ze stonnen d'r netties op, want de plattelaansvrouwlu hadden zorgd veur
ni'je petten.
Tuurlik wodde d'r et ien en aander votgeven, zo weren d'r ni'je
helsters veur de kalverfokklub. De bodden van 'Welkom in Makkinge'
weren an vervanging toe, vandaor 4 ni'jen.
De beheerders van et karkhof, Donker en Schurer, zaggen heur wark
verlicht deur een zelsriedende mi'j-mesiene. Een draodmikrefoon veur de
St. Geluudsinstellaosie. en veur de Gimmestiek twie volleyballen.
110 huusholings kun in et vervolg uut MOP-bekers drinken.
Een
teroggeblik. Jaorovergang
1986/19
In een hiele grote gele klompe stond de MOP stille bi'j et vierde
lustrum
In disse klompe weerden de zeuven oold-MOP-veurzitters binnenscheuven.
Elk veur himzels, blikte terogge op de tied, dat hi'j an et roer van de
MOP ston. Zo kwam de hiele geschiedenis an bod.
Ok bevatte de klompe weer et neudige veur de verschillende verenings
zoas: Een zitbaank in de bos; f. 500 as bi'jdrege veur et opknappen van
et dak van de karke; grimeerdeuze veur de tenielverening.
De E.H.B.O. een dreegbaore; veur de peuters een varfbod mit
anti-knoei-potties en veur et dörpshuus ni'je tenielgedienen.
Poletiek
stuntwark. Jaorovergang 1985/1986.
Omdat et niet altied giet, zo as ze bi'j de MOP daenken, dat et gaon
zol moeten, wodde d'r een ’politieke parti'j’ opricht: De
PET-perti'j."86.
An de vuuf toekomstige fraktieleden kon et pebliek vraogen ofvuren, wat
tot kolderrieke taferelen leidde.
De Sport dee goeie zaeken, deur mar liefst dattigduzend stienen te
kriegen veur heur kleedhokke. Onderwies (de schoele) een EHBO-tasse; de
Meuleruters een kevot; V.V.V. kan touwtrekken mit een ni'j touw.
Jeugdbeleid (de jeugdsoos) acht barkrokken.
De wethoolder Evert Jongediek, die onder meer sportzaeken in de
pottefulie het, zette Top-scorer Ate Bijstra in et zunnigien en
overhaandigde de Stellingwarfbokaal.
An et aende van de aovend wodde de perti'j opheven.
In de veuraovend weren d'r thermometers mit inskriptie en
dreugbloemstokkien uutreikt.
Saemheurighied. Jaorovergang 1987/1988.
Makkinge is een dörp, waor et vereningsleven bluuit, mar liefst
veertien verenings bin aktief. Disse weren deur middel van een puzel
mit verschillende stokken in mekere zet, zodoende kwammen de karke , de
meulen en de brink veur et locht.
Veur de karkeraod weren d'r een elektrische klokke en
toafelklieties.
Karkvoogdij een ni'j stienen hokke op et karkhof, een eigenmaekte
dubbele schommel (toolter) veur et peuterschoeleplak.
De oolde vlagge bleek an vervanging toe, dus was d'r een ni'je anschaft.
Wieder wodde d'r weer es een kelender anbeuden.
De
lokemetief Jaorovergang 1988/1989.
Ze was eerder dit jaor al bruukt om de eupening van et ni'je fietspad
op et Bûterheideveld luuster bi'j te zetten. Now weren d'r drie
anhangers an koppeld.
D'r stonnen markkraomen op, die verwezen naor de vloomart.
As marklu uutdost, zorgden ze weer veur de neudige negoosie: Een kevot
veur de vrouwenver.; de Iesklub vuuftig sukelao-bekers; drie
wedstriedballen veur et vollybal; en veur de gimmestiek drie
oefenballen. en 2500 gulden veur et uniformfoons.
Een keerzestaander verhoogt de sfeer bi'j de oolden-van-daegen.
Zo lek as een
zi'je. Jaorovergang 1989/1990.
Et was benao niet dreuge te holen, de mannen hoosden om et leven, mar
konnen de voeten zeker niet dreuge holen en dan te bedaenken, dat ze
altied gaon veur kwaliteit. Wie ze disse keer op pad stuurd hebben, ik
wete et niet, zeker is wel, dat die Gietersen niet te vertrouwen binnen.
D'r kwammen twie waeterpompen an te passe, om him drievende te holen.
Gelokkig hadden ze d'r al een betien rekening mit holen, en weren de
meerste kedoos in waeterdicht pepier verpakt.
Anderdaegs is hi'j mit een veurlaeder uut de Wiek trokken, hierbi'j
wodde d'r zovule schae anricht, dat teroggebrengen niet meer kon en het
de rooie haene him d'r meester over maekt.
Wat d'r van overbleef weren een peer hanen vol mit spiekers, gewoonweg
gien dingen, die'j in een boot beheuren an te treffen.
De MOP, zat et niet echt mit, ze hadden al een lint en een schere
schonken an et 'Multi-functionele centrum i.o.' om de eupening van een
ni'je sporthal te laoten verrichten.
Wat laeter dee blieken, is die deur poletiek gekronkel in Haulerwiek
terechte kommen.
Veur een opknapbeurt van de karke bin d'r 4 emmers mit varfe en
vuufentwintighonderd pegels; een kevot veur de zang; twee ni'je
boxen veur de Geluudskommissie en tot slot een cheque van duuzend
gulden veur de Volksdaansers.
Annemarie Jorritsma.
Bi'j et honderdjaorig bestaon van Makkinge, wodde d'r een verzaemel- en
opdrachtenspul bedocht deur Oene Spoelstra. Ok de MOP was hierbi'j
netuurlik van de perti'j. De opdracht die et meerste soelaas beud, was:
Hael een bekende Nederlaner naor Makkinge, disse mag niet uut
Stallingwarf-Oostaende kommen. Zorg veur vervoer en een goed onthael,
en zorg d'r veur, dat die om negen ure een toespraoke hoolt van zoe'n
vuuf menuten, waor hi'j zien eigen persoon of prestaosies in beschrift.
Laot dit now krek op een zundag plak vienen, en mar liefst 7 verienings
of buurten kwammen op de naeme van Jan Pelleboer en evenzovule keren
wodde de beste man beld. Now doet disse man dit uut principe niet op
zundag, en hadde daonig de smoor in op al die Makkingesters.
De MOP perbeerde Wiegel te strikken, dit gelokte niet, mar via et zelde
kenaol wussen ze et ankommende telent Annemarie Jorritsma (laeter
vice-premier) over te haelen naor Makkinge te kommen.
Wieder weren d'r doe Jan Nijland, Teun Tolman, Piet de Boer, Jeen v.d.
Berg, Geert Kuiper, Jan Eise Kromkamp, Anne Jan Portijk, Johan
Wardenier, Jan Roelof Kruithof, Atje Keulen-Deelstra en Bennie v.d.
Weide en sportverslaggever en spottekener Dick van Rijn..
De dadde ereburger.
Nao 25 jaor lidmaotschop was et niet meer as billik, dat Evert
ereburger van de MOP wodde. Dit heugelike feit vun plak bi'j de
receptie, die ter ere van dit vuventwintig-jaorig bestaon in de
feesttente holen wodde.
Ni'je
warkgelegenhied. Jaorovergang 1990/1991.
Jim konnen et lezen in de Liwwadder Kraante. In Makkinge zol zich een
ni'je schone industrie vestigen. Ien en aander zol tot stand kommen
wezen deur kontakten, die sersjaant Martin de Boer onderhul mit
een bedrief in et westen van oons laand.
Dat zocht een ni'j plak om heur te vestigen en, van praot komt praot,
wodde hierbi'j et oge valen laoten op et oolde sportterrein.
Ok zol dit nogal wat warkgelegenhied opleveren. ...wat et was...dee
blieken, doe een grote M25, bommewarper de Brink op kwam. .... Aorig in
de zeik zet.
Veur de vuventwintigste keer wodde dit vierd mit een happien en
draankien, en was d'r veur de Sport een vlaggemast; veur de schoele een
koelkaaste veur de overblievers; de visklub een kevot ter ondersteuning
van heur jeugdmiddag; de jeugdklub een fietserek.
De kalverfokklub showde heur ni'je uutdosting, mit meugelik maekt deur
de MOP.
Ni'je meziekmappen weren d'r veur 'Crescendo'.
Twie ponyrieders wodden d'r huldigd n.l. Petra Punter en André Mulder.
Vleispakketten vunnen heur weg eerder op 'e aovend.
.
Is et pet mit de Mop, of ped mit de MOP. Jaorovergang
1991/1992.
In de koppies van de MOP was een ni'j idee boren. Wat wol et geval?
In et Noorhollandse.Schagen hul men jaorliks een autopedrees.
Veur wat ni'js is de MOP altied te vienen, dus showden ze disse aovend
heur proto-type, een hiele grote autoped.
Om bi'j de tied te blieven was d'r een ni'je klokke veur et dörpshuus;
cd-bonnen veur et Haventje; de Meulekommissie een tillevisie mit video;
drinkbekers veur de schoele; twie baanken veur Sportclub.
Grimeerspullen veur de teneelverening. Veur de plattelaansvrouwen een
hiele markkraom.
Om op de ped terogge te kommen, wodde alleman opreupen mit te doen an
een autopedrees, die in juni holen wodden zol.
De MOP slat de
tromme. Jaorovergang 1992/1993.
Mit een kopie van de schoele, en een protte geroffel van trommen leut
de MOP blieken, dat et zo staorigan tied wodde veur een ni'je schoele.
Deurdat d'r nogal wat kiender bi'jkommen weren, bast de schoele uut
zien voegen.
Dit kan zo niet langer.
Toepasselik weren d'r veur de meziek zes ni'je uniforms. Et dorpshuus
kreeg vloerbedekking veur op et podium. De kas van de zangverening
wodde spekt, een schoelbod veur de peuters en elke buurt een
volleyballe.
De 65-plussers wodden verrast mit een fruitpakket.
Jammer dat dit jaor de drumband opheven wodde, mar de oold-leden, now
moppers, gavven een beste roffel vot.
De
lift. Jaorovergang
1993/1994.
Nee, dit is niet de titel van de film, mar staot veur de symboliek, dat
Makkinge aorig in de lift zit; zoe'n geval wodde daoromme
ok an museum 'Et Oold Ark' anbeuden, in de vorm van een stoeltieslift,
die et ok minder valide meensken meugelik maeken moet 'Oold Ark'
te bezuken.
Voet- en körfbal kreeg twie lochtmasten, de plattelaansvrouwen een
diaprojekter en de EHBO twie goed vulde tassen
Veur elke buurt een volleyballe. De VCM kreeg een net vol ballen.
De 65-plussers een plaantebakkien.
Iesnocht. Jaorovergang
1994/1995.
Dat MOP-leden rationeel daenken kunnen, bleek wel uut disse stunt.
Wat was et geval? Ze hadden een enorme scheuvel , 8 meter lang en mit
een hoogte van drie meter maekt. Een echte Viking, die as autoped, deur
zes moppers zo'n bulte snelhied maeken kon, dat mochten ze een
wedstried holen, ze zels Falco Zandstra naor huus rieden zollen.
In vaort gong et dan ok op de iesbaene an. Waor, mit deur
zelswarkzemhied van et Iesklub-bestuur en vri'jwilligers, de 25 jaor
oolde verlochting verni'jd wodde.
.Wieder weren d'r 75.000 vellen pepier veur de Kermobri, veur de
Begraffenisverening een kevot mit inhoold veur de realiseerde aula, ok
iene, veur et peuterspeulplak, mit et doel, dat ze daor een peer
veilige autopeds veur kopen zullen, de O.L.S. een oolde tillevisie en
een koffiewaarmhooldbusse.
Honderddattig pakketten mit koeke en sopie (snert, koeke en
poeiermelk.) lat blieken dat Makkinge vergriest.
Dattig jaor en dattig keer uutpakken. Jaorovergang 1995/1996.
De vergriezing mag dan toenemen, et vereningsleven teelt tierig in
Makkinge, wat dot blieken uut et uutrieken van dattig giften.
Een ofzetlint veur een volleybalveld an alle buurten.
Teneel een smienkdeuze. De biljatklub een set ballen. De zangverening
mag heur piano stemmen laoten. Voet en körfbal ieder een balle en ok
iene veur de Gimmestiek en 'V.C.M.'
Pakhoezen veur de meziek. Een harke veur de sjeu-de-boelers.
IJsklub een ni'je vlagge, de oolde was anvreten deur de rotten, dus dee
de MOP d'r geliek mar een busse rottevergif bi'j. De visklub een
enveloppe..
‘t Haventje CD-bonnen. De peuters twie trapauto's
begraffenisverening een kevot.. Plattelaansvrouwen een knutselpakket,
nudistekaamp 'Lotus' een eveloppe. Pepier veur de supportersverening.
Et hattekaamp wodde verblieded mit een dwargbok, dit om inteelt te
veurkommen. (Nao et dekseizoen?).
Volksdaansen een bi'jdrege. Et fietsehokke bi'j de schoele verlochting.
De Weijert geld.
De Kalverfokklub touw en paolen. EHBO anvulling op heur koffers.
St. Dörpshuus een anplakbod. De ANBO een financiele injektie en tot
slot een fietsestaander veur bi'j Oold Ark..
Daornaost wodden Jacob en Alie Wemer naor veuren haeld.
Jacob hadde in zien funktie van baankhoolder een protte haand- en
spandiensten veur de MOP daon, as hieromme vraogd wodde.
Mit de kroeg naor de kroeg.
Doe Evert en Tietje et kefé uutgongen, en overdeden an Jogchem Visser
en Annemarie Veldman, wodde d'r een waegen optuugd om dienst te doen as
kroeg.
Om op disse gepaste wieze Evert veerwel te zeggen, want krek as een aer
trouwen giet, mos ok Evert nao roem dattig jaor de MOP verlaoten.
In al die jaoren het Evert zoe'n honderd Moppers zien gaon en kommen.
Veur disse gelegenhied wodde d'r op et Sportveld een groepsfoto maekt
van alle oolde en tegenwoordige leden en now an Evert anbeuden.
Bezet uut
liefsbehoold. Jaorovergang 1996/1997.
De bezetting van de meule hadde vertuten daon, dat now 'Et Haventje',
doemd was heur bestaon te verliezen, sprongen de MOP-jongen hierveur in
de bres. Daoromme wodde daegs nao de kastdaegen de boel barrikeerd, en
aachter de schaarms overleg voerd mit de Geriffermeerde Karke in
Donkerbroek en de kotleden oprichte aktiegroep veur behoold van ,,Et
Haventje,,
De Gerriffermeerde karke die d'r jaorliks f. 55.000 veur jeugdwark
tegenan gooide, wil hier mit stoppen, omdat d'r gien geleuf meer
uutdregen wodde. De gemeente daorintegen wil heur subsidie van f.
1000,00 intrekken, juust omdat d'r geleufsaktiviteiten holen wodden
zollen.
Ien en aander hadde as risseltaot, dat de warkgroep en et bestuur van
de karke om 'e taofel zitten gaon zullen, waornao de karkeraod op 8
jannewaori een beslissing nemt, wat d'r wieders gebeuren gaon zal.
Veur 'Sportclub', die een groot tal jeugdleden het, wodden d'r twie
kleine doelen anbeuden; de geluudskemmissie twie staonders; veur et
teniel weren d'r drie kapspiegels; op de peuteropvang zitten meer
meiden as jongen (komt dit wel goed?) vandaor dat d'r een poppehuus
anbeuden is. Een ni'j metaolen hekke veur et Karkhof.
En ok nog zitbaanken veur de anmoedigers van Sportclub. De Iesklub een
verbaandtrommel en de jonge plattelaandsvrouwen een geldelike bi'jdrege.
Op 10 jannewaori bericht de Liwwadder Kraante: Dat de karke et besluut
uutsteld hebben zol tot feberwaori en op 18 feberwaori, dat d'r een
reddende engel opstaon was.
De woningkoperaosie De Stellingwarven nemt et gebouw over, wiels
gemeentelike orgenisaosie Scala zorgt veur een dieltied-jongerenwarker.
Missie lokt.!!
De slopershaemer giet in de
schoele. Jaorovergang 1997/1998.
Een zels in mekeer zette kraene zorgde veur een botte tumult in de
ooldejaorsnaacht van 1997.
De naomaekte schoele wodde deur disse kraene, veurzien van een enorme
sloopkoegel, totaal tegen de vlakte warkt.
Et was de MOP onderhaand mienens dat d'r, nao vule geharrewar, een
ni'je schoele kommen moeten zol.
D'r was dan ok duzend gulden veur de schoele, niet veur sloop- of
ni'jbouw, mar veur schoelemateriaol. De Weijert een ni'je tillevisie,
om de film over de Weijert zien te laoten.
Veur de vri'jwillegers van Oold Ark drie stofjassen. EHBO twie koffers,
Iesklub rubberen matten, en de som van vuventwintighonderd gulden veur
verduustering van zael twieje van et Dörpshuus.
Een bok mit vleugels “De
Boktor” Jaorovergang 1998/1999.
De MOP die altied groot uutpakt, zorgde d'r veur, dat disse keer die
kleine miezerige insekten as boktorren, die de karke antast hadden,
groot uut te beelden, deur een almachtig goed stinkende bok, deur de
MOP behongen mit prachtige vleugels op et teniel te zetten.
Et herstel van de karke vragt om tienduzenden guldens.
Waor dat geld wegkommen moet, mag de MOP an de kont roesten, as et d'r
mar komt.
Geldelik hadde zi'j ok een strop, omdat deur et natte veurjaor de
autokros op et allerlaeste mement aflast wodden mos.
Toch wodde d'r et neudige uutrikt: Een staandebod veur in de kantine
van 'Sportclub';'VCM' een net. De volksdaansers een bi'jdrege veur
een ni'j kestuum. De in Makkinge oprichte groep ,,Mag het wat
minder zijn,, tegen zinloos geweld een bedrag van vuufhonderd
gulden.
De sjeu-de-boelers een koersbalmatte, zodat ze ok binnen speulen
kunnen.
Ankondiging feest, middels krosauto en feesttente. In "99 zal et heven!
.
De MOP scheut mit maggistraol vuurwaark twie ieuwen vot. Jaorovergang 1999/2000.
Op een grote boerewaegen ston een almachtig groot kenon, die disse
aovend ofscheuten gaon wodden zol.
Alveurens hier toe te kommen, weren d'r weer kedo's, zoas mar liefst
vuufduzend gulden veur et opknappen van de karke.
Vuufhonderd pegels veur de plattelaansvrouwen. Pruken veur de
tenielverening
Een schommel (toolter) veur de peuters. En een overhaedprojector
(plaetiesofbeeld- apperaot) veur alle verenings in et dörp
Hiernao gong et in optocht et dörp uut, waor an de Wemeweg een hiel
mooi vuurwark ofsteuken wodde.
Wieder wodde d'r een verjaordagskelinder uutdield.
WWW.MOP-MAKKINGA.NL Jaororvergang 2000/2001.
Mit de tied mitgaond, kuj' vanof now de MOP ok antreffen op et
Internet. Surf naor WWW.MOP-MAKKINGA.NL.
Veur et dörpshuus wodde d'r een veurstelling geven, deur een in
zulverpepier inpakte robot.
Wat daor zoal op ston, koj' zien deur middel van een groot scharm,
waorop de eerder opneumen grappige filmpies op dri'jd wodden; waorin de
kedo's in andreugen wodden.
Een auto-ongelok, bijdrege EHBO - Een opnaeme van zingende MOP-jongen-
zangles is niet overbeudig.- gift 500 veur de Vriendschap.
VCM f. 250, en f.400,00 veur et archief van De Weijert, wiels de
schoelepleinkemmissie 2000 pegels rieker wodde.
Wieder een kelender mit foto's van oold Makkinge.
“Club Bedstee” Et huus van genot en plezier. Jaororvergang 2001/2002.
Mit een hiele grote adverteensie in de Ni'je Ooststellingwarver wodde
een veurankondiging van disse stunt bi'j et pebliek bekend maekt.
Benao alle Makkemers wodden op et verkeerde bien zet, en d'r wodde al
schaande van spreuken, dat dit midden in Makkinge plak vienen zol.
Buurt en dörpsbelang wodden d'r op anspreuken en zollen d'r wark van
maeken moeten. D'r weren toch veurschriften, twie van die sekstenten,
in Berkoop en Else, was toch wel genoeg.
Ni'jjaorsmorgen kwam de aep uut de mouwe; deur de komst van een
roze-schilderde veurmaolige SRV bus, vol mit lichtekouwen, wodden
disse animeer-
maegies ien veur iene an et pebliek veursteld. Now, ze hadden weinig om
et lief, en krek in een winterse regenbujje schrompelde et kerelwezen,
zodat de mannen aorig wiefachtig overkwammen.
Mit hoge stemmegies en berenburg schinkend, wodden de kerels paaid om
mit naor binnen te gaon.
Now bin Moppers meensken van vleis en bloed, zeg mar deursnee-meensken,
zo is d’r nog een verhael uut een hiel veer verleden, doe een
doldrieste Mopper et in de sekstente van Berkoop te hiete onder de
voeten kreeg.
Wat of d'r him daor ofspeuld het, kunnen jow en ik naor gissen, mar
hi'j hadde et zo benauwd, dat hi'j mit zien kleren onder de aarms naor
buten vleug.
Terogge naor de stunt wodde ok et ien en aander anbeuden, zoas een
magnetron veur de iesklub; de volksdaansers 100 euro veur ni'je kleren;
veur et zelde doel 350 veur de meziek; de gimmestiek 200 euro; de soos
een sjoelbak en een traptrekker veur et peuterspeulplak.
De 65-plussers een Weijertbolle mit smeerkeze..
Veurofgaond hadden ze perbeerd de vaastlopen moter van de S.R.V.-waegen
los te kriegen, middels een flinke scheut benzine, hierdeur ontston d’r
een steekvlamme van wel twie meter hoogte.
Ien van de mannen vleug dit midden in et gezichte, hi’j wus wat him te
doen stond, reup om waeter, mar vleug geliek naor een drinkbak van de
koenen om zien gezicht te koelen.
Hi’j is d’r al een dag botte beroerd van west, mar het d’r gien
kwaolike gevolgen an overhullen.
Dit speulde him of veur de kastdaegen, en doe hadde d’r nog gien
meenske ienig
Besef van de raamp die him ni’j-jaorsnaacht bi’j een kefebraand
in Volendam ofspeulen zol. Geliek an disse Mopper heulen d’r pattie
meensken heur heufd koel, deur geliek et waeter in te springen.
Verkeersveilighied. Jaorovergang 2002/2003.
An de haand van wat opneumen videofilmpies, wodde d’r een kwis angaonde
de regels van et verkeer holen.
Hiertoe wodden d’r eerder in et Drentse wat opnaemen maekt.
Hult in reflectorjassen, wodden d’r verschillende ongelokken in scene
zet.
Et leek krek echt, en mennig meenske vreug him of, wat as d’r wel niet
gebeurd mocht wezen?
Liek as aandere jaoren was de kastboom in de brink weer optuugd, in een
spontaone opwelling hebben de MOP-jonges mitmekere een kastconcert
holen.
Deur et onverwaachte hebben d’r mar een stok as twelf meensken van
genieten kunt.
Mit de buurtbus naor de serviceflat. Jaorovergang 2003/2004.
Wiels de meensken stonnen te waachten op wat d’r kommen zol, zaggen ze
de buurtbus een rontien deur et dörp maeken.
Hi’j zat barstensvol ,,bejaorden,, die heur zels uut de bus heisterden,
en al strompelend koers zetten naor et veurmaolige schoeleplein.
Hier wodde een twieverdiepingshoge flat uutbeeld.
In zien ni’j-jaorsrede ston de veurzitter effen stille bi’j et
overlieden van heur ooldste lid Jacob Bos. Jappie was gedurende
vuvendattig jaor et boegbeeld en vlaggedreger van de MOP.
Et lege plak midden in et dörp, deur et wegvalen van de schoele, was de
Mop
een doorn in et oge.
In een gesprek mit wethoolder Bouma, blieken d’r plannen op staepel te
staon, om tegere mit woningbouwver. ,,Aktium,, te kommen tot een
veurziening veur bejaorden.
De MOP juicht dit toe, temeer daor d’r dan weer wat wonings vri’jkommen
veur jonge Makkingasters mit trouwplannen.
Vandaor dat ze hierveur al een naeme bedocht hebben.:.,,Noast de Wieck,,
Disse wodde op een ludieke wieze onthult deur ,,oold-wethoolder Bouma,,.
Dit geft an dat ze verwaachten dat et nogwel herwerts jaoren duren zal,
veurdat dit gebouw tot staand komt..
Ok ziet de MOP et belang van de buurtbus, mit naeme veur bejaorden een
makkelik vervoersmiddel.
Om disse in disse muuilike periode in staand te holen, kregen alle
vuvenzestigplussers een vierrittenkaorte en een route en tiedskaorte.
Wieder was d’r duuzend euro veur de Stichting Dörpshuus om ni’je
taofels en stoelen an te schaffen.
Veur de Meule een bi’jdraoge van twiehonderdenvuuftig euro in de
anschaf van een vitrinekaaste.
De Iesklub viert dit jaor heur honderdvuventwintig jaorig bestaon en
het wilde plannen om hier een groots feest veur op touw te zetten..
Dat feesten de neudige kosten mit heur mit brengen, wet de MOP, vandaor
dat ze hiertoe een gift van vuufhonderd euro dot.
De Jeu-de-Boulle club is botte aktief, zowel buten as binnen, ter
dekking van de kosten kriegen ze van de MOP twiehonderdvuuftig euro.
Veur de bejaorden was d’r een pakket mit spul veur bi’j de borrel, zoas
een stokkien keze, worst, toast, flessien wien, pak fris, borrelnoties
en zok-zo-wat.
Een overzicht van de tentefeesten in Makkinge.
1975: De Johan Willem Friso Kapel.
Concours Hyppique mit: De Friese
Aanspanning
M. en Z. springrebrieken.
Friese tuugpeerden
Friese volksdaangroep Ooldeschoot
Ponnieklub uut Vries.
MOP sterreparade 1975 mit
Ab Hofstee
Imca Marina
John Woodhouse
Gebroeders Brouwer
Peter Oran
De Twee Pinten
Zig Zag Trio
De Dizzy Mans Band
1977: Artiestenparade: m.m.v.
THE CATS
SOUND AROUND
SHORELINE
1979 VOLKSDANSFESTIJN.
OPENLUCHTSPEL ,, WEGPIRATEN,,
BEJAARDENMIDDAG m..m.v.: COCKTAIL - TRIO.
DE CASSELIES
MIEKE
KLEIN RIEKSIE
MOP
- REUNIE m.m.v. DE KLOKKESTOELERS
CONCOURS HYPPIQUE met o.a. TUIGPAARDEN, zowel
fries als bovenlands ras.
Demonstratie M. en Z.. ruiters
FRIES TIENSPAN PIET DE BOER
GROTE ARTIESTENPARADE m.m.v. FRANK EN MIRELLA
JOHN WOODHOUSE
ALBERT WEST
JAN BOEZEROEN
FRANS VROLIJK
ZIG ZAG TRIO.
THE NEW ADVENTURES.
B.Z.N..
1981 BEJAARDENMIDDAG
m.m.v. KLEIN RIEKSIE
JAN EN ZWAAN
RENDEZ - VOUS
VOLKSDANSAOVEND
ARTIESTENPARADE m.m.v. MAYWOOD
JAN EN ZWAAN
DE SLIJPERS
RENDEZ - VOUS.
CONCOURSHYPPIQUE met o.a. TWEE
KAMPIOENSCHAPPEN
TUIGPAARDEN FRIESCH RAS.
CRESCENDO
SPRINGRUITERS M. EN Z.
N O R M A A L
1983 DEMONSTRATIE
VOLKSDANSGROEPEN
FOKVEE - SHOW - VEILING.
TOUWTREKKEN DORPEN/OUDEJAARSPLOEGEN.
55+ PROGRAMMA - REVUE ,,DE GEINEXPRESS,,
ARNE JANSEN & LES CIGALS
CONCOURSHYPPIQUE m.m.v.
VOLTIGEGROEP
OLDENBURG.
TUIGPAARDEN- HACKNEY,S
& FRIES RAS
N O R M A A L
RED POINT HARDROCKBAND
TIPPELTOCHT n.a.d. FRIESLAND - COMBO.
1984 PROGRAMMA SCHOOLFEEST
TOUWTREKKEN DORPEN - OUDEJAARSPLOEGEN.
,,REDPOINT,,
OPTOCHT EN REUNIE OUD-LEERLINGEN
MOP - FIETSTOCHT
,,TROEF,,
1985 VOLKSDANSMIDDAG
BEJAARDENMIDDAG m.m.v. BRAM BIESTERVELD
TOUWTREKKEN DORPEN - OUDEJAARSPLOEGEN
N O R M A A L
CONCOURS - HYPPIQUE
HERMAN BROOD.
1986 MOP-SPORTCLUB
FEESTEN
VOLKSDANSMIDDAG
VOLLEYBALWEDSTRIED
TOUWTREKWEDSTRIEDEN
JOHAN & HENK EN DE SCHATERLACHSHOW
B. Z N.
,,LES CIGALLES,,
1987
BEJAARDENMIDDAG m.m.v. FRANS VROLIJK
TOUWTREKKEN DORPEN EN OUDEJAARSLPOEGEN
VOLKSDANSMIDDAG
,,LES CIGALLES,,
CONCOURS HYPPIQUE met o.a. ACHTIENSPAN P. DE BOER
TUIGPAARDEN FRIES RAS.
ROCKNACHT m.m.v. VENGEANCE
PICTURE
BERTUS STAIGERPAIP.
,,TROEF,,
1989
ZULVEREN JUBILEUM
VOLKSDAANSMIDDAG
BEJAORDENMIDDAG m.m.v.. BRAM BIESTERVELD.
RECEPTIE EN REUNIE OUD MOP LEDEN
SYMPATHIE
KINDERSPELEN
BUURT – VOLLEYBAL.
1993:
MINI-PLAYBACKSHOW
VOLLEYBALWEDSTRIJD
VOLKSDANSEN
GROTE AUTOPEDTOUTOCHT
,,DUTCH BOYS,,
,,NORMAAL,,
1995:
TIROLERAVOND
DE KLOKKESTOELERS
AUTOPEDTOURTOCHT
,,NAMELESS,,
,,NORMAAL,,
1997:
KINDERSPELEN
VOLLEYBAL TOERNOOI
,,DE MAGISCHE WERELD VAN MANRO EN LOIS
,,SPARETIME,,
,,DE KLOKKESTOELERS,,
,,DE GOLDEN AERRING,,
,,VAN DIK HOUT,,
1999:
PLAYBACKSHOW 6 T/M 12 JAAR
VOLLEYBALTOURNOOI
VOLKSDANSEN
COUNTRY EN WESTERNAVOND
,,FRIENDS,,
,,ROWWEN HEZE,,
2001
VOLKSDANSEN
VOLLEYBALTOURNOOI
APRES-SKI AVOND
,,SHADY LANE,,
,,KLOKKESTOELERS,,
,,DENNIS FRANKE & BAND
SPELLENMIDDAG
ROWWEN HEZE