De sleutelclub

Et is begin jaoren zeuventig in de maond december. Et jaor lopt al weer op zien einde. De straoten bin bedekt mit een dun laogien sni'j. Et is een zaachte winter, de bomen bin beriept en de iespegels hangen hier en daor an de dakgeuten. Et is de juuste sfeer die, now et tegen de kastdaegen lopt, een meenske een behaeglik gevuul geft.

Hannah een jonge meid van even in de twintig geniet van dit tafereel. Ze klopt krek de sni'j van een raeke sni'jballe van de kleren. Die was raek, mar mit geft ze heur weer over an een pottien sni'jballen en warempel ze wet heur vrund krek tegen de kop te raeken. Al speulenderwieze kommen ze bi'j de kroeg terechte. As ze de kroeg inkommen, stroffelen ze haost over een tal klompen, die omme hoeke bi'j de deure staon. De waarmte komt ze noflik integen. Et is al redelik drok in de kroeg. Een stel ooldere vri'jgezellen bin an et biljarten, wiels een groep jongere jongens an de stamtaofel zit te tachtigen. In de hoeke veur de w.c.'s staot een mooi optuugde kastboom en de taofelties bin alle veurzien van een kaststokkien mit echte branende keersen.

Hannah en Johan gaon an de bar zitten en bestellen heur elk een pilsien. Hannah huvert, de koolde is heur in de kleren gaon zitten. Johan is geliek al in peteer mit wat oolde kammeraoden, die nog vri'jgezel binnen en hier mekeer treffen, om douk mitmenaander op stap te gaon. Et is best een gezellige boel. De juxebox geft Lea van de Cats weer.
Zo gaonde weg de aovend gaon de stappers d'r van deur en kommen d'r wat ooldere stellegies binnen. Ok de vaaste stamgaasten, een peer oolde alliendstaonde mannen, hebben de weg naor disse kroeg weer vunnen.
As Henk en Mina, een pastrouwd stel binnen kommen wo'n d'r oolde koenen uut de sloot haelt. Johan en Henk weren vaste maoten en et dot blieken dat ze hiel wat mitmaekt hebben. Hannah krigt last van hoog waeter en trekt heur even terogge.
Ze warkt veur de spiegel heur lippen effen bi'j. Mit dat ze teroggekomt bin Kees en Geertje binnenkommen. Een gezellig stel, ok al bin ze al wat oolder. Hannah raekt mit heur an de praot en krigt een pilsien anbeuden. Ze raekt onder de indrok van Kees.
Ok al is hi'j niet zo groot en wat an de gezette kaante, zien mistieke brune ogen hebben vat op heur. Al praotende weg vuult ze een haand op een plak, dat ze normaliter niet velen kan, mar om ien of aandere reden wet ze him niet weg te slaon.

Begin jaoren zeuventig bin strakke broeken mit uutlopende piepen in de mode, ok al is Hannah gien kruuskieker, toch vaalt heur de welschaopenhied van Kees op.
Zo glidt de aovend langzem op slutingstied an. As de klokke ien ure slat, in warkelikhied is et dan nog mar kwat veur, giet de belle veur de laeste ronde van de kastelein.
De jonge jonges weren al zonder dat ze d'r arg in hadden op huus angaon. Now wo'n de aandere gaasten anzegd, dat et de hoogste majesteit is.
Now dizzen de deure uut binnen, wodt de deure op et nachtslot dri'jt en de lochten tempert.
Gezellighied kent gien tied. De dobbelbeker wodt te veurschien haeld. Mit twelf man giet d'r altied wel iene nat. Uut de juxebox kommen now de tonen van Lola, van de Kinks.
Stoelen wo'n an de kaante scheuven en d'r wodt daanst om et leven.

Op een gegeven mement nemt Kees Hannah even appat.
Et dot blieken dat ze al eerder mitmekere an een sleutelkluppien deden. Now wodt Hannah vraogt of Johan en zi'j niet mit doen willen .
As ze et d'r mit Johan over het, kikt die wel even bedaenkelik, mar wil now gien spulbreker wezen. Hannah wil sowieso graeg in et middelpunt van de belangstelling staon en et flirten is veur heur een netuurlike gaove.
Dan kommen de dobbelstienen d'r weer an te pas, bi'j elke ronde wodt om een sleutel speuld.
Het et noodlot et al bepaold? Hoe et ok zij, ze raekt koppeld an Kees.

Veurzichtig stikt Kees de sleutel in et slot en stillegies om de kiender niet wakker te maeken sloepen ze naor de echtelike slaopkaemer. Now bin zien grote hanen om heur slanke middel en drokt hi'j heur stevig tegen him an. Ze vuult zien geslacht opzwellen. Et maekt heur hitzig. Ze knoopt de knopies van zien boezeroen los en dwaelt mit heur vingers deur zien borsthaor. Kees trekt zien gulpe eupen, en dwingt heur deur an heur lange haor te trekken naor beneden. Al mit al wodt et een wilde naacht mit perverse dingen, waor ze nog nooit van droomt het.
As ze vroeg in de morgen naor et huus van heur schoonoolden gaot, gaot ze eerst onder de douche, om zien locht van heur of te wassen.
Wat een naacht, een naacht die veur altied in heur leven grift is.


© Tuller, jannewaori 2014

Dit verhael is uut de doeme zeugen, elke herkenning berust op toeval.
Alliend dat d'r spraoke was van zok soorte club is een gegeven.