Rondje NL, B, F

Home


Rondje NL, B, F

Veurlopig et laeste reisien

Veertien daegen leden wa'k een goeie weke deur een regenachtig Denemarken trokken. Op deensdag 11 oktober 2011, om een ure of twieje in de middag bin 'k votgaon mit et doel om et laeste reisien van dit jaor mit de camper te maken. Daornao mos et zwarfhuus - en zwarfhusien - mar veur et winterschoft onder klied, ha'k docht. Hoe mal kun de dingen lopen...

De route die 'k bedocht hadde: de eerste naacht in Groede (Zeelaand), dan deur naor Oostende (B) om daor uut een stok of drie adressies te kiezen die 'k op internet opscharreld hadde. Op donderdag dan naor de 'voorstelling' van een ni'j woordeboek van et Oostends, een naacht daor in de buurt en dan deur naor Frankriek, richting Caen (Basse-Normandië).

Thuus eerst nog wat bosschoppies ofhaandeld en doe he'k Carin de kommedaosie geven om me - neffens et 'grune boekien' - et pad naor Groede in Zeelaand te wiezen. Ik moet zeggen, daor hadde ze gien muuite mit. A'k onderwegens ok tol betaelen wol, vreug ze. Now he'k een hekel an tevule centen uutgeven dat ik zee, nee, dat moet ditkeer mar niet. Ok goed, docht Carin, en rekende een pad uut zonder tolgadders onderwegens. Meppel, Zwolle, Amersfoort, Utrecht, Gorinchem, Breda, et was oons niks, ikke, Carin en mien campertien.

Nao Breda begreep ik Carin niet hielemaole want opiens za'k een groot bod mit 'België' en alle verkeersregels die in dat laand gebrukelik binnen, d'r op, ommekeren was niet meer meugelik. As dit mar goed komt, docht ik hiel even want et leek me een slim ommelaanse reize. An now toe he'k altied op Carin vertrouwd en et is ok altied nog goed kommen. Ik dee dan ok krek a'k gek was en dee zo Carin mi'j veurstelde. Gewoon dwas deur België en dan lichtkaans weeromme naor 'Hollaand' en dan naor Groede in Zeelaand. Ik geleufde et allemaole. Et is wat laete in de tied van 't jaor, aanders zo'k zeggen: et was gruuizem weer. Et regende de hiele dag al haost mar et kwam goed...

Krek as een protte vrouwluden die een goedkope camping bestieren, leek me dit ok een hiel aorig wiefien toe. D'r was veerder gieniene dat ik kon mar een plakkien uutzuken zo 'k wol. De straffe wiend komt uut et zuudwesten, dat ik zol mar wat an ginne kaante staon gaon, zee ze. Et hoog-seizoen was veurbi'j en ze neum now niet meer de muuite om even mit te lopen en et husien en de doesen te wiezen, wat aanders vaeks wel gebeurt. Nee, daor onder et ofdakkien, en dan wist et himzels, was alle infermaosie wao'k et mit doen mos. Och, as professionele vekaansieganger hej' an een half woord vaeks ok wel genoeg en hoeft alles niet altied twie langen, twie brieden uutstokt te wodden.

Dat van die wiend, bleek een wieze raod want et wi'jde inderdaod niet te zunig, daor in Zeelaand. Doe 'k een plakkien - nao 'k docht wat in de li'jte - vunnen hadde, bleek et - vanwegens die hadde wiend - dan ok niet an te raoden en zette et luifeltien uut. Daor zollen mar brokken van kommen. Now ja, slaopen wil ok wel zonder luifeltien. Et speet me wel da'k nog niet even mit een slaopmussien buten zitten kon, mar was eins al lange bliede dat binnendeure de kachel niet an hoefde.

Aandere morgens om goed zes ure wa'k klaor wakker en twie tellen laeter zat ik, nog haost wat in twielochten, in de deure-eupening an mien eerste paantien koffie en et eerste sigerettien van die dag. Et grös was nat. Ok al ha'k d'r niks van verneumen, et hadde naachs bliekber aorig regend. Al veur acht ure ha'k veureerst genoeg koffie en sigeretties had, me wusken en scheerd en ha'k een stevig morgenbroggien van brood mit bakte eier en spek aachter de knopen. Dan is et altied tied om de boel een betien an te hemmelen want aj' daegen aachter mekeer in zoe'n kleine ruumte van een oold campertien huzen dan moej' alles wel wat ankaant en hemmel holen, aanders wodt et al gauw wat een eermoedig schooiers bestaon. Om een ure of tiene he'k ofrekend en bin 'k ofzet. Op naor België. Op naor Oostende.

Die krap honderd kilemeter is mar een tik an 't oor, vanzels. Wel jammer dat et de hieltied mar regenen bleef. Dan stik ie onderwegens niet gauw even an en eet of drink wat op een terrassien of zo en neudigt et ok niet uut om et ien of 't aander te bekieken. Van de veurige keer in Oostende wus ik nog dat d'r vlak naost de viskeri'j-schoele, waor de prissentaosie doe was, een pleintien vol mit campers stonnen. Ik hadde daor doe veerder gien acht op sleugen omreden ikzels toch gien camper hadde. Now he'k eerst mar wel even op dat plak keken om te kieken a'k daor now lichtkaans ok mit mien 'zwarfauto' terechte kon, zo de Belgen tegen een camper zeggen. Plak zat. Stonnen d'r de veurige keer naor mien gedaachten wel haost een honderd, now mar een stok of drieje.

Van daor weg he'k Carin vraogd om me naor et stadhuus van Oostende te brengen want daor zol morgen de 'voorstelling' wezen. Et bleek op loopofstaand te wezen, zoe'n vuufhonderd meter van et pleintien naost de schoele. Alle tied om Oostende es wat beter te bekieken. Van mien klik-fietsien weren de banen nog hadde zat om me te tillen en fietsende koj' gauw veerder as lopende. Een mooie haven mit aldermeraokelst dure schippen, midden in de stad. Waor vien ie dat? In Oostende dus. Een prachtig oold stesjon ok vot om 'e hoeke. Een goeie honderd meter naost dat oolde stesjon een hiele riegel ni'jbouw van zoe'n vuuf laogen hoge. De daor anplakte trapgevelties kon 'k mar min warderen. Wat nepperig, wat kitserig! Onderwegens een grote puntpoede mit echte Vlaamse frieten mit majo kocht en opeten en doe mar weer op mien tiedelik huus an want et raekte now haost in twielochten. Op et pleintien weren onderdehaand nog een stok of vuuf zwarfauto's ansleuten.

Aj' zo onderwegens gien radio, tillevisie en aander ongemak bi'j je hebben dan kroep ie aovens vaeks niet al te laete op bedde. Et laeste paantien koffie en et laeste sigerettien bruuk ik vaeks zittende op de treeplaake, en zo dee 'k now ok. Een mannegien mit een klein hontien lopt veurbi'j en we groeten mekeer vrundelik. Mit dri'jt hi'j him omme en komt even an om een praotien te maeken. Dat iene sigerettien wodden dan nog wel drieje en veur daj't weten is d'r zomar een ure vot en raek ie toch nog laete op bedde. Mar och, ik hoefde gien wekker te zetten, dat scheelt. De aanderemorgens wa'k trouwens om de standerd tied van rond zeuven ure gewoon weer wakker.

Mit zoe'n hiele dag veur de boeg kuj' je aorig tegoed doen an wat de omgeving te bieden het. Mit de camper een posien an de haven staon te kieken waor de boten an- en ofveren van of naor de zee. Buten de stad bin kilemeters straand om te kuieren, te fietsen of om je heufd hielemaole leeg wi'jen te laoten. Eten en drinken zat te kriegen op de boelevaar. Wel een betien jammer trouwens dat ze de hiele kustlijn vol stampen mit te dure hotels en te dure appattementen, die dan vaeks ok al riekelik vlogge weer te koop zet wodden. Et is trouwens gien gezichte al die betonnen deusies en et is ok gien uutzichte. Ja, de verkopers kun et je mooi veurschilderen: uutkieken op et waeter. Now kan ik ok uren naor de zee kieken mar daor bi'j nao drie daegen ok wel es een keer op uutkeken, wi'k leuven.

Om een uur of vieve henne he'k me goed in de zae eten. Krek as te winkelen wi'k ok niet roppig naor een fesien. Dan zet ie jezels vaeks al gauw in 't locht aj' niet van al dat lekkers ofblieven kunnen. Nao et eten he'k mezels es even flink in de tobbe daon. Et knappe pak anstruupt en wat lekker roek om 't heufd daon. Ie weten mar nooit.

Voorstelling Woordenboek Nederlands - Oostends van Roland Desnerck 13 oktober 2011

Et leek aovens rond zeuvenen wel uutbetaelersure van de bi'jstaand in 't gemientehuus van Oostende. Zwat van 't volk en zo te zien - mar daor moej' altied vreselik mit uutkieken - deurenneer gien al te hoge geletterden die belangstelling hebben zollen veur et Woordeboek van Oostende, zo leek et me teminste toe. Et maegien an de infobalie van et gemientehuus van Oostende gaf me geliek want ik mos an et aende van de lange gang links of in de Konfereensiezael wezen. Tjonge, jonge, de Konfereensiezael, nog wel. Et welkom was as vanoolds alderhattelikst. Deur kammeraod Roland wodde ik vot-en-daodelik as eregaaste benuumd en moch krek as vuuf jaor leden op de veurste riegel een stoel uutzuken waor een briefien miet 'Voorbehouden' op lag. De blispoters wodden naotied iene veur iene an me veursteld - of was 't aandersomme - en daor zat ik dan as eregaaste tussen de schepenen, kultuur-direkteuren en tael-doktoren.

Nao een stief kertiertien bleek de zael niet een klein betien te klein, nee, de Konfereensiezael was vusen te klein! Mar, iene van de - naor mien idenen hiele protte - mooie eigenschoppen van de Belgen is, dat ze veur alle perblemen een - en vaeks ok nog onverwaachse - oplossing hebben. Wat doej' aj' d'r aachter kommen dat de zael te klein is en d'r vusen te min stoelen - en dus meensken - in kunnen? Dan hael ie de helte van de stoelen d'r uut. Zo kun d'r - weliswaor staonde - vule meer meensken in zoe'n te kleine zael. Nao de eerste honderd wa'k de tel kwiet mar et zullen wel zoe'n vier- of vuufhonderd meensken west hebben. Leefde et Stellingwarfs - en in die saemhorighied - mar op zoe'n meniere as daor in Oostende.

De direkteur van kultuur-, biebeltheek- en archiefzaeken, mevrouw Martine Meire,  hiette alleman welkom. Even laeter wodde de 'feestrede' utspreuken deur mevrouw de schepen (wethoolder) Nancy Bourgoignie. Dat kon allemaole even bezakken onder de plezierige klaanken van et (gelegenhieds?) trio 'Koezelamoeze'. De gelegenhiedstoespraoke wodde hullen deur mien buurman veur die aovend, dr. Hugo Ryckeboer, oold-redakteur van et Woordeboek van de Vlaamse dialekten. En weer was d'r een historisch mar veural ok fleurig stokkien meziek van et trio. Et daankwoord deurregen mit alderhaande woordgrappies was van de meester, Roland Desnerck, zels. Ik geleuf dat hi'j mi'j - krek as vuuf jaor leden - wel driekeer daankzegd het veur mien komst, ok mit mooie woorden over et Stellingwarfs en Fries. (Roland komt zo now en dan wel es in Frieslaand.) Nao nog een fleurig nummertien meziek wodden we uutneudigd veur de receptie, zeg mar, de naozit, mar dan hielemaole zonder stoelen. Ik geleuf da'k wel mit een man (en vrouw) of tiene staon hebbe te praoten over tael en schrieveri'je en hoe we et nog keren kunnen dat et zo hadde aachteruut lopt mit dialekten en streektaelen. Want dat is daor bi'j oonze zuderburen niet aanders as bi'j oons in de Stellingwarven en rond om oons henne. Mit een opdracht en een mooie haandtekening in et dikke boek bin 'k weer op mien zwarfauto an toogd en mos bi'j et locht van een keersien vanzels vot even in dat prachtige boek kieken.

As 't zoe'n hiele reize now eins wel weerd was, woj' nog weten? Now, et was de reize meer as weerd. De ontvangst, de entourage, de ni'je kunde diej' weer opdaon hebben. En lao'we eerlik wezen, 't is ok wel een betien appat. En van die doe-mar-gewonen hewwe in de Stellingwarven meer as genoeg van, en dan ok nog in beide betekenissen van et woord!

*

Et wol vanzels meraokel slaopen nao zoe'n feestelike aovend mit niet te zunig an draank en happies. Om zeuven ure wa'k de aanderedaegs weer gewoon wakker en mit et eerste paantien koffiie en sigerettien mos ik toch nog even een peer woorden naopluzen die me naachs deur 't heufd scheuten weren. Drekt om acht ure bin 'k ofreisd, veerder naor 't zuden, richting Amiens in Frankriek. Rond een uur of viere ha'k mien nocht en hebbe me een plakkien 'a ferme' veur de naacht zocht. Een camping veur iene naacht en langer wo'k hier ok niet wezen want disse camping dee zien naeme gien ere. Et was eerder een slaopruumte veur gaastarbeiders van alderlei pluimage, as een gezellige femiliecamping. Dat d'r ok nog een bien in de does lag, dient as titel veur een aander stokkien dao'k mit an 't schrieven bin: Beppe, beppe, d'r ligt een bien onder de does.

Mit de wiend in de rogge he'k me een plakkien zocht en hebbe me in de zae eten an alderlei lekkers wa'k nog 'an boord' hadde. Even bekommen en dan gaot et slaopen al gauw mit zoe'n dik lief. Et warkvolk vertrok de aanderemorgens al mooi op 'e tied. Tussen vieve en zeuven leek et grösveld naost mien campertien bi'jtieden haost meer op een Duutse autobahn. Mar goed, ik kan goed tegen kotte naachten en hebbe daor aandere daegs ok gien last van. Doe alleman vot was ha'k et riek haost hielemaole veur mi'j alliend. Alle tied om te doesen en te poetsen. Et ofrekenen bi'j et meens op leeftied mit heur butengewoon vrundelike lach om 'e mond, vul me honderd percent mit en ik krege d'r nog zes eier op toe. Kiek, zoks past me vanzels wel.

Om een uur of elf bin 'k ofreisd richting Osmanville, een plakkien an de kust in Basse-Normandië. Een reize van omdebi'j vierhonderd kilemeter. Dan kuj' de snelweg nemen waoj' bi'jtieden stevig tot de pottemenee moeten of ie doen zoas ikke ditkeer en kiezen d'r veur om deur allemaole prachtige dörpies te rieden. Et schöt dan wel niet op mar d'r is aorig meer te zien as op de snelweg. In Nederlaand vienen we wel es dawwe vergeven binnen van de rontondes mar ik binne d'r haost wisse van dat ze die dingen in Frankriek uutvunnen hebben. Barre, mar om goed drie ure wa'k wel te plak en dat is eins et ienigste dat telt. Hier ha'k roem twie bunder veur mezels en kon et feest mar losbasten.

(En zundags naor de peerdekoersen in Graignes. Et gelok is vaeks mit de dommen.)


© Piet Bult, Ni'jberkoop, oktober 2011


***

Meestal rijd ik met allerlei omzwervingen en omwegen, op goed geluk richting het doel van mijn reis.
Soms stippel ik een route tot op de punt en de komma uit met overnachtingsmogelijkheden (mooi Scrable-woord), zoals deze.
Eerst via een boekpresentatie door een goede vriend in Oostende (B), dan naar vrienden in Normandië (F) en tot slot naar vrienden net beneden Angers (F). Uiteindelijk ook weer terug Nijeberkoop...

Route Oktober 2011
Vertrek: di. 11-10-2011

Kampeerboerderij 'De Blikken'
Barendijk 3
4503 GT Groede (NL)
0117 - 371365

12/13-10 'De Zwerver'
Brugsesteenweg 29
8620 Nieuwpoort (B)

13/14-10 'De Zwerver'
Brugsesteenweg 29
8620 Nieuwpoort (B)

Even langs:
8430 Middelkerke (B)
Klein Kasteelstraat

8430 Middelkerke (B)
St Laureinsstrand

8434 Westend (B)
Koning Ridderdijk

8460 Oudenburg (B)
carpool/camperplaats
Vaartstraat/Stationsstraat

Ter Hoeve
Duinhoekstraat 101
8660 Adinkerke (B)

Stadhuis Oostende
Vindictivelaan  1
8400 Oostende (B)
naar boekpreentatie

Vrienden
Chefdeville / Aubouille
14230 Osmanville (Normandië (F)

Camping Municipal
Boulevard d'Eindhoven

Camping Municipal
45 Avenue de Verdun
14117 Arromanches-les-Bains (F)

CAMPING MUNICIPAL DES POMMIERS
1, Rue de la Haie Breton
14150 Ouistreham (F)

Camping Caravaning Municipal
Allée Brummel
14530 Luc-sur-Mer (F)

Camping Municipal
9, Rue de la Vallée
14100 Lisieux (F)

Camping Municipal Le Stade
Route de Beaumont
14130 Pont-l'evêque (F)

Camping Municipal
Route Noards
27450 Saint-Georges-du-Vièvre (F)

Camping Camp Municipal
69, Rue Guy de Maupassant
76790 Etretat (F)

Camping Municipal du 'Canada'
Rue de Rouen
76400 Toussaint (F)

Camping Municipal De La Durdent
1, Route du moulin bleu
76560 Héricourt-en-caux (F)

Vrienden bij Anger (F)
Lieu-Dit 'La Forge'
49320 Charcé-Saint-Ellier-sur-Aubance (F)

Camping Municipal Les Fresnes
Route Château Gontier
49220 Le Lion d'Angers (F)

Camping Municipal
Belliard
49370 Villemoisan (F)

Camping L'etang
l'Etang
49320 Brissac-Quincé (F)

Blokkeren van GSM simkaart. Bel 0031 (0)206976337
Blokkeren betaalkaart: 0031 (0)58 212 6000


© Piet Bult, oktober 2011