Za. 7 augustus 2004.
‘k Zal d’r nog een nachien over slaopen, mar dit kon wel es de laeste beschrieving in dit dagboekien wodden. We bin te vaeke onderwegens en dan moet et aovens laete nog vlogge even en daor he’k eins gien nocht an. En doe’k nog niet mit et vertaelen van de Stellingwarver Biebel doende was dee’k nog wel es wat kultureels, mar dat blift d’r ok hoe langer hoe meer bi’j. De laeste veurstelling daor a’k henne west hebbe was geleuf ik, op ‘e Gediek in de Skâns naor een veurstelling van Johan en Karst. Dat is mi’j doe niet mitvalen. En dan die zeuven of acht euro’s veur een verhaeltien van een keboolter van de Blesdiekiger heide… now…, nee…, eerst mar es even gien kulturele uutspattings meer. Hool ik wat meer tied over veur et vertaelen en alles daor om henne.

Lichtkaans da’k Stelling en de vrouw nog es oppakke…

Tot kiek es…

Vr. 6 augustus 2004.
Vandaege wegens oververhitting sleuten…

Do. 5 augustus 2004.
Vandemorgen wa’k al om een uur of halfzesse beneden en heb tot ongeveer halfnegen zitten te lezen en blaederen in een boekien van oonz’ Oene: Stelling en de vrouw. Die beide meensken bin vanzels ok mit Oene wegraekt. Doe kwam de gedachte bi’j mi’j op om mien dagboekien-gedoe in te ruilen veur een opni’j oppakken van die riegel ‘skieve schriffies’. Wieshied van boven of deurkregen of zo. ‘k Zal mi’j d’r es even in verdiepen of dat zo mar kan vanwege copyright en zo…

Vanaovend van vuuf tot zesse hewwe veur RWC weer een gezellig uurtien ‘Wiesproten’ maekt mit oons vuven.

Wo. 4 augustus 2004.
Vandemorgen al vroeg mit twie auto’s vol onderweg naor de Meppeler jaormark. Jammer, laot die now vandaege niet wezen mar morgen, zee een aorig vrommes. Nog even een slag deur de heufdstraote op en daele west mar et daelezetten van de auto kostte daor ok al een euro in ’t ure dat doe biwwe mar vlogge weer instapt en op huus an reden. Op ‘e weerommereize zowwe in Stienwiek wel even te bosschoppen en dan ok nog wat eten mar daor was et parkeren nog vule slimmer. In Berkoop hewwe bi’j de bakker mar wat lekkers haeld en doe hewwe et thuus mar wat gezellig maekt. Overal mooier mar nargens beter as thuus…!

De. 3 augustus 2004.
Vandemorgen al vroeg op pad om op ‘e Veluwe wat veur de baos doende te wezen.  Op ‘e weerommereize bin ‘k even bi’j Frank angaon om een lekker koold glas bier.

Thuuskommen, lag de ni’je Ovend ok in de busse. Weer gien letter over et Biebelprojekt! Ze willen d’r echt niks mit te maeken hebben! Doodzwiegen zullen ze ‘t. Now, dan wil ik zo langzeman niks meer mit heur te maeken hebben, was mien eerste gedachte. Of moe’we zo niet?

In de Ovend las ik in een stokkien van de redaktie over Jan Veldhuizen, et riegeltien: "Doe hi’j een jaor of wat leden van een kammeraod…" De naeme van ‘die kammeraod’ kunnen ze bi’j de SSr ok al niet meer over de lippen kriegen, begriep ik. Meer as twintig jaor slim aktief doende west veur de klup en now in ien keer hielendal vergeten. Op de laeste jaorvergeerdering is et nog zegd: et ledetal lopt wat terogge! ‘k Geleuf da’k et begin te begriepen hoe zoks kommen kan.

Ma. 2 augustus 2004.
Vandemorgen nog de hieltied mit heufdzeerte wakker wodden. Mar och… nao een sloot koffie en een halve poede zwaore sjek en een haandvol asperienties kon ‘k te meenste de dag beginnen.

Vandaege eerst de kraanten nog wat deur west naor wat opmarkelik ni’js. Ankem daonderdag hewwe weer een ‘Wiespraoten’ dus daor mos ik toch wat onderwarpen veur bi’jmekeer zuken.

Mar de kraanten bin ok slim in zoemerstemming. D’r is haost gien ni’js dus dan wodt d’r mar ni’js maekt. Et betien wat d’r is wodt dan ok nog es knap opklopt.

Laot mi’j et now mar gewoon zeggen da’k op dit stuit niks beters wete dan da’k mooi naor buten gao. Nog even een aovend zo lange meugelik buten zitten.