Naor Dagboekien

Veurige weke Ankem weke

Weke 34 (16-22.08.2004):
(Zundagmorgen):
Et is mooi weer vandaege dat wi’j gaon mooi te peerdrieden naor et CH van Haulerwiek. Es kieken awwe daor nog wat verdienen kunnen.

(Vri’jdagaovend):
Nog mar krek thuus en even de mailbusse leegd, zit d’r (al weer) zoe’n halve gere bi’j. Eerder vandeweke wodde mi’j deur femielie uut Zuud-Afrike ok al van alles naor de kop slingerd: ‘k zol gien knip veur de neuze weerd wezen, nee, een sloppeling of zoks, dat wa’k! Da’s niet niks vanzels, dat daor bin ’k es even mit in de hangmatte liggen gaon. Wat wil et geval. Op vuuftien meie van dit jaor wa’k ok es begonnen an een dagboekien op dit haost alles omvattende web. Om precies te wezen, nuumde ik et eerst trouwes een wekeboekien want ik was eins niet van doel om d’r warkelik elke dag wat in te schrieven. (Dat kuj’ trouwes ok nog de hieltied zien an de indieling in wekenommers.) En de opzet - mit ’n knipoge - was doe ok een betien om de Stellingwarvers an een meerderhied te helpen in et Friese geweld van dagboekienschrievers (die bosschop stiet trouwes nog de hieltied boven et begin). Doe ‘k even doende was kree ’k d’r zuver wat aorighied an en hebbe et dan ok tot een dagmennig leden volholen om d’r daegeliks toch even een peer riegelties in te zetten mar…

Een posien leden kwam ik d’r aachter dat et mi’j haost wat te vule wodde. D’r bin meensken die de hiele dag bliekber niks aanders om hanen hebben as lezen, schrieven en drok, drok, drok mit de schrieveri’je in de weer binnen. Prachtig vanzels, mar ik hebbe ok nog een bedrief(ien) te runnen. En dat giet toch (nog krek) veur vanzels. Gien inkommen, gien (spoonser)centen veur mien schrieveri’je. En gelokkig (now ja, gelokkig) hewwe et dit jaor - grif te zoemer - (weer) drokker as aandere jaoren en dan moej’ wel es prioriteiten stellen, zeggen ze. En dat he’k dan ok daon. Dat is smoes iene.

Doe’k dan ofwegings maeken mos, doe he’k mi’j vanzels ok nog es ofvraogd waor aj’ et eins veur doen, zoe’n dagboekien bi’jholen. En veur wie? En wat vienen ze (en ikzels) d’r eins van, en zo… Doe ‘k mien maildeusien nog es deursnuuide kwam ik d’r al radde aachter da’k aorig meer mailties kreeg m.b.t. et biebelvertaelen as m.b.t. et dagboekien. Now ja, dan bi’j vlogge uut beraod vanzels. Et dagboekien mos mar sneuvelen, of… en dat bin ‘k dus nog wel van doel, ik doe et niet meer zo ‘verplicht’ elke dag mar iene of een peer keer in de weke of zo.

Want dit soorte van schrieveri’je het hielendal gien nut vanzels - as et al argens toe dient - aj’ aovends laete uut Braobaant kommen en om twaelf ure (of laeter) naachs nog zo neudig beslist even in je dagboekien schrieven moeten. En et allermeenste is nog dat aj’ dan boven kommen dan is mooi Rosien al diepe wegsukkeld naor een aandere wereld vanzels. Dan kujje as jongkerel wel veur de kop houwen vanzels; hej’ wellicht toch weer wat mist! Ik ken ok wel een peer ‘kollega’s’ die daor trouwes gien ‘last’ van hebben. Die hebben niet zovule te verwaachten as ze naor boven toffelen of et moet de katte al wezen.

Veur nog meer smoesies moej’m nog mar even geduld hebben…

(Donderdagaovend laete):
Vanaovend weer gezellig an ‘t Wiespraoten west bi’j Radio Weststellingwerfs Centraal. ’t Gong d’r weer mal an toe…

Even later kwam ik bi’j toeval vanaovend nog even terechte bi’j een stellegien ‘krinkienspi’jers’. Een man of viere hadden een heftige diskussie over de Schrieversronte. Buten mi’jzels weren d’r drie van de viere (75%!) mit een hieleboel negatieve kritiek. A’k mi’jzels daor dan ok nog toerekenen zol dan wodt et viere van de vieve (80%!). Dat geft de daenken liekt mi’j. Die iene perbeerde slim zien best te doen om nog te redden wat d’r redden vul mar … Ik hope dat iene van de ‘blispoters’ dit stokkien nog es leest en kontakt mit mi’j zuukt om et daor es over te hebben. Ik doe ze graeg (nog es) bescheid.

…

(Deensdagaovend):
Vandeweke ree ik deur Buil, toch een aorig Stellingwarfs dörp donkt mi’j. Zie ik daor bi’j de slager een bottien mit "Foodshop" as verwiezing naor zien winkel. Dat kan dus niet, vien ik.