Weke 43 (18-24/10.2004):
Zundag (24/10):
Vandaege he’k de hiele middag haost doende west mit de geuten en ofvoerputties rondom huus mar weer es uut te hemmelen. Om de voeten in huus een betien druge te holen moet dat van now of an haost elke weke. Et blad op ‘e blieke vien ‘k wel een aorige lappiesdeken mar et blad in de geuten moet d’r jammergenoeg zo now en dan es uuthaeld wodden. D’r bin ok meensken die heur een bladblaozer of –zoeger antugen. Dat vien ‘k vaeke mal volk. Een bladblaozer antugen… A’k iene dan doende zie mit zoe’n ding dan liekt et bi’jtieden ok krek as ze heur d’r zels wat veur schaemen. Want ie lopen vanzels knap veur aep mit zoe’n mal ding. Zok volk is haost nog slimmer as dat volk dat in die aso-bakken rondrit. Krek zoks as een elektrische blikeupener of een elektrisch mes. Dat doej’ toch niet? Die laesten die zullen ok haost altied zeggen dat ze dat ding argens (bi’j)kregen hebben. Of zo’k zels toch wat ofgeunstig wezen…?

Lucas moe ‘k nog ien keer deurlezen en dan kan die naor de drokker. Die het nog de hiele maond november om d’r weer een mooi boekien van te maeken. Frank het et nog drok zat mit de Haandelings van de apostels, wi’k leuven.

Zaoterdag (23/10):
Dat lezen niet altied een gezonde en ongeveerlike bezighied is wodde mi’j vandaege dudelik uut een artikeltien in de kraante (LC). Een vrouw uut Oosterwoolde was even een uurtien naor de biebeltheek gaon en zat daor wat te lezen. Opiens komt d’r een veur heur vremde kerel binnen, lopt recht op heur toe en verkoopt heur een peer beste klappen in de nekke. Tjsa, ie moe’n eins ok niet zonder nekbescharmers naor de biebeltheek gaon en aj’ dat dan toch doen dan kuj’ zoks verwaachten vanzels-;)

Vri’jdag (22/10):
Een drokke dag had vandaege. We kregen onverwaachs Hollanders op vesite. We bin eerst in Vledder naor et museum van valse keunst toe west. Doe een peer uren golfen op de baene van et Heidemeer in Et Vene. De vesite had een professionele, hiele grote, deur de komputer stuurde teleskoop mitneumen. Hoewel et niet mooi helder was hewwe taovend toch hiel dudelik de kraters op de maone zien kund. Ik heb ok nog even zocht naor Paulus bi’j de hemelpoort mar die he’k niet zien. De hemelpoort trouwes ok niet.

Ik las krek in de kraante (LC) van gister dat Friezen makkeliker naor Grunningen gaon as dat Grunningers naor Frieslaand toe kommen. Daor he’k es een schoffien mit in de hangmatte legen te fileseferen en ik bin d’r uut. Et het mit de wiend te maeken en et feit dat Grunningers slimmer binnen as Friezen. Friezen die zetten drekt uutaende as d’r wat in Grunningen te doen is, Grunningers waachten eerst of tot dat de wiend wat oosteliker is en kommen dan veur de wiend, disse kaante op. As ze hier dan ien keer binnen bin ze vaeke ok niet weer vot te kriegen. Wi’j hebben nooit begrepen waorom as dat zo was mar dan waachten ze d’r dus op dat de wiend dri’jen zal naor ’t westen want dan hebben ze weer veur de wiend. En daorom bin Grunningers dus slimmer. Mar now doele ik mit slimmer dan weer op oons ‘slimmer’.

Jammer dat die onderzuker mi’j niet even vraogd het a’k ok een Biebel in huus hebbe. ‘k Zol et gemiddelde aorig omhogens bi’jsteld hebben. Op ’t ogenblik he’k wel een stok of zeuven, achte in huus en ik bin stark van doel om vandaege of morgen nog iene an te tugen. De Naardense Biebel za’k bi’jkotten even bi’j Zwikstra bestellen. Dat is wat een appatte Biebel he’k begrepen van een domenee die zoe’n dattig jaor op zien zoolderkaemertien doende west het mit et zo letterlik meugelik vertaelen van de oolde taelen naor et Nederlaans.

Donderdag (21/10):
Gistermiddag he’k de hiele middag wat in Et Vene op de golfbaene toeholen. Meerstal loop ik die negen holes in krek twie uren. Disse keer ha’k d’r wat meer tied veur uuttrokken en bin meer as drie uren doende west en kletsnat regend. Et veurdeel van et allienig naor zoe’n klup toegaon is vanzels wel daj’ makkelik an de praot raeken. Dat gebeurde now dan ok. Al in et kluphuus kwam ik een aorige ‘lady op leeftied’ tegen die ok allienig lopen zol. We bin dan ok mar wat tegere optrokken en hebben eins meer praot dan ballegies sleugen. Soms het een meenske daor ok meer verlet van. De ‘oolde rakker’ het mi’j trouwes zo gaondeweg wel alle hoeken van de baene zien laoten en het ‘oonze wedstried’ dan ok meer as wunnen. Ze kon et trouwes wel warderen da’k op al mien ballegies (begriep: golfballegies!) een hattien tekend har. Dat doe ‘k al jaoren; op al mien golfballegies teken ik altied twie rooie hatties. Dat aj’m nog es zoe’n ballegien vienen mit een rood hattien d’r op, dan weej’m now van wie die eins is. Mar schrieverties bin gien golfspeulers geleuf ik… of toch wel…? Dan moe’we mar es een klein toernooigien orgeniseren liekt mi’j.

Woensdag (20/10):
Vandemorgen za’k even wat zinnige dinkies doen en dan gao ‘k vandemiddag mar even naor Et Vene te golfen geleuf ik. Ik wark tegenwoordig te hadde veuruut en ik wor te vulle tegenwarkt (deur die verrekte instaansies) dat et risseltaot haost wat negatief uutvaalt. Dan kuj’ dus liekegoed een posien niks doen.

Deensdag (19/10):
Vandemorgen (gistermorgen eins) al hiel vroeg onderwegens naor Duutslaand. Taovend (gisteraovend eins) hiel laete weeromme kommen. Dat zodoende…

Maendag (18/10):
We bin now al haost veertien daegen doende mit een peer hiele grote bedrieven (semi-overhied) in Hollaand om eins mar een hiel bescheiden perbleem even op te lossen. Ik bin d’r zuver wat narrig van van d’r is mit dat volk niet gewoon te praoten. Et kommuniseert veur gien meter mit die lu. Dat ja, loop mi’j now mar even niet veur de voeten want ik slao d’r vandaege vot op.

Eerst mar even een naacht slaopen en dan morgen mar es weer kieken…