Warkliest bi’j de uutrikkinge van Genesis in een Stellingwarver vertaeling

van Piet Bult uut Ni’jberkoop an domenee dr. Rienk Klooster uut Jorwerd

op zaoterdag 26 juni 2004 in de karke van Berkoop.

Om mit te nemen, bin d’r aachter disse warkliest vier verschillende vertaelings anhaokt van ién en etzelde verhael van ‘De verleuren zeune’ dat verteld wodt in Lucas 15:11-32.

Ni’jberkoop, 17 juni 2004.

L.S.,
Deur de jaoren henne bin d’r deur Hendrik Bergveld, Rienk Klooster, Oene Bult en vaaste ok nog wel deur aanderen, al hiel wat stokkies uut de Biebel es vertaeld in et Stellingwarfs. Meerstal gong dat om losse en vaeks kotte stokkies. ’t Liekt mi’j mooi en goed toe om dat now es hielendal te doen.

Ankem oktober komt de ni’jste Nederlaanstaelige Biebel (NBV) uut van et Nederlaans Biebelgenootschop (NBG). Omreden ik et Hebreeuws, Grieks en Aramees van de oorspronkelike boeken alle drieje niet machtig bin, he’k et NBG vraogd a’k heur alderni’jste Nederlaanse tekst bruken mag as brontekst veur de 'Biebel in et Stellingwarfs'. Van ’t veurjaor he’k daor schriftelik heur goedvienen veur kregen.
Frank de Vries uut Blesdieke het mi’j toezegd dat hi’j graeg proeflezen wil en mi’j veerder mit raod en veural ok mit daod helpen zal.

Et eerste heufdstok - Genesis - ligt now in een proefuutgifte klaor. Mit dit boekien willen wi’j et uutaende-zetten van dit projekt een betien feestelik op gaank helpen. Et biebelboek Genesis in een Stellingwarver vertaeling zal daorom as ‘startschot’ anbeuden wodden an domenee dr. Rienk Klooster uut Jorwerd, op zaoterdag 26 juni van 11:00 tot 12:00 ure in de karke van Berkoop. Perfester dr. Anne van der Meiden uut Nijverdal zal een smeuïg inleidend verhael vertellen van zien ondervienings mit et vertaelen van ‘de Biebel in de Twentse sproake’.

Wi’j zollen et slim op pries stellen as jow/jim dit ‘startschot’ mitmaeken willen. Daorveur neudigen wi’j jow/jim dan ok graeg uut. De karke is groot genoeg, dat aj’/aj’m nog kunde mitnemen willen, dan is dat vanzels hatstikke mooi.

Mit een vrundelike groet,
Piet Bult

De Stellingwarver Biebel

Grindweg 18, 8422 DN Ni’jberkoop
Tillefoon: (0516) - 451038
www.Compulaat/Stellingwarfs
Aemel-adres: Info@Compulaat

Leeuwarder Courant
Redactie en Agenda
Postbus 394
8901 BD Leeuwarden

Ni’jberkoop, 10 juni 2004.

L.S.,
An de aandere kaante van dit briefien staot een passebericht van De Stellingwarver Biebel.
Dit zelde bericht is liekewel in et Stellingwarfs (mien veurkeur) as in et Nederlaans beschikber - om te kopiëren - op mien webstee: www.compulaat/stellingwarfs
Daor staon nog vule meer gegevens om d’r een goed en mooi verhael van te maeken.
Aj’m d’r tied en ruumte veur vienen kunnen dan zol ’t mooi wezen aj’m et veur 26 juni plaetsen kunnen.
Ik hope dawwe d’r mitmekeer wat an hebben.

Mit een vrundelike groet,
Piet Bult

Ankem zaoterdag 26 juni wodt in de karke van Berkoop et startschot geven veur et maeken van de 'Biebel in et Stellingwarfs'. Van 11:00 tot 12:00 ure wodt daor een bi’jienkomst holen waor elk welkom is die d’r belangstelling veur het. In dat ure zal et eerste biebelboek, Genesis, in een Stellingwarver vertaeling as boekien in een proefuutgifte uutriekt wodden an domenee dr. Rienk Klooster van Jorwerd.
Perfester dr. Anne van der Meiden uut Nijverdal zal een inleidend verhael vertellen over zien ondervienings mit et vertaelen van de Biebel in et Twents.

Nao meer as een jaor van veurbereidings is Piet Bult van Ni’jberkoop begonnen mit wat vingeroefenings in et vertaelen van de Biebel. Veur him weren o.e. Hendrik Bergveld, Rienk Klooster en Oene Bult d’r ok al es mit doende west mar dat gong meerstal over kleine stokkies of over een speciaol onderwarp. Dit jaor op 27 oktober komt d’r van et Nederlaans Biebelgenootschop een hiele ni’je Nederlaanse vertaeling (NBV) uut. En kotleden is et laeste diel van et Stellingwarfs Woordeboek van dr. H. Bloemhoff uutbrocht zodat an beide kaanten de goeie woorden now roem veurhanen binnen. Et is now dan ok een mooi mement om d’r an te beginnen en et 'boek der boeken' dan in ien keer hielendal te vertaelen.

Tegere mit Frank de Vries van Blesdieke is d’r een meerjaoren plan veur opsteld. D’r zal hadde an warkt wodden om et hiele projekt veur 2010 klaor te kriegen. Dat dit gien warkien is veur een peer regenachtige middaegen, daor bin ze onderhaand wel aachterkommen. En as et in de ankem zes jaor niet hielendal lokt dan is ‘t nog gien schaande want de snelhied mag niet te koste gaon van de kwaliteit.

Elk biebelboek zal eerst in een ienvooldige proefuutgifte verschienen. An et aende van die riegel van ongeveer vuuftig boekies zal de 'Biebel in et Stellingwarfs’ in zien gehiel uutgeven wodden as een boek in een zwatleren baand mit gooldopdrok. Over et tal van die Biebels breken ze heur de kop now nog niet. Et kun wel een peer honderd wodden mar altemet ok wel minder as tiene...


PS: Tied veur de fotograaf omdebi’j 11:30

Ni’jberkoop, 9 juni 2004
Veur meer infermaosie:
Piet Bult
Till.: (0516) - 45 10 38

Naopraot van dr. ds. Rienk Klooster

Vandaege is in de karke van Berkoop et startschot geven veur et maeken van een Stellingwarver Biebel. Piet Bult uut Ni’jberkoop het et eerste biebelboek Genesis in een Stellingwarver vertaeling uutriekt an domenee dr. Rienk Klooster van Jorwerd. Nao een kotte inleiding van dr. drs. Anne Bult uut Utrecht, het perfester dr. Anne van der Meiden uut Nijverdal een causerie holen over zien jaorenlange ondervienings mit et vertaelen van de ‘Biebel in de Twenste sproake’.

In zien woord van welkom gong Anne Bult in op aachtergrond en schrieveri’je van de femilie Bult, veural ok op die van breur Oene. Deur een peer veurbielden te beschrieven gaf hi’j an dat de ‘Bulten’ heur gedaachten en mienings meerstal niet onder de pette holen mar daor op ‘e tied graeg en et liefst op schrift mit naor buten kommen. Hi’j fielseteerde zien breur Piet, die tegere mit Frank de Vries uut Blesdieke, et eerste biebelboek Genesis in een Stellingwarver vertaeling maekte en dat now naor buten brocht.

Perfester Van der Meiden uut Nijverdal begon zien causerie ok mit de fielsetaosies veur disse vertaeling van Genesis. Veerder haelde hi’j tal van veurbielden an van perblemen daor aj’ as vertaeler niet omhenne kunnen. Hi’j benaodrokte daorbi’j de vraoge wat de gevolgen wel niet wezen kunnen veur de theologie, de dogmatiek en de verbelinge in roeme zin. Hi’j maekte mit zien groep van acht meensken een onderscheid van drie laogen waor as de tael verschillend bruukt wodt, t.w. de plechtige tael, de omgangstael en kroegpraot. Een preek in bevobbeld de plechtige tael wodt neffens Van der Meiden al gauw anti-kommenikaosie.

As dadde kwam de initiatiefnemer en vertaeler Piet Bult an ’t woord. Hi’j het in et kot uutstokt hoe as een jaor of wat leden, deur et gadderen van losse Stellingwarver woorties, de follementen legd binnen veur een Stellingwarver vertaeling van de Biebel. Veur him weren o.e. Hendrik Bergveld, Rienk Klooster en zien breur Oene ok al es doende west mit et vertaelen mar dat gong meerstal over kotte stokkies die vaeks bruukt wodden bi’j speciaole gelegenheden. Dat et mit et vertaelen laoten deur een komputer allienig niet goed komt, kwam hi’j al rad aachter. Hoewel de PC een goeie hulpe wezen kan, mos et meerste wark toch gewoon mit heufd en hanen gebeuren. Mit al zien twiefels en perblemen kon hi’j de hieltied bi’j Frank de Vries terechte die zien wark konterleerde en de neudige verbeteringsveurstellen andreug.

Naodat domenee Rienk Klooster et eerste proefboekien van Genesis in een Stellingwarver vertaeling kregen hadde, haelde hi’j in zien daankwoord de geerwarking mit Oene Bult ok nog es naor veuren. Rond 1980 / ’82 hadden zi’j tegere boekies maekt zoas et Ark veur karkewark. Ok konstateerde Klooster dat d’r de laeste tied weer meer belangstelling veur geleuf en karke komt. En d’r komt al hielendal meer belangstelling veur preken in de streektaelen zoas hi’jzels ok mit riegelmaot preekt in et Fries en et Stellingwarfs. Hi’j weenskte de maekers alle goeds toe om d’r wat moois van te maeken en zag d’r now al naor uut dat et hiele boek klaor wezen zol.

Et ure leup wel wat uut mar d’r wodde toch nog tied vunnen om d’r mit belangstellenden nog een posien gezellig over nao te praoten.




Passebericht over de Stellingwarver Biebel (okt 2004) 

Vanwege de geweldige en alderdeegst laandelike belangstelling veur et vertaelen van de Biebel in et Stellingwarfs, is deur de maekers Piet Bult en Frank de Vries besleuten om daorveur een stichting in et leven te roepen. Een weekmennig leden is daortoe dan ok de stichting 'Stellingwerfs Eigen' opricht. Naodat et eerste boekien Genesis in een Stellingwarver vertaeling in eigen beheer uutbrocht is, zet disse ni'je stichting uutaende mit et uutgeven van een proefuutgifte van mar liefst drie biebelboeken toegelieke: Ester, Judit en Ruth. Ok aj' eins mar weinig weerde hechten an de Biebel of an et geleuf dan is dit toch een hiel aorig boekien. Elk van disse drie biebelboeken lat him lezen as een spannend verhael van drie vrouwluden die elk op heur eigen wieze as heldinnen beschreven wodden. Dit driedelig boekien is veur 6,85 te koop bi’j de Stellingwarver boekhaandels of te bestellen via internet op www.stellingwerfs-eigen.nl.

Et kastverhael in 't Stellingwarfs

Et volgende doel van de ni’je stichting is de uutgifte van et dadde boekien uut disse riegel dat nog roem veur de kastdaegen van dit jaor verschienen zal. Daorin zal dan onder eren et geboorteverhael van Jezus neffens et evangelie van Lukas in et Stellingwarfs vertaeld wezen. Uut verschillende reakties bliekt trouwes dat de boekies die as proefuutgiften van de Stellingwarver Biebel uutgeven wodden, wel es een 'collectors-item' wodden kunnen. Daorom is besleuten dat op et mement van uutkommen van de hiele Biebel over een jaor of zeuven, iéne Stellingwarver Biebel in een zwatleren kaft verlot wodden zal onder de meensken die de hiele riegel proefuutgiften kompleet in heur bezit hebben.

Jaorlikse schrieversbundel

Naost et vertaelwark van de Biebel staot de stichting 'Stellingwerfs Eigen' ok eupen veur allerhaande aander kreatief wark dat et Stellingwarfs-eigene angaot. Veur schrievers van gedichten en kotte verhaelen en zo wat henne, het et bestuur van de stichting bedocht om elk jaor nao de winter een boek te maeken en uut te geven mit verzaemeld wark van verschillende schrievers. Daorveur wodt iederiene uutneudigd om veur 31 meert van elk jaor een eigenmaekt wark in te sturen. Et liefst in et Stellingwarfs mar dat hoeft niet beslist. In de Stellingwarven wodden daegeliks de drie taelen, Stellingwarfs, Fries en Nederlaans bruukt. Dat bin dan ok de taelen waorin et schreven wark instuurd wodden kan. In elke uutgifte is plak veur zoe'n vuuftig verhaelen en gedichten en de mooiste drieje kriegen ok nog een aorig priesien. Rond et begin van de zoemer - half juni - wodt et boek dan uutgeven en wodden de priezen uutriekt. Veur de veurweerden en allerhaande aandere infermaosie kuj’ terechte op de webstee www.stellingwerfs-eigen.nl van de ni’je stichting of deur een berichien naor heur aemel-adres info@stellingwerfs-eigen.nl. Daor kuj' ok terechte om je an te melden as donateur van de stichting veur mar tien euro jaors.

Passebericht (rond 5 dec 2004)


+++ foto van het Instituut met PJ uit het raam kijkend +++


Vorige week vrijdag is de derde en wellicht laatste proefuitgave verschenen van 'De Stellingwarver Biebel'. Op de stoep van het Instituut voor de Stellingwerver taalbeweging in Oldeberkoop hebben de makers Frank de Vries en Piet Bult elkaar onder het toeziend oog van ..PJ.. een eerste exemplaar overhandigd van het bijbelboek Lucas in een Stellingwerfse vertaling. Dit bijbelboek bevat veel mooie verhalen waaronder de aankondiging en het geboorteverhaal van Jezus dat in de kerstdagen rondom wordt verteld. Dat voor de uitreiking juist voor de locatie in Oldeberkoop is gekozen heeft alles te maken met de contra-positieve houding die door de directie van de Stellingwarver Schrieversronte is ingenomen met betrekking tot deze vertaling van de bijbel. Door die houding lijkt het voor de vertalers nog een hele kluif te worden om de begroting rond te krijgen voor het projekt. In gesprekken met potentiële geldschieters staat de houding van de Schrieversronte een vlotte afhandeling steeds in de weg. Daardoor ontstaat tevens een vervelende communicatie met o.a. de beide Stellingwerver gemeenten volgens Piet Bult. "Na het moment dat ons door de Schrieversronte duidelijk is gemaakt dat zij niet mee wilden doen hebben wij speciaal voor dit doel een stichting in het leven geroepen. Dat deze stichting Stellingwerfs Eigen nu ook aanspraak maakt op een gemeentelijke taal- en cultuursubsidie kan toch niet door de houding van een bevriende club worden tegengehouden?" In de overtuiging dat de problemen allemaal op een communicatiestoring terug zijn te voeren gaan de vertalers dan ook gewoon door met hun vertaalwerk. Er zijn inmiddels al vijftien bijbelboeken 'roegweg' vertaald. Piet Bult: "Maar het maken en uitbrengen van proefdrukken voor het publiek legt momenteel een te groot beslag op de financiën dus daar stoppen we voorlopig mee."




Passebericht december 2004

Blesdieke / Nijberkoop - In et twielochten van dit jaor is nog krek veur de kastdaegen een proefuutgifte van et biebelboek Lukas mit o.e. et geboorteverhael van Jezus in ’t Stellingwarfs uutbrocht deur de stichting Stellingwerfs Eigen. Disse ni’je stichting is een peer maond leden uut aende zet deur de vertaelers van de Biebel in et Stellingwarfs.

Die vertaelers, Piet Bult uut Ni’jberkoop en Frank de Vries uut Blesdieke, weren veur dit doel uutneudigd deur de Kastman op et kesteel van Blesdieke. Kastman (en kesteelheer) Gregorius nam mar wat graeg dit boekien in ontvangst. Tussen alle reboelie over et uutstarven van kleine taelen leek et him een hiele goeie zet toe om de Biebel es hielendal in et Stellingwarfs over te zetten. Mit een bulderende uuthael van zien bekende “Hoo, hooo, hooo” nam hi’j et boekien an en las d’r een peer stokkies uut veur. Ok kesteelheer Gregorius o.e. huder van de ‘Raodskaemer’vun dat de Stellingwarver Biebel in ’t kesteel thuusheurd.

Disse proefuutgifte van et biebelboek Lukas is al weer et dadde boekien in de riegel ‘Biebel in et Stellingwarfs’ mit in ‘t tetaol vuuf biebelboeken die now in geef Stellingwarfs op pepier staon. Daornaost hebben de vertaelers ok al weer een peer biebelboeken roegweg klaorliggen en liggen dan ok aorig op schema. “Behalven de hiel positieve woorden van Burgemeester Heite van Stellingwarf-Westaende krie'we trouwes de meerste bi’jval van buten oonze beide Gemienten”, neffens de maekers, “en dat is jammer”. “We zollen dan ok best een ploegien vaaste mitlezers uut de buurt om oons henne hebben, om d’r mit mekeer een mooi mar veural ok een goeie vertaeling van te maeken.” Dit boekien van de evangelist Lukas ligt krek as Genesis en ‘Drie maegies in ién boekien' - Ester, Judit en Ruth -, in de Stellingwarver boekwinkels veur kostpries te koop.