zu. 16 meie 2004.
Vandemorgen om een uur of half zeuven wa'k beneden en he'k thee zet. We mossen aorig opschieten want om tien ure mossen we al in Exloo wezen te peerdrieden. De vrouw ridt dan op een mooi wit, dresseerd peerd en komt op wedstrieden uut in de Z1 klasse. Et peerd komt uut Ruslaand en de vrouw uut Hollaand. Een aorige kommenaosie. Dat vient de jury soms ok wel; nog vaeker vint ze dat niet. Goed ien ure weren we weer thuus en had et allienig mar centen kost, niks opleverd. De gehaktballe smaekte mi'j daor best. De wereld leit d'r daor mooi henne, boven op Hoonsrogge in et Drente-laand. Die Hoonsrogge an de oostraand van et Drentse plateau, van Emmen tot an de stad Grunningen, tussen de dellen van de Drentse A en de Hunze. Een kilemeter of vuuftig laank en wel tot zoe'n 32 meter boven NAP in et zuden.

De hiele middag he'k in de weer west mit De Stellingwarver Biebel. Tussendeur wat om huus henne kuierd om de bienen soepel te holen. Vergeten om vandaege een Campari te drinken. Dat doe 'k aanders haost alle zundags. Van een stokmennig Biebelboeken he'k een veurblattien maekt waorin uutlegd wodt waor as et boek over gaot.

za. 15 meie 2004.
Om de Stellingwarvers as dagboekien-schrievers uut et Friese, op dit wereldwiede spinnerag an een meerderhied te helpen, mos ik ok mar es een schoffien mitdoen ha’k docht. Now he'k daegs niet zovule belangrieks om bi'j te praoten mar och, d'r bin van die spullegies daor is et mitdoen belangrieker as et winnen.

De meerste daegen hool ik me doende mit et maeken van komputer-pergrammes dat dan zit ik toch aachter dat ding. Even een peer riegelties schrieven en op de elektische busse smieten moet dan gien muuite wezen liekt mi'j.