Zu. 23 meie 2004.
Vandemorgen al weer vroeg uut de veren. Om halftiene henne naor de manaege in Oosterwoolde. Even te kieken west naor de buurvrouw en heur peerd in een wedstried in de Western stiel. Ze kwam d’r weg mit een vuufde en een twiede pries. Lang niet gek veur een eerste keer mitdoen donkt mi’j.
Op de weerommereize even bi’j radio Centraal in Noordwoolde langes west om even wat of te geven.
Even laeter het de vrouw mi’j thuus een slim uutbreid noenmaol veurzet.
Doe even een uutneudigingsbriefien op pepier zet veur de uutneudiging van et ‘startschot’ van de uutgifte van et eerste boekien (Genesis) van De Stellingwarver Biebel.
Rond een uur of vieve hewwe naor Eén – tussen Haulerwiek en Norg – west om op een jaordagsfesien uutgebreid mit an te schoeven an een wiedwijdige eteri’je. ’t Bakken, braoden en aander keukenwark is de man (Hans) zien hobbie. Dat wodt dan weer zo rond as een tonnegien op bedde vanaovend.
Mar eerst de kraanten van dit weekaende nog even deursnuuid om d’r wat aorige stokkies uut te zuken veur oons radio-pergamme ‘Wiespraoten’ van ankem donderdagaovend op Centraol. Ien onderwarp staot al (haost) vaaste want we hebben naost oonze vaaste Wiespraoters donderdag oonze ‘adderman’ ok in ’t forum. We zullen et dan wiedwijdig mit him hebben over de oftaekeling van et laandschop in de zuud-oosthoeke van Frieslaand. Et Vene, Opsterlaand en Stellingwarf-Westaende hebben al instemd mit de plannemaekeri’je. Oostaende nog niet.

Za. 22 meie 2004.
Vandemorgen om de koffie henne naor Donkerbroek toe gaon veur een streekwedstried in de peerdedressuur. Ien keer 171 en 180 punten mit een winstpunt haeld. Dat was weer best genoeg veur vandaege. ’t Koste gien inschriefgeld en d’r was ok niks aanders as roem te winnen. En mit een twiede pries hej’ toch aorig roem kregen veur je doen, zomar even op een zaoterdagmorgen in Donkerbroek. Donkerbroek, et dörp waor ik krek 58 jaor en drie daegen leden op een mooie zundagmorgen geboren bin as jongste van een koppel van tiene. Dat het mi’j altied goed voldaon.
Mit mien drokker uut Amsterdam hadden we in Donkerbroek ofpraot, dat ik hebbe now de eerste riegel van mien Biebelvertaelings in huus liggen. Et zicht d’r goed uut. Ankem deensdag za’k een peer mitnemen naor de veurjaorsvergeerdering van de Schrieversronte. Es heuren wat ze d’r daor van vienen.
Vandemiddag nog wat thee-vesite had en ’t aovend biwwe zels nog even op de koffie naor Roden west. Onder de koffie weer drok praot over de meugelikheden en onmeugelikheden van et vertaelen.

Vr. 21 meie 2004 (dag nao Hemelvaortsdag).
Gisteraovend laete (zeg mar vandemorgen vroeg) wodde ik d’r deur Jan opmarkzem op maekt dat d’r wat mis was mit mien webstegien. Hi’j had twie dingen: d’r mag wel wat kleur in en de zaekelike thuusziede dee niks meer. Dat daor wa’k vandemorgen al veur zeuven ure mit doende. Veur dat et meerste volk wakker wodde (daenk’) ha’k et weer hielendal op odder. Dat betien kleur as aachtergrond dot wis een stok vrundeliker an.
Now vaalt mi’j krek mien stemkaortien van de boekeplaanke. Et stemkaortien veur et Europese Parlement. Mar ik kenne daor gieniene. Niet stemmen mag niet want dan maj’ laeter niks gien kommentaor hebben (en daor bin ‘k krek goed in). Is wel te stemmen, mar et geft niet waorop, dan een betere keuze? ‘k Zal es even op et web zuken of d’r ok argens een stemmewiezer te vienen is.
Vandaege nog een peer keer over de digitaole snelweg naor Braobaant west. Oonze klaant wol nog meer gegevens vaasteholen. Mit een weke of wat moet dat lokken.
Braobaant meet neffens mien oold eerdriekskunde-boekien zoe’n 5.083 km2 en het omdebi’j 2,3 miljoen inwoonders. ’n Tikkien kleiner as Frieslaand (5.741 km2) mar aorig meer inwoners as oonze 615.000. Tilburg, waor a’k dan wel gauw es komme, is over de straote dikke twiehonderd kilemeter en dus wel een twie-en-een-half ure mit de auto. Een peer keer henne-weer mit mien komputertien is mar een tik an ’t oor.
Vanaovend he’k lekker eten kookt (bakt eins) veur oons beidend. Bakte eerpels mit spekkies en siepels d’r deurhenne en rauwe witlof mit stokkies appel, sinesappel en een kookt ei. Laot Johan dan mar naor Pieter gaon te eten.
Morgen krieg ik de drokproeven van Genesis thuus. Et eerste heufdstok van De Biebel in ’t Stellingwarfs.

Do. 20 meie 2004 (Hemelvaortsdag).
Mooi rustig an de tillefoon vandaege. Meubelroutes en sok soorte van onzinnige dingen daor doen we niet an. Vandaege mooi wat wark daon veur de grootste batteri’je-inzaemelder van oons laand. Tussendeur nog even een spullegien darten verleuren en veerder wat makkelik eten veur oons beidend maekt. Bolties mit kiepesop. Of is ‘t: kiepesop mit bolties.
Ok nog even een stok of wat vassen van Openbaringen deursnuuid en verbeterd. <Zocht, kreun, steun…> Waor bin ‘k an begonnen… Dat geldt liekewel veur dat Biebelvertaelen as vanwege dit dagboekien. ‘k Moet d’r nog even in kommen zuwwe mar rekekenen.
Tussen de bedrieven deur een heufdstok lezen in boek over diere-psychologie. Daor wi’k toch meer van weten. ’t Zet jezels ok slim an et daenken.
Op et platte dak he’k de takke- en blaederommel wat opruumd. Now kan ’t waeter weer fesoenlik votkommen.

wo. 19 meie 2004.
Vandemorgen al vroeg een protte femilie over de heerd had. We hebben mitmekeer es even naor et Biebelvertaelen keken en omstanig bepraot. Vandaege gong et over de Openbaringen van Johannes. De drokte vassie van Genesis zol vandeweke klaorliggen bi’j de drokker. Dat dan is et begin en et aende (alfa en omega) in een eerste roege vassie klaor. We hebben ok een daotum prikt (aende juni) om et eerste boekien Genesis mit een betien tam-tam in de media an te kondigen as ‘startschot’ veur dit 10-jaoren projekt. Daor moet dan eins ok de belangstelling uut blieken veur oonze vrotteri’je.
Even laeter kwam oonze adderman ok nog even. Die he’k strikt veur oons radiopergramme van ankem weke donderdag de 27^ste (Radio Centraal 107.4MHz van 18:00 tot 19:00 ure). Hi’j wol dan graeg zien verhael kwiet over et onderhoold van de netuur hier om oons henne. Et zol mit grote patten van oonze netuur niet goed gaon omreden d’r te vule blispoters binnen en d’r te weinig naor de man in et veld luusterd wodt. Naost dat Andries ammeteur veldbioloog is, het hi’j ok altied zien filmkamera mit et veld in. ‘k Heb al es prachtige bielden van him zien van bevobbeld perende adders!

de. 18 meie 2004.
Nog mar krek zeuven ure wa'k beneden. Et riedeltien van thee zetten, koffie drinken en sigerettien roken eerst ofwarkt. De vrouw wol al vroeg te bosschoppen. Eerst de dingen haelen die beslist moeten omreden we aanders perblemen verwaachten op 't husien en dan wol ze ok nog even gewoon te winkelen. Wat dat is dat wee'k niet. Wa’k wel wete is dat et meerstal een protte centen kost as ze 'even te winkelen' gaot.

Wel mooi stille in huus vanzels. Kan ik mi'j even doende holen mit wat centen te verdienen. Zal ok wel neudig wezen, bin'k bange.

ma. 17 meie 2004.
Vandemorgen wa'k alweer veur zeuven ure in de bienen en hebbe doe eerst mar es weer een paantien thee veur de vrouw zet. Dat doe'k haost elke morgen. Zels drink ik morgens eerst een sloot koffie en roke daor dan mien eerste twie sigeretties bi'j. Dat bin vaeks de lekkerste van de hiele dag.

Veerder he'k de hiele dag wat doende west mit wat klaantewark. Iene uut Braobaand en iene uut Grunningen. Wat kleine anpassings an heur pergrammes.

Aovends het de buurvrouw de vrouw hulpen mit et opvoeden van heur jonge peerd. Veur kenners: een ofstammeling van Olivy. De buurvrouw het een psychologische anpak. D'r het ok al es iene west te helpen die docht dat ze et mit de zwiepe wel redden kon. Doe bin 'k tussenbeide kommen en he'k zegd dat ze mar niet weer kommen mos.