Zu. 18 juli 2004.
Vandemorgen zat ik al veur zeuven ure te lezen; drie boeken lezen en hier en daor nog wat an verbeterd: Ester, Judit en Ruth. De weekaende-kraanten nog es even goed deurneumen om wat onderwarpen bi’jmekeer te zuken veur oons pergramme "Wiespraoten" van ankem donderdag (18:00 – 19:00 ure op RWC). Vandemiddag op verjaordagsvesite west bi’j Jacob. Ok al weer een bekende naeme uut de biebel.
 

Za. 17 juli 2004.
Vandaege wat kleine klussies daon van huusholdelik karakter zoas even wat te bosschoppen in Berkoop (mooi drok daor i.v.m. Eupen Stal), stofzoegen en ofwassen en zo…
Veerder de hiele dag mit Marcus en veural mit Lucas doende west. In ‘t roege wark liggen die beide now klaor. Now nog een keer of wat lezen, lezen en nog es lezen en verbeteren vanzels. As et even kan dan moe’n disse beide biebelboeken eins roem veur de kastdaegen beschikber kommen.
 

Vr. 16 juli 2004.
Vandemorgen eerst even een hiel vervelend klussien in Grunningen. Doe vlogge weer op huus an. En vandemiddag nog even naor Ferwerd. Dat weren veur vandage weer kilemeters genoeg. Now nog gauw even wat elektrische verbienings deur et hiele (now ja, hiele) laand leggen en dan gaon we an ’t weekaende beginnen.
Maendag wi’k eerst de netaoris es kontakten. Een stichting in ’t leven roepen kon wel binnen een weke zee hi’j vandeweke mar as et zo gaot zoas et now gaot dan wodt et hielendal niks dus. Deensdag he’k him mien konseptakte elektrisch toe stuurd, dat dan zol hi’j eins best op uterlik vri’jdag even reageerd hebben kund. Hi’j zal toch eerst niet mit Pieter hoeven te overleggen mag ik annemen?

Do. 15 juli 2004.
Vandaege he’k de kraante-rommel van de laeste tied es een betien opruumd. Veerder disse hiele - wat mistroostige dag – wat zitten te lezen in de biebelboeken Ester, Judith en Ruth. Et liekt mi’j wel aorig toe om die drie maegies straks in ien boekien uut te geven. Drie heldinnen van een peer honder jaor v.C.
Om een uur of achte belde de dri’jer van Berkoop nog. Ze bin de kommende uutgaove doende en now hadden ze wel wat foto’s maekt in de karke mar et redaktionele stokkien kwammen ze niet hielendal uut in ’t Stellingwarfs. En dat wollen ze eins al, dat a’k ok een stokkien klaorliggen hadde op een schiefien want we hebben wel een komputertien mar (nog) gien internet verbiening. Dat ik hebbbe ze mar even een flodderschiefien brocht. Now mar es ofwachten wat ze d’r van knippen en plakken.

 
Wo. 14 juli 2004.
Vandaege mos ik even in Winschoten wezen. Doe'k van de stad Grunningen die kaante opree over de grote weg, zag ik opiens een bottien veur de ofslag Heiligerlee. Die ofslag he'k doe eerst mar es neumen. Want die naeme kwam mi'j slim bekend veur. Een dörpien van niks aj' d'r zo wat deur henne rieden mar toch mit een beroemde (of is 't een beruchte) naeme. Ik hebbe mi'j d'r daor geliek even in verdiept deur wat lekaole infermaosie te gadderen.

Op 23 meie 1568 was de slag bi'j Heiligerlee. Een veldslag tussen de deur Lodewijk van Nassau leide gelegenhiedstroepen van de opstaandelingen (een rommeltien krap 4.000 man infanterie en 300 man op een peerd) en et redelik goed oefend leger (roem 3.000 man infanteristen en 20 ruters) van Jan de Ligne, graaf van Arenberg en stadhoolder van de noordelike gewesten. Arenberg wol de komst van hulptroepen ofwachten, mar Lodewijk lokte et gevecht uut deur een anval van zien kavalerie, waorbi'j zien breur Adolf van Nassau sneuvelde. Doe de Spanjaarden even laeter een tegenanval inzetten, leupen zi'j in een hinderlaoge van scharpschutters (mit zwat kruud?) en wodden ze ok nog es verrast deur de heufdmacht van Lodewijk, die daorbi'j daankber gebruuk maekte van et moerassige veld. Honderden Spaanse soldaoten kwammen hier doe omme, waoronder ok die Arenberg. De Slag bi'j Heiligerlee wodt dan ok wel beschouwd as et begin van de Tachtigjaorige Oorlog. De naeme van die oorlog komt mi'j trouwes ok verekte bekend veur. En hoe laank duurde die oorlog ok al weer...?

De. 13 juli 2004.
Vandaege de hiele dag mit een boot (catamaran*) en een trailer in de weer west. D’r kwam liekewel gien waeter an te pas, wel smerige hanen.

*) De catamaran is een boottype mit twie evenwiedig naost mekeer liggende rompen die deur een soorte van dek mit mekeer verbunnen binnen. In heur ooldste vorm bestaot de catamaran al in de oolde stientied doe o.e. veur de kust van India al veerd wodde op naost mekeer vaastebunnen boomstammen. De catamaran het heur tot an de 17de ieuw haost niet deurontwikkeld. Rond 1700 wodden d’r veur et eerst zeeweerdige catamarans bouwd veur de grote veert. Naoderhaand bin catamarans ok maekt veur allerhaande wark; veural ok sund de Twiede Wereldoorlog wodt et grote veurdiel van dit soorte van boten mit een butengewone grote stabilisaosie onderkend. Catamarans kwammen vanof de jaoren vuuftig in gebruuk as snelle veerschippen veur et vervoer van passagiers op binnerzeeën en bescharmde kusttrajekten. Ok in de zeilsport maekt de catamaran heur waor; hier bin verschillende wedstriedklassen veur ontstaon. D’r bin ok boten van dit type mit drie rompen naost mekeer, de trimaran.

Tussendeur he’k een konsept van oprichtingsakte van een ni’je Stellingwarver stichting naor de netaoris opstuurd. Mar even ofwachten of daor nog wat in veraandert wodden moet.

Ma. 12 juli 2004.
Vandaege de hiele dag in Ochtrup (Dld) en Enschede ommesleugen…
Meer wi’k d’r now even niet over kwiet…