Naor Dagboekien

Veurige weke Ankem weke
*
Weke 14 (4/4 – 10/4 - 2005):
*
Zundag (10/4):
*
Vandaege veur et laest...
Van 4 tot 10 april wodden in et oolde Romeinse riek de 'Megalensia' of 'Ludi Megalenses' holen. Tiedens disse feestdaegen, waorop enorme hoeveulheden alcohol nuttigd weren, wodde Magna Mater (godin Cybele) eerd. Op disse feesten wodde muziek maekt en daanst, waorbi'j sommige dielnemers alderdeegst in extase raekten. Cybele was een kleinaziatische moekegodin. Heur orgiastische, deur ophitsende meziek begeleide kultus verspreidde him over de hiele Griekse en laeter ok over de Romeinse wereld.
* 
 ‘k Was vandemorgen ok es even weer bi’j et ‘life’ maeken van Huus&Hiem over de heerd bi’j radio Centraal. Henk en Frank hadden de gang d’r weer lekker in mit een bakker en melkboer as gaasten. Disse beide mannen hadden ok weer oolde ‘annekedotes’ over lange leden, doe d’r nog wel es een rotte in de soepenbri’j terechte kwam. De kommende -zeg- twintig jaor zullen d’r protte van disse oolde verhaelen mit de meensken in ’t graf wegraeken. De hiele generaosie die de oorlog en nog een stokkien van daorveur nog mitmaekt het, raekt zo langzeman uut de tied. Et bescheid op de vraoge waorom as d’r soldaoten mitdoen an een burgeroorlog, he’k krek mist.
Op mien vraoge waorom a’k Saakje Berkenbosch nooit meer heurde mit et veurlezen van een gedicht, kreeg ik te heuren dat die et zomar wat ofweten laoten hadde. As radiomaekers moej’ wel op je mitwarkers vertrouwen kunnen vanzels en dat konnen ze op disse dus niet. Meensken die zonder reden niks van heur heuren laoten en tillefoonties domweg niet beantwoorden, daor kuj’ hielendal drie keer niks mit.
Ze bruken now vaeke gedichten uut een bundel van Jan Veldhuizen uut Apeldoorn (winner van de anvieteringspries 20??). Vandaege hadden ze et gedicht ‘Aktie’ van Jan uutkeuzen dat aachterop et blattien van 26/27 meert van de Spreukekelinder staot. Op de webstee van de sSr he’k even keken in wat jaor die beste man de pries ok alweer wunnen had mar dat kon ‘k daor niet vienen. Op die hiele webstee komt disse Jan zien naeme niet veur!!! Ok niet in de literetuurliest, krek liekemin trouwes as bi’jglieks die van Christine Magour!!! Hoezo anvieteren van ni’je telenten…sSr? Schaeme je wat! Van de webstee van de sSr:

Dat anpassen van ‘disse list’ in de loop van 2004 moet nog… "List" (blz 126 L-R) ken ik van "list, slimme vondst" of "List en Bedrog". Disse list had liest of lieste wezen moeten liekt mi’j, krek as mien Woordeliesten.

De daotum wanneer as Jan die anvieteringspries wunnen het, he’k trouwes in mien eigen archief even opzocht en dat bliekt 2003 te wezen (uutriekt op 22 september in ’t Gemientehuus van Wolvege). De pries was 500 euro (die het hi’j doe drekt in de pot van de sSr stopt) en een oorkonde. Die oorkonde zal wel bi’j him op ’t husien hangen bin ‘k bange of zol’ie toch boven ’t bedde hangen. A’k zoe’n artikel in de Aovend zo nog es naoleze dan wor ik ni’jsgierig naor dat soorte van dingen. Toch mar stiekemweg wat deurgaon Jan… en aj’ nog es wat uutgeven willen: d’r is now ok een st. Stellingwerfs Eigen en die geven je graeg de ruumte.
*
Lieve Rita: Aj’ literair oe zo gewoonties (bescheiden) blieven en ie hebben et over jezels, zeg ie dan: de schriever of disse schriever?
De schriever, daor is in dit verbaand mar iene van. Aj’ disse schriever zeggen, dan bin d’r vaeks wel meer van. De schriever is in dit verbaand dan ok hielendal niet zo gewoonties as dat et liekt. Groeties van dé Rita.
*
Lieve Rita: Aj’ literair even votgaon, gaoj’ dan argens naor toe of gaoj’ argens henne?
Dan gaoj’ argens henne en niet argens naor toe. Dat laeste is Karstiaans (verbeugen Nederlaans). Liefs, Rita.
*
*
Zaoterdag (9/4):
*
Veenstra goes Frysk! Neffens de kraante (LC) is de beroemde, himzels slim respekterende en alder- alderbeste schriever / dichter uut de Stellingwarven zundag te zien en te heuren in Harlingen (Harns) in "It literêr Sirkwy". Een weke laeter is et hiele Fryske sirkus in Sneek (Snits), weer even laeter in Et Vene (Hearrefean), Franeker (Frentsjer), Twiezelerheide (Twizelerheide) en Liwwadden (Ljouwert). Persoonlik gong ik liever mit de "Femme Vattaal" op stap van dezelde bladziede mar ja… ieder zien meug.
*
Ik kwam heur donderdagaovend in de kroeg tegen en ze vuulde mooi hiete an. Doe’we wat an de praot raekten zegt ze opiens tegen mi’j, ze zegt "Ie kun morgenaovend wel even mi’j thuus kommen, dan is d’r toch gieniene thuus." Now, dat zag ik hielendal zitten vanzels en ik slikte mi’j al om de mond. Ikke d’r gisteraovend henne, bel an… bel an… en bel nog es an… inderdaod: gieniene thuus. (Mit daank)
*
De paus is dood en begreuven, lang leve de paus!

De kluis in de kaemer van de paus was de laeste jaoren nooit bruukt. Disse paus leefde o zo zunig wiels de RK-karke toch de riekste karke van de hiele wereld is. De "Codex Iuris Canonici", et karkelik wetboek dat sund 1918 van kracht is, geft de RK-karke de karkelike juridische basis waorvan de follementen baseerd binnen op goddelike rechten. Christus het zien macht doedestieds overdaon an Petrus en zien opvolgers om veur him - en dus as God op eerde- te regeren. Neffens et canonieke recht nemt de paus et veurste plak in de wereld in en is d'r gien inkelde instaansie die him veur verantwoording roepen kan. Hi'j is de vader van alle vosten en keunings, regeerder van de wereld. Et ontbrekt de paus dan ok bepaold niet an titels en liekemin an centen. Et inkommen van de RK-karke is jaorliks zo rond de 300 miljoen euro wiels heur totaole kapitaol rond de 20 miljard euro schat wodt. Wat zee de ienige echte Petrus ok alweer? "Goold en zulver heb ik niet…", mar in Rome ligt dat krek even aanders.

De riekdom van de RK-karke is veur een groot pat et gevolg van giften mar et meerste wodt verdiend mit andelen in allerhaande bedrieven. Et is bi’jglieks algemien bekend dat de paus een tegenstaander is van anticonceptiemiddels, alderdeegst in lanen waor et AIDS-virus duzenden slaachtoffers maekt. Wat pattie meensken niet weten is dat etzelde Vaticaan belangrieke andelen het in een bedrief in Italië dat diezelde anticonceptiemiddels maekt! Ok verdient et grof geld mit heur casinos in Las Vegas. De RK-karke is in dit gokparadies de vlogst gruuiende religieuze gemienschop. Karke en casino gaot bi’j de Kattelieken bliekber broederlik naost mekeer.

*

Lieve Rita: Ik bin onderwiezeres op een legere schoele. Mit dierendag vertellen de kiender altied wat dieren as ze thuus hebben. Henkie zee: "Ik heb een cavia". Annegien vertelde dat ze thuus een poes had. Pietje stak zien vinger ok op en zee: "Ik heb iene van veertig centimeter". Ik wodde hatstikke lelk en zee streng tegen him: "Blief ie dommiet mar es even nao, mien joongien." Zegt dat kreng: "Ja, dat ha'k wel docht." Lieve Rita, wat moet ik hier mit an? Groeten van een Schoelejuffer.
Lieve Schoelejuffer. ’t Liekt mi’j et beste daj’m d’r nog es even rustig over praoten. As Pietje d’r bi’j blift dat hi’j iene van veertig centimeter het (wat ik ok haost niet leuven wil) dan moet hi’j die mar es zien zien laoten. As ’t niet waor is dan lach d’r mit jim beidend nog mar es omme en stuur him naor huus. As ’t wel waor dan stuur him mar vlogge es naor mi’j toe (zien heit liekt mi’j dan ok wel wat toe). Liefs, Rita.
*
*
Vri’jdag (8/4) verjaordag van een breur van mi’j (niet henne west):
Ik bin d’r now ok aachter waorom a’k wel es een betien vremd bin/doe, want: "Op de achtste dag zee God: Zo, Piet mien joongien, now is 't jow beurt." Dat ja, zo loop ik de hieltied een dag aachterop…
*
Lieve Rita: "Ik zie d’r zo tegenop da’k mittertied wel es wat dement wodden kan. Is daor wat tegen te doen?" Groeten, Annemiek. "Lieve Annemiek. Maek je mar gien zorgen over et dement wodden want ie zullen d'r zels niks van vernemen. En dan nog wat. Ikzels bin et ok al een hiel schoft en daor mark ie toch ok niks van?" Liefs, Rita.
*
Om es even mit in de hangmatte te liggen: "Aj' autorieden dan leg ie je leven in de hanen van je voeten."
*
D’r bin van die meensken die alles altied in ien keer goed doen. D’r bin ok meensken die overal twie keer overdoen. De bosschop veur disse laeste groep: Beginne liever niet an parachutespringen.
*
Een protte manluden zollen mar wat graeg willen dat Valentijnsdag op 29 feberwaori valen zol.
*
De webstee van de sSr is een dagmennig leden ok weer wat uutbreided. Disse keer mit et onderwarp: Stellingwarfs in 'Proeven van dialect'. Daor staot ien zinnegien in die 'k wel twie keer opni’j lezen mos "De hiele bundel hebben zoe'n twintig auteurs an mitdaon." Ligt dat now an mi'j of an de taelkundigen op dit instituut? Et leek mi'j haost wat een zinnegien uut een kiendermond: "De hiele bundel hebben zoe'n twintig auteurs an mitdaon." Ik zol zoks as "An de hiele bundel hebben zoe'n twintig auteurs mitwarkt." zegd hebben, liekt mi’j.
*
Ik zegge en schrieve op 't heden nog wel gauw es da'k de sSr wat een 'benauwd kliekien' vien mar wat is een 'kliek' eins? Daor he'k es even wat op naopluusd en een ure mit in de hangmatte legen …

Een kliek (in ’t hiel chique ok wel clique) is in de sociologie een (hiele) kleine en vaeks wat ‘n informele groep van meensken waor et d’r bi’jheuren niet baseerd is op expliciete kriteria, mar op een vaeks onbekende positieve neiging om iene of meer meensken die bi’j zoe’n kliek heuren, gewoon (d.i. zonder rede) aorig te vienen. De relaosies in zoe’n kliek bin meerstal nauw, hiel persoonlik, slim langdurig en haost altied wederkerig (seins tot intieme vrundschop an toe). Een kliek bescharmt himzels en zet him vaeks of tegen de ‘boze’ buterwereld, mar warkt meerstal wel weer (hiel goed) saemen mit aandere klieken en kliekies (hier wodt niet doeld op: waarm eten). Binnen een grote orgenisaosie ontstaot deur kliekvorming vaeks een slim kompliseerd netwark (mit een informele struktuur), dat van grote betekenis is veur de warking van de orgenisaosie. Klieken variëren veur wat betreft heur effekt, op et funktioneren van de orgenisaosie waorbinnen ze bestaon.

Toevallige klieken (informele, weinig struktureerde kontakten tussen meensken uut dezelde orgenisaosie, die mekeer buten et wark omme ok vaeke treffen) kommen de loyaliteit en de inzet veur de orgenisaosie vaeks te goede. Horizontaole klieken (kollega's en geliekesen in rang of staand, die nauwe informele banen onderholen) verstarken de solidariteit binnen die rang (of staand) vaeks en zullen tegenover hogere en legere niveaus een eigenbelangenbehartigende opstelling (defensief of alderdeegst agressief) kiezen. Ze perberen dan vaeks om een tegenmacht tegen de formele leiding te maeken (mar et warkt krekliek ok wel naor beneden toe). Vertikaole klieken (meensken van ongeliekese rang of staand) bin van grote betekenis: ze kunnen de starre formele verholings vaeks wel wat makkeliker maeken, mar ok de basis vormen veur perti'jevorming, rivaliteit en (op)splissing, waordeur de orgenisaosie heur ienhied verlöst, onbeheersber wodt en haost altied uutmekeer vaalt.

Binnen iedere formele orgenisaosie bestaon vaeks ok nog informele relaosies die alderdeegst tot korruptie leiden kunnen. Ieder meenske in zoe’n kliek het dan zien eigen 'egocentrisch netwark' en staot –vaeks indirekt- mit een protte aandere netwarken in kontakt. Binnen disse netwarken kan korruptie veurkommen as een geerwarkingsverbaand tussen twie meensken (dyade). Veural as de basis veur disse geerwarking eins niet toestaon is (bi'jglieks femiliebanen of een intieme vrundschop) of as d’r een dudelik machts- en konkereensie-element mitspeult (want dan kriej' al gauw weer kliekvorming), is de kaans op korruptie groot. Ok de warksituaosie, bi'jglieks een formeel en fysiek isolement of de noodzaeke om vlogge even wat beslissings te nemen, kan et ontstaon van informele en korrupte loyaliteiten nog al es in de haand warken. Veur meer infermaosie, op- en anmarkings over disse materie… schrief naor: Lieve Rita.

*
*
Donderdag (7/4):
Vandemorgen as aldereerste weer naor Grunningen toogd. En vandaege was ’t wel raek; we hebben haandel daon. Et kwam trouwes wel wat aanders as da’k eerst veur ogen hadde. Gister docht ik nog dat ze wat van mi’j kopen wollen mar vandaege he’k dan wat van heur (twie mooie zwatte mannen) kocht. Ze hadden een hiele tasse vol mit zwat geld. Et zol wel roem honderdduzend dollar weerd wezen en ik hoefde d’r mar vuuftienduzend veur te betaelen. "Ja," zeg ik, "die truuk die ken ik. "en dan moe ‘k daor dommiet ok nog es tiene bi’jleggen veur ‘de chemicaliën’ zeker." "Nee heur," zee die iene mooie zwatte man "ie kriegen d’r drekt een poede mit waspoeier bi’j, et kost je niks meer en et hiele zwikkien kan hup, zo in de wasmesiene." Now, dat klonk slim vertrouwd vanzels, dat dat biwwe mar angaon. Die waspoeier leek trouwes krek op echte OMO en zat ok in krek zoe’n plestieken poedegien. Aj’ niet beter wussen zoj’ daenken dat et even eerder zo uut de winkel haeld was. Now moe’k nog even een dag ofwaachten da’k allienig thuus bin en za’k toch es even een wassien dri’jen…!
*
Dezelde mooie zwatte mannen hadden ok een tilleskoop te koop daor aj’ neffens heur vule veerder mit kieken konnen as mit de duurste NASA-tilleskopen die d’r mar bestaon. Mit disse koj’ alderdeegst de zwatte gatten in et heelal zien. "Eins ok allienig mar zwatte gatten," zeden ze nog. Omreden ze hier op dit stee lezen hadden da’k ok wel es naor de steerns kieke, wollen ze die kieker an mi’j laoten veur een hiel schappelike vuvendattighonderd dollar. Gien geld, leek mi’j, he’k vanzels drekt daon want ik wete wat een goeie kieker weerd is…!
*
En doe hadden ze ok nog ‘unieke’ zwatte Roleksen te koop en zwatte pruken en zwat zaod e.z.v. Van dat laeste he’k trouwes al meer as genoeg.
*
Lieve Rita: "Zoe’n vuuf percent van de wereldbevolking het fantesie. Now dot blieken dat ik et hebbe en die vent van mi’j ok! Hoe hewwe mekeer toch zo vunnen?"
"Hoe zol ik dat now weten moeten. Jim bin mekeer vaaste argens een keer tegen et lief lopen en dat het doe ‘klikt’ –zeg mar, inmekeer klikt as een drokknopien- zeker. Tsja, en as dat dan een betien past dan zit ie an mekeer vaaste vanzels. Zoks overkomt mi’j now nooit. Liefs, Rita."
*
Lieve Rita: "Hadde Pieter Stoevezaand ok een autopet?"
"Nee, hi’j had wel een kroje. Zol ie eins ok es antugen moeten."
*
Et toppunt van luihied schient ‘vroeg uut de veren’ te wezen want dan hej’t daegs langer an tied om even te bekommen…
*
De plaeties van ‘Et mederne leven’ in de LC vien ik veur 99,9 percent prachtig. Die van gister daor zag ik mi’jzels al veur de spiegel staon om te oefenen op de vraoge(n) die ‘k bi’jkotten stellen wil op de jaorvergeerdering van de sSr:
"Meneer de veurzitter… Hoe staot et mit de jeugdofdieling van de sSr?"
"Meneer de veurzitter… Hoe staot et mit een plakvervanger resp. opvolger veur Pieter?"
"Meneer de veurzitter… Jim roepen de hieltied daj’m et gebruuk van oons taeltien graeg anvieteren willen… waorom doej’m dat dan mar zo zunig?"
"Meneer de veurzitter… Wanneer zullen jim jim webstee es wat (inter)aktief maeken. Een gaasteboek of zoks, liekt mi’j wel wat. Of begin eerst es mit wat ongecensureerde ruumte veur inzunnen stokkies in de Ovend."
"Meneer de veurzitter… De centen, de tied en de uutgiftemeugelikheden bin veur de kommende peer jaor al hielendal volboekt, he’k heurd. Waor moe’we now zolange mit oonze kreatieviteit henne?"
"Meneer de veurzitter… Och laot ok mar zitten…"
Vz.: We nemen et allemaole mit, we bin overal drok mit doende en et het oonze andacht. Aanders nog vraogen…?
*
Lieve Rita: A’k jaoren leden op et straand leup en al die minibekini’s zag dan kon ik mar mit grote muuite en twie hanen mien lid in bedwang holen. Tegenworig kan ‘k et wel mit iene haand. Zo’k zoe’n stok starker wodden weren, de laeste tied? Groeten, Hannes.
Koop es een aandere brille, doe es wat aander lekker-roek aachter de oren, praot d’r niet allienig over mar doe es wat, trekke zels es een wat een kottere broek an. Laot nog es van je heuren as ’t ok hulpen het. Liefs, Rita.
*
Lieve Rita: Ik moch vroeger graeg es wat ‘in de broek poepen’. Dat gaf zoe’n gelokzalig en waarm gevuul tussen de billen. Tegenworig moe’k een reetveter (nl: string) anhebben van de vrouw. Kan’k daor ok wel zo lekker mit ‘in de broek poepen’? PS. An now toe, vun ik et mar niks want et lopt mi’j drekt naor kni’jen. Groeten Jan van Poepte.
Ik vien et nog al wat daj’ "uberhaupt" poepen kunnen mit zoe’n strakke reetveter veur ’t gat. Veur vrouwluden die allienig staon, vien ik zoe’n reetveter (ik nuum et dan liever een poezesnaore) gewoon een ‘lekker ding’. Ikzels doe ‘m dan vaeks aachtersteveuren an. As ik jow was dan zo’k mar weer gewoon een lekkere lange onderbokse andoen aj’ naor ’t straand gaon. Vaal ie om meer as iene reden aorig op. Liefs, Rita.
*
Et toppunt van een betien lef in ’t gat: Een spoekerieder links inhaelen…?
*
*
Woensdag (6/4):
De hiele dag, van vandemorgen 8:00 ure an now (23:40 ure) toe in Grunningen ommeheisterd en ok nog niks verdiend. Et blieven Grunningers! Morgenvroeg om een uur of negen za’k d’r weer wezen.
*
Ik bin d’r ok aachter kommen waor die vraoge an Lieve Rita van gister wegkwam, a’k ok een Stellingwarver ‘populaire topauteur’ (m/v) kende. Hi’j kwam veur in et i-dagboekien van Johan V.: "En ja, et vroegtiedig wegraeken van de populaire topauteur zol netuurlik een ontzettend groot verlös veur de Stellingwarver schrieveri’je en kultuur betekenen…"

Doe ‘k toch even wat in aandermans i-dagboekies ommestruunde kwam ik disse tegen van Joop B.: "Troch har wie ik werkend as Joop Boomsma, grut skriuwer en dichter, noch grutter deiboekskriuwer, pylder fan de Fryske kultuer."

Now meugen ze van mi’j allemaole de alderbeste, -dikste, -langste, -grootste, -belangriekste en alle aander superlatieven bi’jmekeer wezen mar ik raeke daor wat impotent van. Impotent in ’t heufd, wel te begriepen. Ik kan hier niet zo goed tegen. Ik moet d’r vaeks een betien van overgeven. "Moeke ik moet spi’jen. Waor is de pot?" Los van mien gevuulte staot et ok nog mar te bezien as (uut bi’jglieks die eerste vremde riegel), et een groot verlös wezen zol. Riekaans dat d’r een betien ‘locht’ en ‘ruumte’ van kommen zol en et is wel zo wis as iene en iene een stok of twie, drieje is, dat: "Aj’ eerder wegraeken daj’ dan bi’j langer dood!" (mit daank an NN).
*
Jan had geliek. An now toe ha’k ieder keer a’k d’r weg kwam ‘de pest in’ mar gisteraovend biwwe (al weer veur de dadde keer) naor de ‘Spannende verhaelen’ in Berkoop toe west en now ha’k es niet (echt) de pest in. Jonge, jonge wat is die Joop mi’j toevalen. Meer as 180%puntgraoden ommedri’jd (hi’j zal wat slims mitmaekt hebben in de femilie- of kundekring) as waor ik him eerder (zoe’n acht jaor leden) van kende. Zo hi’j gister was, was ’t zuver best een aorige kerel en hi’j kon ok best smuui vertellen over (dat wel netuurlik) zien eigen schrieveri’je. En ’t blift vanzels wel een schoelemeester mar eerlik is eerlik, zo kan ‘k ‘m wel hebben. Mar dat spannend schrieven van een verhael blift een lastig perces en Joop had ok gien trukedeusien om oons dat keunsien even bi’j te brengen. En et is krek zoas Jan zegt: "Wat de iene spannend (of mooi) vint, vint een aander seins hielendal niks (mar daor he’k morgen nog een aorig verhael over). Joop had zoe’n opmarking trouwes al verwaacht want zien bescheid op die vraoge was: "Aj’ zels vienen dat’ie goed is dan is’ie dat." Ikzels bruuk meerstal de variaant: "Aj’ zels en nog iene vienen dat’ie goed is dan is’ie dat." Disse hewwe veurig jaor bi’j et Startschot veur de vertaeling van de biebel ok bruukt want daor is ok al zoe’n twieduzend jaor gekilster over. Nee, niet over dat Startschot mar over de biebel vanzels.
*
Ik kreeg ok een aemel mit bescheid op een vraoge van mi’j as hi’j mi’j even argens mit helpen kon/wol. Et bescheid was dat de beste man d’r gien tied veur had/vri’jmaeken kon. Die het mien i-dagboekien van zundag (weke 12) mist bin ‘k bange.
*
Instuurde dialoog (vervolg):
Hi'j: "Ie bin een droomvrouw."
Zi'j: "Dan gao’k now mar slaopen."

En nog iene (van dezelde auteur):

Hi'j: "Ik zol alles wel mit jow patten willen."
Zi'j: "Mooi, lao’we beginnen mit je baankrekening."

En nog een diadaenk en toegelieke een uniloog (van een aandere auteur):
Vandeweke ston ik opiens in een file. De bestuurder van de auto naost mi’j (in de aandere baene) dri’jde langzem zien raempien eupen an mien kaante. Ik daenke, die man wil mi’j wat vraogen, dat ik dri’j mien raempien ok naor beneden. Zegt die mallerd van een man:
"Heb ie ok een scheet laoten?"
*
Dat ‘mallerd’ staot trouwes niet in De Dikke; komt mittertied misschien nog wel in de speciaole homesuele uutgifte.
*

*
Deensdag (5/4):
Gisteraovend biwwe naor een geerkomst van de ‘Commerciële club Oost- en Westaende’ west. Een protte wies-, dom- en aander praot. Twie heufd-Wiespraoters hebben heur zeggien daon over de Stellingwarven en zien (on)meugelikheden in ekonomisch opzichte. Now heb ik et vaeks niet zo hoge opstaon mit disse mannen (waorom toch altied kerels trouwes?) want ze willen allienig mar (praoten over) hadder en meer en zo, en dat hoeft van mi’j toevallig niet zo. Elke dag een betien mit plezier doende wezen en daor mit naor de bakker kunnen, daor vuul ik mi’j meerstal et beste bi’j en daor het de omgeving (et milieu) ok nog es et meenste van te lieden. D’r de hieltied mar over daenken hoe a’k een aander toch mar es bi’j de poot nemen zal, daor he’k gien nocht an of aorighied in. Ik geleuf ok dat de Stellingwarven best een aentien aachterop lopen meugen. Dawwe hier best et ‘Centerparcs van Frieslaand’ wezen meugen want Frieslaand is toch ok al jaoren et ‘Centerparcs van Nederlaand’? En dan is Nederlaand weer et ‘Centerparcs van Europe’ liekt mi’j. Now en… Et ‘meer’ is toch nooit vol bi’j disse mannen! Ik zol nog wel es een boek schrieven willen over ‘Ekonomie in de Stellingwarven’ mit de ondertitel ‘Van Keuter tot Geleuter’ want d’r wodt et meerste over praot vanzels. As et warkelik an ’t wark toe is dan ziej’ disse Wiespraoters niet. Mar de naozit bi’j zoe’n klup is vanzels slim gezellig. Koffie, thee en veural ok wat ‘aanders wat’ was d’r meer as genoeg en ie kommen nog es iene tegen.
Doe’we weeromme reden op huus an, stonnen d’r aorig wat plassen op de weg. We mossen oppassen veur ‘aquaplaning’, zeg mar ‘waeterglieren’ of is ‘t ‘waetervliegen’ (staot niet in de Dikke) want de banen weren niet al te best meer.
*
Instuurde dialoog:
Hi’j: Ie hebben een lichem as een tempel.
Zi’j: Mar d’r is vandaege gien dienst.

En nog iene:
Hi’j: Ik wete wat vrouwluden graeg willen…!
Zi’j: Waorom laoj’ mi’j dan niet mit rust…?

Morgen meer van dissen…

Ik kreeg ok nog een spannende dialoog:
’n Dag of wat leden ha’k (m) seks mit een geweldig mooie vrouw. Doe’we nao ’t wark nog een betien laggen te bekommen zag ik opiens een foto van een manspersoon op heur naachtkassien staon.
"Is dat je man?"
"Nee."
"Is ’t je vrund?"
"Ok niet."
"Wie is dat dan?"
"Dat bin ‘k zels veurda’k eupereerd bin."
"…"
*
Et hiele weekaende he’k (naost een protte argewaosie mit Jesaja) ok nog drok doende west mit de opdracht ‘Spannende verhaelen’ veur vanaovend. Ik bin d’r niet goed mit klaorkommen. Ik had een verhaeltien maekt mar dat bleek een bliedspul te wezen in stee van een spannend verhael en ik had een dialoog maekt mar die paste hielendal niet in of bi’j dat bliedspul. Ik heb trouwes tussendeur ok nog even een grappien uuthaeld mit een ‘echte schriever’. De dialoog waor as de maegies veurige weke nog al hoge over opgavven (in ’t Nederlaans) ha’k - zo letterlik meugelik - in et Stellingwarfs vertaeld en mit mien eigen naeme d’r onder an die ‘echte schriever’ veurlegd. Wat daenk’ie… ofkeurd. Dit klopte niet en dat mos aanders en … Ja, allemaole de boom in… Wie is hier now eins gek?
*
D’r wodde mi’j vraogd a’k ok een Stellingwarver ‘populaire topauteur’ (m/v) kende. Now moe’k je eerlik bekennen da’k et vaeks niet zo hoge opstaon heb mit ‘topmannen’ (m/v). Al hielemaole niet as ze (m/v) dat zels zo mit naodrok vienen; en dat vienen zokken (m/v) nog al gauw es. De meerste topmannen (m/v) daor moe’k niks van hebben. Ik heb ok nooit zo begrepen waorom as de iene ’top’ is en de aander niet. Waorom een puttienschepper meer ‘top’ is as een hoge baentiesman (m/v) of aandersomme. De iene kan toch hielendal drie keer niks zonder de aander? En dat de iene ‘toevallig’ beter metselen kan en een aander ‘toevallig’ verstaand het van bliene-daarms en zo da’s mooi mar gien reden om de iene ‘top’ te vienen en de aander niet, liekt mi’j. Aarme geesten…
*
*
Maendag (4/4):
*
A’k naor een seksfilm kiek dan kan et zomar gebeuren da’k toch wel es wat ‘andrang’ kriege. Vandage he’k et Hooglied nog es deur west en doe…
"Mien hatte lopt over van liefde.
Deuzen vol, wat zeg ik, karrevrachten vol, treinwagons mit bolle schutten...
Ik moet een dam bouwen want mien hatte lopt over."
*
Now brengt Henk mi’j weer in een grote vertwieveling. Wat wil et geval. Op blz. 31 F-K staot onder et lemma ‘fien’ et veurbeeldzinnegien: "De fiene koeke is de weerscheide van een stieve koeke, d.i. de tegenhanger." Op blz. 824 S-Z staot bi’j et lemma ‘weerscheide’: gelijke (van een tweetal), evenbeeld, de andere van een tweetal. Dat now moe’k lieve Rita mar es vraogen wat dat ‘weerscheide’ now eins warkelik is: evenbeeld of tegenhanger. Waorom a’k et zo tegenkwam? Now, ik zocht eins om et woord ‘fienegies’ (net niet ziekelijk), zi’j (m/v) zicht d’r wat fienegies uut vandaege, ze (m/v) is wat smal om ’t snutien. Mar dat ‘fienegies’ staot dus niet in de Dikke en now bin ‘k d’r dan ok niet hielendal wis van as et now ‘fienegies’ is of ‘fienigies’. Ik hool et eerst mar op ‘fienegies’.
*

‘Schottelen’ kon ‘k ok al niet vienen op blz. 114-115 S-Z. Wel pattie woorden mit ‘schottel…’ mar krek niet waor as die woorden weg kommen n.l. van ‘schottelen’, et (een betien) ophaelen van de jurk of rok as een vrouw deur wat ondiep waeter lopt. In et Nederlaans zoks as ‘schorten’ of ‘opschorten’; een jurk of rok dregen as een schölk (schort). Zo bruukte een vrouw dat onderaende dan ok wel es om even wat of te drugen of de eier in mit te nemen uut et kiepehokke en zo. Mar gien woord over et ‘schottelen’ in ’t dikke boek!
*
Een aemel: Zaoterdag haj’ et d’r over daj’ heurd hadden dat Pieter veur de helte ziek is. Wat helte (links/rechts of onder/boven) en wat is dat: veur de helte ziek wezen? Aj’ veur de helte dood binnen dan bej’ ok nog veur de helte levend. Half vol, half leeg, e.z.v. Aj’ veur de helte ziek binnen dan bej’ ok nog veur de helte goed/beter? ’t Gaot d’r niet omme waj’ niet (meer) kunnen mar waj’ nog wel kunnen. Dat waj’ nog wel kunnen daor meuj’ dan een keer zo lange over doen of ie doen de helte in dezelde tied.
*
Nog een aemel: Zundag haj’ et over een zeune van een vri’jgezel die gien ni’je fiets kregen had omreden zien schoonmoeke gien kiender kriegen kon en heur heit in België an ’t hadde fietsen was? Hoe zat dat now?
B: Ik weet et ok niet meer. Ik kieke nooit naor de Tour de France…