Naor Dagboekien

Veurige weke Ankem weke
*
Weke 15 (11 – 17/4 - 2005):
*
Zundag (17/4):
Vandaege de hiele dag zoe’n betien doende west mit et biebelboek Job. Disse man leefde neffens de tredisies van et Oolde Testement in een gries verleden. In Ezechiël 14:14 wodden hi’j en Noach trouwes in iene aosem nuumd. Neffens et naor him nuumde biebelboek woonde hi'j in et onbekende laand Ulz. Zien milieu liekt op dat van de eerdvaders. Hi'j is de heufdpersoon van een wieshiedsboek dat et lieden van de vrome meenske as thema het. De eerste twie heufdstokken bin in proza schreven en vertellen hoe as God deur Satan d'r toe brocht wodt om de volmaekte Job deur rampen op de proef te stellen. Disse proloog wodt ofsleuten deur et bezuuk van drie vrunden Elifaz, Bildad en Sofar.

Et poëtische pat wodt inleided deur de klachten van Job, waor Elifaz bescheid op geft. Dit is ‘t begin van de gesprekken (3–42) waorbi'j Job en zien vrunden aachtermekeer driemaol an 't woord kommen behalven Sofar, die mar twie keer wat zegt. Onverwaachs mingt him nog een vierde man (Elihu) in de diskussie. Et aspekt van God in zien verholing tot et leed van de meensken is neffens de vrunden dat van de 'goddelike vergeldingskausaliteit'. Job zien lieden zol dan wiezen op een ‘eigen schuld, dike bult’. Disse oplossing van et perbleem wodt deur Job niet anveerd en daorom ruziët hi'j mit zien God: et verbond, waor hi'j op vertrouwde is neffens him, deur God verbreuken.

Naor vorm en inhoold beriekt et boek zien hoogtepunt in et bescheid dat God geft vanuut een storm. Job ‘verootmoedigt’ him nao et eerste (38–39) en et twiede bescheid (40–41). Hier wodt trouwes een aandere gerechtighied an ’t locht brocht as die, welke deur meensken te berisseneren is. Nao de ‘verdeemoediging’ deur Job volgt nog een kotte ofsluting van et boek in prozastijl (42:7–17). Et bliekt dat de vrunden bi'j alle goeie bedoelings, niet oprecht over God praot hebben. Job het dit wel daon, ondaanks zien geruzie, en wodt now in zien vroegere eerdse riekdom hersteld.

Et perbleem van et boek Job is ok buten Israël in de antieke wereld steld en beantwoord, bi’jglieks in de wieshiedsliteretuur van Babylon. Over de tied van et ontstaon van dit boek is niks mit wissighied te zeggen. De meerste uutleggers plaetsen et tussen 500 en 300 v.Chr. In Qumran bi'j de Dode Zee bin resten vunnen van een Arameese vertaeling van et boek Job. Dit haandschrift is liekwels uut de 1^ste ieuw n.Chr. mar de tekst daorvan is warschienlik uut de 2^de ieuw v.C.

*
Lieve Rita. "Mien vrouw is d’r vandeur mit een vremde kerel. Now perbeer ik aovonds mien verdriet te verdrinken mar dat lokt me niet. Zol et dan toch waor wezen dat liefde meer kepot maekt as dat draank goedmaeken kan?" Onbesturven wedeman. Beste Wedeman. Neffens mi’j is et al herwerts jaoren et geval dat liefde een protte kepot maekt liekas draank. Jezels ‘te gronde richten’ kan op verschillende menieren, o.e. deur draank, vrouwen of komputers. Dat schient trouwes niet iens onplezierig te wezen. Deur komuters gaot et et vlogste en deur vrouwen et plezierigst (veur een mannegien), he’k wel es heurd. Mar och, as de vrouw votlopen is dan zol ik tegen je zeggen willen: nao disse weer een frisse. En biene je d’r niet zo an, dan is et kwietraeken de volgende keer een stok makkeliker. Tot de volgende (keer). Liefs, Rita.
*
*
Zaoterdag (16/4):
D’r is vandaege ok iene jaorig in oonze femilie mar ik weet zo gauw niet wie en waore, dat ik komme niet.
*
De kraante (LC) van vandaege: "Lonsdalejongeren, perbleemjongeren, jongegassies, d’r is allemaole gien plak meer veur in oons laand. Gemiente mag straks een warkloze weren in een wiek. Gevangenis kan de toestroom van ‘gestoorden’ niet meer an (biwwe zolangzeman allemaole niet beheurlik gestoord?). Dikke meensken moe’n ‘in de hoeke’ staon krekliek as meensken die now nog de hieltied roken. Mien faveriete Jantien had een mooie kolumn over baentiesmannen.
*
Ok uut de LC: "Laat Fries vooral iets natuurlijks blijven. Zodra de taal geforceerd en onnatuurlijk wordt opgedrongen, slaat kracht accuut om in zwakte." Dippeteerde Bertus Mulder wil et Fries de ruumte geven in de daegelikse praktiek en hi’j wil veural niet dat et as geliekweerdig an et Nederlaans opdrongen wodden moet. Neffens mi’j had daorveur etzelde geld staon kund: "Laot et Stellingwarfs veural wat netuurliks blieven". Ik bin et hielendal mit de man (Mulder) iens want neffens mi’j gelt etzelde ok krek zo veur et Stellingwarfs. Mar nee, alles wat d’r hier schreven wodt moet deur et zi’jgien van een man of vier, vieve. Bi’j mi’j is dat argement dan ok onderhaand al ommesleugen. As de sSr d’r mit te maeken het dan zal ik gien wark publiceren.
*
In de ni’jbouwwiek ‘Lindewijk’ in Wolvege is et dommiet verplicht om allemaole etzelde hedegien langs de weg te hebben. D’r wodt in de koopkontrakten ok precies vaastelegd wat schuttingies d’r wel meugen en veural ok, welke niet. De leegloop van Nederlaand komt al langzeman op gang he’k al es heurd en dat zal neffens mi’j nog vule slimmer wodden. Dit soorte van regel- en bemuuizucht daor woj’ toch hielendal ziek van.
*
Now ja, gister he’k de chauffeuse Edith dan ok troffen in heur E-taxi. ’t Vul mi’j niet toe. Al een mooi aende in of richting zestig en et blond was ok meer gries as wat ik onder blond verstao. Heur IQ was niks mis mit, dat d’r was veerder ok niks mit te beginnen. Gewoon een aorige mevrouw … mar ok wel wat een desillusie vanzels. Is et (onwetend) begeren niet (haost) altied mooier as et bezit?
*
Et beschrieven van uterlikheden. We hadden vandemorgen een diskussie over et schrieven van aandermans uterlik. Doej’ dat of doej’ dat niet. Aj’ zien hoe as sommige meensken ommegaon mit oonze Minister President of preens Charles en aanderen dan daenk ik ja, et kan dus best. In tekenings gebeurt et nog vule vaeker. Iedere dag staot d’r wel een spotprente in de kraante. As iene in mien eigen omgeving een (in mien ogen) malle broek, een vremd boezeroen of rare schoenen of zoks an het, dan heb ik dr’ok hielendal gien muuite mit om mien miening luud en dudelik (ok tegen de persoon zels) te zeggen. As iene een butersporige kinne, neuze of grote/kleine oren het, dan za’k daor niet al te gauw wat over zeggen of schrieven. Daor kan de beste man (m/v) vaeks niks an doen en ik hebbe gewoon de behoefte niet om daor wat van te zeggen. Dat is op de legere schoele vaeks ok al genoeg daon. Doe hiette dat pesten. A’k et now doen zol dan nuum ik (onneudig) kwetsen. De deengies die ze zels in de haand hebben zoas bi’jglieks een rare toefte in ’t haor kamt, de lippen overdaodig rood of in een aandere kleur schilderd, een smerige lekker-roek aachter de oren smeerd of geleuf, liefde, geaordhied, uutgaonsleven en gao zo mar deur, daor he’k gien muuite mit. Laot een ieder dit trouwes mar lekker veur him- / heurzels bepaolen…
*
*
Vri’jdag (15/4):
De IJselakedemie het last van een virus, bin ‘k bange. D’r wodden te pas mar veural te onpas aemels verstuurd…!
*
Donderdags staot d’r vaeke een kolumn in de kraante (LC) van Ad Galidi. ‘k Weet niet waor as de man van oorsprong wegkomt (Midden Oosten) mar in zien stokkies kan hi’j et meerstal mooier zeggen as dat mennig van oons dat ooit kunnen zal in zien (m/v) mooiste gedicht. Ik persoonlik hebbe ien gelok, ik heb mien mooiste gedicht nog niet schreven. Dat komt nog es.
"Mien woorden kun hier niet slaopen.
De zeilen van heur weemoed bin opstegen,
de wiend wakkert an.
Ik stao op et zaand van et straand.
Et schip van mien leven gaot veerder as mi’j.
Mien wottels zuken een laand in mien lege zak.
Druug et brood van aanderen, druger as iezer;
et waeter zoolt, alderdeegst de Waddenzee spi’jt et uut.
Deuren van aanderen bin doof veur et kloppen.
Onder een protte daoken heb ik slaopen,
mar nooit heb ik zoks as jow schaad vunnen.
As de naacht vaalt, stuur ik jow mien woorden."
*
Lieve Rita. Wat is een domme eend? Groet, Woerd.
Een domme eend, lieve Woerd, is een eend die op nog gien meter van de autoweg een nust maekt en daor ondertussen op een stokmennig eier zitten gaot te bruden, zoas hier bi’j oons in de buurt et geval is. Disse Rita het trouwes niet al te vule verstaand van domme eenden. Misschien dat zoe’n nust wel wat ommelegd wodden kan (over de sloot bi’jglieks). Heur ik misschien nog wel even, en aanders moet et mar kommen zo ’t komt. Liefs, Rita.
PS. Aj’ tegenworig "Lieve Rita" Googlen, dan staot ze in dit i-dagboekien bovenan. D’r gebeuren ok nog best aorige deengies in ’t bestaon van een i-dagboeker.
*
*
Donderdag (14/4):
Vandemorgen al op ‘e tied onderweg naor Zoetermeer, naor een onderofdeling van VROM. Wat een raar volk, wat een raar volk. Vrouwludevolk is bi’jtieden wel es wat een vremde soorte mar disse baentiesmannen slaon warkelik alles. Veur beide soorten gelt: Nooit za’k ze begriepen…
Ik was nog mooi op ‘e tied weeromme om van zesse tot zeuven et Wiespraoten te maeken veur RWC. Dat doe’we now ok al haost weer een jaor en de hieltied mit een protte wille. Veurig jaor op de 29^ste april hawwe de eerste uutzending dat over veertien daegen za’k gebak mitnemen he’k toezegd. Vandaege gong et ok weer overal en nargens over mar et was toch wel weer de muuite weerd (vun ikzels).
*
Et was goed te marken dat de Ovend weer ‘over de heerd kommen’ is. En opni’j staot d’r een gedicht van Joukje in dat ‘wel even verbeterd’ is. En dus bruuk ik now even een stokkien kopie van gister: "Ik kan daor niet tegen!!! Et Stellingwarfs moet neffens mi’j bruukt wodden zoas et bruukt wodt, en niet deur een klein groepien meensken bi’jknipt en -scheerd, en daordeur vormd wodden."
De ankondigde veraanderings (om droktechnische redens) leken mi’j nog niet deurvoerd te wezen. Et fermaot was nog krekliek as de veurige. De grieze vlakken op de verschillende bladzieden bin wel wat reenfeliger as aanders.
D’r staot ok een oproep in veur de Stellingwarver Schriefwedstried 2006. Om et schrieven in et Stellingwarfs zo bried meugelik an te vieteren… Op mien kommentaor van veurige weke dat de webstee van de sSr now niet bepaold bi’j de tied is kreeg ik now dan ok vlot een aemel mit et veurstel dawwe mar een anvieteringspries in ’t leven roepen moeten om webstegies te verbeteren. Liekt mi’j een ‘strak plan’. Ik stel dan ok spontaon een boekebon tot beschikking veur de meerst aktuele webstee (allienig in ’t Stellingwarfs vanzels) en een koolde eerpel veur de minst onderholen webstee. Tegen de tied dat de preis vaalt roepen we ok even een ‘deskundige jury’ bi’jmekeer vanzels.
Ik hadde trouwes meer andacht veur de et jaor- en produktenverslag as veur de Ovend zels. Ik zal de laeste twie, drie, viere of vieve es naost mekeer leggen om te kieken wat de plannen ‘doe’weren en wat d’r van terechte kommen is. De eerste zin in dit rappot is mi’j trouwes al haost te lange om in ien keer goed te lezen. Rest volgt…
*

In wat plak as die (knappe) Edith mit heur taxi rondridt was een aemelvraoge. Now ja, dat ‘knappe’ is vanzels aorig subjektief en dat blift dan toch nog even ofwaachten mar et moet raar kommen a’k heur morgen niet even treffe. Daor za’k dan morgen of overmorgen dan ok uutgebreid bescheid van doen.
*
Ik kreeg ok een berichien dat d’r gruunwarkers (gien bruunwarkers!) bestaon die de ‘dolle’ van de schoppe d’r ofhaeld hebben en daor een (fiets)zadel veur in ’t plak zet hebben. Zien he’k et nog niet, mar ik geleuf et grif.
*
Lieve Rita. Ik heb een groot perbleem. Ik heb twie linker hanen mar ik bin rechts. Bi'j mien breur is et nog slimmer. Die is niet links- en niet rechtshaandig, mar gewoon onhaandig. Vaalt hier wat an te doen? Groeten, Klussiesman.
Lieve Klussiesman. Ie zeggen dat ie een perbleem hebben. Dat van je breur is toch zien eigen perbleem of reken ie dat ok tot jow perbleem, want dan hej’ dus twie perblemen. Dat onhaandig wezen van je breur liekt mi’j trouwes niet zoe’n groot perbleem want wie zels daenkt dat hi’j wel haandig is ‘werpe de eerste steen’. Et is trouwes vaeks verrekte haandig om onhaandig te wezen. Ik weet et nog wel uut mien eigen jonge jaoren. Ik was hatstikke haandig en de hieltied as ik argens op bi’jglieks verjaordagsvesite kwam dan zat iederiene gezellig te keuvelen en te doen en disse Lieve Rita die wodde an de keukentaofel zet mit allerhaande verstelwark en zoks. Dat ik geleuf niet dat je breur hier al te rouwig om wezen moet. Veur jezels zeg ie daj’ twie linker hanen hebben mar rechts binnen. Dat liekt mi’j hielendal gien perbleem. Et knopien van et PvdA, VVD, CDA of nog rechtser, kuj’neffens mi’j alderdeegst wel mit twie linker hanen indrokken. Ik mark et over een jaor of twie jaor wel, as ’t lokt is. Liefs, Rita.
*
De hiepetheekrente is vandaege ok es weer naor beneden gaon en now is ’t al vri’jdag zie ik op de klokke. Ja, ik kan sund een dagmennig ok klokkekieken…
*
Woensdag (13/4):
Somstieden gunter ik d’r naor om es wat ‘makkeliker’ te wezen, de ogen es wat vaeker halftoe te kniepen en es wat vaeker mar wat zitten te soezen en te ‘ja-knikken’. Veurbeeld?

Al een peer maond leden ha’k toezegd om ok een verhaeltien of een gedichien in te sturen veur een projekt van ‘Landschapsbeheer Friesland’. Een dag-of-wat leden kreeg ik een bericht van heur dat de sSr et (in de Stellingwarfse tael) instuurde wark naokieken zol op spelling en thema. Omda’k d’r een glundige hekel an hebbe om de hieltied deur et benauwde zi’jgien van de sSr te moeten he’k mi’j doe bescheiden weerommetrokken. (Mien beide warkstokken laggen trouwes zo goed as klaor.) Ik wil niet de hieltied naolopen wodden deur kemmissies van de sSr. Iedere solsetaosiebrief (waordeur je leven wel es een belangrieke dri’j kriegen kan!) zo’k ok onkonterleerd de deure uutdoen, mar veur een onneuzel gedichien (sorry) moet d’r de hieltied eerst deur de sSr naor keken wodden. Ik kan daor niet tegen!!! Et Stellingwarfs moet neffens mi’j bruukt wodden zoas et bruukt wodt, en niet deur een klein groepien meensken bi’jknipt en -scheerd, en daordeur vormd wodden. Op disse meniere blieven we mar daenken dat d’r nog de hieltied zoe’n 30.000 meensken geef Stellingwarfs schrieven (kunnen) en ik bin bange dat et mit een honderd (?) wel haost ophoold!

Doe’k mi’j weerommetrokken hadde kreeg ik een berichien dat ze dat slim jammer vunnen omreden d’r toch al niet zovule Stellingwarfs anmeld was. Om precies te wezen, twaelf Stellingwarfse schrievers/dichters hebben heur (m/v) veur dit projekt anmelded.

Now lees ik in et i-dagboekien van Johan dat ze ‘wel aorig vlocht op ‘e kooi hadden’, dat d’r een protte keunsteners an mitdoen en dat et mooi is dat de sSr et wark even naokikt. De preciese ciefers die ik hebbe: 35 keunstemaekers, 40 Friese schrievers en 12 Stellingwarfse. Now mag iederiene daor zels van vienen wat hi’j (m/v) wil mar ‘een hiele vlocht’ wil ik et toch niet numen veur zoe’n typisch Stellingwarfs projekt.
Now ja, en daoromme gunter ik d’r somstieden naor om es wat ‘makkeliker’ te wezen, de ogen es wat vaeker halftoe te kniepen en es wat vaeker mar wat zitten te soezen en te ‘ja-knikken’.
*
Ik kreeg een (zaekelik) berichien dat a’k mit de trein of bus kwam, da’k dan wel mit de E-taxi van et stesjon ophaeld wodden zol. Op mien vraoge wat een E-taxi dan toch wel niet wezen moch, kreeg ik as bescheid: dat is een taxi die deur (oonze knappe) Edith bestuurd wodt. Now, die wille za’k beleven vanzels…
*
Doe’k vandemorgen naor Wolvege toeree doe stonnen d’r een peer gruunmannegies van de Gemiente bi’j een bloemeparkien op heur schoppen te leunen (jim kennen dat vaaste wel). Doe’k een peer uren laeter daor weer langes kwam stonnen ze d’r eins nog krek zo. Ik bin even stopt om te vraogen wat ze zoal an et doen weren en kreeg te heuren: we moe’n van oonze baos oppassen mit de dieren en now zit daor een slakke in dat parkien en now waachten we even tot hi’j (m/v) buten oons beriek gaot. Iene van de aandere mannen dee doe et veurstel: of za’k him (m/v) mar an de kaante zetten want hi’j (m/v) lopt oons de hiele morgen al in de weg…???
*
Doe’k vandemorgen op et Gemientehuus was gong de koffiejuffer krek veur de twiede rond. Zegt zoe’n baentiesman: ikke mar even niet meer Annie, aanders kan ‘k straks niet slaopen. (Mit daank aan Gurbe.)
*
*
Deensdag (12/4):
Regelmaotig (of was et riegelmaotig? nee) kriegen we van disse en gene een mooi stok an kommentaor op oons biebel-vertaelwark. En dat past oons vanzels hiel goed, want ja, wie bin wi’j. Ie hoeven d’r ok beslist niet een echte biebel-kenner veur te wezen om d’r toch zinnege dingen over te zeggen. Hoe we daor mit ommegaon en hoe zoks ongeveer in zien wark gaot, woj’ vraogen? Now zo ongeveer en let es op et op iene nao, laeste (zwatte) zinnengien van de kommentaorgever:

Ik heb et Hooglied van jow een peer keer serieus deurlezen en vergeleken mit de biebel. Mien vertaeling is weliswaor een ooldere as die van jow [[[ Ik heb onderhaand een hiele verzaemeling heur... ]]] , mar d'r vullen mi'j toch wat kleine dingen op.

NBV:

Hals en ketten komt veur in 1:10

NBV:

10 Hoe lieflijk zijn je wangen en je ringen,
hoe sierlijk zijn je hals en je ketting.

Stell.:
10 Hoe lieflik bin je wangen en je ringen,
hoe sierlik bin je hals en je ketten.

04 vs 16: waai deur mien tuun. Neffens jow eigen woordeliest Nederlands - Stellingwerfs is waaien in et Stellingwarfs wi'jen. Et zol dus 'wi'j deur mien tuun' moeten wezen.

NBV:
16 Ontwaak, noordenwind! Kom, zuidenwind!
Waai door mijn hof,
laat zijn balsems geuren.
Mijn lief moet in zijn hof komen,
laat hij daar zijn zoete vruchten proeven.
[[[ Waai is een ordinaire tikfout en naotied over de kop keken. Wodt dan ok anpast. ]]]

Liekewel in de NBV as in de Naardense bestaot gien 6:13.
Dit is NBV:

7:1 Draai rond, meisje uit Sulem, draai rond,
draai rond, we willen naar je kijken.

In de NBG-51 staot wel:
6:13 Keer weder, keer weder, o Sulammith! Keer weder, keer weder, dat wij u mogen aanzien. Wat ziet gijlieden de Sulammith aan? Zij is als een rei van twee heiren.
[[[ Mar disse 6:13 staot in de alinea van Hooglied 7 onder et koppien: De schoonheid der bruid bij den dans. ]]]

08 vs 14: In jow tekst stoat 'Gao now bi'j mi'j weg, mien liefste!' Bi'j mi'j staot 'Kom haastelijk, mij liefste'

Dit liekt mi'j toch percies et tegenovergestelde.

NBV:
8:14 Ga nu van mij weg, mijn lief!
Spring als een gazelle,
als het jong van een hert
over de bergen vol balsemkruid.

Stell.:
8:14 Gao now bi'j mi'j weg, mien liefste!
Spring as een gezelle,
as et jong van een hert
over de bargen vol balsemkruud.

Naardense:
8:14 Vlug, mijn liefste,
en lijk op een gazel
of op het bokje van een hinde
op de balsembergen!

NBG-51:
8:14 Kom haastelijk, mijn Liefste!
en wees Gij gelijk een ree,
of gelijk een welp der herten
op de bergen der specerijen.

[[[ De Naardense is -v.w.b. et kommen of gaon- beheurlik neutraol. De aanderen gaon elk een kaante op. Wi'j vertaelen de NBV en kun d'r dan ok niks aanders van maeken, liekt mi'j. ]]]

Ik heb et Hooglied nog nooit zo goed lezen. Now ik dat wel daon heb is mi'j opvalen hoe geweldig mooi et eins is. [[[Et Hooglied heurt tot de poëtische boeken en is (vien ik ok) gewoon 'lekker' om te lezen. Ik heb onderhaand kontakten om te perberen d'r meziek bi'j te zuken of te maeken en om et ankem jaor (?) op te voeren in de karke van Berkoop.]]]

Dat was et en tot de volgende keer mar weer. [[[ Et was mi'j weer een genoegen. En ziej' now wel daj' op disse meniere toch (weer) een positieve bi'jdrege leverd hebben. Daank daorveur en mar meer van zokken.]]]

*
Maendag (11/4):
*
Mit daank an N.N.:
De pater die et eerder wel es mit de non dee is now "non-aktief".
Een nonneklooster hiet ok wel een "hunkerbunker".
Een manneklooster numen ze een "zaoddreugeri’je".
Grafschrift op een nonnegraf: "Ongebruukt weeromme."
Een lesbische zeemeermin is een "potvis".
En waorom zit d’r een stuur op een fiets?
Aanders moej’ de belle in de haand holen.
Now ja…
*
Lieve Rita: Hoe krieg ik een dom blond ding wat op temperetuur? Groeten van H. Bliksem.
Lieve Bliksem: Stuur et maegien es een hoeke omme van 90 graoden. Een halfomme van 180 of een hiele rotonde van 360 graoden wil ok nog wel es helpen. Riekaans dat ze wat glundig wodt. Laoj’ nog es wat van je heuren? Liefs, Rita.
*
Op de vraoge an Lieve Rita veurige weke: Aj’ literair even votgaon, gaoj’ dan argens naor toe of gaoj’ argens henne? gaf ze as bescheid: Dan gaoj’ argens henne en niet argens naor toe. Dat laeste is Karstiaans (verbeugen Nederlaans).
Et veurbeeld uut een aemel: "We zeggen wel: durf ie d'r wel naor toe ? een hond bi'jglieks." snidt gien hoolt want dat had neffens mi’j in dit geval: durf ie d’r wel op an (of op toe), wezen moeten.
Veur de dudelikhied he’k et nog even naovraogd en Rita blift d’r bi’j dat bi’jglieks de volgende zinnegies gewoon goed binnen: "Ik moet nog even naor Berkoop toe. Hoe brengen we dat naor de leden toe." Die wodden zo ok ongeveer nuumd in et Dikke Boek. Van dat "Argens naor toe gaon" waor ‘naor’ en ‘toe’ drekt aachtermekeer schreven staon, kon ‘k (gelokkig) gien veurbeeld vienen. Bi’j et lemma ‘henne’ op blz 347 F-K staot: 1. Naar iets of iemand toe, weg naar elders. Rita blift d’r dan ok bi’j dat et "argens naor toe gaon", gewoon Karstiaans is. Leuze van disse weke is dan ok: Kiek veerder as de zelsbenuumde beroemde schrievers / dichters.
*
De kraante (LC) van vandaege was ok weer om te lachen:
Voegelties- en regiestellers lopen mekeer zo langzemerhaand veur de voeten. Op dezelde dag wollen die beide soorten et veld in om heur diersoorten te tellen. Jammer, waor de voegeltellers krek west weren was dan ok gien regien meer te bekennen. Hool toch ok es op mit dat getel…!
*
Topsalarissen blieven nog even topni’js nao de topinkommens van de topmannen van Corus (Hoogovens), Nuon en Essent.
*
Doe de baanken heur geldautomaoten in bedrief stelden vunnen ze et mar vremd dat d’r haost gien kop meer an de balie kwam. Balie wodde ofschaft ja, alderdeegst baanken wodden ofschaft. Now bliekt dat de overbleven baanken heur topmannen haost niet meer betaelen kunnen moe’n de burgers mar wat meer betaelen veur et automaotisch geldverkeer. Mi’j liekt dat de baanken heurzels mar hielendal opheffen moeten. Lao’we mar weer ‘gewoon’ betaelen.
*
Dat een vliegtuug van de KLM hielendal weeromme moet van Kannede naor Schiphol vien ‘k vremd. Die ien of twie man hadden ze goedkoper een parachute geven kund, liekt mi’j.
*
Zol preens Charles wel weten hoe aj’ de mondhoeken wat optrekken moeten? En wie zol bi’j him thuus eins de broek an hebben? Dat lopt mar in zien Schots rokkien mit blote bienen.
*
De belasting is d’r nao jaoren aachter kommen dat ze et zels vule beter weten as heur klaanten. Ze zullen now zels et formelier invullen en dan hoej’ allienig je haand d’r mar onder te zetten. D’r bin wel haost vier (!) bladzieden in de Dikke onder et lemma ‘haand’ mar zo as ik et hier (bi’j toeval) bruukte "je haand d’r onder zetten" as et "je haandtekening d’r onder zetten" komt d’r niet in veur. Komt mi’j toch wel as hiel gewoon goed veur…
*
Lieve Rita: Wat is een ‘heer’?
Een ‘heer’ is een kerel die een vrouw mit een kiend zitten lat!