Naor Dagboekien

Veurige weke Ankem weke
*
Weke 26 (27 juni – 3 juli 2005):
*
Zundag (3/7):
*
Vandaege de hiele dag drok in de weer west mit et laeste boek (Spreuken) veur et boekien mit Wieshied. Tussendeur ok alvaaste even via-via wat meensken uut Friese schrieversfemilie waarmlopen laoten veur et fesien rond de uutrikkinge van Wieshied uut de Biebel in de Stellingwarven. Aj’ nog niet krek weten waor dat wezen zal op 17 september dan kuj’ et bescheid vienen op de ziepekiste van Go-Gol
*
Ik bin van doel en gao mooi vroeg op bedde t’aovend. De oogleden wo’n mi’j toch wat zwaor, zo onder de aovend en eins bin ‘k hielendal toch wel wat minnegies wodden van de oflopen naacht. ‘k Mag meerstal eins wel graeg wat laete (uur of twieje) op bedde gaon (en toch rond een ure of zeuven weer beneden) mar de hiele naacht uut in zoe’n drokte en zoe’n draanklocht, da’s lange leden. En vandemorgen wawwe toch ok om een ure of halfnegen weer beneden want ja, de bussen mossen toch ok weer op ‘e tied bi’j de weg…???!-;)
*
Van al mien kompleksen (zie: 29/6) konnen een peer aemelschrievers de meersten wel thuusbrengen mar dat "Oedipuskompleks"...?

Now, een oedipuskompleks is een deur Sigmund Freud invoerd begrip. Hi'j het et weer van et Griekse verhaeltien (sage) over Oedipus overholen. Die Oedipus die brocht zien heit (Laius) om et leven, zonder dat hi'j et zels deur hadde. Hi'j trouwde even laeter mit zien moeke (Iocaste). In de psychoanalytische theorie is 't niet-oploste of niet-overwunnen 'oedipuskompleks' lange tied beschouwd as de keern van iedere neurose (een stooring in de verwarking van konflikten in je binnerste) en dan mit naeme en toenaeme, de hysterische neurose.

Ieder kiend maekt bi'jglieks mit betrekking tot zien psychoseksuele ontwikkelings een 'oedipaol' schoft deur, waorin een joongien verstarkte en ok erotisch richte gevulens en verlaangsten het tegenover zien moeke. Daor komt dan meerstal ok rivaliteit en jeloersighied tegenover zien heit bi'j an te pas. De heit is dan ok as mannelik veurbield dat deur et joongien slim bewonderd wodt. De meniere waorop disse kombinaosie van bewondering en jeloersighied opgelost wodt (of krek niet oplost wodt), zol mitbepaolend wezen veur de veerdere persoonlikhiedsontwikkelings en de toekomstige emotionele relaosies mit aandere meensken. Veur een maegien gellen krek zoksoorte beschouwings mar in dat verbaand wodt d'r dan praot over een elektrakompleks.
*
*
Zaoterdag (2/7):
*
Vandemorgen bin ‘k begonnen (nao zwaore sjek en koffie vanzels) mit et bi’j de weg zetten van et oold pepier. Dat bleek even laeter veur niks te wezen want de ophaeldienst was mi’j krek veur. Doe he’k et zels mar even naor de kontener toe brocht. Even laeter he’k de vliering nog wat opruumd en ha’k een hiele karre vol goed da’k naor de ‘Veurdele’ (kringloopwinkel) in Noordwoolde toe brocht hebbe. Ze weren d’r slim wies mit zee Peter B. (schoelnaeme: Jan G.).
*
Vandemiddag he’k de Wieshied nog wat bi’jschaefd en daon mit op- en anmarkings van de lezersgroep. Vremd is dat eins. Elke keer aj’ zok wark (nog es) weer deurlezen, vien ie ok de hieltied nog weer dingen die beter kunnen. D’r wodden alderdeegst nog (stomme) fouten uuthaeld.
*
In ’t twielochten biwwe naor de radio (RWC) in Noordwoolde reden veur een BBQ. Dat het oons best voldaon. D’r was van alles en meer as genoeg dat we bin aorig in de zae raekt. In de kelder was een disko maekt, boven speulde een gelegenhieds‘band’ en butendeure trok (en drokte) Henk de V. an zien trekzak. We mossen ok ‘zakkienvulen’. D’r hongen een stok of twintig zakkies an een liende mit in elk zakkien onzichtber een klein deengien inni’jd. We mossen raoden wat d’r dan in zoe’n zakkien zat. Rond een ure of elf (23:00) was ’t daonwark en biwwe mit een koppel naor Blesdieke reden, naor et driedaegse Blesdiekiger feest. Dat moet haost wel slim gezellig west hebben want ik geleuf da’k rond een ure of vier (04:00 zundagmorgen) op badde raekt bin. Dat ja, doe ‘k (toch nog de hieltied gisteraovend) bi’j Frank wegreden bin moet et toch wel slim duuster west hebben, et was niet koold mar de steerns weren ok haost niet te zien (geleuf ik…).
*
*
Vri’jdag (1/7):
*
Hewwe juli al weer te pakken. De berkeboompies laoten heur eerste blad ok al weer valen…
*
Zie gister: "Zoas de vissen deur de foeke verraodelik vongen wodden en de voegels deur et flapnet, krek zo zal de meenske deur de tied overvalen wodden."
D’r is vandaege zoe’n 6 keer op raoden mar de goeie zat d’r nog niet bi’j. Neffens mien routeplannertien is et verschil in kilemeters van ‘et plak’:

Berkoop (30 km)
Spange (59 km)
Visvliet (48 km)
Makkum (68 km)
Workum (69 km)
*
*
Donderdag (30/6):
*
Zoas ’t now liekt hewwe op ankem zaoterdag de 17^de september een hiele mooie uutgifte van een spiksplinterni’j buseboekien (pocktboek) mit "Wieshied uut de Biebel in et Stellingwarfs" in romanvorm. Die romanvorm hoolt in dat et wat makkeliker lest zonder al die vasnummers en zo. Et wodt een verzaemeling van Prediker, Job en Spreuken. Dit bin alledrie boeken die heur vorm kregen hebben zoe’n twie-, driehonderd jaor v.Chr. Iene van de mooiste (en bekendste?) schrieversplakkies van Frieslaand zal die dag tot oonze beschikking staon. We bin dan ok van doel om een hiele protte Friese en aandere dialekt en streektael schrievers (en ok niet-schrievers) uut de neudigen. Waor et wezen zal…? Hier wat een kriptische omschrieving uut Prediker over dat plakkien: "Zoas de vissen deur de foeke verraodelik vongen wodden en de voegels deur et flapnet, krek zo zal de meenske deur de tied overvalen wodden."
De eerste die mi’j et goeie plak toe-aemeld krigt et boekien die dag en op dat plakkien van mi’j, ommenocht.
*
De verhaelen uut de Biebel in een tiedbalke.

Rond 1000 tot 960 leefde keuning David. Jeruzalem wodt heufdstad van et deur veroverings de hieltied mar groter woddende Israëlitische riek.

Van 964 tot 926 is Salomo keuning en hi’j bouwt de eerste tempel (1 Kon. 6, 2 Kron. 3). Deur zien voetevolk wodde Salomo riekaans trouwens as een tiran erveren.

In 926 Salomo gaot dood en is d’r een scheuring van et riek Israël en Juda (ok wel: Judea). Et verval was al inzet onder Salomo, deurdat hi'j vremde erediensten toeleut die de ienhied van et riek verzwakten. Israël (noordelik riek; heufdstad: Samaria) 926 - 722.
*
*
Woensdag (29/6):
*
Alweer (of nog de hieltied) gewoon hadde an ’t wark. Aander volk, bi’jglieks een hiele beroemde Stellingwarfs schriever, het et zomar even an tied en kom uut Apeldoorn even naor de Ni’jberkoop veur twie keer twie paanties koffie. De reiskosten niet iens weerd en dan toch even langes kommen, da’s toch hatstikke aorig. Aanderen leupen vandaege -toch een gewone warkdag (of he’k wat mist)- even van Ries naor Staveren en kochten bi’j Doede even een vissien. Mar wat doe ‘k dan toch verkeerd, vreug ik mi’j of… En ik hebbe al zovule kompleksen: een anti-febriekskompleks, een kleine-gebouwekompleks, een gevangeniskompleks, een anti-industriekompleks, een kluzekompleks, een moekekompleks, een oedipuskompleks, een anti-sportkompleks en vanzels een hiel groot minderweerdigenskompleks. En een ‘frustreerde’ bin ‘k ok al. Is d’r een dokter in de web-zael die mi’j hier even in iene klap van of helpen kan…?
*
Vandaege ok een besluut neumen. Iene plaanke in de boekekaaste gao‘k hielendal oprumen. Kom mi’j now niet an mit allemaole bellegies, aemelties en wat d’r aanders nog te bedaenken vaalt want et is ald’ndonder technische en oolde komputerboekebende.
*
Veurige weke kregen we zomar een fesoenlik Stellingwarfs woord veur "Wel nu, … " dat is "Now dan, …" We zuken now een woord veur "dankzij" (door de gunstige invloed van) of we moe’n et de hieltied deur die tekst (deur de geunstige invloed van) ommezetten. Mar ja, invloed (blz.489) is ok niet zoe’n mooi woord. "Deur zien gezag" zol misschien ok nog wel es kunnen mar ….. zol mooier / beter wezen.
*
Zangeres Shakira zee in de Tillegraaf: "Waar vrouwen zijn, zijn moeilijkheden!". Kiek, zoks vertaeld een stok makkeliker en wi’j (kerels) begriepen et ok al gauw.
*
Ok uut de Tillegraaf: Liever seks as tanepoetsen, morgensvroeg. Daor bin ‘k et ok al weer hielendal mit iens.
*
Dat ik wete now al wat d’r morgen in de Liwwadder staot, bin ‘k bange.
*
D’r zol van ’t zoemer ok een gay-parade hullen wodden in Berkoop vanwege et 900 jaorig bestaon, he’k heurd mar nog niks van zien. Zol alleman et wel weten…?
*
Inzunnen spreuken:
a) As et regent et in september, dan vaalt sunderklaos in december.
b) As et regent et in september, dan valen de kastdaegen in december.
c) As et niet regent et in september, dan vaalt sunderklaos in december.
d) As et regent et in september, dan valen de kastdaegen in december.
*
*
Deensdag 28/6):
*
In ’t weekaende ha’k een man de KRO over de heerd en vandaege belde de Wereldomroep. Kan nog spannend wodden!
*
Vandaege de hiele dag gezellig in Enschede ommeslegen.
*
Hoezo aanderhalve fout (zie: veurige weke), wel aanderhalve bladziede kwam d’r even laeter binnenroegelen..! Dit gong gelokkig over wat aanders want aanders was ’t niet best vanzels.
*
Een haikoegien:

Een vas gruun blattien
een geitien vint et lekker
en een oolde man

pb
*
Now, nog iene dan:

Ien veurjaorssprietien
een zunnegien an de locht
dat geft een boel grös.

pb
*
Inzunnen stokkien:

Spreuken 32:1 As et regent in mei dan is april veurbij."
*
Kleren maeken de man.

C. Wildsch.: Met zoo een gek is niets te beginnen; al waart gij de Godin der liefde zelve geweest, van hem is nooit een Adonis te maken.
*
Maendag (27/6):
*
Zoas meerstal maendags, gewoon hadde an ’t wark west. Tussendeur nog een peer heufdstokken van Samuël deurvrot en een verhael van Matten roegweg naokeken.
*
T’aovend het et vertaelkoppel onder et genot van een protte koffie en een gehakballe, drok doende west mit allerhaande kleine klussies.
‘k Was ‘t al haost vergeten mar gister was ’t krek een jaor leden dawwe in de karke van Berkoop et startschot geven hebben veur et vertaelen van de Biebel. Ds. Rienk Klooster het doe et aldereerste boekien (Genesis) van oons kregen, nao een toespraoke van perf. Anne van der Meiden. Now, krek een jaor laeter hewwe al drieëndattig biebelboeken roegweg klaor. Awwe zo deur gaon dan moet et krek veur 2010 hielendal klaor dan ok wel lokken, liekt mi’j.
*
Morgen gao ‘k de hiele dag naor Eanske.