Naor Dagboekien

Veurige weke
*
Weke 36 (5 – 11 september 2005):
*
Et fesien, tegere mit et Fryske Gea en de prissentaosie van oonze Wieshied uut de Biebel in et Stellingwarfs bi’j et arkje van Rink van der Velde op ‘e Veenhoop (bi’j Drachten) is op de 24^ste september om 10:30 ure. Ha’k jow ok al vraogd om te kommen? Wees welkom… Vanwege de ‘hapjes en de drankjes’ is ’t misschien wel goed om je even an te melden.

*
D’r wodt zo now en dan ok al es vraogd waor dat ‘arkje’ van Rink van der Velde dan wel ligt. Now dat is halverwege an de Drachtster Heawei in De Veenhoop (van Drachten of, an de rechterkaante). Ie rieden et makkelikste van Drachten – De Wilgen – naor De Veenhoop of aandersomme vanzels (stiet allemaole wel angeven). Tegen die tied zal d’r ok wel een vlagge en wat auto’s in de baarm(s) staon en dan kan et ‘m (haost) niet missen.
*
Zaoterdag (10/9):
*
Rest mi’j nog om bekend te maeken wie et boekien ‘Wieshied’ ommenocht kriegt (zie: 30/6). Ta, ta, ta, ta,...ta, ta: Otto de Vent van de Fochtel kan et boekien op de 24^ste veur niks ophaelen op ‘e Veenhoop.
Moch iene nog waachten op wat, da’k hier of daor toezegd of liggen laoten hebbe, laot dat dan even weten want… hiermit komt d’r plotselingklaps en opiens, deur omstanigheden en in elk geval veurlopig, een aende an mien geklets en gezwets op dit plak. En och… de Stellingwarvers an een meerderhied helpen lokte oons toch al niet en alleman was d’r ok niet zo hiel bliede mit wa’k hier an ’t doen was, he’k wel es begrepen. Mar pas op… kiek uut… want ik hool jim wel hiel strak in de gaten vanzels…
Daank veur ’t lezen en et zo now en dan es reageren.
Tot kies es…
*
*
Vri’jdag (9/9):
*
D'r wodde mi'j laestdaegs zegd da'k een dissident was. Now en... Dissidenten hebben vaeke (aachterof) geliek as ze heur ongenoegen kenber maeken over et beleid van et zittende (bestuurs)volkien!
*
Tovarisj Jehán zegt in zien stokkien van gister over et sutelen in een ni'jbouwwiek: "et verkocht daor et vaeke niet zo goed." Ik zol zegd hebben: "et verkocht daor niet zo denderend." Denderend, is een mooi Stellingwarfs woord veur goed, in de negatieve zin, neffens blz. 640 A-E. En ie moe'n et Stellingwarfs wel zo geef meugelik bruken vanzels, dat heurt zo! Even veerder lat hi'j oons weten dat hi'j zien verhaelen bliekber hiel "goed rippeteerd het want ze roegelden d'r zomar uut." Zo slim zels dat hi'j goeie kunde op de twiede riegel niet zitten zag. Wi'j hebben oons vertaelmesienegien, zoe’n robotachtige verteller liekt mi'j haost wat een vertelmesienegien, of maek ik now een tikfout? De beste man zegt d'r aachteran dat et zo heurt! Laot mi'j now krek daenken dat et niet zo heurt. Ik had liever lezen dat hi'j zien goeie kunde op de twiede riegel wel op 'e tied zitten zien hadde en in zien verhael ok es een keer een onverwaachte kwinkslag maekt hadde die disse keer goed uutpakte. Zoe'n kwinkslag moet vanzels wel goed uutpakken. Dat heurt zo!
*
Et thuusblad van et webstegien van de sSr is now toch es flink onderhanen neumen. A'k et zo bekiek is d'r trouwens een aandere schriever mit an de slag west as die et eerst altied schreef. Een hiele aandere stijl. Et vuult mi'j wat slim theoretisch an. Wie kan dat now toch wezen? Mar ja, de rest lopt onderhaand ok een aorig aende aachter…
*
Ken ie de uutspraoke "Bijl gaat in woud van regels en vergunningen"? Now, hi'j ston vandaege (alweer) op de veurziede van de kraante (LC). Ik veurspel je dat et allemaole dan nog weer ingewikkelder wodt.
*
In Duutslaand is now een 'belastinggoeroe' in de bienen kommen die mien dagboekien wel es lest, daenk’. Hi'j stelt veur om de belastings makkeliker te maeken: tot tienduzend euro vri'j van belasting en dan van vuuftien percent oplopend tot maximaol vuventwintig. Et anslagformelier past aachter op een bierviltien en kan binnen vuuf menuten deur iederiene invuld wodden. As de beste man dat d'r deurkrigt, stel ik veur dawwe naor Duutslaand verhuzen. Wel jammer dat daor zovule Duutsers wonen vanzels.
*
In et 'Groene Hart' bin de boeren eerst votpest, of mit subsidies votjagd. Now willen ze weer subsidies geven om boeren daorhenne te lokken omreden daor een groot grösperbleem ontstaon is. Dat wodt duur grös, ze bin gek...
*
Een Fraansman het krap elfduzend euro betaeld veur een hiele oolde (niet meer te zoepen) flesse drinken (champange) van zes liter.
*
De waddenverening stuur elf meensken naor huus, mit behoold van heur dagure. Om de lege gatten op te vullen wodden meenksen van et uutzendburo inhuurd. En dat alles in et raemwark van bezunigings...?!?
*
Neffens een onderzuuk van de Taelunie lezen Nederlaanders gemiddeld zestien boeken jaors. En daor geleuf ik now niks van... of ze moe’n alle studieboeken en zo ok mitrekend hebben. Mar die wodden mar zeldzem uutlezen, he’k wel es heurd.
*
Vraogt zoe’n kleine wiesneuze vandemiddag an mi’j a’k wel wus dat ik in giendertied boven in ’n boomtoppe klimmen kon. Vraog ik: waorom daenk ie da’k dat niet opredde? Zegt dat verrekte wiesneusien: omreden een boom hadder gruuit as dat ie lopen! En weg was hi’j…
*
Now, alle dattien mar in ien keer want et wodt mi’j te langdraoderig:
Vr. 1: Welke twie St.warver schrievers zatten tegere op een slaopcursus?
Vr. 2: Welke twie bekende St.warver verhaelen gaon weeromme op etzelde (tragische) ni'jsbericht (en zonder dat de beide schrievers dat van mekeer weten/wussen)?
Vr. 3: Welke bekende St.warver is ok de naeme van een popgroep, film en bekende voetballer?
Vr. 4: Waor staot de afkotting ABS veur
Vr. 5: Wat St.warver plaknaeme staot niet in de dikke Bloemhoff
Vr. 6: Welke uutdrokking mit 'hatte' staot niet in de dikke Bloemhoff
Vr. 7: Welke St.warver adverteensie staot al jaoren mit twie taelfouten rond disse tied in de NOS, Aanpakken en Stellingwerf?
Vr. 8: Waor is BOB de ofkotting van in et Nederlaans?
Vr. 9: Waoromme is et ezelsbroggien BOBO (en BOB) makkelik om de naemen van vier, resp. drie St.warver doktors te ontholen?
Vr. 10: Wat is de populairste St.warver roman neffens een enquete onder et volk?
Vr. 11: En welke neffens de lezers?
Vr. 12: Wie bin de schrievers van de twie St.warver romans die beide toevallig 'Sietske' hieten?
Vr. 13: Welke drie nommers van boeken uut de SSR-reeks bin spoekenommers?
Degene die veur ankem oktober de meersten goed het, krigt een boekwarkien van mi’j.
*
*
Donderdag (8/9):
*
Ik ken mar een peer meensken die (haost) alles en (haost) altied mar mooi, plezierig, genoeglik, en zo veerder, vienen. Zonder dan drekt zwatgallig te wodden staoj’ toch wel es even stille bi’j de dingen en daenken d’r es wat langer overnao, liekt mi’j. Een peer van die meensken bin trouwens gezaemelike kennissen, wi’k leuven. Overal waor ze hennegaon was ’t genoeglik en overal waor ze langesleupen of –reden was ’t plezierig. Dat gelok wi’k ze niet graeg ontnemen mar ik hebbe ok es zocht naor de diepere aachtergrond van zokke ja-knikkers in tegenstelling tot de nee-schudders. De kraanten staon op ’t heden ok vol mit krimmeneerverhaelen over de steigerende priezen. In een protte van die verhaelen stiet dan ok de hieltied de vraoge tot hoelange zoks deurgaon kan en as et veur de overhied niet es tied wodt om d’r wat an te doen. Neffens mi’j kan dit nog wel even anholen en hewwe grif niks van de overhied te verwaachten. De geschiedenis leert oons dat dit soorte perblemen allienig deur et ‘gewone volk’ zels oplost wodden kan (en moet). Bekende veurgangers bin o.e. vervoers- en havenarbeidersstakings.

Ok een benaodering over de vraoge hoelange zoks (nog) deurgaon kan (hoelange et volk dit slikt), het alles te maeken mit de gedaachte hoelange awwe et over et generaol neumen ondervienen as ‘een slecht of een goed leven’. Dit het niks mit bi’jglieks de bezinepries ‘an sich’ te maeken mar is meerstal een optelsomme van alles en nog wat wao’we nog (krek) wel of (krek) niet meer ‘mit leven kunnen’. Een dag of wat leden (30/8) ha’k al een stokkien van Aristoteles over et gevuul van ‘gelok’. Vandaege een vervolg daorop mit et thema: ‘wat is een plezierig leven?’
*
De filesoof Aristoteles (384-322 v.C.)

Veurof:
Gien aandere filesoof het in de Europese geschiedenis zovule invloed had op alderhaande gebieden van wetenschop as Aristoteles. Vanof zien jeugd was Aristoteles lange tied een leerling van, en laeter lerer an de Akkedemie van Plato. Hi'j ontwikkelde uutaendelik hiel aandere filesofische opvattings as zien leermeester en begon laeter zien eigen schoele in Athene. Veur die tied -vanof 342 v.C.- was Aristoteles warkzem as huuslerer van de jonge Alexander III (ok wel Alexander de Grote) (356 tot 323 v.Chr.).

Aristoteles baseert zien redenerings op de waorneembere warkelikhied en lat weinig ruumte veur et bovermeenselike. Van de ongeveer honderdvuuftig warkstokken die Aristoteles schreven het, kennen wi'j d'r eins mar een stok of dattig. Et giet om materiaol dat hi'j bruukte as basis veur zien kolleges die hi'j deur de jaoren henne anvulde en bi'jwarkte. Ok om die reden bin de warken van Aristoteles in et algemien gien makkelik leesvoer: ze bin vaeke stroef, kompakt en slim technisch schreven.

Eerder ha’k al een stok uut et begin van de Ethica, schreven veur zien zeune Nicomachus (Ethica Nicomachea). In dat stok zocht Aristoteles een definitie van gelok. Vandaege een stok uut zien Lof van de wiesbegeerte (Protrepticus), een vroeg wark uut de tied doe hi'j nog bi'j Plato warkte. Dit wark het een protte invloed had op laetere kristelike schrievers, zoas karkvader Augustinus (354-430 n.Chr.).

Aristoteles:
Dat meensken die kiezen veur een intellektueel leven ok een biezonder plezierig leven hebben, kan blieken uut et volgende. Et woord "leven" kan in twie betekenissen bruukt wodden: ofwel in de zin van et vermogen, ofwel in de zin van de verwezenliking. Wi'j zeggen ommes in twie gevallen van levende wezens dat ze ‘zien’: (1) as ze ogen hebben en gebruuk maeken van et angeboren gezichtsvermogen, (2) mar ok as ze heur ogen dichte hebben en as ze dan van et vermogen gebruuk maeken om naor wat kieken. Zo is et ok mit ‘weten’ en ‘kennen’. Seins bedoelen we daormit et gebruuk van et vermogen en et beschouwen, et bezit van vermogen dus en et bezit van kennis.

Awwe dan an de hand van et waornemen een onderscheid maeken tussen leven en niet-leven, en as 'waornemen' twie betekenissen het, in strikte zin et gebruukmaeken van de waorneming en veerder ok et in staot wezen om waor te nemen (daorom, liekt et wel, zeggen we ok van een slaopende, dat hi'j wel waornemt), dan is et dudelijk dat 'leven' him ok ansluut bi'j dit dubbele gebruuk. Van iene die wakker is kan ommes ok in warkelike en in strikte zin zegd wodden dat hi'j leeft. En veur iene die slapt gelt: omreden hi'j in staot is om zien toestand te veraanderen in die vorm van aktiviteit, omreden wi'j zeggen dat hi'j wakker is en wat waornemt, om die reden en mit et oge daorop kuwwe ok zeggen dat hi'j leeft.

Awwe ien en etzelfde woord in twie betekenissen bruken, ofwel as verwiezing naor een aktiviteit ofwel naor een passieve toestaand, dan zuwwe an et eerste in hogere maote de ‘eigenlike betekenisse’ toekennen. We zeggen bi'jglieks eerder van iene dat hi'j 'wet' as hi'j kennis bruukt as wanneer hi'j alle kennis 'het'. Aj’ zien kunnen dat de kennis bruukt wodt of as iene zels zegt dat hi’j de kennis het. Die ‘eigenlike betekenisse’ bestiet ok as hi'j 'zicht' (en begript) as dat hi'j naor wat kikt omreden hi'j allienig 'in staot is' om d'r naor te kieken.

Ok bi'j dingen waorveur mar ien woord beschikber is, praoten we niet allienig van 'in hogere maote' in de zin van meer-wezen, mar ok in de zin van eerder en laeter. Zo zeggen we bi'jglieks dat gezondhied in hogere maote wat goeds is as wat dat de gezondhied goeddot, en krek zok-zo-wat as aord op himzels de muuite weerd is tegenover wat, dat wat weerdevols oplevert. We zien hiermit dan ok dat et woord 'goed' in beide gevallen toepast wodt, ok al is dat niet mit etzelde benul, omreden et in 't iene geval op wat nuttigs slat en in 't aandere geval op (hooguut) een goeie eigenschop. We kun dan ok van iene die wakker is zeggen dat hi'j in een hogere maote leeft as iene die slapt, en krek zo van iene die daodwarkelik gebruuk maekt van zien ziel tegenover iene die ze allienig tot zien beschikking het. Vanwege de eerste kuwwe ok van de twiede zeggen dat hi'j leeft: de eerste is ommes in de toestaand dat hi'j én de aktiviteit én de passieve toestaand van dat 'leven' anneumen het.

Stelling: een gelokkig leven bestiet in et wiesgerig inzicht en dan in een vorm van wieshied, ofwel et bezit van de beste eigenschoppen, ofwel de hoogste maote van bliedschop en wille, ofwel al disse dingen mit mekeer.

As een gelokkig leven in wiesgerig opzicht bestiet, dan is 't dudelik dat et allienig veur de beoefeners van de wiesbegeerte weglegd is(!). As et bestiet in 't bezit van de beste eigenschoppen van de ziel of in et beleven van wille, ok dan is 't allienig of veurnaemelik veur et weglegd, want et bezit van de beste eigenschoppen is et belangriekste wawwe hebben, en de grootste bron van wille is, awwe alles stok veur stok bekieken, et wiesgerig inzicht. Ok as iene zegt dat al die dingen saemen an et gelokkig leven toeheuren, dan nog komt et bi'j de omschrieving daorvan an op et wiesgerig inzicht.

Dat hoolt ok in dat iederiene die d'r toe in staot is, an wiesbegeerte doen moet(!). Daorin is ofwel uutaendelik et volmaekte leven gelegen, ofwel et is van alle meugelikheden, om mar iene faktor te numen, veur de ziel de beste weg daorhenne. Et kan misschien gien kwaod om dit punt wat te verdudeliken an de haand van wat in de ogen van (haost) iederiene veur vanzelssprekend is. Iene zaeke is in ieder geval veur iederiene dudelik, dat iene niet köst veur een leven van de grootste riekdom en macht zonder een betien bezunnenhied of redelikhied, alderdeegst niet as hi'j veur zien plezier et meerst onvolgruuid genot naojaegen kunnen zol, zoas pattie gekken heur leven lange doen. Alle meensken, zo liekt et wel, perberen veural de bezinning uut de weg te gaon. Et tegenoverstelde van die onbezunnenhied is et wiesgerig inzicht. Van die twie tegenpolen gaoj' vaeks et iene uut de weg en kies ie (dus) veur et aander.

Zoawww ziekte seins veur wezen moeten, zo moe'we veur gezondhied kiezen. Neffens disse rissenering bliekt dan ok et wiesgerig inzicht onder alle omstaandigheden et meerst te verkiezen, en niet omwille van wat aanders dat daor uut komt. As iene alles al hebben zol, mar antaast is en ziekelik in zien vermogen tot inzicht is, dan zol et leven veur him niet de muuite weerd wezen, want hi'j zol ok gien weenst hebben over de aandere goeie dingen. Daorom vienen alle meensken die in anraeking kommen mit wiesgerig inzicht en in staot binnen om daorvan te pruven, dat al et aandere van gien of mindere betekenisse is. En om diezelde reden hoolt gieniene van oons et een hiel leven lange vol om dronkend te wezen of kiend te blieven.

Wi'j hebben, donkt mi'j, veur 'leven' allienig een aandere vorm neudig dan veur een 'goed leven'. We moe'n et de meerste meensken mar niet anrekenen dat zi'j allienig et eerste doen. Zi'j hebben wel de weenske om gelokkig te leven, mar bin al tevreden mit et ienvooldige feit om leven te kunnen (waeter en bolle is genoeg). Mar as ze daenken dat et leven tot iedere pries deurgaon moet, zol et ronduut belachelik wezen om niet alle meugelieke muuite te doen en daor de grootste zorg an te besteden om him die vorm van wiesgerig inzicht eigen te maeken die de waore warkelikhied kennen zal.
*
pb: "Dom volk lacht et luudst, ienvooldige meensken lachen et meerste, en intellektuele meensken genieten et meerste en wo’n vaeks ok oolder. Mar ja, wie is now dom, ienvooldig of intellektueel?"
*
*
Woensdag (7/9):
*
Wat het tovarisj Johan toch de hieltied te zeuren over et mitlopen te sutelen van aandere schrievers? Vraoge: Bin die d'r dan? En zo ja, moch d'r nog iene wezen dan wodt die binnenkot ok nog wel votjagd, bin 'k bange? Ikzels hebbe een peer jaor hiel plezierig mitlopen mar hebbe ok hiel plezierig ofscheid van neumen en brieduutmeten, da'k now niet en ok nooit weer mitdoe… Et was gister trouwens niet allienig Claus zien verjaordag, mar ok die van Geert Wilders (1963) (en nog een hiel protte aanderen)! Doe'k hier en daor trouwens even wat ommesnuffelde wie Annie B. (zol die ok in heur ‘hot-pants’ mitlopen hebben?) was, wodde ik slim ofleided deur een opmarking op de webstee van de "Vereniging van Oud-Employés der Koninklijke Shell" (VOEKS), daor o.e. te lezen stiet dat Bakkevene et ienige brinkdörp in Fryslân is. Wat een onzin, o.e. 'oons' Berkoop, Makkinge, Ooldemirdum en Veenklooster (en d’r bin grif nog wel een peer) bin toch ok brinkdörpen?
*
De burgemeester van Stienwiekerlaand (Zuud-Stellingwarf) Hayo Apotheker, het et ‘ei van Columbus’ bedocht, kopte de kraante (LC). Bi’jglieks jongeren hoeven de grond om heur ni’je koophuus henne niet meer te kopen mar betaelen daorveur jaorliks hure an de Gemiente, had de beste man ‘bedocht’. Hoezo, ei van Columbus bedocht. Zoks bestiet toch al jaorenlaank…? Veural in de steden is ’t hiel gewoon dat d’r veur de grond ‘erfpacht’ betaeld wodt en dat die grond nooit je eigen wodt. En hoezo, de kosten kun op disse meniere aorig leger holen wodden bi’j et antugen van een huus. D’r moet toch hielendal niks? As ze et huus now bi’j de woningstichting (daor bin tegenworig duurdere naemen veur) onderbrengen, dan bin ze (op kotte termien grif) nog vule veurdeliger uut… gewoon huren en veerder niks. Eigies…
*
Fraude mit uutkerings moet op ’t heden ok wel slim gemakkelik wezen a’k de kraanten leuven mag. De iene nao de aandere zakkevuller.. sorry, dirrekteur stapt mit een goolden haanddrok op. Ze hebben et smoordrok mit heur eigen orgenisaosie. En zokke orgenisaosies bin dr’op ’t heden ok wel meer: de zorg, de woningstichting, e.z.v.
*
In een miljoenenkostende kampanje laot de belastingdienst oons weten dat ze van now of ok alderhaande toeslaegen uutbetaelen an de burgers. Eerst de BPM betaelen en dan laeter van de beslastingdienst weerommekriegen. Eerst de (te dure) hure betaelen en et dan laeter van de beslastingdienst weerommekriegen. En gao zo mar deur. En overal zit vanzels weer een zakkevuller… sorry, een dirrekteur tussen die ‘hiel belangriek’ wark dot en …
*
Honderden meensken wussen d’r van dat et OM (en NFI) wel es wat anrommelen mit bewiesmateriaol, mar d’r is bliekber gieniene die zien mond es eupendot. ’t Is gien vergeliek vanzels, mar zokke ja-knikkers bin d’r in Berkoop zo langzemeran ok te vule van…. Sorry dat ma’k niet zeggen vanzels, dat heurt niet zo. En eerlik is eerlik, in tegenstelling tot de sGp meugen d’r bi’j de sSr wel vrouwlu in ’t bestuur. Wanneer was de laeste veurzitter of dirrekteur van de sSr eins een vrouwspersoon?
*
En now wa’k nog mar krek an de kraante begonnen… vot, bi’j ’t oold pepier…! Lao’k d’r mar een riempien van maeken want dat is ok al weer even leden.

Horizon

Waor de locht de grond raekt
daor ligt de horizon
mien horizon
mar ik wil meer
en ik wil veerder
veerder dan die horizon.

Dat schient lopend niet te kunnen
liekas mit de auto niet
et ienige vervoer
om disse horizon veurbi'j
is mit gedaachten in mien heufd.

A'k dan es over 't raantien kiek
en aachteromme naor jim
dan zie ik daor
een hiele protte jimmen
en zie mi'jzels daor niet meer staon.

Hi'j was nooit van disse wereld
en nooit van disse tied
vun et mar niks
hier tussen al die jimmen
hi'j wol veerder as zien eigen horizon.

Piet Bult, 7 september 2005.
*
Et vraoge liesien:
Vr. 1 en et bescheid is onderwiels bekend.
Vr. 2: Welke twie bekende St.warver verhaelen gaon weeromme op etzelde (tragische) ni'jsbericht (en zonder dat de beide schrievers dat van mekeer weten/wussen)?
Vr. 3: Welke bekende St.warver is ok de naeme van een popgroep, film en bekende voetballer?
D’r is een betrouwber bescheid op de dadde vraoge binnenkommen. Et goeie antwoord is "Johan". Dat dat de naeme is van een bekende Stellingwarver is, is dudelik. Et is ok de naeme van een voetbalblad. En wussen jim dat die Johan C. zien oerbeppe van Noordwoolde komt krek as de oer-oerpake van Van der Vaart? Ie kunnen et an heur beider taelgebruuk nog heuren. En wussen jim dan ok daj’m de naeme van ‘oonze ‘ Johan, as goeie Stellingwarver uutspreken as Jehan, mit de klemtoon op 'han'? Ik wil ’t wel eerlik bekennen, ik wus dit allemaole niet van mi’jzels.
Vr. 4: Waor stiet de afkotting ABS veur?
Vr. 5: Welke St.warver plaknaeme stiet niet in de dikke Bloemhoff
Vr. 6: Welke uutdrokking mit 'hatte' stiet niet in de dikke Bloemhoff
Vr. 7: Welke St.warver adverteensie stiet al jaoren mit twie taelfouten rond disse tied in de NOS, Aanpakken en de Stellingwerf?
Vr. 8: Waor is BOB de ofkotting van in et Nederlaans?
*
Robert Lembke: "Dichters zijn mensen die omwille van het rijm hun gevoelens kunnen veranderen."
*
*
Deensdag (6/9):
*
Dit stokkien ha'k krek klaorstaon:
De webstee van de sSr is veur et laeste bi'jwarkt op 3-08-2005 stiet onderan et eerste blad van de ni'jgies. Halverwege stiet: "D’r is op 2 september een prachtig boek verschenen over ..." "Is verschenen" is neffens mi'j voltooid verleden tied. Mar dat kan toch op 3/8 (haost) niet zo west hebben, zoj' zeggen, of zol 'et instituut' een hiele eigen scheurkelinder hebben? Now ja, de laeste Ovend is ok van juni, stiet d'r nog de hieltied!
Doe’k veur de wisseghied krek nog even keek hebben ze vandaege de webstee toch stiekem wat anpast, dat now kan (dat stokkien) d'r weer op deur. Now de rest ok nog even naokieken jonges (m/v)!
*
Perfester Arjo Klamer vint dat Nederlaanders krek een stellegien verwende kiender binnen. Daor zit misschien wel wat in mar zok roepen het niet zovule nut aj' niet even veerder kieken, hoe is 't zo kommen. Neffens mi'j komt et veur een pat deur al die muren van (opzettelik) onbegrip waor aj' op 't heden vaeke tegenop lopen. Al de 'n duvel beginnen mit nee-zeggen en awwe tied (en nocht) hebben dan zuwwe d'r (laeter) nog es naor kieken. En vaeks krek as bi'j de sSr, heur ie d’r dan nooit weer wat van.
*
Chinese kleraosie mag de EU niet in en ik mar daenken dawwe hier graeg zovule meugelik 'markwarking' veurstaon. Ok alweer: an me hoela!
*
Vr. 1: Welke twie St.warver schrievers zatten tegere op een slaopcursus?
Ik kreeg een bescheid op disse vraoge daor a'k wel aorig vertrouwen in hebbe: "Pieter Jonker en Benny Holtrop kenden mekeer al van een slaopkursus waor ze beidend jaorenleden op zatten. Laeter gong Benny Stellingwarfs schrieven. Of zol PJ him op die cursus overhaeld hebben? Dan het hi'j in ieder geval niet zitten te slaopen."
*
Vr. 2: Welke twie bekende St.warver verhaelen gaon weeromme op etzelde (tragische) ni'jsbericht (en zonder dat de beide schrievers dat van mekeer weten/wussen)?
Vr. 3: Welke bekende St.warver is ok de naeme van een popgroep, film en bekende voetballer?
Vr. 4: Waor staot de afkotting ABS veur (= Algemien Beschaofd St.warfs en antiblokkeersysteem (kan de SSR ok wel bruken)
Vr. 5: Welke St.warver plaknaeme staot niet in de dikke Bloemhoff
Vr. 6: Welke uutdrokking mit 'hatte' staot niet in de dikke Bloemhoff
Vr. 7: Welke St.warver adverteensie staot al jaoren mit twie taelfouten rond disse tied in de NOS, Aanpakken en de Stellingwerf?
*
In et Klunderen van vandaege in de kraante (LC) zag ik Karst ok al een betien an ’t oefenen om wat naost de schoenen te lopen. En hi’j stiet ok al es wat vaeker veur de spiegel, leek mi’j zo toe.
*
Jean Cocteau: "De dichter is een exhibitionist in een blinde wereld."
*
*
Maendag (5/9):
*
Zoas meerstal wa’k weer bliede dat et weer maendag was vandemorgen. Heufdzeerte verdwenen en we weren dan ok al mooi op ‘e tied op reize naor Tukkerlaand. Vandemiddag en aovend mossen we nog zoe’n tien kilemter over de greens wezen veur een bosschoppien.
*
Et bi'jwoord "om".
Et vaalt mi'j (veural in de kraante (LC)) op dat et bi'jwoord "om" in et Nederlaans hoe langer hoe vaeker weglaoten wodt. Veurbeelden:
"Het is de hoogste tijd de politie erbij te halen." en
"We besluiten maar te gaan slapen." en
"Ik had mij zelf dus voorgenomen jullie niet opnieuw ..."
Waorom niet:
"Het is de hoogste tijd om de politie erbij te halen." en
"We besluiten maar om te gaan slapen." en
"Ik had mij zelf dus voorgenomen om jullie niet opnieuw ..."
Is d'r ok een 'Neerlandicus' die mi'j dit even uutstokken kan?
En dan wi'k ok graeg weten of zoks in 't Stellingwarfs ok veurkomt.
*
Ik hebbe ok nog de hieltied dé kode liggen uut de Da Vinci kode:
De kode 16-39-44-16-39-101-84-20-5-60-16-16-117-117-85-60 aachterin et boek 'De Da Vinci code' is een verwiezing naor de heufdstokken van et boek. Aj' iedere eerste letter van et heufdstok opzuken dan kriej' de tekst "erperdjlwteeoogt". Aj' dat opschrieven neffens de 'Ceasarcodering', dus in 'n vierkaant (van 4 x 4 letters in dit geval), dan stiet d'r:
e r p e
r d j l
w t e e
o o g t
Lees dit op-en-daele dan stiet d'r "er wordt op je gelet".

Hej' de Engelstaelige versie lezen, dan kriej' de kode 128-10-93-85-10-128-98-112-6-6-25-126-39-1-68-78 dat stiet veur de text "we are watching you".
*
"Ie hebben et nog wel gauw es over jow kammeraoden bi’j de Schrieversronte." schreef iene. As anvietering (za’k mar annemen) zag hi’j zoks as "construktieve wrijving". Is d’r alweer iene die et wel begrepen het!
*
Dan liggen d’r ok nog de hieltied wat vraogen te waachten op een bescheid:
Vr. 1: Welke twie St.warver schrievers zatten tegere op een slaopcursus?
Vr. 2: Welke twie bekende St.warver verhaelen gaon weeromme op etzelde (tragische) ni'jsbericht (en zonder dat de beide schrievers dat van mekeer weten/wussen)?
Vr. 3: Welke bekende St.warver is ok de naeme van een popgroep, film en bekende voetballer?
Vr. 4: Waor staot de afkotting ABS veur (= Algemien Beschaofd St.warfs en antiblokkeersysteem (kan de SSR ok wel bruken)
Vr. 5: Welke St.warver plaknaeme staot niet in de dikke Bloemhoff
Vr. 6: Welke uutdrokking mit 'hatte' staot niet in de dikke Bloemhoff
*
Fellini: "Zelfs een dichter heeft het recht om te spreken over dingen die hij onvoldoende kent."