Doe mi'j mar Stellingwarfs

Weeromme naor Verhaelen
Weeromme naor Stellingwarfs
Home


Doe mi'j mar Stellingwarfs

Een schoffien leden ha’k docht dat de schrieveri’je van buurtgenoten in dit kraantien een betien op gaank kommen zol. Jammer, nao een peer berichies was et ok weer over. Van now of an hebbe ik mi’j veurneumen om mit riegelmaote es wat in dit blattien te doen. ‘k Hebbe ok in gedaachte om dat in ’t Stellingwarfs te doen. Want naost dat et hier in Ni’jberkoop nog wel ommeraek praot wodt, moe’n we de schrieveri’je in ’t Stellingwarfs ok een betien in ere holen donkt mi’j.

Veur diegene die niet deur het wie ze now veurhebben, za’k mi’jzels eerst even an jow veurstellen. Piet Bult is de naeme. Tegere mit mien Monique, een peerd en een hond, wonen wi’j al(weer) krapan tien jaor in ’t oolde winkeltien van wedevrouw Keizer an de Grindweg op nommer achttien. Wi’j holen oons daegeliks bezig mit kompjoeters en alles daoromhenne. We kommen deur hiel Nederlaand (en zels in Duutslaand) en dan veurnaemelik bi’j bedrieven die zich bezig holen mit Recycling. Vroeger nuumden we dat oold-iezer en oold-pepier boeren. Tegenwoordig bin dat meerstal hiele nette bedrieven waor ok een hieleboel administraosie (dus kompjoeterwark) te doen is.

Aj’ bevobbeld een oold batteri’jgien bi’j de fotowinkel in de batteri’jetonne smieten dan lopt de administraosie daorvan op ienig mement deur een deur oons maekt kompjoeterpergamme. Tussendeur wi’k jim d’r op wiezen dat et vaeks nog beter is om die oolde batteri’jgies an de kiender van de legere schoele mit te geven. De meerste legere schoelen in Nederlaand doen mit an een perjekt veur et gadderen van oolde batteri’jen. Veur de inleverde kilo’s krigt de schoele dan weerdepunten om te speren veur algemiene leerhulpmiddels zoas een tilleviesie of een videorecorder of zokswat.

Een jaor of wat leden bin’k lid wodden van de Stichting Stellingwarver Schrieversronte. Et enthousiasme van die klub het mi’j slim te pakken kregen. Zodoende he’k veurig veurjaor naor een kursus “Stellingwarfs” west en et oflopen veurjaor he’k opni’j naor Berkoop west veur een vervolgkursus. Disse klub hoolt zich drok doende mit et vaasteleggen en uutdregen van alles wat mit de Stellingwarver historie, tael en kultuur te maeken het. Een protte meensken van Ni’jberkoop bin al lid van de SSR mar d’r kun de hieltied nog meer leden bi’j vanzels. Op ’t heden (september) biwwe drok doende mit de sutelaktie. Dat hoolt in dawwe een maondlaank daegs een peer ure, mit een kroje mit boeken en nog wat ere negosie de huzen van een tal dorpen langesgaon om te verkopen. De “Sutelkraante” hej’m vaast wel lezen want die is hier huus-an-huus verspreided.

Et Stellingwarfs dawwe hier bruken is vanoolds een Neder-Saksische tael. Dit taelgebied bestriekt roegweg de perveensies Grunningen, Drenthe, Overiesel, een pat van Gelderlaand en een pat van Duutslaand. En niet te vergeten vanzels, oonze beide gemienten Oost- en Weststellingwarf. De tael het now een erkenning onder diel twie van et ‘Europees Handvest voor regionale en minderheidstalen’. Et Fries bi’jgelieks het al wat meer staotus en vaalt dan ok onder diel drie van dat zelde Handvest. In praktiese zin gaot et vanzels veurnaemelik om de hoogte van de subsidie die d’r geven wodt om zoe’n (minderhieds)tael in staand te holen.

Veur dit mement genoeg ha’k docht. Wie mitdoen wil of d’r meer van weten wil, kan altied bi’j mi’j terechte. De koffie staot klaor.

Piet Bult, september 2003