Körfballen

Weeromme naor Verhaelen
Weeromme naor Stellingwarfs
Home


Körfballen

Körfballied (28-11-2004)

Körfballen is een balspullegien dat speuld wodt deur twie teams van vier manluden en vier vrouwluden.
Een team maekt een doelpunt as de balle an de boverkaante deur de körf van de tegenparti'j gooid wodt.
D'r bin twie soorten van körfbal: Butenkörfballen en Binnenkörfballen.

Solo:

Et rechthoekige veld van zestig bi'j dattig meter is in twie geliekese vakken verdield.
In elk vak staot een paol van drie-en-een-halve meter hoge waor een körf zonder bojem an vaaste zit.
In elk vak staon van beide parti'jen twie speulsters en twie speulers opsteld.
Elk vak is van de iene parti'j et anvals- en toegelike van de aandere et verdedigingsvak.
De balle mag niet uut de hanen van de tegenstaander sleugen wodden.
Drokken, vaasteholen en ofholen mag ok niet.
Bi'j et hinderen moet et vri'je gebruuk van et lichem van de tegenstaander ontzien wodden en d'r mag allienig iene van de eigen sekse hinderd wodden.

Solo:

De anvalers moeten heur deur vlogge te kombineren en deur goed positiespul de vri'je doelkaansen maeken.
Uut een hinderde stand mag niet op de körf scheuten wodden.
Bi'j een overtreding van de spulriegels krigt de tegenstaander een vri'je gooi.
Gaot deur de overtreding een doelpuntkaans verleuren, dan komt d'r een strafworp, die neumen wodt op twie-en-een-halve meter veur de körf.

Solo:

Zwaore overtredings, vaeke roeg spul of wangedrag wodden bestraft mit een gele of een rooie kaorte.
Een gele is 'n waorschouwing een rooie betekent: van 't veld.
Om de twie doelpunten wodt van vak wisseld.
Een wedstried duurt twiekeer drie kertier.

Solo:

Bi'j et binnenkörfbal is et rechthoekige veld veertig bi'j twintig meter en ok in twie geliekese vakken verdield.
Vanuut et verdedigingsvak maj' niet perberen om een doelpunt te maeken, ie moe'n eerst een speuler van eigen perti'j die in et anvalsvak is, de balle toespeulen.

Solo:

Begin jaoren vuuftig van de veurige ieuw is et binnenkörfbal begonnen as oefenvorm veur et veldkörfbal en om toch ok in de wintertied et spul speulen te kunnen.
De eerste binnenkörfbalwedstried (dat doe nog mikrokörfbal nuumd wodde) was in 1952 in de Hooltrusthallen van Den Haag.
In de loop van 'e jaoren gruuide et binnenkörfballen uut tot een wedstriedsport.
As kieksport het et binnenspul ondertussen et veldspul overvleugeld.
Deur de kleinere vakindieling van et speulveld wodt d'r bi'j et körfbal binnen, vule meer van een speuler vraogd: zo wodden d'r hogere eisen steld an et uutholingsvermogen, d'r moet vlogger speuld worden en de behendighied speult een grote rolle.

Solo:

Körfballen is een sport die in Nederlaand uutvunnen is, in 1902 ontwikkeld deur de Amsterdamse onderwiezer Nico Broekhuysen (1877–1958). Nao 1920 kwam et ok in België op gaank en sund 1946 wodt et körfballen ok in Ingelaand speuld.
Sund de jaoren zeuventig het et körfballen een grote vlocht neumen.
Et wodt in de meerste Europese lanen in kompetitieverbaand speuld.
Ok in India, Australië, Amerike, Indonesië en in et Verre Oosten wodt et körfballen in toenemende maote speuld.
Nederlaand en België speulen nog de hieltied internationaol een slim belangrieke rolle in et körfballen.

Solo: