Zu. 13 juni 2004.
Vandemorgen al op ‘e tied an de kuier. Vanof een ure of halfzeuven even ‘n uurtien hier naost in de regen ’t bos in west. Dan roekt et daor op zien mooist (vien ik). Om een uur of tiene / half elf hewwe koffiedrinkers had. Meerstal gao’k tegen twaelf ure even naor et Huus&Hiem duo Henk en Frank in de studio van radio Centraal. Vandaege kwam dat d’r dus niet van vanwegens die koffiedrinkers. Luuster ik morgenaovend wel even naor de herhaeling (van 18:00 tot 19:00 ure). Oonze herhaeling van ‘Wiespraoten’ is deensdagaovend om dezelde tied. Veerder de hiele dag aorig hadde an ’t wark west mit ‘schapkaorties en barkodes’ en zo wat henne. Ankem vri’jdag (en zaoterdag) hewwe een verhuzing van een beheurlik groot bedrief op de agenda staon en daor is ok nog al wat veurbereiding veur neudig. Dat zo doende.

Johan het vandaege een citaot van Cécile Evers in zien dagboek zet: "Als de streektaal dient om gebrek aan talent te maskeren, zal zij nooit serieus worden genomen." Een citaot om even over nao te daenken, zee Johan. Een ‘what-if’-stelling mit een inpaandige konklusie. Liekevule waor as niet-waor liekt mi’j. Wie of wat is die ‘zij’ uut et twiede pat van die zin? Is dat de streektael, et telent of een lady die in et zinnegien d’r veur nuumd wodt? Wanneer is een streektael eins serieus? Een tael is om te kommuniseren en as d’r kommuniseerd wodt dan is dat vaeks deur twie of meer meensken (aandere beesten kun trouwes ok aorig kommuniseren). En da’s altied ongeleuflik serieus! Dat iene een telent is (west het) kuj’ vaeks allienig aachterof vaaste stellen. Dan is et een telent bleken. Iene die een telent nuumd wodt, wodt dat vaeke nuumd uut mar iene of twie gezichtspunten. Om aachterof een telent van eerder nuumd wodden te kunnen het vule meer andachtspunten neudig. Ok hier gelt vaeke dat allienig geld en/of macht genoeg is. As ‘zij’ niet serieus neumen wodt… dan wodt dat wel es tied… as ze te meenste een betien an de jaoren is. In disse tied is een streektael haost altied een hobby (en vaeke een twiede tael). Deurbreken in een streektael gaot lieke makkelik en/of muuilik as in elke aandere tael. En hoe, wie of wat is dat deurbreken dan weer? In dit geval is de bruukte tael niet vule meer as de verpakking van de bosschop. Now, laank genoeg over naodocht donkt mi’j.

Za. 12 juni 2004.
Nao een dag mit pakkies huj omme sjouwen en dan nog een hiele dag op de golfbaene; ik bin kepot. Kramp in bienen en kramp in de vingers en ok in de rest van mien lief. Mar goed, toch nog een peer zinnige dingen daon vandaege. Meer omdat et mos dan omda’k d’r nocht an hadde. Al aorig op ‘e tied van vandemorgen had een klaant van oons wat perblemen. We konnen ze mit wat henne-en-weer mailen weer oplossen. Ik gao now even liggen. A’k vandaege nog al weer wakker wodde dan maek ik dit stokkien nog even of. Aanders is et now of….
 

Vr. 11 juni 2004.
Vandaege bin ‘k om goed negen ure vertrokken naor de golfbaene, heb de hiele dag et edele spellegien (mit)speuld. We wodden indield in een ‘flite’ mit een peer onbekende mar heldere wiefies mit een kneuzekerektie (Handicap) van 24. We hebben d’r mitmekeer een hiel gezellige dag van maekt. Om goed negen ure vanaovend wa’k weer thuus. Krek et klokkien rond dus! Zoe’n dag is nog haost hadder warken as gewoon een dag an ’t wark. ‘k Was eins krek even te laete thuus. ‘k Had nog wel even naor Berkoop wild, naor de uutrikkinge van Johan zien stiekelige cd’s. ’t Is d’r niet van kommen.

Via een kunde van de Universiteit van Leiden kwam ik een gedicht tegen van Constantijn Huygens waor nien naeme in veurkomt.

Ma. 7 juni 2004.
Vandaege niet al te vule spannende dingen beleefd. Van zeuven tot een uur of negen even hadde an ’t wark west veur een klaant in Grunningen. Om tien ure mossen we mit ‘n jong peerd naor Appelsche veur zien eerste springkursus. Hi’j moet an ’t aende van disse maond naor de keuring en dan is ’t mooi as hi’j ok een betien springen kan. Hi’j wodt dan keurd op springvermogen en vri’j loopvermogen. Zien moeke kan dan preferent wodden of sokswat he’k begrepen.

Om een ure of iene henne kwam Andries om et grös te mi’jen. De eerste bunder – eerste snee – ligt now plat. Woensdag an ’t aende van de middag zal et in pakkies past wodden. Pakkies mit plestiek d’r omme toe want dan kan et buten liggen blieven. Ik heurde trouwes krek daj’ aorig subsidie beuren kunnen aj’ de greide d’r mar roeg henne liggen laoten. Dan mag d’r gien dong op en gien vee in en d’r moe’n op een vierkaante meter vuuftien verschillende plaanten gruuien. Zo bin d’r nog wat veurweerden mar aj’ daor dan allemaole an voldoen dan kriej’ omdebi’j 900 euro de bunder. Ik daenke da’k dommiet slaopende riek wodde.

Vandemiddag kreeg ‘k een stok tekst van Hilly toestuurd. A’k et Stellingwarfs even naokieken wol. Et stok komt in ’t Nederlaans in de kraante (de Stellingwerf) mar de citaoten blieven in ’t Stellingwarfs. ‘k Bin beni’jd.