Naor Dagboekien

Veurige weke Ni'je weke

Weke 8 (21/2 – 26/2 - 2005):

Zundag (27/2):

Vandemorgen wa’k al veur zes ure wakker en bin ‘k naor beneden gaon. Nao mooi wat koffie en zwaore sjek bin ‘k aachter et toetsebod kreupen en he’k de brief van Paulus an de Galaten onderhanen neumen. Goed en wel nao et middagure wa’k d’r deur en bin ‘k veerder gaon mit Jesaja. Belangrieke thema's in de profetische uutspraoken van Jesaja bin: de Davidische dynastie, Jeruzalem as keuningsstad en et plak van de tempel, de kritiek op kultische en sociaole misstanen, en de ondergaank van vi'jandige volken. De stijl van de poëzie in dit gedielte is beeldend, krachtig en kompakt.

Doe’we om een uur of zesse et beestespul op stal hadden biwwe nog mar even naor Amsterdam gaon en daor hewwe hulpen om de verjaordag van mien typograaf mit te vieren.

Zaoterdag (26/2):

Vandaege kreeg ik een aemel van iene die vreug waoromme a’k Karst zovaeke ‘bi’j de kop hebbe’. Daor ha’k nog niet over naodocht vanzels mar et komt grif omreden de man nog al wat an de weg timmert. En aj’ haost iedere dag in ’t locht staon en een protte van die (kleine) fouties maeken, dan kuj’ zoks verwaachten vanzels.

Vandaege bin ik ok begonnen an et biebelboek Jesaja. Dat liekt mi’j nog een hiele toer toe. D’r zitten ok wel aorige stokkies in mar et is allemaole toch wel een hiele protte tekst (66 heufdstokken).

Vandemiddag kreeg ik nog zaekelike vesite. De man is om een uur of iene kommen en eerst om vuuf ure weer votraekt. Mar we hebben wel weer nuttige dingen daon veur et Ministerie van VROM

Ik mos de kraanten van vandaege vanzels ok even deur veur wat onderwarpen veur oons Wiespraoten van ankem donderdag.

Van ‘Landschapsbeheer Friesland’ kreeg ik een kevot mit nog wat anwiezings veur et bomeprojekt. D’r hadden o.e. wel twaelf Stellingwarfse schievers reageerd op de oproep.

Van Tine en Akky een bericht mit de eerste opdracht veur de kursus ‘Spannende verhaelen schrieven’ van de sSr. Dit begint al goed. D’r zat een kaortien op et grote kevot mit een bosschop van de TPG-Post a’k mar even twie kwatties (now vuuftig eurocenten) bi’jbetaelen wol want de maegies hadden d’r wat te min postzegels opplakt. Aachter op et brune kevot ston op een ofkotte meniere de ofzender ‘8932 PC 2’ (dat is van Tine). In de anhef van de brief staot "… hebben Tine en ik …". Daoruut bliekt dat Akky de brief votstuurd het. Vrouwluden…. ik zal ze nooit (leren) begriepen en waorom moe’n MI’J dat soorte dingies ok altied drekt opvalen…?

Vri’jdag (25/2):

Vandmiddag heurde ik Karst op ‘e radio bi’j de Omrop hatstikke aorig doen en lachen mit een jaeger. Uut eerdere verhaelen he’k wel es begrepen dat Karst niks van jaegen hebben moet. Mar ja "wiens brood men eet…"

In een dom praotien over de dichtkeunst hul iene mi’j veur daj’ een goed gedicht wel drie keer lezen moeten veurdaj’ d’r ok mar een woord van begriepen. Ik vien dat (ok) een gedicht dat slim toegaankelik is best een goed gedicht wezen kan. Laot die diepegreveri’je mar zitten.

Ze zeggen wel es dat meensken op aepen lieken. Ze zeggen wel es dat een belangriek kenmark van meensken is, et hebben van een kultuur. Dat is een niet arfelik vaastelegde gedreging die deur et onderwiezen leert wodden kan en dat van meenske op meenske overdreugen wodden kan en dat dan ok nog es anvuld wodt mit deur leren en onderviening opdaone inzichten. Zo ontwikkelde de meenske zien eigen religie(s), zien eigen spraoke en zien eigen tael, krek as et schrieven, de wetenschop, keunsten en weerden en norms. Et meerst an meenske verwaante dier, de Meenske-aepen, Gibbons en aandere aepen, onderwiezen of niet of haost niet. Aepen leren in heufdzaeke deur nadoen (keunsies). Alderdeegst as meenske-aepen deur een meenske onderwezen wodden, leren zi'j (haost) gien kulturele zaeken. Aepen hebben dan ok (vri'jwel) gien eigen kultuur. Heuren aepen dan tot de kultuur van de meenske of heuren we tegere as iene kultuur tot een aandere kultuur? In dat geval zol de kultuur van de meenske gien kultuur nuumd wodden moeten mar een sub-kultuur of… (wie et wet mag et zeggen).

Donderdag (24/2):

Vandemorgen al mooi vroeg onderweg naor Kampen. Goeie dingen daon. Doe we thuus kwammen lag d’r een briefien van de belastingdienst. Awwe mar even een boete en roem honderdduzend euro overmaeken wollen vanwege et et overschrieden van een termien van et dadde vorrels van veurig jaor. Rare jonges, die jonges van oonze nationaole pottemenee.

In de kraante (LC) las ik dat Engelsen een sterrestelsel ontdekt hebben zonder sterregies. Ja, zo kan ik et ok vanzels: Ik hebbe gister een boek lezen zonder woorden en vandemorgen he’k zitten te broodeten zonder bolle…

Et laeste ure van de middag he’k snipperd en even naor et aachterlochien van de peerdetreler keken. Et braande…

Woensdag (23/2):

Vandaege zat d’r bi’j de post een uutneudiging van die Vito autoverkoper die mi’j veurig jaor gien Vito verkopen wol omreden ze allemaole even in vergeerdering zatten. Veur details kiek mar es bi’j mien Verhaelties op disse webstee bi’j autoverkoperi’je. Mit een mooi briefien weeromme za’k ze daor nog es an herinneren. En ik miene da’k doe ok vraogd hadde om mien naeme uut heur komputer te haelen. Dat schient trouwes wel bi’j meer instaansies een hiel perbleem te wezen.

D’r zat ok een uutneudiging van de sSr bi’j de post veur een kursus ‘Spannende verhaelen schrieven’. Daor ha’k mi’j veurig veurjaor al es veur opgeven. Veurig haast bi’j de lieties-schrief-kursus had Pieter J. al es zegd dawwe daor in jannewaori bericht van hebben zollen. Nog eerder het hi’j ok al es zegd dat et veurig jaor september al uutaende zetten zol. Better let as net, is ’t niet zo?

In etzelde kevot zat ok nog een uutneudiging van de "Kalinderredaksje fan it Skriuwersboun" om een gedicht, een verhaeltien of een meziekstok te maeken veur de Friese scheurkelinder. Doe’k taovend an ’t eten koken was (kookte eerappels mit chinese kool en een peer wossies) leup ik d’r wat mit omme en mos ik dit opiens opschrieven:

Verdwaeld bin ik,
verdwaeld in ruumte en in tied.
Waor kom ik ok weer weg,
waor zol ik ok weer henne?

Mien weg zuuk ik,
in de vroege waarmte van de dag,
et duuster van de naacht.
Waor zol ik ok weer henne?

Weeromme wil ik,
weeromme in tied en in ruumte,
mar waor mos ik henne?
Waor kwam ik ok weer weg?

Piet Bult, feberwaori 2005.

Dat he’k now altied (now ja, vaeke). Eten koken en spoken in ‘e kop en dan lekt et mi’j zomar uut de penne. Een muurtien metselen is muuiliker zuwwe mar rekenen… En dan ligt d’r ok nog iene veur wark over een boompien van "Landschapsbeheer Friesland". Mar al mit al kuj’de kost d’r niet mit verdienen he’k al deur.

In de Ni’je Ooststellingwerver vul mi’j op dat Karst now in de raod gien Stellingwarfs meer praot. Tot een schoft leden stonnen zien citaoten altied in ’t Stellingwarfs in de kraante mar now niet meer. Of et ligt an de kraante vanzels. In datzelde stokkien nam Karst zien perti’jgenoot en Burgemeester ok nog es aorig in bescharming. Niks duaole stelsel dus mar gewoon ordinaire perti’jpoletiek.

De Gemiente het et ok tegenholen dat d’r een grote winkel op et oolde plak van Jonge Poerink komt. Waor bemuuien ze heur mit…! Ja, en dat ze in Berkoop niet snappen dat d’r gien glezuurde pannen op et dak meugen…! Van die verschrikkelike onsjogge zunnepanelen wodden subsidieerd mar gewone ‘lekkere’ pannen op je daoke, daor zal de Gemiente wel es even een stokkien veur stikken. Waor bemuuien ze heur mit…? Veurig jaor he’k in een inzunnen stokkien al es zegd dat et niet lange meer duren kan of de Gemiente schrift veur wat bloempies aj’ veur ’t raem hebben moeten. Waor bemuuien ze heur mit…!

Deensdag (22/2):

Vandaege kwam ik disse tekst argens tegen. "Een volk wat Gods Woord niet wenst, maakt haar eigen bijbel naar haar eigen wensen aangepast aan haar eigen ideeën en verlangens." Doe mos ik daenken an een Klunderen van Johan Veenstra die hi’j veurig jaor es schreef over mien vertaelen van de biebel in et Stellingwarfs. Zoe’n soorte vertaeling wol Johan d’r mi’j doe ok mar van maeken laoten. Die bladzieden mit al die oorlogen, hoereloperi’je, moord en doodslag en gedonder over onderdrokking van vrouwluden en homo’s, mos ik mar blaank laoten, was zien advies. Now bin ‘k al een schoffien doende en a’k Johan zien raod volgd hadde dan ha’k et vertaelde stok wel haost op ien bladziede holen kund bin ‘k bange.

Neffens een bericht in Johan zien dagboekien (18/2) he’k aendelik wel een ‘medestander’ in him vunnen in mien gevecht veur een wat beter bruken (in ’t schrieven) van oonze Stellingwarfse tael. Hi’j zegt et wat nettieser (Johan eigen) en ik misschien wel es wat grof, mar we bedoelden klaorbliekelik wel etzelde. In vlogge even een aemel, dan til ik d’r niet zo zwaor an mar aj’ publiseren dan is d’r veur pattie schrievers nog hiel wat te beteren (of laot et even naokieken vanzels; daor hoej’ je trouwes niks veur te schaemen).

Ie kun op ’t heden gien kraante opslaon of et gaot over Jan Campert en zien gedicht "De achtien doden". ’t Is niet da’k mien kop d’r veur in ’t zaand stikke mar ik hebbe niet zovule (meer) mit al die verhaelen over de oorlog. Ik mos vanzels wel even ni’jsgierig naor dat gedicht kieken. Et eerste vas:

dat ik nu nog niet weet,

……………….

En et laeste vas:

……………….

Jan Campert, (1902 – 1943).

Maendag (21/2):

Vandemorgen eerst even naor Franeker west. Ze wollen me daor niet holen (mar ’t scheelde niet vule)…

Op ‘e weeromme reize even naor Wolvege. Daor wollen ze me ok al niet holen. Kan ‘k me ok nog wel begriepen…

Doe mar weer op huus an. Mien M-metje was nog wel wies me… Da’s (Die’s) aorig…

Et pakket veur et Friese Biebelmuseum ok even op ‘e busse daon…

En veerder? Koningen, Psalms, Koningen, Psalms, Koningen, Psalms, Koningen, Psalms, Koningen, Psalms.

Aemels kregen uut Duutslaand, ’s-Gravenhage, Grunningen, Franeker, Liwwadden, ’s-Hertogenbosch, Hoogevene en Naarden en nog een mennig N.N.