Naor Dagboekien
Veurige weke Ankem weke
Weke 9 (28/2 – 6/3 - 2005):
Vandaege heurd: "Gewoon doen is de beste remedie om d’r aachter te kommen waorom as meensken altied tegen je zeggen daj’ et niet doen moeten."
Oonze peerden gaon - ok mit disse sni’j - iedere dag wel een peer uren in ‘t laand. Ze vienen et prachtig! Et het even duurd mar ze hebben now ok uutvunnen dat d’r onder de sni’j ok nog wel es een grössprietien te vienen is. Ze moe’n now eerst de hieltied een posien haddelopen en gaon dan staon te krabben zodat ze een plakkien schonemaekt hebben om ok nog wat vreten te kunnen. Now ja, ze wodden d’r now niet zo opblaozen dikke van.
Vandemiddag biwwe even henne-weeromme naor femilie an de aandere kaante van Rotterdam west. Henne was ’t wel mooi bi’j de weg, weeromme was ’t een stok minder.
Van ‘Schietschorum’ kreeg ik een aemel mit wat tips op mien poep- en husiespepier verhaeltien.
Aj’ een spierrechte drol dri’jd hebben die langer as acht centimeter
was dan mos’ie die eins rechtop in de hoeke van kaemer zetten te
drugen. Hi’jzels legde zoe’niene ok wel es in de vriezer om ‘m bi’j de
borrel te versnieden as d’r es onverwaacht meensken over de heerd
kommen. Et keuteldri’jen kuj’ wel een betien beïnvloeden deur d’r
rekening mit te holen waj’ eten. Snet geft bi’jglieks een smuuie
‘stukadoorskeutel’ en van boeremoes kriej’ een stieve.
Veur et ophangen van de rolle pepier had ‘Schietschorum’ disse oplossing bedocht: Eins hangt de rolle altied wel goed en as’ie een keer niet goed hong dan mos’ie ‘m eerst even ommedri’jen.
Et bruken van et husiespepier daor zat nog een hiel verhael anvaaste. Hoevule aj’ bruken mossen had alles te maeken mit de lengte van je naegels. Mit lange naegels kon ’t wel es makkeliker wezen om et pepier dubbel of alderdeegst driedubbel te volen. De geaordhied had d’r ok mit van doen. Homesuelen schienen aorig meer pepier neudig te wezen as niet-homesuelen. Alderdeegst aj’ wel of niet roken kon van belang wezen. Aj’ niet roken hej’ meer pepier neudig as daj’ wel roken want aj’ roken dan hej’ de vingers vaeke toch al wat bruun. Mien konklusie is dan ok dat een niet-rokende homesueel mit lange naegels et meerste husiespepier bruukt. Te slotte was et ok nog belangriek daj’ bi’j et ofhemmelen je gat goed ‘opspouwen’ (staot niet in de ‘Dikke’). En de laeste tip van ‘Schietschorum’: Dat vrouwluden vaeks een plemuurmes en een bossel bruken as ze heur opmaeken is hiel gewoon. Waorom zoj’ bi’j et kontofvegen gien ‘schraopstaol’ of bi’jglieks een klein bessempien bruken kunnen? Tsja,…
Zaoterdag (5/3):
Vandemorgen al op ‘e tied naor et hoge noorden van Frieslaand. Tot vlak bi’j de zeediek. D’r lag lang zovule sni’j niet as bi’j oons mar et was daor vule koolder.
Gien poeppraoties vandaege mar nog wel een husiesperbleem. Al jaoren raek ik in de stress van et dilemma as et husienpepier now mit de loshangende flappe tegen de mure heurt of heurt die flappe now krek niet an de murekaante, dus loshangende. Ik durf haost gien ni’je rolle meer op te hangen want de hieltied weer dat perbleem van die losse flappe. Krek etzelde perbleem he’k altied mit wat kaante van et pepier aj’ tegen je gat holen moeten. Moet dat de binnerkaante van et pepier an de rolle wezen of de buterkaante? En hoevule vellegies is eins et gemiddelde waj’ bruken. Waorom zit d’r eins een ofscheurraand om de dattien centimeter? An ién zoe’n schieterig vellegien hej’ toch nooit genoeg? Vraogen, vraogen, vraogen. Gek woj’ d’r van…
In de kraante (LC) van vandaege vul mi’j de adverteensie over twie volle bladzieden op, van de marmerkeuning van Godlinze. De laeste keer da’k daor west hebbe zal een jaor of achte leden wezen. Nog weer een jaormennig eerder wa’k d’r ok al es west. Wat de man ok verkoopt, verkoopt hi’j mar et is ok een hiel appatte gewone kerel. Mar ja, hoe kan dat ok aanders, zoe’n hiete zuderling op et wienderigste platte laand van de Grunninger Ommelanen.
Vri’jdag (4/3):
Hoe is et meugelik…! Op mien vraoge van gister as d’r ok iene een
spannend verhael veur mi’j klaorliggen hadde om as huuswark in te
leveren kreeg ik twie hiel aorige verhaelen opstuurd, waorveur daank
vanzels. Et, hoe is et meugelik, slaot op zie’n meenst op drie
onderwarpen die in beide verhaelen veurkommen, een (zeg mar) autogien
veur minder-validen, et plak waor as et autogien henne mos, beide naor
Overiesel in, en ze kriegen beide nogal wat ongemak onderwegens. De
iene was zoe’n 20-kilemeterding dat in Uddel wezen mos mar d’r een
protte muuite mit hadde om daor te kommen en de aander een
45-kilemeterding onderwegens naor Zwolle die ok al in de baarm vaaste
raekte.
Ik kreeg trouwes ok een aemel dat dit zo niet de bedoeling was. Ik mos
zels een spannend verhael op pepier zien te kriegen en dat moet ok nog
aorig an riegelties voldoen. Grofzegd bin die riegelties, dat et
verhael opdield wodden moet in drie patten, begin, midden en aende. De
zintugen heuren, zien, roeken, pruven en vulen heuren d’r in en
gewoonlik moe’n de vuuf journalistieke W’s, watte, waore, wanneer, wie
en waoromme d’r ok in verwarkt wodden. Dat ja, ‘k weet niet beste
instuurders, jim dochten misschien daj’m d’r weren mar… In disse tied
mit een boel sni’j, daenke da’k mar een verhael maeke van kri’jen op
een karkhof en dat et over et hiele hof een mooie witte sni’jdeken ligt
behalven op iene van de greven. Krek ofpast op dat iene graf ligt niet
ién vlokkien sni’j. De grond op dat graf vuult zuver wat waarm an. En
veerders, och eerst mar even weer op bedde en et weekaende vieren, zo’k
zeggen.
Vandemorgen mos ik ok even naor ’t husien veur een grote bosschop. Dat is niet zo vremd zuj’ zeggen want dat moeten de meersten van oons iedere dag. Dat is vanzels ok zo mar aj’m dan klaor binnen kieken jim dan wel es even omme naor et risseltaot? Ik altied, kan ‘k jim zeggen. Doe’k mi’j vandemorgen ommedri’jde ston ik versteld van mien eigen keunstwark. Et was iene spierrechte drol die stokstief rechtop in de pot ston as was hi’j bevreuren. Een pracht van een gezicht mar d’r wol gieniene van mien huusgenoten van dat mement (incl. een gaast) naor kommen te kieken. Ze vunnen et bliekber de muuite niet weerd. Ik hebbe nog van alles mit ze perbeerd, zo van, kuwwe mit mekeer niet wat keunstpoepen en d’r dan een tentoonstelling van maeken of zoks? Ze mossen d’r niks van hebben, de schieters.
Donderdag (3/3):
Vandaege weer drok, drok, drok mar ik kreeg toch ok een peer kritische
aemelties mit o.e. verkeerde woorden die ik bruken zol, de aachtergrond
(hiele indeling trouwes) van dit webstegien was mar zo-zo, mien
tendentieuze geschrief over de sSr (neem et zo as et is of opzeggen),
ie kun je tied wel beter besteden, en gao zo mar deur.
Die verkeerde woorden die ik nog al es bruukte: bevobbeld (bi’jglieks) en taovend (t’ aovend), daor had Henk hielendal geliek an en ik zal perberen die dan ok niet meer te bruken.
Et mooi of niet-mooi van mien webstee daor zuwwe wel niet uutkommen. Een mooiere webstee kost veural (vule) meer tied en dat gaot te koste van aandere dingen die ‘k ok graeg doe resp. belangrieker viene. A’k een riek man wezen zol dan zo’k mi’j een webmaster antugen. Mar ja, dan bi’j weer zo verekte ofhankelik en zo is d’r altied wel wat.
Vandaege ok even mit mien koppelde schrief-kammeraod naor een spannende lekaosie west om inspiraosie op te doen veur de kursus Spannende verhaelen schrieven van de sSr. En now moet d’r veur ankem weke dan ok een spannend verhael maekt wodden. Of het iene van disse lezers misschien nog wat liggen, bevobbeld, oeps…, bi’jglieks over een stellegien in een vuvenveertigkilemeterautogien (mooi scrabble-woord) die deur et ies zakt en dan bi’j Petrus an de poort staon en in heur natte kleren an de beste man vraogen as ze asjeblief naor de hel meugen omreden et daor zo lekker waarm wezen zol? Aj’ zoe’n spannend verhael klaorliggen hebben dan laot et mar even weten. …
Woensdag (2/3):
Vandaege eins weer gien tied mar in een interaktie mit de LC lekte mi’j dit ok uut penne:
Omreden d'r in oons eigen Stellingwarfs
tiedschrift 'De Ovend' gien plak is veur reakties van butenof he'k mi'j
veurneumen om daor nooit es wat in te publiseren. An inzunnen stokkies
herken ie et pebliek van de kraante, blad of tiedschrift. As daor gien
ruumte veur is dan hoeft zoe'n blad om mi'j niet. De wisselwarking
tussen maekers en lezers liekt mi'j veur beide van een groot belang.
Deensdag (1/3):
Vandaege eins gien tied. De hiele maond meert eins niet! Een protte gedonder mit dat volk van VROM. Jim moe’n vandaege mar wat in een aander zien dagboekien ommelezen, bevobbeld in die van Johan Veenstra
Maendag (28/2):
Mien komputer was dit weekaende overhiete raekt (ik wark ok vusen te hadde) dat ik hebbe mi’j vandemorgen eerst een ni’je uut de deuze haeld en installeerd. Nog een hiel gedonder om alles weer naor je haand te zetten. Mar ik kan d’r now weer even tegen.
Vanaovend het et vertaelkoppel tussen de gehakballen deur weer drok in de weer west mit Psalms, Pslams en nog es Psalms. Gelokkig hoeven ze niet te riemen.