Naor Dagboekien 

Veurige weke Ankem weke

Weke 10 (7/3 – 13/3 - 2005):

Zundag (13/3):

Et was vandaege een mooie dag om van alles wat of te maeken. Even (weer) mit de stofzoeger deur ’t huus west en gisteraovend hatstikke lekker kookt veur oons beidend. Een protte bakte eerpels mit niet te zunig mitbakte spekkies, toemaekte witlof (mit ei, patties manderijn, stokkies appel, augurk, zulversiepelties, wat raspte keze, e.z.v.) en ieder een halve ‘cordon blue’. Hoezo ‘ieder een halve’? Now, as ’t gien gehakballe is dan is et oons (beide) gauw te vule, wat et vleis angaot. Dan hewwe meerstal an elk de helte meer as genoeg.

Veerder de webstee van de Stellingwarver Biebel www.stellingwerfs-eigen.nl weer wat bi’jwarkt en de dag opvult mit Jesaja, Jesaja, en nog es Jesaja. Et boek Jesaja het zien naeme kregen van de profeet Jesaja, de zeune van Amos, die in Jeruzalem leefde en as profeet (Hebr.: nabi) optrad in de tied rond 750-700 v.Chr. Een profeet is een spreker in de naeme van God. In et biezonder een verkondiger van wat deur God ingeven wodt. In et Oolde Testement wodden tot de profeten rekend de mannen liek as Mozes, Elia, Elisa, Jesaja, Jeremia en de vrouwen as Mirjam, Debora en Chulda. De profeten wodden ok nog wel es oppat in kleine en grote profeten. De profeet is een typische gedaonte van de Israëlische godsdienst. Uut et Ni'je Testement bliekt dat Jezus himzels ok rekende tot de profeten (zie bev. Luc. 4:24) en deur de ommestaanders ok zo zien wodt (zie bev. Luc. 24:19). Buten et jodedom en et kristendom is binnen de islam et meerste spraoke van profetisme. Mohammed gelt ok as een profeet, as de laetste en et zegel van de profeten.

Veur et blad FUORT bin ‘k doende mit een gedicht over et onderwarp ‘Romantyk yn Fryslân’. ‘k Zal et Hooglied d’r nog es op naolezen. Es kieken as daor nog wat te inspireren vaalt.

In ’t twielochten biwwe naor Sneek toe gaon en hebben lekker zitten te eten bi’j ‘De lachende koe’ an ’t Kleinzaand, schuin tegenover et ‘Fries Scheepvaart Museum’. Kan ‘k anbevelen. Gezellig drok en een best maol eten.

Zaoterdag (12/3):
Et wil mi’j mar niks haandigen dat et husienpepier mit de flappe in de ruumte hangt. Et wil mar niet. Mar ik hebbe iene van de tips bruukt en dat bevaalt me goed. As et mit de flappe niet tegen de mure hangt dan dri’j ik de rolle eerst omme, scheure d’r een peer blatties of en hang et dan ok weer terechte zo as et hong.

Neffens Johan zien Klunderen van vandaege zol de burger meer inspraoke hebben moeten bi’j de Gemiente. En iene die aj’ niet lieden meugen die meuj’ gewoon ‘een lul in ’t kwadraat numen’. Mooi zegd vanzels mar ok wel zoe’n veertig, vuuftig jaor te laete neffens mi’j. De macht en et kaptaol is onderhaand al aorig verpat en wie die macht en de centen ienkeer het, wil d’r mar ommeraek min weer van of. De onderste laoge het zien rechten al lange verspeuld deur d’r genoegen mit te nemen om ien keer in de vier jaor een rood krusien zetten te meugen; de sufferds, et stellegien lullen in ’t kwadraat.

Neem now zoe’n Dales van Liwwadden. Krigt bi’jstaand van de Gemiente want aanders kan hi’j zien huus niet bestuveren, zegt ie. Ik geleuf d’r niks van. Disse man het hielendal gien ‘hatte’ veur et noorden en al krek liekemin ‘hatte’ veur Liwwadden, bin ‘k bange. Hi’j wil zien huus in Amsterdam gewoon nog een posien anholen om straks ok zo weer uut Liwwadden te vertrekken. Aj’ as oold-Wethoolder ien keer Burgemeester op je CV staon hebben dan kuj’ vaeks ok wel aandere baenties kriegen. Ik veurspel dat de man veur de Kastdaegen van dit jaor weer in Hollaand zit.

Ik veurspel ok dat in ’t laeste van ankem weke et eerste ‘ljipaai’ vunnen wodt.

Ik zeg vandemorgen tegen et maegien, ik zeg: "Ik geleuf da’k vandaege mar es niet onder de pompe gao, ik schiet zo in de broek." Da’s toch een hiele gewone Stellingwarfse uutdrokking, liekt mi’j. Ze keek mi’j mar mal an…

Ie meugen eins niet zeggen "…een klein voegeltien…" want een voegeltien is altied al klein. In de duurste gedichten wodt wel altied zegd "… witte sni’j …" ???

Vandemiddag, onder de aovend biwwe naor Et Vene west en laeter drekt deurreden naor Sneek. ’t Was al nao twaelven dawwe weer thuus kwammen.

Vanaovend he’k mien warkstok "Kroegkri’jen" veur de kursus "Spannende verhaelen schrieven" opstuurd an de maegies van de kursusleiding. ‘k Heb et ok drekt mar op disse webstee zet bi’j de ‘Verhaelties’. Ik bin beni’jd wat ze d’r van vienen en lieke beni’jd wat de aandere tiene d’r van maekt hebben. We zullen et deensdagaovend wel te heuren kriegen.

Donderdag (10/3):

Vandemorgen bin ‘k naor Grunningen west -stop-. Doe ‘k vandemiddag weer thuus kwam zat mien elektrische brievebusse haost vol. Iene aemel sprong d’r bovenuut. De man mit et rooie potlood het mien verhaelties (op disse webstee) lezen en naokeken op ‘vouten’. Hi’j het krapan vuuftig rooie strepen zet. A’k dat mar even naokieken wol. En dat he’k daon vanzels. Ik was et niet in alles mit him iens mar et meerste he’k onderhaand naor zien veurstellen anpast.

Et spannende verhael van de sSr kursus he’k ok nog es weer deur west. Morgen nog ien keer en dan gaot et op ‘e busse.

In de kraante (LC) las ik dat d’r een GSM-virus op grote schaole verwaacht wodt. Dat wodt de ni’je haandel…

Een perfester uut Tilburg vint dat et hebben van meer vrouwen een goed ding is. Daor moe’we niet zo muuilik over doen en ’t zol goed wezen veur ekonomie. Et hebben van meerdere manluden, daor wodt gien woord an smerig maekt in dat stokkien. Veerder zegt de man dat ‘Liefde’ wat van vroeger was. Vandaege-de-dag is ‘Liefde’ zoks as een bliene darm of zoks as een nutteloos verschiensel uut et lange leden, neffens de prefester… Disse man moet hulpen wodden liekt mi’j. Alles dri’jt toch zoe’n betien om liefde? Aj’niet van iene (of meer) of van ‘wat’ holen kunnen dan kuj’ ok niet van jezels (et leven) holen liekt mi’j. En ‘Loesje’ kan dan ok wel oppakken. Niks goed veur de ekonomie…

D’66 bestaot now ongeveer veertig jaor en wil nog graeg een peer jaor bestaon en dot dan ok mar weer wat van heur beroemde waeter bi’j de wien. Et liekt mi’j niet muuilik om te veurspellen dat d’r zo van D’66 hielendal niks overblift bi’j de volgende verkiezings.

"Banken lenen te veel aan minima." Niet allienig an de minima, vien ik. Ik hebbe nog van huus uut mitkregen dat et hielendal niets slim is om wat hieptheek op je huus te hebben mar centen lienen veur allerhaande aandere rarighied zo as een vekaansie naor Turkië of zoks dat doej’ vanzels niet. Ik heb dat nog de hieltied aorig volholen. Een protte aanderen bliekber niet.

Minister Verdonk wil heur verhael graeg kwiet tegenover de ‘zielige’ verhaelen van asielzukers. Ik bin beni’jd wat kaante et ‘zieligst’ is.

En now bin ‘k nog mar op de eerste bladziede van de kraante…

t’ Aovend ok nog een heufdstok Jesaja roegweg ommezet en nog wat ‘Etiqette-regels’ deurneumen.

Woensdag (9/3):

Vandemorgen al op ‘e tied naor Franeker west. Doe ‘k vandemiddag weeromme naor huus toe ree, wodde ‘k onderweg opbeld a’k nog even langes kommen kon, in … Franeker. Dat plak wodt geveerlik veur mi’j. As ze m’j oppakken dan za’k d’r wel blieven moeten mar uut mi’jzels wi’k d’r niet wonen. A’k et tegen die tied veur ’t zeggen hebbe dan gao ‘k toch liever naor Zuudlaoren.

Op ‘e weerommereize nog op Et Vene an west.

t’ Aovend nog wat gezellige anloop had.

En now gao ‘k nog een stief ketier bi’j ’t maegien op ’t baankien mit een mooi glassien van et ien of et aander en dan schieten we d’r vanaovend mar vroeg in, donkt mi’j. ‘k Bin ’t even hielendal zat.

Deensdag (8/3):

Vandaege niet al te vule spannende deengies mitmaekt. Nog wel wat aemels kregen over ‘homesuelen’, gegriem op ’t husien en ok een bescheid over een boek / boeken over et ommekommen van de viskersvloot van Paesens-Moddergat daor a’k gister om vreug. Et meerst bekende is een (of misschien ok wel een riegel van twie boeken) van Abe Brouwer (1901 – 1985). De titel (Springtij) is nog niet wis. D’r is ok een (nog niet zoe’n oold) boek in ’t Fries van Durk van der Ploeg (* 1930) over dit onderwarp mit de titel 'Foarby it Boarkumer fjoer'. Mit daank veur de berichies vanzels.

Ok nog even doende west mit mien spannend verhael veur de schriefkursus van de sSr. Moet vandeweke inleverd wodden. Staot ankem wel op dit webstee bi’j de ‘Verhaelties’.

Eerst even een oproep::: D’r vreug mi’j iene a’k ‘m ok helpen kon mit de titel en de naeme van de schriever van een boek over et vergaon van de hiele vissersvloot van Paesens-Moddergat op 6 meert 1883. Wie et wet mag et zeggen en dan geef ik et wel even deur.

In mien Restaanten op disse webstee staot een riegel, wat wondere teksten onder et motto van Een wereld is gek (waor he’k die titel toch al es eerder heurd?). Ik kreeg nog een ni’je: Een komputer waor aj’ op de Startknoppe drokken moeten om et ding uut te zetten. Mit daank an Jan en hi’j staot d’r al bi’j. In ditzelde verbaand kwam ikzels ok nog zokswat tegen: "De dooien liggen op nog gien twie meter van de bewoonde wereld. Ik bin wel es hielendal van de wereld en toch niet dood."

Een betien viespraot bliekt altied een protte reakties op te roepen. ‘Schietschorum’ kon d’r haost niet van slaopen, leut hi’j nog even weten. Hi’j was ok drok doende om daor now es echt wat op uut te vienen zoas een ‘gat-uutschep-schoppien’ of zoks. Hi’j docht ok an een scheppien mit een stokkien d’r an krek as et ‘rokerspiepien’ waj’ van een ekkel ofhaelen die van de boom vaalt mar nog an iene kaante in zoe’n doppien-mit-een-stokkien vaaste zit. De Avébé mos mar es mit zoe’n ofbreekber ding van eerpelmael an de slag onder et motto: Waj’ opscheppen moej’ ok weer ofscheppen.

Jan had kotleden in de kraante lezen dat d’r ongeveer een jaor leden iene ofstudeerd was op et perbleem van et huisiespepier. De uutkomst van disse promovendus was dat de loshangende pepierflappe niet tegen de mure mar los in de ruumte hangen mos.

‘Stellingwarf’ kwam mit dezelde uutkomst. Hi’j had die vunnen in een wetenschppelik onderzuuk van de Universiteit veur Toepaste Huushooldwetenschoppen (UTH). Et zol ok nog te maeken hebben mit al die smerige hanen (hoezo smerige hanen?) die aanders allemaole tegen de mure angriemen zollen om de pepierflappe te pakken te kriegen en dat de bakteries makkeliker tegen de mure plakken blieven as in de vri’je locht.
Now ik geleuf et allemaole graeg vanzels en as d’r al wat ni’js op de mark komt dan lao’k et wel even weten. As ’t mar niks is daor batteri’jen in moeten. Of …?

t’Aovend het et vertaelkoppel onder et genot van ni’je gehakballen en een hiele mooie rosé, ok weer drok doende west mit de punties op de ‘i‘ (en aandere letters) van de Psalms. Ik krieg onderhaand haost wat medelieden mit Jan Koops uut Oosterwoolde omreden die beste man al aorig wat Psalms vertaeld het mar dan ok nog es op riem..! Wi’j weten now ongeveer hoe dat vuult, daenk ik. Et perbleem zit ‘m veural in de kotte zinnegies. D’r vaalt niet zovule ommehenne te beduren. Aj’ in een ‘gewoon’ verhael een vervelend woord tegen kommen dan kuj’ dat vaeke wel om- of beschrieven mar in de kotte riegels van een Psalm kriej’ daor deur die riemeri’je haost gien ruumte toe. Op riem hej’ ok nog es te maeken mit et tal lettergrepen die precies uutkommen moeten want ja et staot wel wat ‘slordig’ as de orgenist al klaor is en de Gemiente moet nog een peer zinnegies ofmaeken (of aandersomme vanzels). Een hiele toer…

De Ni’jgies op de webstek van de sSr bin onderhaand ok al weer meer as een maond oold. De Agenda en de Ni’jsrebriek van Karst bin now al haost een jaor leeg en ok niet aanders wodden. Et linkien naor KiekKarst hael ik mit een dag uut mien linkies want dit het gien zin vanzels. Et hebben van zoe’n webstee trouwes ok niet liekt mi’j.